Lesson 13

Pagtudlo sa mga Baruganan sa Ebanghelyo ngadto sa mga Anak

Bahin 1

Mga Ideya alang sa Paggamit

Sumala sa imong kaugalingon nga mga panginahanglan ug mga kahimtang, sunda ang usa o duha niining mga sugyot.

Basaha ang Doktrina ug mga Pakigsaad 68:25–28. Samtang ikaw nagbasa, ilha ang mga baruganan ug mga ordinansa nga gisugo sa Ginoo ngadto sa mga ginikanan nga itudlo sa ilang mga anak. Pagplano og pipila ka mga butang nga imong mabuhat aron pagtudlo niining mga baruganan ug mga ordinansa ngadto sa imong mga anak o ngadto sa mga apo, pag-umangkon nga mga babaye ug pag-umangkon nga mga lalaki, o ubang mga bata nga imong nahibaloan.
Samtang ikaw nagbasa sa mosunod nga artikulo, pagpili sa pagtunong sa usa o duha sa mga sugyot nga gihatag ni Elder Robert D. Hales. Kon ang nagkalainlain nga mga kahigayunan moabut, tunong sa laing mga sugyot gikan sa artikulo.

Buluhaton sa Pagbasa

Tun-i ang mosunod nga artikulo. Kon ikaw minyo, basaha ug hisguti ang artikulo uban sa imong kapikas.

Pagpalig-On sa mga Banay: Atong Sagrado nga Katungdanan

Elder Robert D. Hales
Sa Korum sa Napulog Duha ka mga Apostoles

Ang Espiritu Molig-on sa mga Banay

Ang pagpalig-on sa mga banay mao ang atong sagrado nga katungdanan isip mga ginikanan, mga anak, mga sakop sa kabanay, mga pangulo, mga magtutudlo, ug tinagsa nga mga sakop sa Simbahan.

Ang kamahinungdanon sa espirituhanon nga pagpalig-on sa mga banay tin-aw nga gitudlo diha sa mga kasulatan. Si Amahang Adan ug Inahang Eva mitudlo sa ilang anak nga mga lalaki ug anak nga mga babaye sa ebanghelyo. Ang mga sakripisyo ni Abel mao ang gidawat sa Ginoo, kinsa iyang gihigugma. Si Cain, sa lain nga bahin, “nahigugma ni Satanas labaw pa kay sa Dios” ug nakahimo og bug-at nga mga sala. Si Adan ug si Eva “nagbangutan sa atubangan sa Ginoo, tungod ni Cain ug sa iyang mga kaigsoonan,” apan sila wala gayud mohunong sa pagtudlo sa ilang mga anak sa ebanghelyo (tan-awa sa Moises 5:12, 18, 20, 27; 6:1, 58).

Kita kinahanglan gayud nga makasabut nga matag usa sa atong mga anak miabut uban sa nagkalainlain nga mga gasa ug mga talento. Ang uban, sama ni Abel, ingon og gihatagan og mga gasa sa hugot nga pagtuo diha sa pagkatawo. Ang uban nakigbisog uban sa matag desisyon nga ilang himoon. Isip mga ginikanan, kita kinahanglan nga dili gayud motugot sa pagpangita ug pagpakigbisog sa atong mga anak nga makapaduhaduha o makapawala sa atong hugot nga pagtuo sa Ginoo.

Si Alma ang Batan-on, sa diha nga “gisakit uban sa kahasol…[ug] gisamok sa panumduman sa [iyang] daghan nga mga sala,” nahinumdum nga nakabati sa iyang amahan nga nagtudlo mahitungod sa pag-anhi ni “Jesukristo, usa ka Anak sa Dios, aron sa pag-ula sa iyang dugo alang sa mga sala sa kalibutan” (Alma 36:17). Ang mga pulong sa iyang amahan misangpot ngadto sa iyang pagkakabig. Sa sama nga paagi, ang atong pagtulun-an ug pagpamatuod mahinumduman sa atong mga anak.

