Kaaraki

Te Kairi Ibukiia Kaaro aei e na buokiko n reiakinna bwa ko na kanga ni buokiia ami ataei n reiakinaki n te reirei ao n te mweenga.

A reirei ataei mairouia kaaro ao taan reirei. A reirei naba rinanon te mwakuri, takakaro, ao taian titiraki are a titiraki iai. A rang kakawaki utu ao buokiia ataei n reireiniia. Ngkana a ibuobuoki utu n reireiniia aia ataei, ao ataei a na namakina te kukurei ao te nakoraoi n aia reirei. A tangiria naba n reiakinna ae bati riki.

Marooroakinna ma kaain am utu bwaai ake ko reiakin ngkai ko wareka te kairi aei. Tataro ibukin te buoka mairoun Tamara are i Karawa. E ngae ngkana e aki tau am reirei, ko bon kona naba ni buokia n reireiniia am ataei. Te Uea e na buokiko ao am ataei n reiakinna n ikotaki ngkai ko mwakuri, takakaro, marooro ma tatabeman, ao wareware.

E Kanga Kabonganaan te Kairi Aei

A kona kaaro ni kamatebwaia te kairi aei n ikotaki, ma aia ataei, ke ma tabeman kaaro. A kona taan kairiiri ni kaoiia kaaro nakon te boowi ao ni marooroakin atuun rongorongo inanon te kairi aei. Taari ao titita n ibuobuoki a kona naba ni marooro iaon atuun rongorongo inanon te kairi aei ma utu ake a buokiia.

E Kanga Kamatebwaian Atuun Rongorongo n Tatabeua

Iriri mwaneka aikai ngkai ko kamatebwai atuun rongorongo n tatabeua inanon te kairi aei:

1. Kaoiia tabeman ni kamatebwaia atuun rongorongo ma ngkoe, ke kamatebwaia atuun rongorongo n tii ngkoe.

2. Iangoia ao marooroakin taekan taian titiraki.

3. Warekia ao karaoa te waaki ni kakukurei.

4. Iangoia ao tataroakinna bwa tera ae ko a tia n reiakinna.

5. Marooroakina te bwai ae ko a tia n reiakinna ma am utu.