Galulue Faatasi i Ai

*Tala a Candice

Sa ou iloaina le vaisu a la’u tane i ponokalafi ae ma te lei faaipoipo, ae sa ou le malamalama i le aafiaga o le a i ai i vaega uma o o ma olaga faatasi.

A oo ina fefiloi se vaisu i ponokalafi ma se ma’ivalea i taaloga faakomepiuta ma le le faigaluega, o se mamanu lea mo le le fiafia. I aluga o le tausaga lona lua o le ma faaipoipoga, sa ou tautonu ai lava i le tulaga aupito maualalo o lo’u lotofaanoanoa. Sa ou faaaluina le tele o o’u aso e nofonofo ai i le nofoa faalue i le potu o la’u tama tama faatoa fanau mai, ma luelue o ia ma faataupupula atu i fafo o le faamalama a o ou tagi. Sa tonu ia te a’u, ua oo i le taimi e faamuta ai lenei le fiafia. Sa ou faia ni fuafuaga mo le tatalaga o le ma faaipoipoga. Sa ou saunia e faatino, ae sa ou lagonaina na tatau ona ou talanoa muamua i le epikopo.

I ni nai aso mulimuli ane, sa ta’u mai e lo’u toalua e i ai lona fono a’oa’i i le Ekalesia ma e mafai ona ou alu atu ai pe a ou manao ai, ae ou te le tau alu atu. Sa ou le fiafia. E le o le tulaga lea sa tatau ona i ai le faaipoipoga faavavau, po o le mea sa ou moemiti i ai i taimi o lesona a Tamaitai Talavou na aoao mai e uiga i le faaipoipoga e faavavau. Sa ou filifili o le a ou tau atu i le epikopo i lena po ia la’u faaiuga e tatala le ma faaipoipoga.

Ina ua valaau mai le epikopo ou te alu atu i lona ofisa, sa autilo sa’o mai i o’u mata ma fai mai na faaumatia e Satani lo’u aiga, ae sa mafai lava ona faamaopoopoina pea. Sa ia faimai sa i ai lava le faamoemoe mo lo’u aiga.

Sa ou alu i le fale ma le filima’oti ia aua nei faatagaina Satani e malo. Sa ma tau muamua i le muai olaga, ae o lenei la o le a ou tau ma ia i a’u mea uma iinei i le lalolagi. Sa ou faitauina lauga uma o le konafesi aoao e uiga i le faamagaloga, o le Togiola a le Faaola, aiga, faamoemoe, ma le faatoilaloina o luitau. Sa ou sailia mau uma e uiga i le autu o le faamagaloga. Ou te lei iloaina pe mafai ona ou faamagaloina tiga ma lē fiafia uma, ae sa ou tatalo faamaoni ia mafai ona ou faamagaloa lo’u toalua.

I se tasi taeao, sa ou tootuli ma folafola atu i le Tama Faalelagi afai o le a Ia faamalosi ia te a’u, o le a ou le toe mafaufau lava i le tatala o le faaipoipoga. Ua valu tausaga talu mai lena aso. O loo i ai pea lava le vaisu ma ona lugā ma lalō, ae o loo ma galulue faatasi pea i le ma faaipoipoga.

Na faafia ona ta’u mai e lo’u epikopo ia te au, e le o tuua na o a’u ma o ponokalafi o se faafitauli tele lea i le Ekalesia, ae ou te lei iloa se isi tagata o fai ponokalafi ma vaisu a lana tane. Ina ua tuu mai e le epikopo ia faamatalaga e uiga i le Addiction Recovery Program, sa ou matauina sa i ai se fonotaga faavaega e mo na o fafine o a latou tane na fai ma vaisu ia ponokalafi.

Na vave lava ona ou lagonaina o le mea lea e manaomia ona ou alu i ai. Sa ou ta’u atu i lo’u toalua e mafai ona sau ma te o pe afai e manao ai, ae ou te alu lava au.

Sa iu ina ma o faatasi, na alu o ia i le fono a tamaloloa ae o a’u i le fono a fafine. O fonotaga a le ARP na faatagaina ai au ia ou vaai e i ai foi isi fafine o loo feagai ma faafitauli lava ia e pei o au. Sa amata ona ou taulimaga lagona sa ou taofiofia. Sa ou aoaoina le auala e fiafia ai, tusa lava pe o a faatinoga sa faia e lo’u toalua. O ana faatinoga sa le faapea e pulea ai o’u lava lagona, taga, faalogona, po o lo’u lava taua. Sa ou aoao ai e alofa, faamagalo, pipiimau i le Faaola, ma oo ai ina tutoatasi mai tosinaga mai fafo. Sa maua e lo’u toalua se amataga maoae na ia manaomia ma faaauau ai ona alu i fonotaga o le toe foi i le olamau.

I le avea o se toalua, e mafai ona ou alofa ma lagolago la’u tane, ae e le mafai ou faaleleia le vaisu mo ia. O se auala lena ua tatau ona malaga ai o ia. Ae o le a ou i ai iina mo ia, ma patipatia o ia mai tua po o le a lava le umi na te faia ai. Ma te taumafai malosi e tausi le ma fanau i se aiga fiafia, ma ma galulue faatasi e avea o ni uo ma alofa le tasi i le isi. O lo’u toalua o se tamā sili mo le ma fanau, ma e latou te faamemelo tele ia te ia. O ia o la’u uo mamae.

Ou te faafetai lava ona sa aoaoina au e le ARP, taitai perisitua alolofa, ae maise lava lo tatou Faaola, i le ala e alofa ai ma faamagalo atu. E ui o loo tauivi pea lo’u toalua ma ana vaisu, ae ona o le talalelei a Iesu Keriso, ua mafai ai ona ou ataata i aso uma.

*Ua suia le igoa.

O lenei tala na muai aumaia mai le Addiction Recovery Program website.