Ang 2,000 ka batan-on nga mga mangugubat sa kasundalohan ni Helaman mipamatuod nga ang ilang matarung nga mga inahan gamhanan kaayo nga mitudlo sa mga baruganan sa ebanghelyo ngadto kanila (tan-awa sa Alma 56:47–48).

Diha sa panahon sa mahinungdanon nga espirituhanong pagsiksik, si Enos miingon, “Ang mga pulong nga akong madunggan kanunay nga gipamulong sa akong amahan mahitungod sa kinabuhi nga dayon…mituhop gayud pag-ayo sa akong kasingkasing” (Enos 1:3).

Diha sa Doktrina ug mga Pakigsaad ang Ginoo miingon nga ang mga ginikanan mao ang motudlo sa ilang mga anak “magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo ka tuig ang panuigon… .

“Ug sila usab motudlo sa ilang mga anak sa pag-ampo, ug sa paglakaw nga matarung sa atubangan sa Ginoo” (D&P 68:25, 28).

Ang Pagtudlo sa Ebanghelyo Makapalig-on sa mga Banay

Samtang kita magtudlo sa atong mga anak sa ebanghelyo pinaagi sa pulong ug panig-ingnan, ang atong mga banay sa espirituhanon nga paagi malig-on og mapanalipdan.

Ang mga pulong sa buhi nga mga propeta tin-aw kalabut sa atong sagrado nga katungdanan sa paglig-on sa atong mga banay sa espirituhanon nga paagi. Sa 1995 ang Unang Kapangulohan ug ang Konseho sa Napulog Duha ka mga Apostoles mihatag og pamahayag ngadto sa kalibutan, nagpahayag nga “ang banay mao ang sentro ngadto sa plano sa Tiglalang alang sa mahangturon nga kapalaran sa Iyang mga anak…Ang bana ug asawa adunay ligdong nga kapangakohan sa paghigugma ug sa pag-amuma alang sa usag-usa ug alang sa ilang mga anak… .Ang mga ginikanan adunay sagrado nga katungdanan sa pag-amuma sa ilang mga anak diha sa paghigugma ug pagkamatarung, sa pagsangkap alang sa ilang espirituhanon nga mga panginahanglan, sa pagtudlo kanila sa paghigugma ug pag-alagad sa usag usa, [ug] sa pagsunod sa mga sugo sa Dios”¹ (“Ang Banay: Usa Ka Pamahayag Ngadto sa Kalibutan,” Ensign, Nob. 1995, 102).

Sa Pebrero niini nga tuig, ang Unang Kapangulohan mi-isyu og tawag ngadto sa tanang mga ginikanan sa “pagpahinungod sa ilang labing maayong mga paningkamot sa pagtudlo ug pagpadako sa ilang mga anak sa mga baruganan sa ebanghelyo diin makapadayon kanila sa pagpaduol sa Simbahan. Ang panimalay mao ang sukaranan sa matarung nga kinabuhi, ug walay lain nga instrumento ang makapuli o makatuman sa gikinahanglan nga mga kalihokan sa pagdala ngadto sa unahan niining hinatag sa Dios nga kapangakohan.”

Sa Pebrero nga sulat, ang Unang Kapangulohan mitudlo nga pinaagi sa pagtudlo ug pagpadako sa mga anak diha sa mga baruganan sa ebanghelyo, ang mga ginikanan mahimong makapanalipod sa ilang mga banay gikan sa makapaut-ot nga mga elemento. Sila dugang nga mitambag sa mga ginikanan ug mga anak “sa paghatag og labing una nga pagtagad sa pag-ampo sa banay, gabii sa banay, pagtuon sa ebanghelyo ug panudlo, ug maayo nga mga kalihokan sa banay. Bisan unsa pa tingali ka takus ug tukma ang uban nga mga panginahanglan o mga kalihokan nga mahimo, kini kinahanglan nga dili gayud tugutan nga makapuli sa hinatag nga langitnong mga katungdanan nga ang mga ginikanan ug mga banay lamang ang makapahigayon sa husto nga paagi” (First Presidency letter, 11 Feb. 1999; gikutlo sa Church News, 27 sa Peb. 1999, 3).

