ការថ្វាយបង្គំនៅថ្ងៃឈប់សម្រាក
ការទទួលទានសាក្រាម៉ង់ជារៀងរាល់ថ្ងៃអាទិត្យ នាំមកនូវភាពរឹងមាំខាងវិញ្ញាណ ។
ថ្ងៃឈប់សម្រាកគឺជាថ្ងៃដែលត្រូវបានញែក ដើម្បីគោរពប្រតិបត្តិដល់ព្រះអម្ចាស់ ។ ឥរិយាបថ និង អាកប្បកិរិយារបស់អ្នកនៅថ្ងៃនេះ បង្ហាញព្រះអំពីអារម្មណ៍ដែលអ្នកមានចំពោះទ្រង់ ។ អ្នកនឹងរីករាយនៅក្នុងព្រះអម្ចាស់នៅពេលអ្នក ធ្វើឲ្យថ្ងៃឈប់សម្រាកនៅក្នុងគេហដ្ឋានរបស់អ្នក មានសភាពខុសពីថ្ងៃដទៃទៀតអំឡុងសប្ដាហ៍ ។ សូមចូលរួមក្នុងសកម្មភាពនានាដែលពង្រឹងទំនាក់ទំនងក្រុមគ្រួសារ ដូចជាការបង្រៀនដំណឹងល្អដល់គ្នាទៅវិញទៅមក និង ការស្រាវជ្រាវឈ្មោះជីដូនជីតារបស់អ្នកបន្ថែមទៀត ។ ទស្សនាវដ្តី និង គេហទំព័រសាសនាចក្រមានដូចជា LDS.org មាននូវធនធានជាច្រើន ដែលអាចជួយអ្នកឲ្យថ្វាយបង្គំព្រះអម្ចាស់នៅក្នុងគេហដ្ឋានរបស់អ្នកនៅថ្ងៃរបស់ទ្រង់ ។ សូមសម្រាកពីការងារទាំងឡាយដែលអ្នកធ្វើអំឡុងសប្ដាហ៍ ហើយព្យាយាមផ្ដល់ការបម្រើដល់អស់អ្នកដែលរងទុក្ខ ឬ អ្នកដែលឯកោ ឬ អ្នកដែលត្រូវការជំនួយ ។ ឥរិយាបថដ៏ពេញដោយការគោរព និង ការថ្វាយបង្គំនៅក្នុងគេហដ្ឋានរបស់អ្នកនៅថ្ងៃឈប់សម្រាក បង្ហាញសេចក្ដីស្រឡាញ់ និង ការគោរពដល់ព្រះ ។
អ្នកក៏អាចគោរពថ្ងៃឈប់សម្រាក ដោយការចូលរួមការថ្វាយបង្គុំនៅព្រះវិហារនៅរាល់ថ្ងៃអាទិត្យដែរ ។ ផ្នែកដ៏សំខាន់បំផុតនៃការចូលរួមព្រះវិហារគឺ ពិធីសាក្រាម៉ង់ ។ អំឡុងការប្រជុំសាក្រាម៉ង់ នោះនំប៉័ង និង ទឹក ត្រូវបានប្រសិទ្ធពរ ហើយចែកដល់ក្រុមជំនុំ ទុកជាការរំឭកដល់ដង្វាយធួនរបស់ព្រះយេស៊ូវគ្រីស្ទ ។ នំប៉័ងតំណាងឲ្យព្រះកាយទ្រង់ រីឯទឹកតំណាងឲ្យព្រះលោហិតទ្រង់ ។ ពេលធ្វើពិធីបរិសុទ្ធនេះ អ្នកត្រូវបានរំឭកអំពីសេចក្ដីសញ្ញា ដែលអ្នកបានធ្វើជាមួយព្រះ ហើយអាចតាំងចិត្តដើម្បីរក្សាសេចក្ដីសញ្ញាទាំងនោះឡើងវិញ ។ បន្ទាប់ពីបានទទួលពិធីបុណ្យជ្រមុជទឹក