Leksyon 11

Ang Sagrado nga mga Tahas sa mga Amahan ug mga Inahan

Bahin 2: Mga Tahas sa Inahan

Mga Ideya alang sa Paggamit

Sumala sa inyong kaugalingon nga mga panginahanglan ug mga kahimtang, sunda ang usa o duha niining mga sugyot.

Sa pahayag diha sa banay, kita gitambagan nga “ang mga amahan ug mga inahan mga obligado sa pagtabang sa usag usa isip managsama nga mga managkauban” (tan-awa sa pahina iv niini nga giya sa pagtuon). Uban sa inyong kapikas, tun-i pag-usab ang 10 ka mga sugyot alang sa mga amahan ni Presidente Ezra Taft Benson, sa mga pahina 47–48 niini nga giya sa pagtuon, ug sa iyang 10 ka mga sugyot alang sa mga inahan, diha sa mga pahina 52–54. Paghisgot og mga paagi nga kamo makatambayayong ug makabulig sa usag usa dinhi niini nga mga kapangakohan.
Paghimo og usa ka sulat ngadto sa inyong inahan o ngadto sa usa ka apohan nga babaye.

Buluhaton sa Pagbasa

Tun-i ang mosunod nga mga artikulo. Kon ikaw minyo, basaha ug hisguti ang mga artikulo uban sa inyong kapikas

“Tungod kay Siya Usa ka Inahan

Elder Jeffrey R. Holland
Sa Korum sa Napulog Duha ka mga Apostoles

Pasidungog ngadto sa mga Inahan

Adunay pipila ka mga linya nga gipahinungod ngadto ni Victor Hugo nga mabasa:

“ Siya mibuak sa pan ngadto sa duha ka mga bahin ug gihatag kini sa iyang mga bata, kinsa mikaon uban sa kahinam. ‘Siya wala magbilin alang sa iyang kaugalingon,’ mibagulbol ang sarhento.

“ ‘Tungod kay siya wala gutoma,’ miingon ang usa ka sundalo.

“ ‘Dili,’ miingon ang sarhento, ‘tungod kay siya usa ka inahan.’ ”

Diha sa tuig nga kita nagsaulog sa hugot nga pagtuo ug kaisog niadtong kinsa mihimo nianang malisud nga pagpanaw sa karomata tabok sa Iowa, Nebraska, ug Wyoming, Ako buot nga mohatag og pahinungod ngadto sa bag-ong nga mga katugbang niadtong unang lumulupyo nga mga inahan kinsa nag-atiman, nag-ampo alang sa, ug sa kasagaran milubong sa ilang gagmay nga mga bata nianang taas nga dalan. Ngadto sa mga babaye nga maabut sa tunog sa akong tingog kinsa mapinanggaon nga paagi buot mahimong mga inahan apan dili mahimo, ako moingon pinaagi sa inyong mga luha ug sa amo diha niana nga hilisgutan, ang Dios unya, sa mga adlaw nga umaabut sa usa ka dapit sa unahan, mohatag og “paglaum ngadto [sa] magul-anon nga kasingkasing.”¹ Ingon sa gibalikbalik sa pagtudlo sa mga propeta gikan niini nga pulpito, sa katapusan “walay panalangin nga pagapugngan” gikan sa matinud-anon, bisan kon kadtong mga panalangin dili dihadiha nga moabut.² Sa kasamtangan kami nagmaya nga ang pagtawag sa pag-amuma dili lamang kutob sa atong kaugalingon nga mga anak.

Sa paghisgot bahin sa mga inahan ako wala makalimot sa mahinungdanon, nga tahas sa mga amahan, ilabi na kon walay amahan sa sama nga mga panimalay giisip sa pipila nga mao ang “ang sentro sa problema sa katilingban sa atong panahon.”³ Sa pagkatinuod, ang walay amahan mahimong usa ka problema bisan diha sa usa ka panimalay diin ang amahan mutonga lang kon mokaon ug matulog, nga mao ang paga-ingnon, “ang mga amahan niini nga mga kahimtang dili moapil sa kalihokan uban sa ilang mga banay.” Apan kana ang mensahe sa pagkapari alang sa lain nga adlaw. Karon ako buot nga modayeg niadtong mga kamot sa inahanon nga mitabyog sa duyan sa masuso nga bata ug, pinaagi sa pagkamatarung nga gitudlo sa ilang mga anak diha, mao ang labing mahinungdanon sa mga katuyoan sa Ginoo alang kanato dinhi sa pagkamortal.

