Duha ka Matang sa Hugot nga Pagtuo
Gikan sa usa ka debosyonal nga pakigpulong, “The Faith to Reap,” nga gipamulong didto sa Brigham Young University–Idaho niadtong Marso 17, 2015.
Ang hugot nga pagtuo kang Jesukristo ug sa Iyang Pag-ula mao ang hugot nga pagtuo sa pag-ani. Kini ang hugot nga pagtuo sa Iyang gahum, dili sa inyoha.
The Golden Harvest, ni David Merrill, sa maayong kabubut-on sa Church History Museum
Si Kristo Nag-ampo diha sa Tanaman sa Getsemani, ni Hermann Clementz
Si Lehi ug ang iyang pamilya didto sa kamingawan pipila lang ka adlaw sa dihang ang Ginoo misulti kaniya sa pagpadala sa iyang mga anak balik ngadto sa Jerusalem aron kuhaon ang tumbaga nga mga palid gikan ni Laban. Wala nato pasalamati kanunay ang duha ka masukulong anak ni Lehi, sila si Laman ug Lemuel, apan sa tinuod andam silang moadto. Sila adunay igong hugot nga pagtuo sa pagsulay niini.
Si Laman, ug dayon si Lemuel uban sa iyang igsoong mga lalaki, nangayo ni Laban sa mga palid. Nawala sa mga igsoong lalaki ang kabtangan sa pamilya ug hapit ang ilang mga kinabuhi sa pagpaningkamot. Nianang puntoha, ang hugot nga pagtuo nila ni Laman ug Lemuel nawala ug andam na silang mohunong. Si Nephi, sa laing bahin, mibuntog sa kakuyaw ug kahigawad:
“Ingon nga ang Ginoo buhi, ug samtang kita buhi, kita dili mobalik ngadto sa atong amahan sa kamingawan hangtud matuman ang butang nga gisugo sa Ginoo kanato.
“Busa, kita magmatinud-anon sa paghupot sa mga sugo sa Ginoo” (1 Nephi 3:15–16).
Dayon gigamit ni Nephi ang iyang hugot nga pagtuo, nakuha ang mga palid ni Laban, ug mibalik uban sa iyang mga igsoon nga lalaki ngadto sa ilang amahan didto sa kamingawan.
Ingon og adunay duha ka lahi nga mga matang sa hugot nga pagtuo. Ang unang matang mao ang hugot nga pagtuo sa pagsulay, ang hugot nga pagtuo sa paglihok sa atong mga galab. Ang ikaduhang matang mao ang hugot nga pagtuo sa pagbuhat. Labaw pa kini sa hugot nga pagtuo sa pagpalihok sa inyong galab—kini ang hugot nga pagtuo sa pag-ani.
Sila si Laman ug Lemuel adunay hugot nga pagtuo sa pagsulay, apan si Nephi adunay hugot nga pagtuo sa pagbuhat. Sila si Laman ug Lemuel adunay igong hugot nga pagtuo sa pagpalihok sa ilang galab, apan si Nephi adunay igong hugot nga pagtuo sa pag-ani.
Kanang gamay kaayo nga kalainan tali sa hugot nga pagtuo sa pagpalihok sa inyong galab ug sa hugot nga pagtuo sa pag-ani makahimo og importante nga kalainan sa inyong kinabuhi. Sa pagpuyo pag-usab uban sa atong Langitnong Amahan ug sa pagpuyo nga mabungahon ug malipayong kinabuhi sa yuta, kinahanglan natong palamboon ang hugot nga pagtuo sa pag-ani.
Nakadawat kita og talagsaong mga saad gikan sa Ginoo—mga saad sa kalipay niini nga kinabuhi ug kahimayaan sa sunod. Apan ang mga hagit ug mga problema sa atong inadlaw nga kinabuhi ingon og moguba sa atong paglaum. Ang atong yuta sa saad ingon og layo kaayo, imposible kaayo, mao nga kita nagsugod sa pagduha-duha.
“Dili posible alang nako sa pagkab-ot niana nga tumong o sa pagdawat niana nga panalangin,” naghunahuna kita. “Sa pagkatinuod, ang Ginoo naghunahuna mahitungod sa laing tawo sa dihang Siya mihimo niadto nga mga saad.”
Wala, Siya nag hunahuna kaninyo ug kanako. Nagkinahanglan lamang kita og igong hugot nga pagtuo sa pagdawat sa atong mga panalangin—usa ka hugot nga pagtuo nga lig-on aron kini makausab sa atong umaabut nga mga saad ngadto sa mga reyalidad karon. Nagkinahanglan kita sa hugot nga pagtuo sa pag-ani.
Unsa gayud kini nga hugot nga pagtuo, ug unsaon nato sa pagpalambo niini?
