Mga Simbolo diha sa Bag-ong Tugon

Kinutlo gikan sa Russell M. Nelson, “In This Holy Land,” Tambuli, Peb. 1991, 13, 17, 18.

Agig dugang sa mga pagtulun-an, makita nato ang kahulugan sa mga butang, kultura, kasaysayan, ug mga dapit sa Bag-ong Tugon.

Tubig: “Ang Suba sa Jordan mao ang dapit nga gipili ni Jesus alang sa Iyang pagpabunyag pinaagi ni Juan aron ‘sa pagtuman sa tibuok pagkamatarung’ [Mateo 3:15]. Dili ba makahuluganon nga kining sagrado nga ordinansa gipahigayon diha sa pinakaubos nga kalaparan sa tab-ang nga tubig dinhi sa kalibutan? Makapili ba Siya og mas maayo pa nga dapit sa pagsimbolo sa mapaubsanong giladmon nga Iyang giadto ug diin gikan niini Siya mibangon?”

Kabukiran: “Ang kabukiran dili sayon tungason. Dayon, sa samang paagi, ang Ginoo mitawag sa Iyang mga disipulo sa pagtungas sa kabukiran sa paghatag og gibug-aton sa kaepektibo sa paningkamot ug pagkamasulundon. Mangayo Siya sa sama gikan kaninyo, sa pasumbingay ug posible sa literal nga paagi usab.”

Mga Olivo: “Si Jesus miadto sa ubos sa Bungtod sa mga Olivo aron himoon ang unang bahin sa Pag-ula. Kini ang Iyang gibuhat sa Tanaman sa Getsemani. Ang pulong Gethsemani [Getsemani] nagagikan sa duha ka Hebrew pulong: gath, nagpasabut nga ‘pagpuga,’ ug shemen, nagpasabut nga ‘lana,’ ilabi na sa olivo.

“Didto ang mga olivo gipuga gamit ang gibug-aton sa dakong bato nga ligid aron pigsaton ang mahalon nga lana gikan niini. Mao nga si Kristo sa Tanaman sa Getsemani sa literal nga paagi gipuga tungod sa mga sala sa kalibutan. Ang iyang singot nanibug-ok daw apol nga nagpangatagak—ang ‘lana’ sa iyang kinabuhi—nga gikan sa matag lungag sa panit. (Tan-awa sa Lucas 22:44; D&P 19:18.)”

Kalabera: “Ang Paglansang nahitabo sa usa ka bungtod nga gitawag og Golgotha (Hebreohanon) o Kalbaryo (Latin) nagpasabut nga ‘ang kalabera.’ Ang kalabera nagsimbolo og kamatayon. Sa usa ka dapit nga sama niini, ang maulaong sakripisyo nakompleto. Diha sa krus, ang Manluluwas sa kalibutan gibayaw sa kamatayon sa labing dakong posible nga kahulugan—ang pagkaamgo ug pagkatinuod sa gahum sa Ginoo ibabaw sa kamatayon.”