Sa pagsulti sa ingon ako modason ni Pablo, kinsa misulat sa pagdayeg sa “tinuod nga pagtuo ni Timoteo…, nga sa sinugdanan,” siya miingon, “diha sa imong apohang babaye nga Loida , ug [sa] imong inahan nga si Eunice.”⁴ “Sukad [sa] imong pagkabata,” si Pablo miingon, “ikaw nakasabut na sa balaan nga kasulatan.”⁵ Kami mohatag og pasalamat sa tanan nga mga inahan ug apohan nga babaye diin ang mao nga mga kamatuoran nakat-unan sa sayo nga pangidaron.

Mga Sakripisyo nga Gihimo sa Batan-ong mga Inahan

Sa paghisgot sa kinatibuk-an kabahin sa mga inahan, ako buot nga modayeg ug moawhag sa batanong mga inahan. Ang buhat sa usa ka inahan malisud, sa kasagaran kini usa ka buhat nga walay usa nga mopasalamat. Ang unang mga katuigan sa kasagaran mao kadtong bisan ang bana o asawa—o ang duha—nagtungha pa gihapon sa tulunghaan o diha sa labing sayo ug labing malisud nga mga panahon sa pagpalambo sa mga kasarang sa bana sapagpangita og kabuhian. Ang mga panalapi sa banay nagkalahi sa matag adlaw gikan sa pagka adunay gamay ngadto sa pagka wala. Ang balay abangan sa kasagaran gidayandayanan sa usa o duha ka madanihon nga mga desinyo—Mga kagamitan gikan sa mga tindahan sa mga ginamit na. (Second Hand Stores) Ang sakyanan, kon adunay usa, nga magdagan sa upaw nga ligid ug walay sulod nga tanke. Apan uban sa gabii nga mga pagpakaon ug gabii nga mga pagpatutoy, sa kasagaran mao ang labing dako nga hagit sa tanan alang sa usa ka batan-ong inahan ang hilabihang kakapoy. Niining mga katuigan, ang mga inahan magpadayon nga kulang sa katulog ug mohatag og labaw pa sa uban sa walay personal nga pagbag-o alang sa ilang mga kaugalingon kay sa bisan kinsa nga laing pundok nga akong nahibaloan sa bisan asa nga ubang higayon sa kinabuhi. Dili kini ikatingala kon ang mga anino ubos sa ilang mga mata usahay mag-anam kaayo og kadako.

Sa dayag ang kalisud mao nga sa kasagaran ang igsoong babaye ang atong buot nga tawagon— o gikinahanglan nga tawagon—sa pagpangalagad sa mga kaabag sa purok o istaka. Kana masabtan. Kinsa ang dili buot nga mahimo nga panig-ingnan nga impluwensya niining mga batan-on nga mga Loida—ug mga Eunice-diha-sa-paghimo? Matag usa, pagmanggialamon. Hinumdumi nga ang mga banay mao ang labing una sa tanan, ilabi na niadtong nagtubo nga mga katuigan. Bisan og batan-on kaayo, ang mga inahan sa gihapon makakita og maanindot nga mga paagi aron pag-alagad nga matinud-anon diha sa Simbahan, bisan sama sa uban moalagad ug molig-on kanila ug sa ilang mga banay sa sama nga paagi.

Buhata ang labing maayo kutob sa inyong mahimo niining mga katuigan, apan bisan og unsa ang uban ninyong buhaton, mahala kana nga tahas nga talagsaon kaayo nga inyo ug diin ang langit mismo mopadala og mga anghel sa pagbantay kaninyo ug sa inyong gagmay nga mga anak. Mga bana—ilabina sa mga bana—ingon man usab sa mga pangulo sa Simbahan ug mga higala sa matag padulnganan, pagmatinabangon ug pagmabination ug pagmaalamon. Hinumdumi, “Adunay panahon alang sa tanang butang, ug panahon alang sa tagsa-tagsa ka tuyo ilawom sa langit.”⁶

Mga inahan, kami miila ug mitamud sa inyong hugot nga pagtuo sa matag lakang. Palihug hibaloi nga takus kini kaniadto, karon, ug sa kahangturan. Ug kon, alang sa bisag unsa nga katarungan, kamo nag-inusara niining maisugon nga paningkamot, nga wala ang inyong bana sa inyong kiliran, diha ang among mga pag-ampo mahimo ang tanan mahinungdanon alang kaninyo, ug ang among tinguha sa pagtunol og matinabangon nga kamot gani labaw pa nga matinud-anon.