Uban sa tabang sa Ginoo ug sa Iyang doktrina, ang tanan nga makasakit nga mga sangputanan gikan sa mga hagit nga mahimong masugatan sa banay mahimong masabtan ug mabuntog. Bisan unsa ang panginahanglan nga tingali mahimo sa mga sakop sa banay, kita makahimo sa pagpalig-on sa atong mga banay samtang kita mosunod sa tambag nga gihatag sa mga propeta.

Ang yawe sa pagpalig-on sa atong mga banay mao ang pag-angkon sa Espiritu sa Ginoo nga moabut sulod sa atong mga panimalay. Ang tumong sa atong mga banay mao nga maanaa sa higpit ug pig-ot nga dalan.

Mga Ideya alang sa Pagpalig-on sa mga Banay

pagpalig-on sa banay. Mahimo ba nga ako makigbahin og pipila ka mga ideya nga mahimong makatabang sa pag-ila sa mga dapit nga gikinahanglan nga lig-unon sa atong kaugalingon nga mga banay. Ako mihalad niini diha sa espiritu sa pag-awhag, nasayud nga ang matag banay—ug matag sakop sa banay—talagsaon.

Ang mga Panimalay Kinahanglan nga usa ka Luwas nga Dapit

Himoa ang atong mga panimalay nga usa ka luwas nga dapit diin ang matag sakop sa banay mobati sa gugma ug salabutan sa pagkasakop. Hibaloi nga matag anak adunay nagkalahi nga mga gasa ug mga abilidad; ang matag usa ka tawo nga nagkinahanglan og linain nga gugma ug pag-amuma.
Hinumdomi, “ang tubag nga malumo makapahupay sa kapungot” (Mga Proverbio 15:1). Sa diha nga ang akong hinigugma ug ako gibugkos didto sa Templo sa Salt Lake, si Elder Harold B. Lee mihatag kanamo sa usa ka maalamon nga tambag: “Kon kamo mopataas sa inyong tingog sa kasuko, ang Espiritu mopahawa gikan sa inyong panimalay.” Kinahanglan nga kita dili gayud, gikan sa kasuko, trangkahan ang pultahan sa atong panimalay o sa atong kasingkasing ngadto sa atong mga anak. Sama sa mausikon nga anak, ang atong mga anak kinahanglan nga masayud nga kon sila maulian sa ilang mga kaugalingon sila makadangop kanato sa gugma ug tambag.
Paggahin og tinagsa ka panahon uban sa atong mga anak, papilia sila sa kalihokan ug sa hilisgutan sa panagsultihanay. Kuhaa ang mga sagabal.

Tudloi ang mga Anak sa Pag-ampo, Pagbasa sa mga Kasulatan, ug Pagpaminaw sa Takus nga mga Musika

I-awhag ang tinago nga relihiyoso nga kinaiya sa atong mga anak, sama sa personal nga pag-ampo, personal nga pagtuon sa kasulatan, ug pagpuasa sa tino nga mga panginahanglan. Sukda ang ilang espirituhanon nga pagtubo pinaagi sa pagpaniid sa ilang kinaiya, pinulongan, ug pamatasan ngadto sa uban.
Pag-ampo matag adlaw uban sa atong mga anak.
Pagdungan sa pagbasa sa mga kasulatan. Ako nakahinumdom sa akong kaugalingon nga inahan ug amahan nga nagbasa sa mga kasulatan samtang kaming mga anak naglingkod sa salog ug naminaw. Usahay sila mangutana, “Unsa ang buot ipasabut sa kasulatan diha kaninyo?” o “Unsa ang inyong gibati niini?” Dayon sila maminaw kanamo samtang kami motubag sa among kaugalingong mga pulong.
Basaha ang mga pulong sa buhi nga mga propeta ug uban nga makadasig nga mga artikulo alang sa mga bata, mga batan-on, ug mga hingkod diha sa mga magasin sa Simbahan.
Kita makapuno sa atong mga panimalay uban sa tunog sa takus nga mga musika samtang kita magdungan og kanta gikan sa himno nga basahon ug sa Children’s Songbook.

