តើខ្ញុំអាចបម្រើនៅក្នុងសាសនាចក្របានតាមរបៀបណា ?
ព្រះបានប្រទានឲ្យអ្នកនូវទេពកោសល្យ និង អំណោយទានពិសេសដែលអ្នកអាចប្រើដើម្បីជួយក្រុមជំនុំក្នុងមូលដ្ឋាន និងសហគមន៍របស់អ្នក ហើយបម្រើបុត្រាបុត្រីរបស់ព្រះនៅគ្រប់ទីកន្លែង ។ នៅពេលអ្នកព្យាយាមបំពេញតាមសេចក្ដីត្រូវការរបស់បុគ្គលម្ដងម្នាក់ៗ នោះអ្នកកំពុងធ្វើតាមគំរូរបស់ព្រះយេស៊ូវគ្រីស្ទ ។ ការបម្រើដ៏សំខាន់បំផុតមួយចំនួនដែលអ្នកនឹងផ្ដល់ គឺជាទង្វើនៃសន្តានចិត្តល្អ និង សេចក្ដីស្រឡាញ់ដែលក្រៅផ្លូវការ និង សាមញ្ញ ចំពោះបុគ្គលទាំងឡាយដោយមិនចាំបាច់មានការស្នើសុំ ឬ ការចាត់តាំងឲ្យធ្វើឡើយ ។ នៅពេលអ្នកចំណាយពេលវេលា ទេពកោសល្យ និង មធ្យោបាយដើម្បីជួយបំពេញសេចក្ដីត្រូវការរបស់ពួកគេ នោះអ្នកអាចជួយមនុស្សដទៃឲ្យស្គាល់សេចក្ដីស្រឡាញ់របស់ព្រះ ហើយរកឃើញសក្ដានុពលរបស់ពួកគេ ។ នៅពេលអ្នកបម្រើនៅក្នុងសាសនាចក្រ ហើយជួយមនុស្សដទៃឲ្យរៀន ហើយរីកចម្រើន នោះចំណែកមួយនៃភាពរីកចម្រើន និង ការរៀនសូត្រផ្ទាល់ខ្លួនរបស់អ្នកក៏នឹងកើនឡើងដែរ ។ នៅពេលអ្នកស្គាល់មនុស្សដទៃទៀតនៅក្នុងក្រុមជំនុំក្នុងមូលដ្ឋានរបស់អ្នក នោះអ្នកនឹងដឹងថា អ្នកមានអ្វីៗច្រើនដើម្បីផ្ដល់ជូនពួកគេ ។
ការហៅបម្រើនៅក្នុងសាសនាចក្រ
បន្ទាប់ពីអ្នកបានទទួលពិធីបុណ្យជ្រមុជទឹកហើយ អ្នកអាចនឹងទទួលបាន ការហៅបម្រើ ឬ ការចាត់តាំងជាផ្លូវការមួយឲ្យបម្រើនៅក្នុងសាសនាចក្រ ។ ព្រះជ្រាបអំពីភាពខ្លាំង និង ភាពខ្សោយរបស់អ្នក ។ ទ្រង់មានផែនការផ្ទាល់ព្រះអង្គមួយដើម្បីជួយអ្នក ឲ្យរីកចម្រើនក្លាយទៅជាបុគ្គលដែលទ្រង់ជ្រាបថាអ្នកអាចក្លាយទៅជាបាន ។ ជាផ្នែកមួយនៃផែនការនោះ ព្រះបំផុសគំនិតដល់ថ្នាក់ដឹកនាំសាសនាចក្រ ឲ្យចាត់តាំងការហៅបម្រើដល់អ្នក ជាការហៅបម្រើដែលទ្រង់ជ្រាបថានឹងផ្ដល់ពរឲ្យអ្នក ហើយអនុញ្ញាតឲ្យអ្នកផ្ដល់ពរដល់មនុស្សដទៃ ។ ការបម្រើនៅក្នុងការហៅរបស់សាសនាចក្រ អាចជួយអ្នកឲ្យបង្កើនចំណេះដឹង ជំនាញ និង មិត្តភាព ។ ថ្នាក់ដឹកនាំសាសនាចក្រនឹងផ្ដល់គោលការណ៍ណែនាំ ការដឹកនាំ និង ការគាំទ្រ ដើម្បីជួយអ្នកឲ្យរីករាយនឹងការហៅបម្រើនោះ ហើយបំពេញវាដោយជោគជ័យ ។ នៅពេលអ្នកអធិស្ឋានទូលសូមជំនួយ នោះព្រះវិញ្ញាណបរិសុទ្ធនឹងប្រទានការបំផុសគំនិត ការដឹកនាំ និង ការលួងលោមចិត្តដល់អ្នក ។
ព្រះអម្ចាស់បានមានព្រះបន្ទូលសន្យាថា « បើសិនជាពួកគេបន្ទាបខ្លួននៅចំពោះយើង ហើយមានសេចក្ដីជំនឿជឿដល់យើង លំដាប់នោះយើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ( អេធើរ ១២:២៧ ) ។ ព្រះអម្ចាស់នឹងធ្វើឲ្យអ្នករឹងមាំនៅក្នុងកិច្ចខិតខំរបស់អ្នកដើម្បីបម្រើ ។
ដំណើរការនៃការទទួលបានការហៅបម្រើ
សមាជិកត្រូវបានគាំទ្រឲ្យទទួលហៅបម្រើ នៅក្នុងការប្រជុំសាក្រាម៉ង់ ។