Ang mga Inahan Naghimo sa Buluhaton sa Dios

Usa ka batan-on nga inahan dili pa dugay nga misulat kanako nga ang iyang kabalaka adunay tulo ka mga bahin. Ang una mao nga sa panahon nga siya makadungog og mga sulti kabahin sa SUA (Santos sa Ulahing mga Adlaw) nga pagkainahan, siya nabalaka tungod kay siya mibati nga siya wala sa gikinahanglan nga mga kahanas. Ikaduha, siya mibati nga ang kalibutan nagpaabut kaniya sa pagtudlo sa iyang mga anak sa pagbasa, pagsulat, desinyo sa sulod sa panimalay, Latin, calculus, ug sa Internet—ang tanan sa dili pa ang gamay nga bata nga makasulti og usa ka butang nga ordinaryo kaayo, sama sa “goo goo”. Ikatulo, siya sa kasagaran mibati nga ang mga katawhan usahay mohilig, hapit kanunay nga walay kahulugan nga mahimo, tungod kay ang tambag nga iyang nadawat o gani ang mga pahalipay nga iyang nadawat ingon og dili mohulagway sa mental nga pamuhunan, ang espirituhanon ug emosyonal nga panlimbasog, ang panginahanglan nga mohangtud sa tibuok adlaw ug gabii ug mohurot sa tanang kusog sa usa ka tawo nga usahay gikinahanglan sa pagsulay nga mahimo ug buot nga mahimo nga inahan nga gilauman sa Dios nga siya mahimo.

Apan usa ka butang, siya miingon, nga nakapadayon kaniya: “Bisan sa maayo ug dautan nga mga panahon niini, ug bisan karon ug unya sa mga luha niining tanan, ako nasayud diha sa kahiladman nga ako naghimo sa buhat sa Ginoo. Ako nasayud nga diha sa akong pagka inahan ako anaa sa mahangturon nga pagpakig-uban Kaniya. Ako natandog kaayo nga ang Dios nakakaplag sa Iyang katapusan nga katuyoan ug kahulugan nga nahimong usa ka ginikanan, bisan kon ang pipila sa Iyang mga anak nakapahimo Kaniya sa pagbakho.

“Dinhi niini nga katumanan,” siya miingon, “nga ako mosulay sa paghinumdom niadtong dili kalikayan nga malisud nga mga adlaw sa diha nga ang tanan niini masanapon. Tingali tungod kini sa atong kakulangan ug pagkadili mabalak-anon nga nagawhag kanato sa pagkab-ot ngadto Kaniya ug mopadali sa Iyang kahanas sa pagkab-ot balik kanato. Tingali Siya sa tago nga paagi naglaum nga kita mahimo nga mabalak-on,” siya miingon, “ug mohimo og pangamuyo alang sa Iyang panabang. Dayon, ako motuo, Siya makatudlo niining mga bata sa laktud, pinaagi kanato, apan walay pagsupak nga gihatag. Gusto ako niana nga ideya,” siya mitapos. Kini naghatag kanako og paglaum. Kon ako magpuyo sa matarung nga paagi sa atubangan sa akong Amahan sa Langit, tingali ang Iyang paggiya sa atong mga anak mahimong dili mapugngan. Tingali dayon kini mahimong Iyang buhat ug Iyang himaya diha sa usa ka tinuod kaayo nga panabut.”⁷