Paghimo og Gabii sa Banay ug mga Konseho sa Banay

Paghimo og gabii sa banay matag semana. Isip mga ginikanan, usahay kita mahadlok kaayo nga motudlo o mopamatuod ngadto sa atong mga anak. Ako nakasala niana diha sa akong kaugalingon nga kinabuhi. Ang atong mga anak nagkinahanglan nga kita makigbahin sa espirituhanong mga pagbati uban kanila ug sa pagtudlo ug paghatag sa pagpamatuod ngadto kanila.
Paghimo og mga konseho sa banay aron paghisgut sa mga plano sa banay ug mga kabalaka. Ang pipila sa labing epektibo nga konseho sa banay mao ang usa sa usa uban sa matag sakop sa banay. Tabangi ang atong mga anak nga masayud nga ang ilang mga ideya mahinungdanon. Paminaw ngadto kanila ug magkat-on gikan kanila.

Ipakigbahin ang Ebanghelyo, Suportahi ang mga Pangulo sa Simbahan, ug Salmot isip usa ka Banay

Dapita ang mga misyonaryo sa pagtudlo sa dili kaayo aktibo o dili sakop nga mga higala diha sa atong mga panimalay.
Pagpakita nga kita mopaluyo ug mosuporta sa mga pangulo sa Simbahan.
Pagdungan og pangaon kon mahimo, ug paghimo og makahuluganon nga mga panaghisgutan sa panahon sa pagpangaon.
Magtambayayong sa pagtrabaho isip usa ka banay, bisan pa kon kini dali ug sayon nga buhaton sa atong mga kaugalingon. Pakigsulti sa atong anak nga mga lalaki ug anak nga mga babaye samtang kita nagtambayayong sa pagtrabaho. Ako adunay kahigayunan niana matag Sabado uban sa akong amahan.

Tudloi ang mga Anak nga Mahimong Maayo nga mga Higala ug Mangandam alang sa Umaabut

Tabangan nato ang atong mga anak nga makat-on kon unsaon sa paghimo og maayo nga mga pag-panaghigalaay ug mohimo sa ilang mga higala nga giabiabi sa atong mga panimalay. Pakig-ilaila sa mga ginikanan sa mga higala sa atong mga anak.
Tudloi ang atong mga anak pinaagi sa panig-ingnan kon unsaon sa pagbadyet ang panahon ug mga kapanguhaan. Tudloi sila nga makat-on sa kinaugalingon nga paninguha ug sa kamahinungdanon sa pagpangandam alang sa umaabut.

Pagpakigbahin sa Kabilin ug mga Tradisyon sa Banay

Tudloi ang atong mga anak sa kasaysayan sa atong mga katigulangan ug sa atong kaugalingon nga kasaysayan sa banay.
Paghimo og mga tradisyon sa banay. Pagplano ug paghimo og makahuluganon nga panag-uban nga mga pagbakasyon, hunahunaon ang mga panginahanglan, mga talento, ug mga abilidad sa atong mga anak. Tabangi sila sa pagmugna og malipayon nga mga handumanan, palamboa ang ilang mga talento, ug lig-una ang ilang mga pagbati sa kaugalingon nga katakus.

Itudlo ang Kamahinungdanon sa Pagsunod sa mga Sugo ug Pagdawat sa mga Ordinansa

Pinaagi sa pulong ug panig-ingnan, itudlo ang mga moral nga hiyas ug usa ka pasalig sa pagsunod sa mga sugo.
Human sa akong bunyag ug kumpirma, ang akong inahan mibitad kanako sa daplin ug nangutana, “Unsa ang imong gibati?” Ako mihulagway kutob sa akong mahimo sa mainit nga pagbati sa kalinaw, kahupayan, ug kalipay nga ania kanako. Si Mama mipasabut nga unsa ang akong gibati mao ang gasa nga ako pa lamang nga nadawat, ang gasa sa Espiritu Santo. Siya misulti kanako nga kon ako magpuyo nga takus niini, akong maangkon nga magpadayon kana nga gasa uban kanako. Kadto mao ang usa ka higayon sa pagkat-on nga wala gayud nako hikalimti sa akong tibuok kinabuhi.

