Mga Young Adult
Ang Ebanghelyo: Ang Paagi ngadto sa Kinabuhing Dayon
Si Lori Fuller mao ang editor alang sa Friend nga magasin. Ganahan siyang makakita og bag-ong mga banda, maminaw sa mga balita sa radyo, ug magluto og pagkaon gikan sa tibuok kalibutan. Usahay mosulat siya og bisan unsa.
Nakahunahuna ba kamo mahitungod kon sa unsa nga paagi nga ang pagtuman sa mga sugo nakapahimo sa kinabuhi nga mas sayon?
Sa miaging bulan, pipila ka mga higala ug ako nag-istoryahanay bahin sa among semana. Usa ka higala mipakigbahin nga siya miatubang sa malisud nga mga sirkumstansya sa pagkaayo sa iyang mama gikan sa alkohol. Mas bata pa siya kay kanako, ug ingon og mao ang labing grabe nga buluhaton sukad.
Nianang pagkagabii, nagsugod kami sa pag-istoryahanay kon unsa ka mahal ang pagpanigarilyo ug unsa ang usa ka tawo nga among nailhan makasigarilyo og usa ka pakete sa sigarilyo kada adlaw. (Sa pagkwenta, dako kaayo nga kwarta ang magasto!) Misulay siya sa paghunong ug nakasinati og mga simtoma sa paghunong. Ang iyang anak nga lalaki nalipay pag-ayo nga siya mihunong. Ang iyang papa namatay sa sobrang paggamit og drugas, nga nakapahimo sa bisan unsa nga paggamit og drugas nga mas makahahadlok alang niini nga batan-on.
Sa katapusan, ang among panag-istoryahanay natapos sa kape—unsa ka daghan ang imnon sa mga tawo kada buntag (ug hapon ug usahay sa gabii) ug unsa ang ilang kamingaw niini karon nga dili na sila makapalit niini kada adlaw.
Samtang nagdrayb ko pauli, naghunahuna sa tanan niini nga panag-istoryahanay, “Ang Pulong sa Kaalam mao gayud ang labing maayong paagi sa kinabuhi sukad.” (Kon kamo wala makahibalo, ang “kahanas sa kinabuhi” mao ang paagi sa paghimo sa inyong kinabuhi nga mas maayo, magpuyo nga mas epektibo, og uban pa. Sama sa gihulagway sa usa ka tawo sa online, ang kahanas sa kinabuhi mao ang unsay nahibaloan sa una nga “usa ka maayong ideya.”) Ingon og ang Dios miingon, “Aniay paagi sa pagtigum og kwarta, makatabang ninyo nga magpabilin nga himsog, manalipod sa inyong mga anak, ug makalikay sa bug-at nga mga problema sa emosyon, lakip sa mga adiksyon sa inyong kaugalingon ug sa uban.” Ingon og ang Dios nanagana sa tanang mga problema nga atong masugatan ug mihatag nato og usa ka paagi sa paglikay sa katunga niini. …
Uban sa bisan unsa nga mga sugo sa Dios, kita adunay kapilian sa pagsunod niini o sa pagbaliwala niini. Apan sa akong pagtuo sa Pulong sa Kaalam isip usa ka hut-ong sa mga sumbanan gikan sa Dios nga nanagna ug nanalipod kanato gikan sa daghan kaayo nga mga hagit, ako naghunahuna, “Unsa kon ang tanang mga sugo sa Dios ingon ana?” Unsa kon ang usa ka mahigugmaong Langitnong Amahan, kinsa nakasinati niini nga kinabuhi ug sa mga hagit niini, mihatag og usa ka sumbanan aron sa pagtabang kanato sa pagpuyo nga walay sakit kutob sa mahimo? Ug unsa kaha kon siya mihatag niana ngari kanato tungod kay Siya nahigugma kanato ug gusto nga manalipod kanato?
Gusto nga makontento sa unsay anaa ninyo, aron magmalipayon ug mapasalamaton? “Dili ka maibug sa balay sa imong isig ka tawo” (Exodo 20:17).
Gusto nga makalikay sa sala, pagkapriso, dako nga piyansa ug balayranan sa korte? Gusto nga magpabilin ang pagsalig ug pagtahud sa mga tawo—ug sa imong trabaho? “Dili ka magpangawat” (Exodo 20:15).
Gusto nga magpabilin nga suod sa Dios aron nga Siya makagiya ug makadirekta kaninyo ug makatabang sa pagpas-an sa inyong mga palas-anon? “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan” (Mateo 22:37).
Ang lista magpadayon ug magpadayon. Ang matag usa sa sugo makapanalipod kanato gikan sa kasakit, makahimo sa atong kinabuhi nga mas sayon, makapalikay nato gikan sa malisud nga mga problema, o makatabang nato nga makakita og kalinaw. Ug ang tanan uban sa gamay kaayo nga personal nga galastuhan o kabalda. (Ug walay gitago nga mga balayranan!)
Dili gyud nako ipagamay ang mga sugo sa Dios nga usa lang ka mga sumbanan o makatabang sa mga paagi ngadto sa kinabuhing dayon. Mas dako pa kay niana. Apan kini yano usab kaayo. Ang Langitnong Amahan dili makapanalipod kanato sa tanan. Apan isip usa ka mahigugmaong ginikanan, Siya gusto nga moandam kanato ug manalipod kanato gikan sa mga galastuhan sa atong mga pagpili—pinaagi sa paggiya nato sa paghimo og mas maayo nga mga pagpili.
Dayag lang, nga kita makasunod sa mga sugo ug sa gihapon adunay dili maayo nga mga butang nga mahitabo. Mao nga nganong maghasol-hasol?
Tungod kay dili gayud kita makahibalo nga kita gi panalipdan tungod sa atong pagkamasulundon. Tungod kay makatabang kini nga kita mahimong gawasnon gikan sa kinabuhi sa mga kasakit nga hinimo sa kaugalingon. Tungod kay ang pagkamasulundon nagtabang nato nga magpabilin nga suod sa Dios. Tungod kay kini makaandam nato sa paghinulsol kon kita makapili og sayop. Tungod kay kita misalig sa Dios nga masayud unsaon sa pagpanalangin ug pagpanalipod kanato.
Ang lista magpadayon ug magpadayon. Taas pa kaayo kini kay sa lista sa mga rason nga dili motuman sa mga sugo.
Kon ang sangputanan maayo o dili, ang Dios motugot nako sa pagpili kon unsa ko ka masulundon. Ako makapili kon unsa ko ka bukas ngadto sa mga panalangin nga Iyang giandam alang kanako. Mao nganong mosunod sa mga sugo? Tungod kay gusto ko nga ang akong kinabuhi bukas ngadto sa tabang nga ihatag sa Dios.