Ang Inyong mga Anak Motawag Kaninyo nga Bulahan

Sumala niana nga mabination nga pagpahayag, kini tin-aw nga ang pipila niadtong dagko nga mga landong sa ilawom sa mga mata miabut dili lamang gikan sa pag-ilis og lampin ug paghatud sa mga bata sa tulunghaan o mga kalihokan ug pagpulipuli og padagan sa sakyanan sa paghatud sa pundok sa mga bata ngadto sa tulunghaan o mga kalihokan apan gikan sa dili mokubos walay kinatulgan nga mga gabii nga nagugol sa pag-ampo, matinguhaon nga nangita alang sa kasarang sa pagpadako niining mga bata aron mahimo kon unsa ang buot sa Dios nga sila mahimo. Gipalihok niana nga matang sa debosyon ug determinasyon, mahimo ba nga ako moingon ngadto sa mga inahan sa tiningub nga paagi, diha sa ngalan sa Ginoo, kamo talagsaon. Kamo nagbuhat og maayo kaayo. Ang pagkatinuod gayud nga kamo natagaan sa ingon nga kapangakohan mao ang walay katapusan nga kamatuoran sa pagsalig sa inyong Amahan sa Langit nga anaa kaninyo. Siya nasayud nga ang inyong pagpakatawo sa usa ka bata dili dayon diha-diha nga makahimo kaninyo nga makahibalo sa tanan; makahimo kaninyo nga usa sa linain nga mga tawo kinsa nasayud sa tanan nga butang.⁵ Kon kamo ug ang inyong bana maninguha sa paghigugma sa Dios ug magpuyo sa ebanghelyo sa inyong mga kaugalingon; kon kamo mangamuyo alang niana nga paggiya ug kahupayan sa Espiritu Santo nga gisaad ngadto sa matinud-anon; kon kamo moadto sa templo aron kamong duha mohimo ug moangkon sa mga panaad sa labing sagrado nga mga pakigsaad nga mahimo sa usa ka babaye o lalaki niini nga kalibutan; kon kamo makapakita sa uban, lakip sa inyong mga anak, ang sama ka maamumahon, mapuanguron, mapasayloon nga kasingkasing nga buot ninyong ipakita sa langit diha kaninyo; kon ikaw mosulay sa inyong labing maayo nga mahimong labing maayo nga ginikanan kutob sa inyong mahimo, kamo nakabuhat sa tanan nga mabuhat sa usa ka tawo ug sa tanan nga gipaabut sa Dios nga inyong buhaton.

Usahay ang desisyon sa usa ka bata o apo nga bata makabuak sa inyong kasingkasing. Usahay ang mga gipaabut dili dayon dihadiha matuman. Matag inahan ug amahan mabalaka mahitungod niana. Bisan kana nga gihigugma ug talagsaon nga nagmalampuson nga ginikanan si Presidente Joseph F. Smith nangamuyo, O! Dios, ayaw itugot nga akong mawala ang mga ako.”⁸ Kana mao ang pangamuyo sa matag ginikanan, ug diha niana mao ang usa ka butang nga gikahadlokan sa matag ginikanan. Apan walay usa nga napakyas kinsa kanunay nga misulay ug kanunay nga nag-ampo. Kamo adunay matag katungod sa pagdawat og pag-awhag ug sa pagkahibalo nga sa kaulahian ang inyong mga anak motawag sa inyong ngalan nga bulahan, sama niadtong mga kaliwatan sa nag-una nga mga inahan sa wala pa kamo kinsa milaum sa sama nga mga paglaum ug mibati sa sama nga mga kahadlok.

Ang inyo mao ang labing taas nga tradisyon ni Eva, ang inahan sa tanan nga tawhanon nga banay, ang usa kinsa nakasabut nga siya ug si Adan kinahanglan nga mapukan aron nga ang“mga lalaki [ug mga babaye] mahimo”⁹ ug nga aron adunay hingpit nga kalipay. Inyo mao ang labing taas nga tradisyon ni Sarah ug Rebekah ug Rachel, kon wala pa sila wala unta kadtong talagsaong patriyarkal nga mga saad ngadto ni Abraham, Isaac, ug Jacob nga mipanalangin kanatong tanan. Inyo mao ang labing taas nga tradisyon ni Loida ug Eunice ug sa mga inahan sa 2,000 ka mga batan-ong mga manggugubat. Inyo mao ang labing taas nga tradisyon ni Maria, gipili ug gi-orden nang daan gikan sa wala pa kini nga kalibutan, sa pagsabak, pagdala, ug sa pagpanganak sa Anak sa Dios sa Iyang kaugalingon. Kami nagpasalamat kaninyo nga tanan, lakip ang among kaugalingon nga mga inahan, ug mosulti kaninyo nga walay labaw pa ka mahinungdanon dinhi niining kalibutan kay sa pag-apil dihadiha sa buhat ug himaya sa Dios, sa pagpahinabo sa pagka-mortal ug kalibutanon nga kinabuhi sa Iyang anak nga mga babaye ug anak nga mga lalaki, aron ang pagka-imortal ug kinabuhing dayon makaabut ngadto sa celestial nga mga kalibutan sa kahitas-an.

