“O a ni auala e mafai ona lelei ai la’u lagolago i lo’u toalua?” Fesoasoani mo Taitoalua (2021)

“O a ni auala e mafai ona lelei ai la’u lagolago i lo’u toalua?” Fesoasoani mo Taitoalua

O a ni auala e mafai ona lelei ai la’u lagolago i lo’u toalua?

E taua le i ai i lou toalua o se naunauga ia suia lona mausa i ponokalafi ma ua loto o ia e fesili atu mo se fesoasoani. E le mafai ona e faamalosia pe pulea se toalua e le o loto e suia. E manaomia ona e sauniuni pe o le a faapefea ona e tali atu pe afai e le loto lou toalua e suia. E mafai ona avea o se taimi faigata tele lea e faia ai ni faaiuga, faatulaga tuaoi, ma filifili pe o le a le mea e sili mo oe. Faitau atili i le tusitaulima Taiala Lagolago: Fesoasoani mo Taitoalua ma Aiga o i Latou ua Toe Foi i le Olamau.¹

E mafai ona lelei lau lagolago i lou toalua pe afai ua e saunia faalelagona e faia, ma pe a ua e lagona ua i ai lau lava vaega lagolago e fesoasoani ia te oe i le faagasologa. E mafai ona fesoasoani tele le faamatalaga lenei.

Filima’oti pe o afea ae pe faapefea foi ona fesoasoani i ai. Atonu e i ai ni taimi e te lagona ai ua e mafaia faaleagaga ona ofo atu le lagolago, ma o le mea masani lava lena. O le lagona faapea e tatau lava ona e avanoa e le aoga mo oe po o lou toalua. E matua’i moni lena mea pe afai o loo e tauivi ma lagona o le tau’ole’ole po o le le mautonu. Afai e te lei saunia e fesoasoani i lou toalua, e mafai ona e faamalosiau ia te ia e faailoa i ai se tagata lagolago e itupa tutusa ma lou toalua.
Fesoasoani i lou toalua ia malamaama i le uiga o le tali atu mo ia lava. E tusa lava po o le a le tele o lou manao e fesoasoani, o lou toalua e nafa lava ma le suiga o lana amio. O se tasi o itu aupito taua o le lagolagoina o lou toalua o le fesoasoani lea ia te ia e talia le tiutetauave mo le suiga. A o aoao e lou tolaua e talia le tiutetauave e agai ai i luma, o le a ia lagona se tiute tele e tali atu ai mo le manuia po o le toilalo. E mafai foi ona aoga mo oe ma lou toalua le talanoaina pe faapeī le tali atu i la oulua faaipoipoga ma pe o le a faapefea ona oulua talanoaina e le aunoa.
Talanoaina se fuafuaga mo le suiga. E mafai ona fesoasoani tele mo oe le talanoaina o fuafuaga a lou toalua mo le suiga o lana amio. E mafai ona e fai atua fesili e pei o le “O a auiliiliga o lau fuafuaga?” ma le “O le a se mea e te manao ou te faia e lagolago atu ai ia te oe?” E ao foi ona e faitaulia pe o lenei fesoasoani o se mea ua e avanoa faalelagona e tuuina atu.
Fesoasoani i lou toalua ia iloa ua le na o ia. O i latou e tauivi ma le faaaogaina o ponokalafi e ono lagona le maasiasi ma le faaesea mai isi, pe latou te ono talitonu foi ua na o i latou o i ai lenei faafitauli. Fesoasoani ia malamaama lou toalua e toatele tagata o loo tauivi ma le faaaogaina o ponokalafi ma maua auala e toefaaleileia ai ma agai i luma. E toatele ua maua le mafanafana i le auai i vaega lagolago, ma e mafai foi ona aoga lena i lou toalua. (Tagai i le addictionrecovery.ChurchofJesusChrist.org mo faamatalaga e uiga i vaega lagolago a le Ekalesia.)
Faalogo ma se loto malamalama O lona uiga e tuu atu i lou toalua lau gauai atoa ma faalogo ia malamalama nai lo le faamasino. Atonu e te lagonaina faapea, ina ia mafai ona tuu atu le lagolago, e tatau ona e tuu atu se fautuaga pe fai se faatinoga. Ae e sili ona mafai ona e avatu le lagolago i le na ona faalogo. Aoao atili i le tusiga o le “Atiina ae le Agaga Malamalama e Auauna Atu Ai. ”² Ia manino pe a manaomia ona e laa ese pe fai sina koma mai talanoaga faigata.
Fesoasoani i lou toalua ia malamaama i le eseesega o le ta’usalaina ma le maasiasi. O le toatele o i latou o e tauivi ma ponokalafi e lagona le maasiasi e uiga i a latou amioga. O lena mea e aofia ai le lagona ua le agavaa mo le alofa ma le faamagaloga mai le Atua ma isi. E ono manaomia e lou toalua le fesoasoani e faatoilalo ai nei lagaona e le lelei. E mafai ona e fillifili e faamautu atu i lou toalua e alofagia o ia ma faatauaina e le Atua ma le ala o loo e taumafai malosi ai ia talia ana taumafaiga e toefausia ai le faatuatuaga.
Ia faatutu ni tuaoi talafeagai. O se tuaoi o se mea e gata ai amioga patino e te le faatagaina lou toalua e laasia e aunoa ma ni taunuuga. O le sini o le i ai o se tuaoi o le tausisia lea o lou saogalemu mai faatama’iaga faalelagona. O tuaoi e le faamoemoe ia suia ai amioga a lou toalua, e ui atonu o se aafiaga lona lua lena. O le faatutuina o tuaoi e ono suia ai auga o la oulua sootaga, ae pe tau atu ai i le faatafunaga po o le olaola o la oulua faaipoipoga, o tuaoi e puipuia ai oe ma fesoasoani e te manatua ai lou taua. Tulitatao i le faatumauina o ou tuaoi pe a uma ona faavae. Pe a faamalolosia tuaoi, manatua aua nei faia i le ita. O tuaoi e le faapea o se faasalaga o lou toalua ae o se auala e puipua ai oe ma ou lagona.