Tudloi ang atong mga anak sa kamahinungdanon sa bunyag ug kumpirma, sa pagdawat sa gasa sa Espiritu Santo, sa pag-ambit sa sakramento, pagtahud sa pagkapari, ug paghimo ug pagtuman sa mga pakigsaad sa templo. Sila kinahanglan nga makahibalo sa kamahinungdanon sa pagpuyo nga takus sa usa ka rekomen sa templo ug sa pag-andam alang sa kaminyoon sa templo.

Kon kamo wala pa mabugkos didto sa templo ngadto sa inyong kapikas o mga anak, paningkamot isip usa ka banay sa pagdawat sa mga panalangin sa templo. Paghimo og mga tumong sa templo isip usa ka banay.
Pagpakatakus sa pagkapari nga inyong gihuptan, mga kaigsoonan, ug gamita kini aron sa pagpanalangin sa inyong banay….

Hibaloi ang mga Kalihokan sa Komunidad, Tulunghaan, ug Simbahan

Mga kapanguhaan makuha gawas sa panimalay. Maalamon nga paggamit niini makapalig-on sa atong mga banay.

Awhaga ang atong mga anak sa pag-alagad diha sa Simbahan ug komunidad.
Pakigsulti sa mga magtutudlo, mga tigbansay, mga magtatambag, ug mga pangulo sa Simbahan sa atong mga anak mahitungod sa atong mga kabalaka ug sa mga panginahanglan sa atong mga anak.
Pagpakisayud kon unsa ang gibuhat sa atong mga anak sa ilang panahon nga walay buhat. Impluwensyaha ang ilang pagpili og mga sine, mga programa sa telebesyon, ug mga video. Kon sila anaa sa Internet, pagpakisayud kon unsa ang ilang gibuhat. Tabangi sila nga makakita sa kamahinungdanon sa maayo nga kalingawan.
Iawhag ang maayo nga mga kalihokan sa tulunghaan. Pagpakisayud kon unsa ang gitun-an sa atong mga anak. Tabangi sila sa ilang mga gihatag nga tun-anan sa balay. Tabangi sila nga makaamgo sa ka mahinungdanon sa edukasyon ug sa pagpangandam alang sa pagpanarbaho ug kinaugalingon nga pagsangkap.
Batan-ong mga babaye: Tambong sa Kapunongan sa Kahupayan kon kamo moabut sa inyong ika 18 nga adlawng natawhan. Ang pipila kaninyo tingali nagduhaduha sa paghimo niana nga tran-sisyon. Tingali kamo mahadlok nga kamo dili angayan. Akong batan-ong igsoon nga mga babaye, dili kini mao ang pagkabutang. Adunay daghan diha sa Kapunongan sa Kahupayan alang kaninyo. Kini mahimo nga usa ka panalangin nganha kaninyo sa tibuok ninyo nga kinabuhi.
Batan-ong mga lalaki: Tahura ang Aaronic nga Pagkapari. Kini mao ang gitagana nga pagkapari, nag-andam kaninyo alang sa Melchizedek nga Pagkapari. Pag-aktibo pag-ayo diha sa korum sa mga anciano kon kamo ma-orden sa Melchizedek nga Pagkapari. Ang pag-inigsoonay, ang panudlo sa korum, ug ang mga kahigayunan sa pag-alagad sa uban makapanalangin kaninyo ug sa inyong banay sa tibuok ninyong kinabuhi.

Sunda ang Panig-ingnan sa Gugma sa Ginoo

Matag banay mahimong malig-on diha sa usa o sa lain nga paagi kon ang Espiritu sa Ginoo madala ngadto sa atong mga panimalay ug kita motudlo pinaagi sa Iyang panig-ingnan.