Salig sa Manluluwas Hangtud sa Kahangturan

Kon kamo nakaduol sa Ginoo sa kaaghup ug kapainubsanon sa kasingkasing ug, ingon sa gisulti sa usa ka inahan, “mitoktok sa mga pultahan sa langit aron sa pagpangayo, sa pagpangamuyo, sa paghangyo og giya ug kaalam ug panabang alang niining katingalahan nga tahas,” kana nga pultahan pagaablihan aron paghatag kaninyo sa impluwensya ug sa tabang sa tanan nga kahangturan. Angkona ang mga saad sa Manluluwas sa kalibutan. Pangayoa ang makaayo nga balsamo sa Pag-ula alang sa bisag unsa nga nagsamok kaninyo o sa inyong mga anak. Hibaloi nga sa hugot nga pagtuo ang mga butang mahimo nga matarung bisan pa man kaninyo o, labaw pa sa husto nga paagi, tungod kaninyo.

Kamo dili makahimo niini nga mag-inusara, apan kamo adunay gihatag nga tabang. Ang Ginoo sa Langit ug Yuta anaa aron sa pagpanalangin kaninyo— Siya kinsa sa matinguhaon nga paagi; mangita sa nawala nga karnero, manilhig pag-ayo aron makit-an ang nawala nga sensilyo, naghulat nga walay hunong alang sa pagbalik sa mausikon nga anak. Ang inyo mao ang buhat sa kaluwasan, ug busa kamo padakon, pagagantihan, himoon nga labaw pa kay sa unsa kamo ug labaw pa ka maayo kay sa inyong nahimo sukad samtang kamo maninguha sa paghimo og matinud-anon nga paningkamot, bisan unsa ka huyang nga usahay inyong bation.

Hinumdumi, hinumdumi ang tanang mga adlaw sa inyong pagkainahan: “Kay kamo wala pa makaabut niini nga gilay-on gawas kon kini pinaagi sa pulong ni Kristo uban sa dili matarug nga hugot nga pagtuo diha kaniya, mosalig sa hingpit diha sa mga maayo nga buhat kaniya kinsa gamhanan sa pagluwas.”¹⁰

Salig diha Kaniya. Salig diha Kaniya pag-aayo. Salig Diha sa kahangturan. Padayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum.”¹¹ Kamo nagbuhat sa buhat sa Ginoo. Kamo nagbuhat niini sa talagsaon. Siya mipanalangin kaninyo ug Siya mopanalangin kaninyo, bisan pa—dili, ilabi na—kon ang inyong mga adlaw ug inyong mga gabii mahimong labing mahagiton. Sama sa babaye kinsa wala magpaila, sa maaghop nga paagi, tingali bisan pa sa pagduhaduha ug pipila ka kaulaw, nakigbisog sa iyang agianan agi sa pundok aron lamang sa paghikap sa sidsid sa sapot sa Magtutudlo, aron si Kristo moingon ngadto sa mga babaye kinsa nabalaka ug nahibulong ug usahay mohilak ibabaw sa ilang kapangakohan isip mga inahan, “Anak nga babaye, pagkalipay; ang imong pagsalig nakapaayo kanimo.”¹² Ug ingon man usab kini makaayo sa inyong mga anak.

Gikan sa usa ka pakigpulong ni Elder Jeffrey Holland sa Abril 1997 nga kinatibuk-ang komperensya sa Simbahan (tan-awa sa Conference Report, Abr. 1997, 46–49; o Ensign, Mayo 1997, 35–37).

Ngadto sa mga Inahan diha sa Zion

Presidene Ezra Taft Benson
Ika 13 nga Presidente sa Simbahan

Mga inahan sa Zion, ang inyong hinatag sa Dios nga mga tahas mahinungdanon kaayo nganha sa inyong kahimayaan ug sa kaluwasan ug kahimayaan sa inyong banay. Ang usa ka bata nagkinahanglan og inahan labaw pa kay sa tanang mga butang nga mapalit sa salapi. Ang paggahin og panahon uban sa inyong mga anak mao ang labing mahinungdanon nga gasa sa tanan.

Uban sa gugma sa akong kasingkasing alang sa tanan nga mga inahan sa Zion, ako karon buot nga mosugyot og napulo ka tino nga mga paagi nga ang atong mga inahan mahimong makagahin og epektibo nga panahon alang sa ilang mga anak.