Pagbaton og Hugot nga Pagtuo kang Jesukristo
Una, dili sama sa hugot nga pagtuo sa pagpalihok sa inyong mga galab, ang hugot nga pagtuo sa pag-ani dili hugot nga pagtuo sa inyong kaugalingon. Dili kini sama sa pagsalig sa kaugalingon o positibo nga panghunahuna nga kinaiya. Dili gani kini hugot nga pagtuo sa inyong pamilya o sa mga higala—nga kining tanan maayo. Ang hugot nga pagtuo sa pag-ani mao ang hugot nga pagtuo kang Jesukristo ug sa Iyang Pag-ula. Kini ang hugot nga pagtuo sa Iyang gahum, dili sa inyoha.
Sa dihang gitawag ako isip presidente sa stake sa Mesa Arizona Maricopa Stake, si Elder W. Mack Lawrence, nianang higayuna usa ka General Authority sa Seventy, midapit sa akong asawa ug nako ngadto sa opisina sa presidente sa stake ug mihatag sa calling. Akong gidawat. Dayon gidapit kami niya sa pagsulod sa lawak sa high council ug mainampoong mikonsiderar og mga lalaki nga irekomend isip akong mga magtatambag. Sa akong pagsulod sa lawak, nakita nako ang mga litrato sa tanang mga presidente sa stake kinsa nakaserbisyo sa na sa stake sukad kini naorganisar, ug ang akong kasingkasing nawad-an og kadasig. Mga bantugan sila nga mga lider sa Simbahan ug sa komunidad.
Mitan-aw ko sa akong asawa ug miingon, “Kathleen, sa akong hunahuna dili ko makahimo niini. Dili ko pareha nila kamaayo.”
Miingon siya, “Nan, ayaw ko sultihi mahitungod niana. Mas maayo nga makigsulti ka ni Elder Lawrence.”
Sa akong kasurprisa, sa dihang gisultihan nako siya nga sa akong hunahuna dili ko makahimo sa calling, si Elder Lawrence mitubag, “Bitaw, nagtuo ko nga sakto ka.”
Apan dayon miingon siya, “Dili ka makahimo niini, Brother Andersen, apan ang Ginoo makahimo. Siya adunay gahum sa paghimo sa Iyang buhat, ug kon ikaw magpakatakus ug motrabaho og maayo, Siya ang mobuhat niini. Makita nimo.”
Ug gihimo Niya.
Ang hugot nga pagtuo sa pagpalihok sa inyong galab mao ang hugot nga pagtuo sa pagsulay. Kini usa ka hugot nga pagtuo sa kaugalingon, ug kini mawala kon magkalisud na. Ug dayon magsugod kita sa pagduha-duha. Apan ang hugot nga pagtuo sa pag-ani mao ang hugot nga pagtuo diha ni Ginoong Jesukristo. Dili gayud kini magpadala.
Ipahiangay ang Inyong Kabubut-on sa Kabubut-on sa Amahan
Ang paggamit sa hugot nga pagtuo sa pag-ani, kinahanglan nga nakasiguro kita nga ang atong mga tinguha ug mga tumong nahisubay sa kabutbut-on sa Dios. Dili gayud kita makagamit sa hugot nga pagtuo sa pag-ani kon ang Dios dili mouyon niana nga pag-ani. Aron makabaton sa Iyang tabang, kinahanglan nga atong ipahiangay ang atong kabubut-on sa Iyang kabubut-on.
Tungod kay si propeta Nephi sa basahon ni Helaman usa ka matarung ug matinud-anon nga tawo, ang Ginoo misulti kaniya, “Ako mopanalangin kanimo sa kahangturan; ug Ako mohimo kanimo nga gamhanan diha sa pulong ug diha sa buhat, diha sa hugot nga pagtuo ug sa mga binuhatan; oo, bisan kanang tanan nga mga butang mahimo nganha kanimo sumala sa imong pulong.” Talagsaon kana nga saad. Dayon ang Ginoo midugang, “Tungod kay ikaw dili mangayo niana nga supak sa akong kabubut-on.” (Helaman 10:5).
Ug si Moroni misulti kanato, “Ug si Kristo miingon: Kon kamo adunay hugot nga pagtuo kanako kamo makabaton sa gahum sa pagbuhat sa bisan unsa nga butang nga maayo ngari kanako” (Moroni 7:33).
Ang pagpahiangay sa atong mga tinguha ngadto sa kabubut-on sa Dios usa ka kinahanglanon sa hugot nga pagtuo sa pag-ani.
Sa batan-on pa ang akong mga anak nga lalaki, midula sila sa mga team sa basketball sa high school. Kaniadto sila adunay pag-ampo sa team sa dili pa magsugod ang matag dula. Samtang nagtan-aw ko gikan sa lantawanan, naghunahuna ko kon unsa kaha ang ilang giampo. Kon sila nag-ampo nga modaog sa dula, ang ilang pag-ampo kulang sa hugot nga pagtuo sa pag-ani. Klaro kaayo ang ebidensya tungod sa gidaghanon sa dula nga napildi sila. Ang Ginoo ingon og dili gusto sa ilang tinguha nga kinahanglan nga sila modaog sa matag dula.
