តើខ្ញុំអាចបន្តរៀនសូត្រនៅក្នុងសាសនាចក្របានតាមរបៀបណា ?
ការរៀនសូត្រ និង ការរស់នៅតាមដំណឹងល្អរបស់ព្រះយេស៊ូវគ្រីស្ទ គឺជាកិច្ចប្រឹងប្រែងពេញមួយជីវិត ។ អ្នកមិនចាំបាច់ត្រូវមានអារម្មណ៍ថា អ្នកត្រូវដឹងអ្វីគ្រប់យ៉ាងអំពីដំណឹងល្អពីមុនអ្នកទទួលពិធីបុណ្យជ្រមុជទឹក ឬ បន្ទាប់ពីអ្នកទទួលពិធីបុណ្យជ្រមុជទឹកហើយនោះទេ ។ ចំណេះដឹង និង ការយល់ដឹងរបស់អ្នកអំពីដំណឹងល្អនឹងកើនឡើងតាមពេលវេលា និង កិច្ចខិតខំនៅពេលអ្នកពឹងផ្អែកទៅលើព្រះអង្គសង្គ្រោះ ប្រែចិត្តពីអំពើបាប ហើយព្យាយាមបន្តរៀនសូត្រ និង បម្រើ ។ សមាជិកនៃសាសនាចក្របន្តរៀនសូត្រ និង រីកចម្រើនជាមួយគ្នា ។
អ្នកនឹងដឹងកាន់តែច្រើនអំពីដំណឹងល្អ និង អំពីព្រះឆន្ទៈរបស់ព្រះមានសម្រាប់អ្នក នៅពេលអ្នកថ្វាយបង្គំទ្រង់តាមរយៈការអធិស្ឋាន ការសិក្សាដំណឹងល្អ និង ការរក្សាថ្ងៃឈប់សម្រាក ។
ការសិក្សាដំណឹងល្អផ្ទាល់ខ្លួន និង ជាក្រុមគ្រួសារ
ការអធិស្ឋាន និង ការសិក្សាព្រះគម្ពីរជារៀងរាល់ថ្ងៃ នាំមកនូវសេចក្ដីសង្ឃឹម ។
អ្នកត្រូវបានលើកទឹកចិត្តឲ្យសិក្សាព្រះគម្ពីរជារៀងរាល់ថ្ងៃ ទាំងដោយខ្លួនឯង និង ជាក្រុមគ្រួសារ ។ ការអធិស្ឋាន និង ការសិក្សាព្រះគម្ពីរជារៀងរាល់ថ្ងៃ ធ្វើឲ្យអ្នកខិតទៅកាន់តែជិតព្រះ ហើយពង្រឹង ទីបន្ទាល់របស់អ្នក ។ ទីបន្ទាល់គឺជាសាក្សីខាងវិញ្ញាណមួយ ដែលព្រះវិញ្ញាណបរិសុទ្ធប្រទានឲ្យដល់បុគ្គលម្នាក់ៗ ។ ការអធិស្ឋាន និង ការអានព្រះគម្ពីរ យាងព្រះវិញ្ញាណបរិសុទ្ធចូលមកក្នុងជីវិតរបស់អ្នក ។ ការដឹកនាំពីព្រះវិញ្ញាណបរិសុទ្ធមានសារៈសំខាន់សម្រាប់ការរៀនសូត្រនៅក្នុងសាសនាចក្រព្រោះ « ដោយព្រះចេស្តានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្តីពិតនៃគ្រប់ការណ៍ទាំងអស់ » ( មរ៉ូណៃ ១០:៥ ) ។ ការអធិស្ឋាន និង ការសិក្សាព្រះគម្ពីរ អនុញ្ញាតឲ្យអ្នកបង្កើនការយល់ដឹងអំពីដំណឹងល្អកាន់តែច្រើន តាមរយៈ វិវរណៈផ្ទាល់ខ្លួន ឬ ទំនាក់ទំនងជាមួយព្រះ ដែលបានមកពីព្រះវិញ្ញាណបរិសុទ្ធ ។