Kanunay nga anaa sa tibuok kinabuhi sa imong anak. Una, paggahin og panahon nga anaa kanunay diha sa kinabuhi sa imong mga anak bisan kon moabut o molakaw—kon sila mobiya ug mobalik gikan sa tulunghaan, kon sila mobiya ug mobalik gikan sa mga pakigdate, kon sila modala og mga higala sa panimalay. Kanunay nga anaa sa ilang mga kinabuhi bisan kon ang imong mga anak unom o napulog unom ka tuig. Sa mga Proverbio atong mabasa, “Ang usa ka bata nga pasagdan lamang sa iyang kaugalingon nagapakaulaw sa iyang inahan” (Mga Proverbio 29:15). Uban sa labing dako nga mga kabalaka sa atong katilingban mao ang mga minilyon ka mga anak sa nagtrabaho nga mga ginikanan kinsa mopauli sa panimalay sa matag adlaw ngadto sa walay sulod nga mga balay, nga walay pagdumala sa nagtrabaho nga mga ginikanan..

Pagmatinud-anon nga Higala. Ikaduha, mga inahan, paggahin og panahon nga mahimong usa ka tinuod nga higala sa inyong mga anak. Paminaw ngadto sa inyong mga anak, paminaw nga matinudanon. Pagpakigsulti uban kanila, katawa ug kumedya uban kanila, kanta uban kanila, pakigdula uban kanila, hilak uban kanila, gaksa sila, dayga sila sa matinud-anon nga paagi. Oo, sa naandan paggahin og dili dinalian nga tagsa tagsa nga panahon uban sa matag anak. Pagmatinud-anon nga higala ngadto sa inyong mga anak.

Pakigbasa ngadto sa Imong mga Anak. Ikatulo, mga inahan, paggahin og panahon sa pagbasa ngadto sa inyong mga anak. Pagsugod gikan sa duyan, pagbasa ngadto sa inyong anak nga mga lalaki ug anak nga mga babaye. Hinumdumi kon unsa ang giingon sa magbabalak:

Mahimong ikaw adunay dili ikasulti nga mahikap nga katigayunan;
Mga kaban sa mga alahas ug mga kaban sa bulawan.
Ikaw dili makahimo nga molabaw pagkadato kanako— 
Ako adunay inahan kinsa mobasa kanako. 

(Strickland Gillilan, “The Reading Mother.”)

Ikaw motanom og gugma alang sa maayo nga literatura ug usa ka tinuod nga gugma sa mga kasulatan kon ikaw mobasa ngadto sa imong mga anak kanunay.

Pag-ampo uban sa Inyong mga Anak. Ikaupat, paggahin og panahon sa pag-ampo uban sa inyong mga anak. Banay nga pag-ampo, ubos sa pagdumala sa amahan, kinahanglan nga himoon buntag ug gabii. Ipabati sa inyong mga anak nga mobati sa inyong hugot nga pagtuo samtang kamo motawag sa mga panalangin sa langit diha kanila. Pagsulti pag-usab sa mga pulong ni Santiago, “Ang pagpangamuyo sa matarung nga [inahan] dakong kahimoan inig-ampo niya” (Santiago 5:16). Himoa nga ang inyong mga anak moapil sa banay ug personal nga pag-ampo ug magmaya diha sa ilang matam-is nga mga paglitok ngadto sa ilang Amahan sa Langit.

Paghimo og Matag Semana nga mga Gabii sa Banay. Ikalima, paggahin og panahon aron sa paghimo og makahuluganon nga senemana nga gabii sa banay. Uban sa inyong bana nga nagdumala, apil sa espirituhanon ug usa ka makapabayaw nga gabii sa banay matag semana. Paapila ang inyong mga anak sa aktibo nga paagi. Tudloi sila sa husto nga mga baruganan. Himoa kini nga usa sa inyong mahinungdanong mga tradisyon sa banay. Hinumdumi ang katingalahan nga saad nga gihimo ni Presidente Joseph F. Smith sa diha nga ang mga gabii sa banay una nga gipaila sa Simbahan: “Kon ang mga Santos motuman niini nga tambag, kami mosaad nga mahinungdanon nga mga panalangin moabut. Gugma diha sa panimalay ug patahud ngadto sa mga ginikanan motubo. Ang hugot nga pagtuo mapalambo diha sa mga kasingkasing sa mga batan-on sa Israel, ug sila makaangkon og gahum sa pagpakig-away sa dautan nga impluwensya ug mga pagtintal nga magsamok kanila” (sa James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 4:339). Kining katingalahan nga saad sa gihapon masangputon karon.

