7

Buokiia Ami Ataei ni Kataneiaiia ni Wareware, Koroboki, ao Numera

Titiraki ni Marooroakinaki

1. Tarai tamnei aikai. Tera ae Ko Nooria?

2. Ko na kanga n iangoia bwa ami ataei a na namakina taekan te reiakinaki?

3. Ko na kanga ni buokiia ami ataei n reirei ni katoa bong?

Reiakinna

Ataei a reiakinaki bwaai aika mwaiti n te reirei. A kona ni kataneiaiia n te mweenga ni buokiia ni uringii bwaai aika a tia n reiakin. Aikai tabeua kawai ni buokiia ami ataei ni kataneiaiia ni wareware, koroboki, ao numera ni katoa bong:

Wareware

Te wareware e rangi ni kakawaki bwa kawaia ataei n reiakinaki. Kaaro a kona ni buokiia aia ataei n ataia bwa e kanga te wareware ni buokiia n te reirei ao inanon maiuiia. Ataei a kona n reiakinaki ni katamaroa aia wareware man te wareware ibon irouia ke n takaruaia nakoia tabeman ni katoa bong. Ko kona n tuangiia ami ataei ni wareware nakoim ngke ko tabe ni karaoa te amwarake ke ni mwakuri ni mweengam. Ko kona naba n tuangiia bwa a na warekii taeka ke kiibu inanon koroboki aika tabu. Ami ataei ake a ikawai riki a kona ni wareware nakoia tariia ao mwaneia aika uarereke.

Koroboki

Koroboki e kona ni buokiia ataei n iango ao reiakinna. Ngkana a koroboki, ataei a na kona n tibwauai aia iango ao ni kabonganai taeka aika boou. Ko kona n tuangiia ami ataei ni korea teutana ni katoa bong. Tabeman ataei a tangiria ni korei karaki. Tabeman a tangiria ni korei taekan bwaai ake a riki nakoia. Tuangiia ami ataei ni warekia bwa tera are a koreia nakoim.

Te numera

Reiakinan te rabakau n te numera e bon rangi ni kakawaki. Rabakau aikai a bon kabonganaaki inanon te kateitei, kuuka, ao tabeua mwakoron te maiu ni katoa bong. A mwaiti ataei aika a taku n aia iango bwa te numera e matoatoa. Ma e aki riai n riki anne. Ko kona ni buokiia ami ataei n reiakina te numera ni katoa bong. Tuangiia ami ataei ni wareka te mwane ke ni kabwakai boon bwaai n te mwaakete. Tuangiia ni wareki bwaai n te mweenga ke ngkana ko tabe ni kuukana te amwarake. Aio are e na buokiia n iangoi taekan taian nambwa ao a kanga ni kabonganai numera ni katoa bong.

Iangoia ao Tataro

Iangoia bwa tera ae ko a tia n reiakinna. Korei mwiin ami iango nako are ko karekei ke iango ake a roko mairoun te Tamnei. Ko na kanga ni buokiia ami ataei ni kataneiaiia ni wareware, koroboki, ao numera ni katoa bong?

Waaki ni Kakukurei

Tarai bwaai aika koreaki ni karinanaki inano. Korea te mwaake (✓) inanon te bwaoki ni kaitarai bwaai ake ko tangiria ni karaoia ma ami ataei.

Wareware n te Mweenga

Ma ami ataei:

• Wareki booki n takarua.

• Wareki kanikinaean bwaai.

• Ikaruoruo ni wareki koroboki aika tabu.

• Wareki kanikina ake a tei n taian kawai.

• Atongii aran taian kanikina ake a noori.

Koroboki n te Mweenga

Tuangiia ami ataei bwa a na:

• Korei tamnei ao n tuangko taekaia.

• Korei reeta.

• Korei taian karaki.

• Korei araia kaain te utu.

• Koroboki inanon te tieno.

Numera n te Mweenga

Ma ami ataei:

• Wareki bwaai n te mwaakete.

• Uakorai bwaai n amwarake ngkai ko kuuka.

• Ikoti ao anai taian nambwa.

• Mwakuria ana kangaanga te numera n ikotaki.

• Wareki waare iaon te tai.

Marooro ma Ami Utu

Marooro ma am utu iaon bwaai ake ko a tia n reiakinna. Maroroakin titiraki aika oti inano. Tuangiia kaain am utu n tibwauai aia iango ao ni kakauongo imarenaia n tatabemaniia.

• Tera bwaai aika ko reiakin n te reirei?

• Ti na kanga ni buokiia n tatabemaniia ni wareware ao ni koroboki ni katoa bong?

• Ti na kanga ni buokiia n tatabemaniia ni karaoa te numera ni katoa bong?