សាសនាចក្រជួយអ្នកក្នុងការរៀនសូត្រដំណឹងល្អ ដោយផ្ដល់ឲ្យនូវធនធាននានាលើអ៊ិនធើរណែត មានដូចជាព្រះគម្ពីរ សារលិខិតមកពីព្យាការីកំពុងរស់នៅ និង សម្ភារលើកស្ទួយផ្សេងៗទៀត ( សូមមើល LDS.org ដើម្បីបានធនធានសិក្សាដទៃទៀត ) ។ អ្នកក៏អាចជាវព្រះគម្ពីរ ទស្សនាវដ្តីសាសនាចក្រ និង ធនធានដទៃទៀតរបស់សាសនាចក្រដែលមានតម្លៃថោកៗ ។
ទោះជាសាសនាចក្រផ្ដល់នូវឱកាសជាច្រើនដើម្បីរៀនសូត្រអំពីដំណឹងល្អក្ដី ក៏គេហដ្ឋានគឺជាទីកន្លែងសំខាន់បំផុតសម្រាប់ការរៀនសូត្រអំពីដំណឹងល្អដែរ ។ សមាជិកគ្រួសារមានការទទួលខុសត្រូវដើម្បីពង្រឹង ហើយគាំទ្រគ្នាទៅវិញទៅមកខាងវិញ្ញាណ ។ ព្រះវិញ្ញាណបរិសុទ្ធអាចជួយអ្នកឲ្យដឹង អំពីរបៀបបម្រើក្រុមគ្រួសាររបស់អ្នក ។ ឪពុកម្ដាយមានករណីយកិច្ចពិសេស ដើម្បីចិញ្ចឹមបីបាច់កូនចៅរបស់ខ្លួនដោយសេចក្ដីស្រឡាញ់ និង សេចក្តីសុចរិត ។ ពួកគេគួរតែ « បង្រៀន [ កូនចៅរបស់ខ្លួន ] ឲ្យចេះស្រឡាញ់ និង បម្រើគ្នាទៅវិញទៅមក ចេះគោរពព្រះបញ្ញត្តិទាំងឡាយនៃព្រះ ហើយធ្វើជាប្រជាពលរដ្ឋ ចេះគោរពច្បាប់គ្រប់ទីកន្លែងដែលពួកគេរស់នៅ » ( « ក្រុមគ្រួសារ ៖ ការប្រកាសដល់ពិភពលោក » Ensign ឬ Liahona ខែ វិច្ឆិកា ឆ្នាំ ២០១០ ទំព័រ ១២៩ ) ។
រាត្រីជួបជុំក្រុមគ្រួសារ
រាត្រីជួបជុំក្រុមគ្រួសារ ជួយឲ្យក្រុមគ្រួសាររីកចម្រើនក្នុងដំណឹងល្អ ។
សាសនាចក្រលើកទឹកចិត្តក្រុមគ្រួសារ ឲ្យរក្សារាត្រីថ្ងៃចន្ទទុកជារាត្រីសម្រាប់ជួបជុំក្រុមគ្រួសារ ។ កម្មវិធីនេះត្រូវបានហៅថា រាត្រីជួបជុំក្រុមគ្រួសារ ។ រាត្រីជួបជុំក្រុមគ្រួសារ អនុញ្ញាតឲ្យសមាជិកគ្រួសាររៀនអំពីដំណឹងល្អ ហើយរីករាយនឹងសកម្មភាពទាំងឡាយដែលស្អាងគ្នាទៅវិញទៅមក ។ វាក៏ជាពេលសម្រាប់ការអធិស្ឋាន ការច្រៀងចម្រៀង ការអានព្រះគម្ពីរ និង ការពិភាក្សាអំពីបញ្ហានានាដែលទាក់ទងនឹងសេចក្ដីត្រូវការរបស់គ្រួសារដែរ ។ សម្រាប់ធនធានដើម្បីជួយអ្នក និង គ្រួសារអ្នកឲ្យរៀបចំរាត្រីជួបជុំក្រុមគ្រួសារ សូមចូលទៅកាន់គេហទំព័រ lds.org/topics/family-home-evening ។
ក្រុមជំនុំជាច្រើនក៏អាចធ្វើកម្មវិធីរាត្រីជួបជុំក្រុមគ្រួសារ សម្រាប់យុវមជ្ឈិមវ័យនៅលីវ ដែលរស់នៅឆ្ងាយពីក្រុមគ្រួសារដែរ ។