Pasiuna

Katuyoan Niini nga Tun-anan

Ang tun-anan sa Kaminyoon ug mga Relasyon sa Banay giplano aron pagtabang sa mga sakop sa Simbahan nga malig-on ang mga kaminyoon ug mga banay ug makakaplag og hingpit nga kalipay diha sa ilang mga relasyon sa banay. Kini gibahin ngadto sa duha ka mga bahin. Bahin A, “Paglig- on sa mga Kaminyoon,” makatabang ilabi na sa minyo nga managtiayon ug alang sa mga sakop kinsa nangandam aron maminyo. Bahin B, “Mga Kapangakohan sa mga Ginikanan aron Paglig- on sa mga Banay,” motabang sa mga ginikanan ug sa mga apohan sa ilang mga pagpaninguha sa “pagmatuto sa [mga anak] sa pagbansay ug pagpahamatngon gikan sa Ginoo” (Mga Taga-Efeso 6:4).

Ang tun-anan gibase diha sa mga doktrina ug mga baruganan nga gitudlo diha sa mga kasulatan ug pinaagi sa mga propeta ug mga apostoles sa ulahing mga adlaw. Kini naghatag og espeyal nga gibug-aton sa “Ang Banay: Usa ka Pamahayag ngadto sa Kalibutan,” diin gilakip sa pahina iv niining giya sa pagtuon.

Alang sa kinatibuk-ang pagpasabut sa tun-anan, tan-awa sa mga pahina vii–viii. Gamita kining kinatibuk-ang pagsabut kanunay sa pagtuon pag-usab sa mga doktrina ug mga baruganan nga imong nakatunan ug sa pag-andam sa imong kaugalingon alang sa umaabut nga mga leksyon.

Ang Pagtambong sa Tun-anan Sumala sa Imong Kaugalingong mga Panginahanglan

Ikaw adunay katungod sa pagpili sa pagtambong sumala sa imong tinagsa nga mga panginahanglan. Sama pananglit, kon ikaw minyo apan walay mga anak, ikaw mahimong mopili sa pagtambong sa unang walo ka mga leksyon apan dili sa katapusan nga ika-walo. Kon ikaw nag-inusara nga ginikanan, ikaw mahimong mohukom sa pagtambong lamang sa mga leksyon diha sa bahin B.

Pag-apil diha sa Tun-anan

Pinaagi sa pagpili aron makaapil niining tun-anan, ikaw nakapakita og tinguha sa paglig-on sa imong banay. Aron makadawat sa hingpit nga kaayohan sa tun-anan, ikaw kinahanglan nga motampo sa mga panaghisgutan diha sa klase, gamita kining giya sa pagtuon, ug paningkamot sa paggamit sa mga dotrina ug mga baruganan nga imong nakat-unan.

Pagsalmot sa mga Panaghisgutan sa Klase

Samtang ikaw ug ang uban nga mga misalmot nagtampo sa mga panaghisgutan sa klase, ikaw makahimo sa pagdapit sa impluwensya sa Espiritu Santo ug magtudlo ug makahatag og kaayohan sa usag usa. Ang Ginoo miingon, “Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton ug managsama nga kahigayunan” (D&P 88:122).

Ang tanan kinsa miapil sa tun-anan makakat-on gikan sa matag usa, bisan pa sa ilang kasinatian uban sa kaminyoon o pagpadako sa mga anak. Ang inyong kasinatian diha sa lawak klasehanan mahimong labing magantihon samtang kamo makigbahin sa mga kasinatian nga may kalabutan nganha sa mga leksyon ug maminaw nga matinahuron kon ang uban mobuhat sa ingon. Samtang kamo magpamatuod sa mga kamatuoran nga gihisgutan, kamo makalig-on sa inyong pagpamatuod ug sa mga pagpamatuod sa uban. Bisan pa niana, ikaw kinahanglan nga magmabinantayon nga dili maghisgot og labing tinago o sagrado nga mga kasinatian nga dili angay alang sa panaghisgutan sa lawak klasehanan. Ikaw usab kinahanglan nga magbantay sa mga tagal sa panahon sa klase ug matuguton sa magtutudlo ug ubang mga sumasalmot.

Paggamit Niining Giya sa Paguton

Sa semana sunod sa matag leksyon, gamita kining giya sa pagtuon aron sa pagtuon pag-usab kon unsa ang imong nakat-unan. Ang giya sa pagtuon naglakip sa “Mga Ideya alang sa Paggamit,” nga mga sugyot aron sa pagtabang kanimo nga magpuyo sumala sa mga doktrina ug mga baruganan nga inyong nakat-unan sa matag leksyon. Agi og dugang, usa o duha ka mga artikulo sa Kinatibuk-ang mga Kadagkoan sa Simbahan nag-uban sa matag leksyon. Kon ikaw minyo, makadawat og mahinungdanon nga mga kaayohan gikan sa pagbasa ug paghisgot sa mga artikulo uban sa imong kapikas.

Pipila sa mga artikulo sa sinugdanan gihatag isip mga pamahayag sa kinatibuk-ang komperensya ug ubang mga kalihokan, ug ang uban gisulat alang sa mga magasin sa Simbahan. Tungod kay kini gikuha gikan sa nagkalainlaing mga publikasyon, gamay nga mga kausaban gikinahanglan aron paghimo sa pormat niining giya sa pagtuon nga managsama. Sama pananglit, pipila ka gipahiuna nga mga komentaryo nga gikuha gikan sa mga pakigpulong sa kinabtibukang komperensya, ug ang pipila ka mga ulohan ug mga pasabut giusab. Ang mga pagtulun-an nagpabilin nga wala mausab.