Paghiusa sa mga Panahon sa Tingkaon. Ikaunom, Paggahin og panahon nga magkahiusa sa mga panahon sa tingkaon kanunay kon mahimo. Kini mao ang hagit samtang ang mga anak magkadako og ang mga kinabuhi magkapuliki. Apan ang malipayon nga panagsultihanay, pagpakigbahin sa mga plano ug mga kalihokan sa adlaw, ug linain nga mga panahon sa pagtudlo mahitabo sa panahon sa tingkaon tungod kay ang mga inahan ug mga amahan ug mga anak naningkamot niini.

Basa sa mga Kasulatan Matag adlaw. Ikapito, paggahin og panahon matag adlaw sa pagbasa nga maghiusa sa mga kasulatan isip usa ka banay. Tinagsa nga pagbasa sa kasulatan mahinungdanon, apan ang banay nga pagbasa sa kasulatan mao ang mahinungdanon kaayo. Ang pagbasa sa Basahon ni Mormon nga maghiusa isip usa ka banay sa linain nga paagi makapalambo sa espirituhanon nga paagi sa inyong mga panimalay ug makahatag sa mga ginikanan ug mga anak sa gahum sa pagbatok sa pagtintal ug sa pag-angkon sa Espiritu Santo isip ilang makanunayon nga kauban. Ako mosaad kaninyo nga ang Basahon ni Mormon mousab sa mga kinabuhi sa inyong banay.

Pagbuhat sa mga Butang isip usa ka Banay. Ikawalo, paggahin og panahon sa pagbuhat sa mga butang nga maghiusa isip usa ka banay. Paghimo og mga pagpanggawas ug mga piknik ug mga pagsaulog sa adlaw nga natawhan ug mga pagbyahi espesyal nga mga panahon mga tigpahinumdom. Kon mahimo, motambong, isip usa ka banay, sa mga panghitabo diin usa sa mga sakop sa banay moapil, sama sa dula sa tulunghaan, dula sa bola, usa ka pakigpulong, usa ka recital. Tambong sa mga tigum sa simbahan nga maghiusa ug maghiusa nga maglingkod isip usa ka banay kutob sa inyong mahimo. Ang mga inahan kinsa motabang sa mga banay nga mag-ampo ug magdula nga maghiusa magpabilin nga maghiusa ug mopanalangin sa mga kinabuhi sa mga anak sa kahangturan.

Tudloi ang Inyong mga Anak. Ikasiyam, mga inahan, paggahin og panahon sa pagtudlo sa inyong mga anak. Pahimusli ang mga higayon sa pagtudlo. Kini mahimo sa bisag unsa nga higayon niana nga adlaw— panahon sa tingpangaon, diha sa daklit nga mga kahigayunan, o diha sa talagsaon nga panaghiusa nga pagpanglinkod, diha sa tiilan sa higdaanan sa pagkahuman sa adlaw, o sa sayo sa buntag nga panag-uban nga pagpanglakaw. Mga inahan, kamo ang labing maayo nga magtutudlo sa inyong mga anak. Ayaw ibalhin kining bililihon nga kapangakohan ngadto sa mga day-care centers o mga tigbantay sa bata. Ang gugma sa inahan ug maampoon nga pagpakabana alang sa iyang mga anak mao ang iyang labing mahinungdanon nga mga sangkap diha sa pagtudlo sa iyang kaugalingon.

Tudloi ang mga anak sa mga baruganan sa ebanghelyo. Tudloi sila nga maayo ang pagtinarung. Tudloi sila nga walay kaluwasan sa sala. Tudloi sila og gugma alang sa ebanghelyo ni Jesukristo ug sa pagpamatuod sa iyang pagkabalaan.

Tudloi ang inyong anak nga mga lalaki ug anak nga mga babaye sa kaligdong, ug tudloi sila sa pagtahud sa pagkalalaki ug pagkababaye. Tudloi sila sa lawasnon nga kaputli, tukma nga mga sumbanan sa pagpakigdate, kaminyoon sa templo, misyonaryo nga pangalagad, ug sa kamahinungdanon sa pagdawat ug pagpalambo sa balaan nga mga tawag Simbahan.

Tudloi sila alang sa gugma sa trabaho ug sa bili sa maayo nga edukasyon.

Tudloi sila sa kamahinungdanon sa husto nga matang sa kalingawan, lakip ang tukma nga mga salida sa sine ug mga video ug musika ug mga libro ug mga magasin. Hisguti ang kadautan sa pornograpiya ug mga druga, ug tudloi sila sa kabililhon sa pagpuyo sa limpyo nga kinabuhi.

