Tuleiga Tomua a le Au Peresitene Sili

Tolu masina talu ona mavae le faatulagaina o le Ekalesia, a e faatonu e le Alii le faletua o Iosefa Samita, o Ema, e ala mai i le Perofeta o Iosefa Samita, na te filifili ma tuu faatasia ni viiga paia mo le Ekalesia: “Aua e fiafia lo‘u agaga i le pese a le loto; ioe o le pese a e amiotonu o se tatalo mai ia te a‘u, ma o le a ou talia ma se faamanuiaga i luga o o latou ulu” (MF&F 25:12).

O lenei, i le 150 lea o tausaga ua mavae talu ona faasalalauina le tusipese muamua o le Ekalesia, ua matou fiafia e tuuina atu le lomiga toe teuteuina lenei. Ua i ai le tele o viiga sa i ai ia tatou tusipese muamua ma lomiga na sosoo ai, faapea foi ma le tele o viiga fou ua faaopoopoina. Ua filifilia ia viiga uma e faataunuu ai mea eseese ua manaomia e tagata o le Ekalesia i le lalolagi atoa i ona po nei.

O Musika ia Tatou Sauniga Lotu

O viiga musuia o se vaega taua o a tatou sauniga lotu. E aumai e viiga le Agaga o le Alii, faatupuina le lagona o le migao, faalotogatasi i tatou o tagata o le Ekalesia, ma tuuina mai ai ia i tatou se ala tatou te vivii atu ai i le Alii.

O nisi o timaiga musuia tele lava e tuuina atu lea i le lagiina o viiga. Euunaia i tatou e viiga ia tatou salamo ma faia galuega lelei, atiinaae le molimau ma le faatuatua, faamafanafana i e vaivai, faamafanafana i e faanoanoa, ma uunaia i tatou ia tatou tumau sei oo i le iuga.

Matou te faamoemoe ia vaaia se faateleina o le lagiina o viiga ia tatou faapotopotoga. Matou te faamalosiau atu i tagata uma o le Ekalesia, pe talenia i musika pe leai, ia ‘au faatasi ma i tatou i le lagiina o viiga. Matou te faamoemoe o le a faaaoga le tusipese e taitai, faiaoga, faapea ma tagata o le Ekalesia o e e valaaulia e lauga, ina ia saili ma sii mai ai tomatauga mamana ma matagaofie ua tuuina mai i upu o viiga.

Ua loa ona i ai i le Au Paia o Aso e Gata Ai le tu masani o le pepese faaleaufaipese. E tatau i uarota ma paranesi taitasi i le Ekalesia ona i ai sa latou aufaipese e pepese soo. Matou te faamalosiau atu i aufaipese ia latou faaaoga le tusipese e avea ma a latou tusipese faavae.

O Viiga i o Tatou Aiga

Ua i ai i musika ni mana le faatapulaaina mo le uunaiga o aiga ia faateleina le faaleagaga ma le maelega i le talalelei. E tatau i le Au Paia o Aso e Gata Ai ona faatumulia o latou aiga i leo o musika lelei.

O la tatou tusipese o se tusipese mo le aiga faapea foi ma le falelotu. Matou te faamoemoe o le a avea le tusipese ma se tasi o tusi taua i o tatou aiga faatasi ma tusitusiga paia ma isi tusi faalelotu. E mafai e viiga ona aumai i aiga le agaga o le filemu ma matagofie ma e mafai ai foi ona uunaia le alofa ma le lotogatasi i tagata o le aiga.

Aoao a outou fanau ia fiafia i pese. Pepese ai i le Sapati, i afiafi faaleaiga, i le taimi o aoaoga i tusitusiga paia, ma taimi o talosaga. Pepese ai ao outou galulue, ao outou taaalo, ma ao outou malaga faatasi. Usu viiga o ni pese faamoemoe pepe e atiinaae ai le faatuatua ma le molimau ia outou fanau laiti.

O Viiga i o Tatou Lava Olaga

E le gata ina faamanuiaina ai i tatou o se Ekalesia faapea ma tagata o o tatou aiga, a e e mafai foi ona aoga tele viiga ia i tatou o ni tagata taitoatasi. E mafai e viiga ona sii ae o tatou agaga, tuuina mai ia i tatou le lototele, ma uunaia i tatou e fai mea tonu. e mafai ona latou faatumuina o tatou agaga i mafaufauga faalelagi ma aumai ia i tatou le agaga o le filemu.

E mafai foi e viiga ona fesoasoani ia i tatou e tetee i faaosoosoga a le fili. Matou te faamalosiau atu ia te outou ia outou tauloto viiga e sili ona outou fiafia i ai ma suesue i mau e faatatau i ai. A oo ai ina oo mai ni mafaufauga le tatau ai i lou mafaufau, ona e usuusu lea o le pese ia te oe lava, ma uunai ese atu ai le leaga i le lelei.

Uso e ma tuafafine, ia tatou faaaoga viiga e aumai ai le Agaga o le Alii ia tatou potopotoga, o tatou aiga, ma o tatou lava olaga taitoatasi. Ia tatou taulotoina ma manatunatu i ai, taulotoina ma peseina, ma taumamafa ia latou tausiga faaleagaga. Ia outou mautinoa o le pese a le amiotonu o se tatalo lea i lo tatou Tama o i le Lagi, “ma o le a talia ma se faamanuiaga i luga o [outou] ulu.”

O Le Au Peresitene Sili