Sa laing mga pulong, ang Dios motabang nato nga makab-ot lamang ang mga tumong nga makaayo kanato. Kana tungod kay Siya nahigugma kanato, ug Siya mas nakahibalo kay kanato kon unsa ang makaayo kanato. Ug dili ba kita magmapasalamaton niana. Kinahanglang mag-ampo kita matag adlaw nga ang Langitnong Amahan mopanalangin kanato uban sa matarung nga mga tinguha sa pagpahiangay sa atong kabubut-on ngadto sa Iyang kabubut-on. Kinahanglan kitang makat-on sa pag-ampo sama sa gibuhat sa Ginoo didto sa Tanaman sa Getsemani nga ang kabubut-on sa Dios, dili ang atoa, ang matuman (tan-awa sa Lucas 22:42). Diha lamang kita makagamit sa hugot nga pagtuo sa pag-ani.
Pagtrabaho
Ang ikatulo nga kinahanglanon sa hugot nga pagtuo sa pag-ani mao ang pagtrabaho. Si Apostol Santiago miklaro nga ang hugot nga pagtuo nga walay buhat patay. Ang hugot nga pagtuo sa pagpalihok sa atong mga galab nagkinahanglan og pagtuo, apan ang hugot nga pagtuo sa pag-ani nagkinahanglan og labaw pa kay sa pagtuo. Bisan ang mga yawa nagatuo, misulat si Santiago, ug nagapangurog (tan-awa sa Santiago 2:17, 19).
Nakadungog ko og istorya sa usa ka amahan kinsa nakakita sa iyang batan-ong anak nga babaye nga nagluhod tupad sa iyang higdaanan, nag-ampo nga ang Langitnong Amahan manalipod sa gagmay nga mga langgam nga makasulod sa lit-ag sa langgam nga gibuhat sa iyang igsoong lalaki ug gibutang sa nataran sa luyo. Pagkataud-taod nianang adlawa, ang amahan nabalaka. Nasayud siya nga ang lit-ag maayo. Mitabang siya sa iyang anak nga lalaki sa paghimo niini.
“Nakadungog ko nimo nga nag-ampo ganihang buntag nga ang Langitnong Amahan manalipod sa gagmayng mga langgam gikan sa lit-ag sa imong igsoong lalaki,” matud niya ngadto sa iyang anak nga babaye. “Apan usahay subo nga mga butang mahitabo bisan og nag-ampo kita nga dili lang unta.”
Mitubag siya, “Nasayud ko nga dili siya makadakop og bisan unsa nga langgam, Papa.”
“Midayeg ko sa imong hugot nga pagtuo, langga,” miingon ang amahan. “Apan kon makadakop siya og pipila ka langgam, manghinaut ko nga dili kini makatandog sa imong hugot nga pagtuo.”
“Dili siya makadakop, Papa,” miingon siya. “Nasayud ko nga dili siya makadakop.”
Ang amahan nangutana, “Ngano nga ikaw adunay dako kaayong hugot nga pagtuo?”
“Tungod kay human ako makaampo,” tubag sa iyang anak nga babaye, “miadto ko sa luyo ug gipatidpatiran ang iyang lit-ag sa langgam ug nabungkad kini.”
Maayo nga mag-ampo alang sa mga panalangin sa Langitnong Amahan. Apan human kita makasulti og amen, kinahanglan kitang motrabaho. Dili kita makapaabut sa Ginoo sa paggiya sa atong mga lakang kon kita dili andam nga molihok sa atong mga tiil. Ni kita mohangyo Kaniya sa pagbuhat alang kanato unsay atong mabuhat ug kinahanglang buhaton alang sa atong kaugalingon.
Kinahanglan kita motrabaho sa pagkab-ot sa atong matarung nga mga tumong, ug kinahanglan kita motrabaho og maayo sa pagtuman sa mga sugo. Ang tinuod nga gahum sa atong mga pakigsaad ug ang tinuod nga gahum sa hugot nga pagtuo sa pag-ani matinuod dili kon kita motapos uban sa kasiguroan nga ang Dios motuman sa Iyang mga saad apan kon kita motapos uban sa kasiguroan sa pagtuman sa atong mga saad. Kanang importante nga kamatuoran mao ang unsay mokabig sa umaabut nga mga saad ngadto sa mga reyalidad karon. Kinahanglan kitang motrabaho.
Ayaw pagkawala sa paglaum sa inyong nga kapakyasan o mga sayop, apan pagmakanunayon sa inyong mga paningkamot, ug determinasyon. Ang hugot nga pagtuo sa pag-ani wala magkinahanglan og pagkahingpit, apan kini nagkinahanglan nga makanunayon.
Modapit ako kaninyo sa pagpalambo nianang hugot nga pagtuo sa pag-ani. Lig-ong ibutang ang inyong hugot nga pagtuo diha sa atong Manluluwas, nga si Jesukristo, ug sa Iyang Pag-ula. Siguroha nga ang inyong mga tinguha nahisubay ug nahiuyon sa Iyang kabubut-on. Dayon pagtrabaho uban sa inyong tibuok kasingkasing, gahum, hunahuna, ug kusog, uban sa walay pagkahupas nga determinasyon ug pagkamakanunayon. Walay hagit, walay problema, walay babag nga dili magpadala sa pagtoo aron mag-ani.