Buhat uban sa hugot nga pagtuo; ayaw pagtubag uban sa kahadlok. Kon ang atong mga tin-edyer mosugod pagsulay sa mga hiyas sa banay, ang mga ginikanan kinahanglan nga moduol sa Ginoo alang sa giya sa tino nga mga panginahanglan sa matag sakop sa banay. Kini mao ang panahon alang sa dugang nga gugma ug pagbulig ug sa paglig-on sa imong mga pagtulun-an kon unsaon sa paghimo og mga pagpili. Makahahadlok kini sa pagtugot sa atong mga anak sa pagkat-on gikan sa mga sayop nga ilang nahimo, apan ang ilang pagkamauyunon sa pagpili sa paagi sa Ginoo ug mga hiyas sa banay labaw pa kon ang pagpili moabut gikan sa sulod kay sa diha nga mosulay kita sa pagpugos niadtong mga hiyas diha kanila. Ang paagi sa Ginoo sa gugma ug pagdawat mas maayo pa kay sa paagi ni Satanas sa pagpangusog ug pagpamugos, ilabi na diha sa pagpadako sa mga tin-edyer.
Hinumdumi ang mga pulong ni Propeta Joseph Smith: “Walay daghan kaayo nga pagbanabana sa paggiya sa mga katawhan sa paghikalimot sa sala ingon sa pag-alsa sa ilang mga kamot, pagbantay kanila uban sa kalumo. Kon ang mga tawo magpakita sa ubos nga kamabination ug gugma kanako, O unsa ka gamhanan ang naangkon niini ibabaw sa akong hunahuna, samtang ang katugbang nga tunong adunay kahilig sa pagha-sol sa tanang masakit nga mga pagbati ug pag-paluya sa tawhanon nga salabutan” (Teachings of the Prophet Joseph Smith, sel. Joseph Fielding Smith [1976], 240).

Ang mga Anak Kinsa Nahisalaag Mobalik

Samtang kita mawad-an sa paglaum sa diha nga, human sa tanan nato nga nabuhat, pipila sa atong mga anak nahisalaag gikan sa dalan sa katarung, ang mga pulong ni Orson F. Whitney makapahupay kanato: “Bisan og pipila sa mga karnero mahisalaag, ang mata sa Magbalantay anaa diha kanila, ug sa madali o madugay sila mobati sa mga gaway sa Balaan nga Pag-alima nagkab-ot kanila ug mobitad kanila pabalik sa panon. Niining kinabuhi man o sa kinabuhi nga moabut, sila mobalik. Sila kinahanglan nga mobayad sa utang sa kaangayan; sila moantus alang sa ilang mga sala; ug magsubay sa tunukon nga agianan; apan kon kini modala kanila sa katapusan, sama sa mahinulsulon nga Mausikon nga anak,¹ ngadto sa usa ka mahigugmaon ug mapasayloon nga kasingkasing ug panimalay sa [inahan ug] amahan, ang masakit nga kasinatian dili makawang. Pag-ampo alang sa [atong] walay pagtagad ug dili masunuron nga mga anak; gunit ngadto kanila uban sa [atong] hugot nga pagtuo. Padayon sa paglaum, padayon sa pagsalig, hangtud nga imong makita ang kaluwasan sa Dios” (pagkutlo kang Joseph Smith, sa Conference Report, Abr. 1929, 110).