Oo, mga inahan, tudloi ang inyong mga anak sa ebanghelyo diha sa inyong kaugalingon nga panimalay, diha sa inyong kaugalingon nga fireside. Kini ang labing epektibo nga panudlo nga sukad madawat sa inyong mga anak. Kini mao ang paagi sa Ginoo sa pagtudlo. Ang Simbahan dili makatudlo sama sa inyong mahimo. Ang tulunghaan dili makahimo. Ang day-care center dili makahimo. Apan kamo makahimo, ug ang Ginoo mopaluyo kaninyo. Ang inyong mga anak mahinumdom sa inyong mga panudlo sa kahangturan, ug kon sila matigulang na, sila dili mopahilayo gikan niini. Sila motawag kaninyo nga bulahan—ang ilang tinuod nga anghel nga inahan.

Mga inahan, kining matang sa langitnon, inahanon nga pagtudlo molungtad og panahon—daghan nga panahon. Kini dili mahimo nga epektibo sa usa ka bahin sa panahon. Kini kinahanglan gayud nga buhaton sa tanan nga panahon aron maluwas ug mahimaya ang inyong mga anak. Kini mao ang inyong balaan nga tawag.

Higugmaa ang Inyong mga Anak sa Matinud-anon nga Paagi. Ikanapulo ug katapusan, mga inahan, paggahin og panahon sa paghigugma sa inyong mga anak sa matinud-anon nga paagi. Ang walay kinutoban nga gugma sa usa ka inahan nagkaduol sa Kristohanon nga gugma.

Ania ang usa ka maanindot nga pahinungod sa usa ka anak nga lalaki ngadto sa iyang inahan: “Ako wala kaayo mahinumdom og daghan mahitungod sa iyang mga panan-aw sa pagpili ni sa iyang katilingbanon nga dungog; ug unsa ang iyang mga ideya sa pagbansay sa anak, paagi sa pagkaon, panghunahuna sa pagpadako sa mga anak diin, ako dili makahinumdom. Ang labing dako nga butang nga akong nahinumduman karon sa daghang nang mga tuig ang mao nga siya nahigugma kanako. Siya ganahan nga mohigda sa kasagbutan uban kanako ug moasoy og mga sugilanon, o modagan ug motago uban kanamo nga mga bata. Sa kanunay siya mogakos kanako. Ug ako gusto niini. Siya adunay malipayon, mapahiyumon nga nawong. Alang kanako kini sama sa Dios, ug ang tanan nga mga kabulahanan nga mga santos nagsulti Kaniya. Ug magkanta! Sa tanan nga mga pagbati nga makalingaw sa akong kinabuhi walay makatandi uban sa kamaya sa pagkamang paingon sa iyang sabakan ug sa pagkatulog samtang siya nagtabyog ngadto ug nganhi sa iyang tuyatuya nga lingkuranan ug magkanta. Maghunahuna niini, ako matingala kon ang babaye sa karon, uban sa iyang dako kaayo nga katuyoan ug mga plano, nakaamgo kon unsa ka dako nga butang siya sa pagpaigo sa iyang anak alang sa kadaut o pag-antus. Ako naghunahuna kon siya nakaamgo kon unsa ka dako ang lunsay nga gugma ug pagtagad nga giihap alang sa kinabuhi sa usa ka bata.”

Mga inahan, ang inyong tin-edyer nga mga anak nagkinahanglan usab niana nga sama nga matang sa paghigugma ug pagtagad. Kini mao ra og sayon alang sa daghan nga mga inahan ug mga amahan sa pagpahayag ug pagpakita sa ilang gugma ngadto sa ilang mga anak kon sila bata pa, apan labaw nga lisud kon sila modako na. Paningkamot niini sa mainampoon nga paagi. Dinhi wala magkinahanglan og dako nga mga kalainan tali sa mga kinaiya ug mga hiyas sa tigulang og batan-on nga mga kaliwatan. Ug ang yawe mao ang gugma. Ang atong mga batan-on nagkinahanglan og gugma ug pagtagad, dili sa pagpasagad. Sila nagkinahanglan og panahon ug pagsabut, dili walay pagtagad sa ilang mga inahan ug mga amahan. Sila nagkinahanglan sa panahon sa mga ginikanan. Ang mabination nga mga panudlo ug ang iyang gugma ug pagsalig sa usa ka tin-edyer nga anak lalaki o anak babaye sa pagkatinuod makaluwas kanila gikan sa dautan nga kalibutan.

Gikan sa pagpakigpulong ni Presidente Benson sa usa ka fireside alang sa mga ginikanan sa 22 sa Pebrero 1987.