សាសនាចក្រគឺជាសហគមន៍នៃសេចក្ដីស្រឡាញ់ និង ការគាំទ្រ ។ នៅពេលអ្នកព្យាយាមបម្រើនៅក្នុងការហៅរបស់អ្នក នោះអ្នកនឹងមិនឯកោឡើយ ។ បន្ទាប់ពីអ្នកទទួលយកការហៅបម្រើមួយ សមាជិកក្នុងក្រុមជំនុំរបស់អ្នក នឹងបង្ហាញនៅក្នុងការប្រជុំសាក្រាម៉ង់ថា ពួកគេយល់ព្រម គាំទ្រ ឬជួយជ្រោមជ្រែងអ្នកក្នុងការហៅបម្រើ ។ សមាជិកបង្ហាញការគាំទ្រនេះតាមរយៈការលើកដៃស្ដាំ នៅពេលសមាជិកម្នាក់ក្នុងគណៈប៊ីស្សព ឬ គណៈប្រធានសាខាបានអញ្ជើញពួកគេឲ្យធ្វើដូចនោះ ។
ក្នុងនាមជាសមាជិកសាសនាចក្រ អ្នកក៏អាចគាំទ្រមនុស្សដទៃក្នុងការហៅបម្រើរបស់ពួកគេ តាមរយៈរបៀបជាច្រើនដែរ ។ ឧទាហរណ៍ អ្នកអាចចូលរួមក្នុងថ្នាក់ និង សកម្មភាពនានា ដែលរៀបចំដោយមនុស្សដទៃ អធិស្ឋានឲ្យពួកគេ ស្ម័គ្រចិត្តនៅពេលពួកគេសុំជំនួយឲ្យជួយក្នុងការហៅបម្រើរបស់ពួកគេ ឬ ពង្រឹងអ្នកទាំងឡាយណាដែលអាចនឹងកំពុងមានបញ្ហា ។ អ្នកក៏អាចគាំទ្រថ្នាក់ដឹកនាំសាសនាចក្ររបស់អ្នកបានដែរ តាមរយៈការធ្វើតាមការប្រឹក្សាដែលពួកលោកផ្ដល់ឲ្យ ។ ការគាំទ្រដល់មនុស្សដទៃគឺជារបៀបមួយនៃការបម្រើ ។
សមាជិកម្នាក់ត្រូវបានញែកចេញឲ្យទទួលការហៅបម្រើថ្មីមួយ ។
បន្ទាប់ពីបានទទួលការហៅបម្រើមួយហើយ អ្នកក៏នឹងត្រូវបាន ញែកចេញ ដោយថ្នាក់ដឹកនាំបព្វជិតភាពម្នាក់ដែរ ។ នៅពេលអ្នកត្រូវបានញែកចេញ អ្នកទទួលបាន ការប្រសិទ្ធពរបព្វជិតភាព ពិសេសមួយ ។ ការប្រសិទ្ធពរនេះផ្ដល់ឲ្យអ្នកនូវសិទ្ធអំណាចពីព្រះ ដើម្បីទទួលបានការបំផុសគំនិត ហើយធ្វើការចាត់តាំងនៃការហៅបម្រើរបស់អ្នក ។
ការហៅបម្រើទាំងអស់មានសារៈសំខាន់ស្មើគ្នា ហើយជួយស្ថាបនាសាសនាចក្ររបស់ព្រះ ។ ការបម្រើនៅក្នុងសាសនាចក្រ គឺជាការងារស្ម័គ្រចិត្ត ហើយគ្មានប្រាក់កម្រៃទេ ។ ក្រៅពីការហៅបម្រើជាអ្នកផ្សព្វផ្សាយសាសនាពេញម៉ោង ការហៅបម្រើភាគច្រើនពុំតម្រូវឲ្យមានការតាំងចិត្តធ្វើការពេញម៉ោងឡើយ ។ ទោះជាកំពុងបម្រើនៅក្នុងសាសនាចក្រក្ដី សមាជិកនៅតែបន្តធ្វើមុខរបរ និង ការងារចិញ្ចឹមជីវិតរបស់ខ្លួនដូចធម្មតា ។ ការហៅបម្រើពុំមានការដំឡើង ឬ ទម្លាក់តំណែងនោះទេ ហើយសមាជិកមិនគួរជាប់ចិត្តតែនឹងការហៅបម្រើជាក់លាក់ណាមួយឡើយ ។
ការផ្លាស់ប្ដូរនៅក្នុងការហៅបម្រើ អនុញ្ញាតឲ្យមនុស្សជាច្រើនបម្រើនៅក្នុងសមត្ថភាពខុសៗគ្នា ។ ថ្នាក់ដឹកនាំសាសនាចក្រអាចទទួលបានការបំផុសគំនិតឲ្យហៅអ្នក ដើម្បីទទួលការហៅបម្រើផ្សេងមួយទៀត និង ដើម្បី ដោះលែង អ្នកពីការហៅបម្រើដែលអ្នកកំពុងធ្វើ ។ នៅពេលអ្នកត្រូវបានដោះលែង អ្នកគ្មានការទទួលខុសត្រូវលើករណីយកិច្ចនៃការហៅបម្រើពីមុនទៀតឡើយ ហើយអាចទទួលការទទួលខុសត្រូវនៃការហៅបម្រើថ្មីមួយ ។ ក្រុមជំនុំរបស់អ្នកក៏អាចទទួលស្គាល់ការដោះលែងរបស់អ្នក ហើយថ្លែងអំណរគុណសម្រាប់ការបម្រើដែលអ្នកបានផ្ដល់ តាមរបៀបស្រដៀងទៅនឹងពេលដែលអ្នកត្រូវបានគាំទ្រដែរ ។