5

Ikotaki n Reiakinna n te Mweenga

Titiraki Aika A na Maroroakinaki

1. “Tarai tamnei aikai. Tera ae ko nooria?

2. A kanga natim n reirei man te ikotaki ni mwakuri ao n takakaro?

3. Tera ae ko karaoia ma natim irarikin te reirei are e buokiia n reireiniia?

Reiakinna

A kona utu ni karaoi mweenga bwa taabo ike te Tamnei ae Raoiroi e na kona ni buokiia n reireiniia. A na kona ni marooro iaon Iesu Kristo ao ni kataia n riki n ai Arona. Ko kona ni karaoi bwaai aika mwaiti ni kaoa te Tamnei ae Raoiroi nakon mweengam ao ni kateimatoa ni kakorakora am utu. Ko kona n tataro ao ni wareki koroboki aika tabu ma te utu ni katoa bong, maiuakina te euangkerio, ao ni buokiia tabeman.

Ngkana te Tamnei ae Raoiroi e mena ni mweengam, am utu a na tararuaia imarenaia ma te akoakoi ao te itangitangiri. Ngkana ami ataei a namakina tangirakiia, a na namakina te boutoka are a kainanoia bwa aonga ni waaki raoi.

Bwaai aikai a na buoka mweengam n riki bwa te tabo n tangira ao n reirei:

• Bwaina te taotaonaki n nano.

• Kataia n aki kai un.

• Kabanea te tai ni ikotaki ma ngaiia.

• Kakukureiko.

• Kakauongo raoi.

• Kamoamoaia ami ataei ngkai a kataia n reireiniia.

• Kabonganai taeka n akoi.

Iangoia ao Tataro

Iangoa te bwai ae ko a tia n reiakinna. Korei iango aika roko n am iango ke iango ake a roko mairoun te Tamnei ae Raoiroi. Tera n am iango te bwai ae tangiria te Uea bwa ko na karaoia? Tera bwaai aika ko kona ni karaoi ni karekei ke ni kaota te tangira ae raka riki inanon mweengam?

Waaki ni Kakukurei

Iangoi bwaai are a na buoka mweengam ni kaonaki ma te tangira. Korei uoua ke tenua iango man bwaai ake ti noori, ongo, ao n namakinna ngkana a onrake mweengara ma te tangira.

Tera ae ko nooria ngkana ko taraa mweengam ni katobibia?

• Katooto: Aomata a buokiia i bon imarenaia.

Tera te bwai ae ko ongo ae a taekinna kaain te utu imarenaia n tatabemaniia nako?

• Katooto: Taeka n akoi.

Tera ae a namakinna kaain te utu ngkana a mena ni mweengaia?

• Katooto: A na namakina te tangiraki.

Buokiia ami ataei ngkana a kangaanga bwaai ibukiia. Aio te katooto bwa ko na kanga ni kaota te tangira ngkana natim te aine e aki nakoraoi ana tai:

Natim te aine e anaa ana ukeuke ae bubura. E mwakuri korakora. Ma e reke ana bwii ae aki raoiroi ao e nanokawaki. Ngkai e na manga karaoa te ukeuke riki inanon onoua namwakaina. Ko na manga kabwaka naba te roo ibukin te ukeuke.

Aio te bwai ae rang matoatoa. Ngkoe ao natim te aine kam kaai n nanokawaki. Aikai tabeua bwaai ake ko kona n taekinna nakoina ni kaota te tangira:

• I tangiriko. I ataia ko rang mwakuri korakora. I mena ikai ibukim.

• I nanokawaki ngkai ko aki karekea am bwii ae rietaata. I ataia ko namakina ae aki raoiroi naba. Tera ae I kona ni buokiko iai?

Marooro ma Ami Utu

Marooro ma am utu bwa tera ae ko a tia n reiakinna. Maroroakin taian titiraki aika inano. Tuangiia kaain te utu n tibwauai aia iango ao n kakauongo imarenaia n tatabemaniia.

• Tera ae ti kona ni karaoia n ara utu ni karekea te Tamnei ae Raoiroi inanon mweengara riki?

• Ti na kanga ni kaota te tangira ao karinerine nakoira n tatabemaniira nako?

• E na kanga te tangira inanon mweengara ni buokiira n reiakinaki ni kabane?