និង ពីធីបញ្ជាក់ហើយ ពិធីសាក្រាម៉ង់ផ្ដល់ឲ្យអ្នកនូវឱកាសដើម្បីប្រែចិត្ត ឲ្យបានស្អាតស្អំពីអំពើបាប និង រក្សាឲ្យបានព្រះវិញ្ញាណបរិសុទ្ធជាដៃគូ ។ នៅពេលអ្នកទទួលទានសាក្រាម៉ង់ប្រកបដោយការពិចារណាជារៀងរាល់សប្ដាហ៍ ហើយស្ដាប់ការអធិស្ឋានសាក្រាម៉ង់ដោយប្រុងប្រយ័ត្ន អ្នកនឹងយល់អំពីដង្វាយធួនរបស់ព្រះយេស៊ូវគ្រីស្ទ និង សេចក្ដីសញ្ញារបស់អ្នកកាន់តែច្បាស់ ។
ព្រះនឹងមានព្រះបន្ទូលមកកាន់អ្នក តាមរយៈព្រះវិញ្ញាណបរិសុទ្ធ នៅពេលអ្នកចូលរួមការថ្វាយបង្គំនៅព្រះវិហារ ។ ឥរិយាបថដ៏ពេញដោយការគោរព រៀបចំខ្លួនអ្នកឲ្យស្គាល់គំនិត និង អារម្មណ៍នានា ដែលព្រះវិញ្ញាណបរិសុទ្ធប្រទានដល់អ្នក ។ របៀបមួយចំនួនដែលអ្នកអាចបង្ហាញការគោរពដល់ព្រះ រួមមានការមកដល់ព្រះវិហារឲ្យបានមុនម៉ោង ការអង្គុយដោយស្ងៀមស្ងាត់ និង ការផ្ដោតអារម្មណ៍ទៅលើការប្រជុំទាំងឡាយ ។ នៅពេលអ្នកផ្ដោតអារម្មណ៍ស្ដាប់សារលិខិត និង ទីបន្ទាល់របស់មនុស្សដទៃ និង ព្រះវិញ្ញាណបរិសុទ្ធ នោះចំណេះដឹង ព្រមទាំងទីបន្ទាល់របស់អ្នកនឹងរីកចម្រើន ។ ព្រះអម្ចាស់មានព្រះទ័យស្រឡាញ់អ្នក ហើយនឹងប្រទានពរអ្នកនៅពេលអ្នកបន្តចូលរួមព្រះវិហាររាល់សប្ដាហ៍ ទោះជាអ្នកកំពុងមានបញ្ហា ឬ មានអារម្មណ៍ថាបានធ្វើកំហុសក្ដី ។
ថ្នាក់យុវនារីសិក្សាដំណឹងល្អ ។
ការប្រជុំដទៃទៀតនៃសាសនាចក្ររួមមាន ថ្នាក់សាលាថ្ងៃអាទិត្យ សម្រាប់មជ្ឈិមវ័យ និង យុវវ័យ ក៏ដូចជាថ្នាក់ផ្សេងៗទៀតដែលបែងចែកជាក្រុមតូចៗ ។ នៅក្នុងការប្រជុំទាំងនេះ សមាជិកសាសនាចក្ររៀនសូត្រអំពីដំណឹងល្អជាមួយគ្នា សួរសំណួរ ហើយគាំទ្រគ្នាទៅវិញទៅមក ។ នៅពេលអ្នកចូលរួមព្រះវិហារជារៀងរាល់សប្ដាហ៍ អ្នកអាចរកឃើញចម្លើយសម្រាប់សំណួរ និង ដំណោះស្រាយចំពោះឧបសគ្គនានាដែលអ្នកមាន ។ អ្នកក៏នឹងរកឃើញភាពរឹងមាំដែរ នៅពេលអ្នកប្រាស្រ័យទាក់ទងជាមួយសមាជិកសាសនាចក្រ ។