4

Karaoi Kouru ni Buoka Aia Waaki Ami Ataei

Titiraki Aika A na Maroroakinakinaki

1. “Tarai tamnei aikai. Tera ae Ko Nooria?

2. Bukin tera karekean kouru a kakawaki?

3. E kanga am namakin ngke e a koro bukin am kouru are ko a tia ni karaoia?

Reiakinna

Ngkana ko tangiria ni katoka te kangaanga ke ni karaoa te bwai teuana, ko kainanoia n iangoia bwa ko na kanga ni karaoia. E aranaki aio bwa karaoan te kouru. Buokiia ami ataei n reireiniia karaoan aia kouru are e na buoka aia waaki.

Ngkoe ao am ataei kam kona ni karaoi kouru inanon aua mwaneka aika bebete:

1. Kunea

2. Baire

3. Mwakuri

4. Kauringnga

Taraa te katooto mai inano n nooria bwa e kanga mwaneka akanne ni buokiko ao am ataei ni karaoi kouru.

1. Kunea:

   Tera ae ko kainanoia ni katamaroa ke ni bitia?

   Natiu te aine iai ana kangaanga n ana numera. E tuangai buokana, ma Ngai e aki raoiroi au numera.

2. Baire:

   Tera mwaneka ae ko kainanoia n anaia?

   N na marooro nakon ana tia reirei ao tabeman kaaro iaon kawai ni buoka natiu ma ana numera.

3. Mwakuri:

   Ko kainanoa riki te buoka?

   I tataro ibukin te ibuobuoki. I namakinna ae N na riai n taetae ma te membwa n au uoote are bon te tia reirei. E taku bwa e na buoka natiu te aine n ana bwai n reirei. Ti karaoa te tai ibukiia n reitaki ni katoa wiiki.

4. Kauringnga:

   Tera ae ko reiakinna? Tera ae ko kainanoia ni karaoa te kouru ae boou ke n reitanako te kouru aei?

   I kainanoia n tuoa natiu te aine ni katoa bong n taraia bwa e kanga aron ana bwai n reirei iaon ana numera ao manga rinanoi baike e korei inanon ana boki.

Iangoia ao Tataro

Iangoi taekan bwaai ake ko a tia reiakinna. Korei mwiin iango nako ake ko karekei ke iango ake a roko mairoun te Tamnei ae Raoiroi. Tera ae ko iangoia are te Uea e tangiriko bwa ko na karaoia? Ko na kanga ni karaoa te katooto ibukiia ami ataei man karaoan ao katiaan kouru?

Waaki ni Kakukurei

Iangoa taekan te bwai teuana are ko tangiria ni kanakoraoia ke bitia. Kabongana te moan mwaneka aika uoua ni karaoa te kouru.

Imwiin karaoan am baire, oki rikaaki nakon te waaki ni kakukurei aei ao katiai mwaneka aika uoua imwina:

1. Kunea:

   Tera ae ko kainanoia ni kanakoraoia ke bitia?

2. Baire:

   Ko na kanga ni kanakoraoia ke karaoa te bitaki? Tera mwaneka ae ko kainanoia n anaia?

3. Mwakuri:

   E kanga te onimaki iroun Iesu Kristo ni buokiko ni kakoroa nanon am kouru? Ko kainanoa te ibuobuoki?

4. Kauringnga:

   Tera ae ko reiakinna? Ko kainannoia ni karaoa te kouru ae boou ke n reitanako te kouru aei?

Marooro ma Ami Utu

Marooro ma am utu bwa tera ae ko a tia n reiakinna. Tuangiia kaain am utu n tibwauai aia iango ao ni kakauongo imarenaia n tatabemaniia.

• Buokiia ami ataei ni karaoa aia kouru. Tataro n ikotaki n ataia bwa tera ae a riai ni karaoia.

• Korei inano mwiin aia kouru ataei n tatabeman. Marooroakina bwa ko na kanga ni buokiia ataei n tatabeman iaon kakoroan nanon ana kouru teuanne ke neienne.