E Leai Se Mea e Le Mafaia

*Tala a Kacie

E iva masina talu ona ou faaipoipo i la’u tane, ae ou mauaina sa i ai sona vaisu o ponokalafi. E le gata sa aofia ai o ia a o ma feoa’i faamasani ma faamau, ae sa oo mai foi ana amioga i totonu o la ma faaipoipoga fou ma mu’amu’a. E le lava ni upu e faailoa atu ai le ita, tiga, ma le taufaa’ole’ole sa ou lagonaina ina ua ou iloaina. Ae o na mea uma, sa ou lagona na faatogafalea a’u ia ou faaipoipo atu ia te ia. Ona sa ma faaipoipo i le malumalu, sa ou lagona ai le utia i se faaipoipoga e faavavau i se tamaloa sa ou le’i iloaina ma e mautinoa lava e le mafai ona faatuatuaina.

Sa fautuaina mai e lo matou epikopo le Polokalama o le Toe Foi i le Olamau mai Vaisu [Addiction Recovery Program] e fitoitonu lava mo vaisu i ponokalafi, ma sa ma malilie e auai ai. Sa faatulagaina le polokalama o se fonotaga faavaega, ma i le taimi muamua sa o se mea e maasiasi ai le auai atu, aemaise ina ua ou iloaina o se isi fafine i le vaea o se tasi na ma faigaluega faatasi. O nei faalogona na mou malie ese i le aluga o aso, a o ou atinaeina se sootaga felatai ma isi sui auai o e sa feagai foi ma tauiviga faapena.

E lei leva ona amata ou togafitiga, sa tosoese mai a’u e se tamaitai o le vaega ma fautuaina malosi au ia ou faaleaogaina le ma faaipoipoga a o lei atoa le tausaga. Sa ia faasoa mai ia te au le faifai pea o le toefoi o lana tane i lana vaisu, e ui lava ina uma ona maua le fesoasoani, ma ona lagona e le mafai ona ia tuua o ia ona e toafa lana fanau e tausi. Sa ia uunaia a’u ia maua se faaleaogaina ina ia ou ‘alofia ai ni fanau ma se tatalaga o se faaipoipoga. Sa matuai ou manatunatu loloto i ana upu ma lagona le faanoanoa ma le le fiafia i le vaiaso na sosoo ai. Ina ua mavae se ma talanoaga ma lo’u peresitene o le siteki, ma le anoanoai o tatalo ma manatunatuga loloto, sa ou lagonaina o le a ou ioe e galue i le ma faaipoipoga po o le a lava le umi e taumafai ai lo’u toalua. E ui ina sa ou ita ia te ia, ae tau ia ina ou faafetai ona sa naunau o ia e sui.

Sa oo ina sili ona leaga ona faatoa oo ai lea ina lelei. O le tulaga aupito maualalo ou te manatuaina o le taimi na lata i le tasi tausaga o le ma faaipoipoga, ina ua fesili mai lo’u toalua pe o o’u alofa pea ia te ia ma sa ou tali atu sa matuai ou le iloa lava. Na mavae nai masina na sosoo ai ma le mau tiga ogaoga ma le ulutiga, lea sa ou matua mafatia ai i le malu’ia ma le tuuatoatasi. E tele taimi sa ou augani atu ai i lo’u Tama Faalelagi e aumai ia te au le malosi ou te lavatia ai.

A o mavae atu taimi ma ua amata ona faasolo lelei mea, sa mafai ona ou taulai atu i meamoni taua e tele sa ou aoaoina, lea na fesoasoani i lou toe foi i le olamau.

1. O se faagogo le faapea e le liliu atu tagata i ponokalafi pe a le faamalieina afineaiga. Sa ou lagonaina se avega mamafatu i le talitonu ai sa ou tata’ia lo’u toalua i ponokalafi ou te lei faamalieina o ia i nisi itu. O le mea moni, o le tele o tagata e i ai nei vaisu sa autausaga ona latou feagai, i taimi e tele talu mai ona laitiiti. O se vaisu ua leva ona i ai i la’u tane ae ma te lei fetaui, ma o lana filifiliga e auai ai e le o a’u na pogai ai.

2. E matuai taua lava le sailia e paaga e toalua se fesoasoani. E ui e le o a’u tonu na afua ai amioga a la’u tane, ae o o’u uiga faaalia na i ai moni foi sana vaega na fai ai i le ala na ma taulimaina ai faatasi ia faafitauli. Sa ou iloaina ma faia ai ni suiga e tele e uiga ia te au lava e ala i lenei faagasologa o lea sa masani ona ou taumanatuantu ai pe na tele atu ni mea na ou maua mai le togafitiga nai lo loau tane.

3. E fesoasoani le taofiofia o upega saogalemu i o latou tulaga, aemaise pe a le toe faaauauina le fofo. Sa tele ni tulafono e le maufetuuna’ia e uiga i le faaaogaina o ala o fesootaiga sa ma faatulagaina, lea na ma faamatagatagaina i le aluga o taimi ina ma lagonaina ua saogalemu ma talafeagai ona faia.

4. E manaomia ai se taumafaiga ma le loto atoa e agai atu ai i le toe foi i le olamau. O le mafaufau fetala’i i mea sa matauina e tagata e uiga ia te au, na mafai ai ona ou faia suiga sa ou manaomia e faaleleia atili ai la’u faaipoipoga.

5. E manaomia ai se taimi tele e toe foi ai i le olamau. E oo lava foi ina ua atili mautu ia mea, ae sa ou iloaina o la lava e tumau lo’u le fiafia i la’u tane. Sa oo ina ou ita pe a vivii atu isi ia te ia, ma mafaufau, “Pe ana latou iloa moni o ia, semanu latou te le fai atu la ituaiga upu agalelei ia te ia.” Ina ia tetee atu i nei lagona, sa ou tausia se apitalaaga o le lotofaafetai mo le silia i le masina ma tusi ai se mea e tasi i po uma e faaalia ai lo’u lotofaafetai mo la’u tane. E i ai taimi sa ou lagona ai toeitiiti a le mafai ona maua e oo lava i se tasi se manatu i lenei apitalaaga. O le taimi nei, ua ou fiafia i le faaviivii e maua e la’u tane, ma o le a le lava itulau i se api se tasi e tusia ai mea uma ou te faamemelo ai ia te ia.

   E le mafai ona ou faamatalaina laasaga uma sa ou faia i lenei faagasologa atoa, ae e mafai ona ou faapea atu e leai se mea e le mafaia e ala ia Iesu Keriso. Sa ou augani atu ia te Ia e toefuatai la’u faaipoipoga i lona tulaga sa i ai, ae nai lo lena ua Iaaveina atu i se tulaga e matuai maualuga atu. Sa ou latalata atili atu ia te Ia e ala i le vaavaai atu i lo’u toalua e faapei ona Ia faia, ma e ala i le ofoina atu o le lotofaamagalo a o faailoa atu faapea, o i tatou uma o tagata aisi i luma o le Alii.

   O le aso, ua lima ai tausaga talu ona ma faaipoipo ma la’u tane ma ua i ai so ma afafine lalelei. E maoae le manaia o la ma’ua ulugalii ma se olaga matagofie ma faamanuiaina. Ua ou le toe ola nei i le fefe. Ua ou le toe vaai atu i lo’u toalua ma lagonaina le tiga ma le ita. E na o le Faaola lava e mafai ai ona maua lenei ituaiga o faamalologa. Ua Ia faamaloloina o’u manu’a e ala i Lona alofa tunoa.

   “Ua suia le igoa.

   O lenei tala na muai aumaia mai le Addiction Recovery Program website.