Mga Young Adult
Tudloi Ko sa Paglupad: Pagkab-ot sa Emosyonal nga Pagpaningkamot sa Kaugalingon pinaagi sa Pamaagi sa Ginoo
Ang tagsulat nagpuyo sa California, USA.
Si Valerie Durrant gikan sa California, USA, ug naminyo sa iyang bana, nga si Ryan, sulod sa upat ka tuig na. Bag-o lang siyang nahimong inahan sa usa ka batang lalaki. Ganahan siya og yoga, painting, magbasa, ug hiking.
Kinahanglan kitang mosalig sa Langitnong Amahan ug ni Jesukristo ug mohimo sa atong kaugalingong paningkamot samtang kita maninguha nga mahimong mapaningkamuton sa emosyonal nga paagi.
Paghulagway gikan sa Getty Images
Kon kita maghunahuna sa gamay nga langgam nga nagkat-on sa paglupad, sa kasagaran atong hunahunaon ang katapusang maisugon nga pagsulay: nagkapa-kapa gikan sa salag, mibukhad sa mga pako, ug milupad ngadto sa panganud. Apan, sa wala pa kanang katapusan nga kalampusan, tingali dihay daghan nga mga kapakyasan nga maoy hinungdan nga ang langgam wala makalupad ngadto sa panganud apan nahagbong ngadto sa yuta.
Sama sa langgam nga nagkat-on sa paglupad, kita usab mahimong mahulog pagbalik-balik samtang kita magtinguha nga mahimong mapaningkamuton sa emosyonal nga paagi sa atong kaugalingon. Apan kon kita moduol ngadto sa Ginoo alang sa panabang ug maningkamot, makat-on kita unsaon nga magmalampuson pag-usab kon ang kinabuhi wala kaayo masunod sama sa giplano ug sa pagsalig Kaniya ug kon ang mga pagsulay sobra ra kaayo nga atong pas-anon.
Pagkat-on sa Paglupad
Kon ang pagkat-on sa paglupad usa ka masakit nga proseso, ngano nga ang langgam mobiya man sa salag? Tungod sa iyang inahan. Alang sa unang bahin sa kinabuhi sa iyang mga anak, ang inahan nga langgam magdala og pagkaon direkta ngadto kanila diha sa salag. Apan moabut ang panahon, nga sugdan niya sa pagbilin sa pagkaon sa gawas sa salag aron ang mga piso nga langgam kinahanglang mobiya sa luwas ug naandan nga salag aron makakuha og pagkaon.
Pareho ra kini nga proseso nga atong buhaton samtang magkat-on kita nga mahimong mapaningkamuton sa kaugalingon sa emosyonal nga paagi—apan wala paabuta gikan nato nga makalupad dayon sa hingpit sa atong kaugalingon.
Susama sa inahan nga langgam nga mitugot sa iyang mga piso nga mahulog gikan sa salag, ang Langitnong Amahan nagtugot nga kita moagi og mga pagsulay ug mga kasinatian nga mahimong masakit, makalagot, ug makahigawad. Ang Iyang plano sa kaluwasan gihimo aron sa pagtabang nato nga mahimong sama Kaniya, aron ang matag hagit nga atong atubangon mahimong usa ka oportunidad sa pagkat-on ug pagtubo. Sama sa inahan nga langgam, ang Langitnong Amahan naghatag gihapon nato sa kahupayan ug direksyon tungod kay sa Iyang tabang lamang nga kita makakab-ot ug makapadayon sa kahimsog sa atong emosyon ug pangisip.
Pagkapa-kapa sa Atong Kaugalingong mga Pako
Bisan og ang Langitnong Amahan mao ang atong kauban, kinahanglan nga dili kita magpaabut Kaniya nga mobuhat sa tanan alang kanato. Gusto Siya nga gamiton nato ang atong kabubut-on ug ang mga kapanguhaan nga Iyang gihatag kanato sa atong pagpadulong sa emosyonal nga pagpaningkamot sa kaugalingon.
Pananglitan, kon kita makasinati og sakit sa ulo, kasuko, o kadaot, gusto Siya nga kita magpakitambag Kaniya, apan kinahanglan nga dili kita mohunong diha lang—kinahanglang buhaton nato ang atong labing maayo sa paghimo sa mga aghat nga Iyang gihatag kanato; sa pagtuman sa mga sugo; sa pagtambong sa templo aron makakita og kalinaw, kahupayan, ug mga tubag; nga maghunahuna sa mapanagnaon nga tambag; ug sa pagsalig sa Iyang plano alang kanato.
Ang Langitnong Amahan mihatag nato og daghang himan sa pagkab-ot sa pagpaningkamot sa kaugalingon sa emosyonal nga paagi, apan kon gihimo na nato ang tanan ug sa gihapon makita ang atong kaugalingon nga wala mouswag o naglisud sa atong kahimsog sa pangisip, dugang nga mga kapanguhaan ang gikinahanglan. Aduna gayuy mga panahon nga kamo kinahanglan nga makigkita og propesyonal sa kahimsog sa pangisip o makadawat og tambag gikan sa inyong bishop alang sa dugang nga giya aron makapadayon.
Ibutang sa hunahuna, nga kon kita mangayo og panabang gikan sa uban matag higayon nga kita makasugat og babag, mahimong mawala ang bililhon nga mga oportunidad sa pagkat-on ug pagtubo sa atong kaugalingon. Usab, kinahanglan kita nga mobutang og igong panahon sa atong kaugalingong paningkamot sa pagpadayon.
Pagsunod sa Sundanan sa Ginoo
Sa Doktrina ug mga Pakigsaad seksyon 9, si Oliver Cowdery gipanton tungod sa pagsulay sa paghubad sa mga palid sa Basahon ni Mormon nga wala “ikaw maghunahuna gawas sa pagpangutana sa [Dios]” (bersikulo 7). Dayon siya gipahimangnoan nga “magtuon niini diha sa imong hunahuna,” mohimo sa iyang kaugalingon nga desisyon, ug dayon “mangutana sa [Dios] kon kini husto” (bersikulo 8).
Kon mosunod kita niini nga sundanan, ang Langitnong Amahan dili mobiya kanato sa pagsalig sa hingpit sa atong kaugalingong mga abilidad ug mga hunahuna samtang atong atimanon ang atong kahimsog sa pangisip. Gitugutan kita Niya sa oportunidad sa pagkat-on unsaon sa paggamit sa atong kabubut-on. Ang pagpangita og mga tubag sa atong mga pangutana ug pagpangita og mga solusyon sa atong mga problema uban sa Iyang tabang mao ang makatabang nato nga sa katapusan mahimong sama Kaniya. Uban niini sa hunahuna, makahangyo kita Kaniya sa pagpakita kanato unsaon nga kita mas makabalanse sa emosyonal nga paagi imbis yanong mohangyo Kaniya sa paghimo nato nga mahimong mas maayo.
Sa atong paggamit sa atong kabubut-on pagbalik-balik niini nga paagi kon ang atong emosyon pagasulayan, hinay-hinay mahimo kitang mas maayo ug mas masaligon. Samtang dili pa kinahanglan nga atong hingpiton ang paglupad, makasiguro kita nga Siya nag-uban kanato ug nagmaya sa kamatuoran nga Siya nagtabang kanato nga mahimong mas maayo sa hinay-hinay. Matag adlaw adunay oportunidad nga mahimong mapaningkamuton sa kaugalingon—nag-andam nato sa adlaw nga kita makahimo na sa paglupad sa atong kaugalingon.