E mafai faapefea ona ou taulimaina o’u manaoga?

A o e taulimaina le faaaogaaga e lou toalua o ponokalafi, e taua le gaua’i atu i lo oe lava soifua manuia faaau’upuola, faalemafaufau, faaleagafesootai, ma le faaleagaga. O le a fesoasoani lenei mea e te saunia lelei ai e fetaia’i ma lagona e lei faamoemoeina ma e tele ina faigata o loo e taulimaina.

Soifua Maloloina Faaau’upuola

I taimi faigata faapena, o se tulaga masani le lagona o le lofituina, atuatuvale, po o le popolevale. O mamanu o lau moe, taumafa tatau, ma masani faamalositino e taua i lou soifua manuia aoao. O fomai faalesoifua maloloina, faaagaifanua ma isi e ese ai, e mafai ona avea ma faapogai lelei o faamatalaga ma fesoasoaniga. E toatele le aufaigaluega faapolofesa o le maloloina faalemafaufau latou te uunaia a latou tagata mamai e faailoa atu soo se faafitauli o le soifua maloloina i se fomai o vailaau ma ia faia ai se suesuega atoa faafomai. E mafai e se fomai o vailaau ona fesoasoani e faailoa ni tulaga moni faaau’upuola e tatau ona e talanoaina.

Soifua Maloloina Faalemafaufau

O lou soifua maloloina faalemafaufau e saofaga i le ala e te mafaufau ai, vaai atu ai i le lalolagi, ma lagona ai faalogona. I le sailiga ia malamalama pe faapefea ona tosina oe e mea moni faalemafaufau, e mafai ona fesoasoani le sailia o fautuaga mai le aiga, uo, ma i latou e maua ai le fesoasoani i le soifua maloloina faalemafaufau. O nisi o tosinaga faalemafaufau atonu e te manatunatu i ai e aofia ai:

• Faafitauli o le soifua maloloina faalemafaufau e pei o le atuatuvale, lotopopole, po o le faalagolago i isi.

• Aafiaga matuia o le olaga faatamaitiiti e pei o le sauaina faalefeusuai po o le faaletino.

• Ou lagona o lou taua faaletagata lava ia ma le to’amautinoa faaletagata lava ia.

• O uiga faaalia ma amio a ou matua, aemaise e uiga i feusuaiga.

• O ou aafiaga faalefeusuai ua tuanai.

Soifua Maloloina Faaagafesootai

O lou soifua maloloina faaagafesootai e aofia ai mea moni e pei o sootaga faaleaiga, uo, talitonuga faaagafesootai, ma siosiomaga faaleaganuu. E mafai ona fesoasoani tele lou siosiomaga faaagafesootai ia te oe. O tagata o le aiga, uo, ma vaega lagolago faaagafesootai e mafai ona fesoasoani ia te oe e mafaufau ai i mea e filifili ai ma avatu ai ia te oe faamatalaga e uiga i amioga maloloina ma amioga e le maloloina. E mafai ona e maua le mafanafana i le faaavanoaina o se taimi mo oe lava e mafuta ai ma isi ma saili ia iloa ou lava faanaunauga ma sootaga.

Soifua Maloloina Faaleagaga

O aafiaga faigata e mafai ona luluina ai lou faatuatua ma tuua ai oe ma lagona fememea’i, tiga, tuuatoatasi, po o le tuulafoaiina e le Atua. E ono tele se taimi e iloilo ai ma galue i ou mafaufauga ma lagona faaleagaga. O tatalo faaletagata lava ia ma manatunatuga loloto, suesue i tusitusia paia, auai i le lotu, auauna atu i isi, ma le feutagai ai ma taitai o le Ekalesia o ni nai mea ia e mafai ona fesoasoani ia te oe e iloilo ou talitonuga ma atia’e se malamalama loloto atu i le Atua ma Lona alofa mo oe. A o e saili e faamalosia lau sootaga ma le Tama Faalelagi ma Iesu Keriso, e mafai ona e maua faaaliga patino i lou lava tulaga.

Manatu Faaopoopo

Saili e faasoa atu ou lagona i le Tama Faalelagi e ala i le tatalo. O a isi auala e ono faamalosia ai la oulua sootaga ma i La’ua?

Mafaufau e talanoa i tagata i lau vaega faaagafesootai o le a avea o ni e faalogo ma le lotomalamalama ma o le a mafai ona ofo atu ia te oe le lagolago faalelagona.

Iloilo aafiaga le lelei ua tuanai ia e ono taofia ai oe mai le faasoa atu o ou manaoga i le taimi nei lava. O se tasi faataitaiga atonu o le talitonu faapea o le pupuia o le le faalauaiteleina o lou toalua e sili ona taua nai lo le lagolagoina o lagona faalelagona. E ono mafai faapefea ona e talanoa e uiga i ai ma le iloa pe o le a alagatatau ia te oe le faasoa atu pe leai?