Mga Hamtong nga dili Minyo ug Kabanay Makahatag og Kalig-on

Unsa kaha kon ikaw dili minyo o wala mapanalangini og mga anak? Ikaw nagkinahanglan ba sa pagpakabana mahitungod sa tambag bahin sa mga banay? Oo. Kini mao ang usa ka butang nga kinahanglan nga makat-unan natong tanan sa kinabuhi nga yutan-on. Ang dili minyo nga hamtong nga mga sakop sa kasagaran makahatag og talagsaon nga matang sa kalig-on ngadto sa banay, mahimong dako kaayo nga kapanguhaan og pagsuporta, pagdawat, ug gugma ngadto sa ilang mga banay ug sa mga banay niadtong naglibot kanila.
Daghan nga hingkod nga mga sakop sa kabanay naghimo og daghan nga buluhaton sa pagkaginikanan sa ilang kaugalingon nga katungod. Mga apohan, mga iyaan ug mga uyoan, igsoon nga mga lalaki ug igsoon nga mga babaye, pag-umangkon nga mga babaye ug pag-umangkon nga mga lalaki, mga ig-agaw, ug uban nga mga sakop sa banay makahatag og dako nga kalig-on diha sa banay. Ako buot mopahayag og pagpasalamat alang niadtong akong kaugalingon nga kabanay kinsa migiya kanako pinaagi sa ilang panig-ingnan ug pagpamatuod. Usahay ang mga sakop sa kabanay makasulti og mga butang nga dili masulti sa mga ginikanan nga dili makasugod sa panaglalis. Human sa taas nga kinasingkasing nga panaghisgot uban sa iyang inahan, usa ka batan-on nga babaye miingon: “Makapahadlok ang pagsulti kanimo ug ni Papa nga ako nakahimo og usa ka butang nga sayop. Apan labaw pa kini ka dautan ang pagsulti ni Tiya Susan. Ako dili lang gayud makahimo sa pagpahigawad kaniya.”

Walay Hingpit nga mga Banay

Nasayud nga kita ania sa pagkamortal aron makat-on ug makapalambo sa atong hugot nga pagtuo, kita kinahanglan nga makasabut nga kini gikinahanglan gayud nga adunay katugbang sa tanan nga mga butang. Sa panahon sa konseho sa banay sa akong kaugalingon nga panimalay, ang akong asawa miingon, “Kon ikaw tingali naghunahuna nga usa ka tawo adunay hingpit nga banay, ikaw wala lang gayuy igo nga kasayuran bahin kanila.”

Ipahimutang ang Balay ug Banay sa Kahusay

Mga kaigsoonan, isip mga ginikanan atong paminawon ang pahimangno, gani ang badlong, nga gihatag sa Ginoo ngadto ni Joseph Smith ug sa mga pangulo sa Simbahan sa 1833 nga “mopahimutang diha sa kahusay sa [atong] kaugalingon nga balay” (D&P 93:43). “Ako nagsugo kaninyo sa pag-amuma sa inyong mga anak diha sa kahayag ug kamatuoran” (D&P 93:40). “Ipahimutang diha sa kahusay ang [atong ] banay, ug tan-awa nga sila labaw nga makugihon ug mabuhaton diha sa panimalay, ug mag-ampo kanunay, o sila pagakuhaon gikan sa ilang mga dapit” (D&P 93:50).

Ang mga propeta sa atong panahon mihatag sa sama nga pahimangno ug pasidaan ngadto sa mga ginikanan sa pagpahimutang sa kahusay sa atong mga banay. Unta kita mapanalanginan uban sa pagdasig ug gugma aron pagtubag sa pagsupak uban sa hugot nga pagtuo sulod sa atong mga banay. Kita unya masayud nga ang atong mga pagsulay mao ang labaw nga makapaduol kanato ngadto sa Ginoo ug ngadto sa usag usa. Unta kita maminaw sa tingog sa propeta ug ipahimutang sa kahusay ang atong kaugalingon nga mga panimalay (tan-awa sa D&P 93:41–49). Ang banay malig-on samtang kita magpa-duol sa Ginoo, ug ang matag sakop sa banay ang nalig-on samtang kita mobayaw ug molig-on ug mahigugma ug moamuma alang sa usag usa. Ikaw mobayaw kanako ug ako mobayaw kanimo, ug kita magdungan sa pagsaka” (Quaker proverb).

Unta kita makahimo sa pag-abiabi ug pagpadayon sa Espiritu sa Ginoo sa atong mga panimalay aron sa paglig-on sa atong mga banay. Nga ang matag usa sa atong mga sakop sa banay magpabilin diha sa “higpit ug pig-ot nga dalan nga mopadulong sa kinabuhi nga dayon” (2 Nephi 31:18), ako nag-ampo.

Gikan sa pakigpulong ni Elder Hales sa Abril 1999 sa kinatibuk-ang komperensya (tan-awa sa Conference Report, Abr. 1999, 39–44; o Ensign, Mayo 1999, 32–34).