កិច្ចការផ្សព្វផ្សាយសាសនា
អ្នកអាចបម្រើមនុស្សដទៃ ហើយចែកចាយអំណរនៃដំណឹងល្អតាមរយៈការធ្វើ កិច្ចការផ្សព្វផ្សាយសាសនា ។ កិច្ចការផ្សព្វផ្សាយសាសនាត្រូវបានធ្វើឡើងដោយសេចក្ដីស្រឡាញ់របស់ព្រះ និង របស់បុត្រាបុត្រីទ្រង់ ហើយវាមាននូវការជួយមនុស្សដទៃឲ្យយល់ ហើយទទួលបានពរជ័យមកពីដំណឹងល្អរបស់ព្រះយេស៊ូវគ្រីស្ទដែលបានស្ដារឡើងវិញ (សូមមើល នីហ្វៃទី១ ៨:១២ ) ។
ព្រះយេស៊ូវគ្រីស្ទសព្វព្រះទ័យឲ្យមនុស្សគ្រប់គ្នា មានឱកាសទទួលយកដំណឹងល្អ ពីមុនទ្រង់យាងមកម្ដងទៀត ។ ទ្រង់បានត្រាស់បង្គាប់ពួកអ្នកដើរតាមទ្រង់ ឲ្យប្រកាសដំណឹងល្អរបស់ទ្រង់ទៅពាសពេញពិភពលោក ( សូមមើល ម៉ាថាយ ២៨:១៩ ) ។ នៅពេលអ្នកចែកចាយអ្វីដែលអ្នកបានរៀនសូត្រអំពីដំណឹងល្អដែលបានស្ដារឡើងវិញ ជាមួយក្រុមគ្រួសា និង មិត្តភក្តិរបស់អ្នក អ្នកអាចជួយព្រះអម្ចាស់ធ្វើកិច្ចការរបស់ទ្រង់ ហើយជួយមនុស្សជាច្រើនឲ្យទទួលបានពរជ័យនៃដំណឹងល្អ ។ ព្រះអម្ចាស់មានព្រះបន្ទូលសន្យាថានឹងជួយអ្នក ឲ្យដឹងពីសេចក្ដីដែលត្រូវនិយាយ និង ត្រូវធ្វើនៅពេលអ្នកចែកចាយដំណឹងល្អ ។
បន្ថែមពីលើការជួយមនុស្សដទៃឲ្យរកឃើញដំណឹងល្អ នោះទស្សនវិស័យ និង ទីបន្ទាល់របស់អ្នកនឹងក្លាយជាពរជ័យមហិមា ដល់សមាជិកដទៃទៀតក្នុងសាសនាចក្រ ។ អ្នកអាចជួយអ្នកទាំងឡាយណាដែលមានសេចក្ដីជំនឿទន់ខ្សោយ តាមរយៈការធ្វើជាមិត្តនឹងពួកគេ លើកទឹកចិត្តពួកគេ និងអញ្ជើញពួកគេឲ្យទៅព្រះវិហារជាមួយអ្នក ។ នៅក្នុងគ្រប់ទង្វើ ឬ ការចាត់តាំងរបស់អ្នកក្នុងសាសនាចក្រ សូមព្យាយាមអញ្ជើញមនុស្សគ្រប់គ្នាឲ្យមកកាន់តែជិតព្រះគ្រីស្ទ ។
ទោះជាការចែកចាយដំណឹងល្អជាមួយមនុស្សដទៃមានសារៈសំខាន់ក្ដី ពុំមានន័យថា មនុស្សគ្រប់គ្នានឹងទទួល យកអ្វីដែលអ្នកប្រាប់ពួកគេនោះទេ ។ សូមបង្ហាញមិត្តភាព សេចក្ដីស្រឡាញ់ និង ការគោរពដល់មនុស្សគ្រប់រូប ទោះជាពួកគេឆ្លើយតបទៅនឹងទីបន្ទាល់ ឬ ការអញ្ជើញរបស់អ្នកយ៉ាងដូចម្ដេចក៏ដោយ ។ នៅពេលអ្នករស់នៅតាមដំណឹងល្អយ៉ាងស្មោះត្រង់ អ្នកនឹងធ្វើជាគំរូ ហើយបង្ហាញដល់សមាជិកគ្រួសារ និង មិត្តភក្ដិរបស់អ្នក នូវពរជ័យមហិមាដែលកើតឡើងពីការរស់នៅតាមដំណឹងល្អ និង ការបម្រើព្រះ ។