Paggamit sa mga Doktrina ug mg Baruganan nga Imong Nakat-unan

Dili kini igo ang pagkat-on lamang sa ebanghelyo. Aron ang ebanghelyo mahimong epektibo diha sa imong kinabuhi, ikaw kinahanglan gayud nga magbuhat sa inyong nakat-unan. Si Presidente Harold B. Lee, ang ika 11 nga Presidente sa Simbahan, mitambag:

“Ang tanang mga baruganan ug mga ordinansa sa ebanghelyo usa lamang ka paagi sa mga pagdapit sa pagkat-on sa ebanghelyo pinaagi sa pagsunod sa mga pagtulun-an sa ebangyelyo. Walay tawo nga nasayud sa baruganan sa ikapulo hangtud nga siya mobayad sa ikapulo. Walay usa nga nasayud sa baruganan sa Pulong sa Kaalam hangtud nga siya mosunod sa Pulong sa Kaalam. Mga bata. o mga hingkod usab, dili makabig ngadto sa ikapulo, sa Pulong sa Kaalam, sa pagbalaan sa Igpapahulay nga adlaw, o pag-ampo pinaagi sa pagpaminaw sa usa ka tawo nga nagsulti mahitungod niini nga mga baruganan. Kita makakaton sa ebanghelyo pinaagi sa pagsunod niini….

“… Kita sa tinuod wala gayud makahibalo sa bisan unsa nga butang sa mga pagtulun-an sa ebanghelyo hangtud nga kita makasinati sa mga panalangin nga moabut gikan sa pagsunod sa matag baruganan” (Stand Ye in Holy Places [1974], 215)

Dugang nga mga Kapanguhaan

Ang mosunod nga gihimo sa Simbahan nga mga kapanguhaan naghatag og dugang nga kasayuran diha sa mga hilisgutan nga gihisgutan niini nga tunanan. Kini makuha pinaagi sa mga sentro sa tig-apudapud sa Simbahan. Ikaw mahimo nga makabaton niining mga publikasyon ug mogamit niini sa inyong panimalay.

Sumbanan nga Basahon sa Banay (31180). Kining sumbanan nga basahon naghulagway sa pagkatukod sa banay, naghatag og kasayuran mahitungod sa pagtudlo sa ebanghelyo diha sa panimalay, ug naglatid sa mga paagi alang sa mga ordinansa ug mga panalangin sa pagkapari.
Mga artikulo mahitungod sa kaminyoon ug sa banay diha sa mga magasin sa Simbahan.
Family Home Evening Resource Book (31106). Kini nga basahon makatabang sa mga ginikanan ug mga anak sa pag-andam sa mga leksyon alang sa gabii sa banay (mga pahina 3–160, 173–232). Kini naglangkob sa mga ideya aron sa paghimo sa gabii sa banay nga malampuson (mga pahina 163–70) ug naglakip og mga sugyot alang sa pagtudlo og piho nga mga baruganan ug mga kapangakohan ngadto sa mga anak (mga pahina 235–62). Kini usab naglangkob og mga ideya alang sa mga kalihokan sa banay (mga pahina 265–340).
Teaching, No Greater Call (36123). Kini nga kapanguhaan naglankob sa mga baruganan ug praktikal nga mga sugyot aron pagtabang sa mga sakop sa Simbahan sa pagpalambo isip mga magtutudlo sa ebanghelyo. Bahin D. “Pagtudlo diha sa Panimalay” (mga pahina 125–48), makatabang kaayo sa mga ginikanan.
Sumbanan nga Basahon sa Pagtudlo (34595). Kining sumbanan nga basahon naghatag og mga sugyot alang sa pagpalambo sa pagtudlo ug pagkat-on sa ebanghelyo
For the Strenght og Youth (34285). Kining gamay nga basahon naglatid sa mga sumbanan sa Simbahan alang sa pagpakig-date, pagsinina ug pamarug, pagpakighigala, pagkamatinud-anon, sinultihan, medya, mental ug kahimsog sa panglawas, musika ug pagsayaw, sekswal nga kaputli, pamatasan sa Domingo, paghinulsol, katakus, ug pangalagad.
A Parents Guide (31125). Kining sumbanan nga basahon naglangkob sa mga sugyot aron sa pagtabang sa mga ginikanan aron pagtudlo sa ilang mga anak mahitungod sa pisikal nga kasuod.
Guidebook for Parents and Guardians of Handicapped Children (31123). Kining sumbanan nga basahon naghatag og tambag alang sa mga banay uban sa mga anak kinsa adunay mga kakulangan. Kini usab naglangkob og kasayuran mahitungod sa gihimo nga mga materyal sa Simbahan aron sa pagtabang sa mga ginikanan ug sa uban kinsa nagtudlo niadtong adunay mga kakulangan.
Cornerstone of a Happy Home (33108). Kining gamay nga basahon naglangkob sa usa ka pakigpulong nga gihatag ni Presidente Gordon B. Hinckley samtang siya nag-alagd isip Ikaduhang Magtatambag sa Unang Kapangulohan.
Being a Righteous Husband and Father (35402). Kining gamay nga basahon naglangkob sa usa ka pakigpulong nga gihatag ni Presidente Howard W. Hunter, ang ika-14 nga Presidente sa Simbahan.
One for the Money: Guide to a Family Finance (33293). Kining gamay nga basahon, ni Elder Marvin J. Ashton sa Korum sa Napulog Duha ka mga Apostoles, naghatag og praktikal nga mga sugyot sa pagdumala sa mga panalapi sa banay.