9

Riiki Ngkami Bwa Mwakoron Aia Reirei Ami Ataei

Titiraki ibukin Marooro Iaona

1. Tarai tamnei aikai. Tera ae Ko Nooria?

2. Ko na kanga n riki bwa mwakoron aia reirei ami ataei?

3. A na kanga ami ataei n tuangiia aia tia reirei ibukin buokaia ngkana a bon aki oota?

Reiakinna

Ko kona ni marooro ma ami ataei, mwakuri ma ngaiia, takakaro ma ngaiia, wareware ma ngaiia, ao kakauongo nakoia. Aio are e na buokiia am ataei n namakina te tangiraki. Ko kona naba n tuangiia bwa tera ae a reiakinna n te reirei. Titirakiniia bwa tera ae e bebete ibukiia. Titirakiniia bwa tera ae e matoatoa. Titirakiniia bwa e kanga aia namakin iaoia aia tia reirei. Ngkana ko iangoia bwa e kona ni buoikiia ami ataei, tuanga aia tia reirei ngkana ko kona n taetae ma ngaiia.

Taan reirei n taainako a rang tangiria ngkana kaaro a na marooro ma ngaiia ao titirakiniia bwa a na kanga ni buokiia aia ataei ni karaoa ae tamaroa n te reirei.

Imwain ae ko na kaitibo ma aia tia reirei ami ataei, korei titiraki are ko tangiria n titirakiniia iai. Aikai tabeua bwaai are ko kona ni karaoi:

1. Karabwaia taan reirei ibukin reireinakiia ami ataei.

2. Titirakiniia taan reirei bwa a kanga aron aia waaki ami ataei n aia kiraati.

3. Tuangiia taan reirei bwa ko na kanga ni buoka ami ataei ni karaoa ae tamaroa n te reirei.

4. Titirakiniia taan reirei ngkana iai bongin namwakaina aika kakawai are ko riai n ataia.

Ngkana ko aki kona ni kaitibo ma taan reirei, ko kona n reitaki ma ngaiia n teuana ke iai kawai aikai:

• Kanakoa te rongorongo n te tekiti.

• Kanakoa te imeeri.

• Reitaki n taetae iaon te tareboon.

• Korea te reta.

E mwaiti aomata ake a buokiia ami ataei n reiakinaki ni katoa bong. Iangoia tabeman aomata are ko kona n taetae nakoia iaon reiakinaia ami ataei.

Iangoia ao Tataro

Iangoia bwa tera ae ko tia n reiakinna. Korei mwiin iango nako ake ko karekei ke iango are e roko mairoun te Tamnei ae Raoiroi. E kanga mwiin am marooro ma aomata tabeman iaon reiakinaia am ataei ni buokiia am ataei n te reirei?

Waaki ni Kakukurei

Korei tenua bwaai are ko tangiria n titiraki ke n taetae iaona ma aia taan reirei am ataei ke tabeman aomata ake a buokiia am ataei n reiakinaki.

Marooro ma Ami Utu

Tera ae ko na karaoia ma te bwai are ko a tia n reiakinna. Maroroakin taian titiraki aika inano. Tuangiia kaain te utu n tibwauai aia iango ao ni kakauongo imarenaia n tatabemaniia.

• Antai aomata ni maiura ake a buobuokiira n reiakinaki?

• A na kanga tabeman ni buokiia kaain te utu n tatabemaniia n te reirei?