Lesson 6

Pagpalig-on sa mga Kaminyoon pinaagi sa Hugot nga Pagtuo ug Pag-ampo

Mga Ideya alang sa Paggamit

Sumala sa imong kaugalingon nga mga panginahanglan ug mga kahimtang, sunda ang usa o duha niining mga sugyot.

Pagdesisyon sa usa ka butang nga imong mabuhat aron sa paglig-on sa imong hugot nga pagtuo sa Langitnong Amahan ug Jesukristo.
Paghimo og panahon sa matag adlaw aron magampo uban sa imong kapikas.

Pagbasa nga Buluhaton

Tun-i ang mosunod nga artikulo. Kon ikaw minyo, basaha ug hisguti ang artikulo uban sa imong asawa.

Pagkaplag og Hingpit nga Kalipay sa Kinabuhi

Elder Richard G. Scott
Sa Korum sa Napulog Duha ka mga Apostoles

Mga Kalainan taliwala sa Pagkamakanunayon

Dili pa lang dugay ako nagbarug sa amihanang baybayon sa maanindot nga isla sa Pasipiko nagtutok ngadto sa dagat pagsubang sa adlaw. Ako nadani sa kanunay diin ang dagko nga mga balod makanunayon nga nag-irog sa unahan ug mabungkag diha sa babayon. Kini nagpahinumdom kanako sa makanunayon nga laraw sa Ginoo, uban sa hugot, nga mahangturong balaod, ug ang kasiguroan sa malungtarong kaangayan ug sa kalumo sa kalooy kon kini maani sa pagkamasulundon. Ako nakaamgo nga ang matag balod mutuybo diha sa nagkalainlaing gitason sa kapunawponawan aron sa pagpangita sa iyang linain nga agianan ngadto sa baybayon. Ang uban modagayday ibabaw sa dagkong mga bato, nagbiya og gagmayng sapa sa nagbula, nga puting tubig. Ang uban mabungkag diha sa baybayon sa tinagsa nga mga porma. Kini modahili aron sa pagbasa sa balas uban sa madulaon nga malawayong suwab unya mobula ug motuyok samtang kini nagsibog.

Ako naghunahuna sa walay katapusan nga nagkalainlaing mga kalagmitan nga gihatag sa Ginoo alang kanato. Kita adunay daghang kaayo nga kagawasan, daghan kaayo nga kahigayunan sa pagpalambo sa atong linain nga mga pagkatawo ug mga kahanas, ang atong tinagsa ka mga handumanan, ang atong kinaugalingon nga mga tampo. Tungod kay walay dugang nga kahigayonan sa pagtan-aw sa halangdon nga dagat, ako misulay sa paghanduraw sa mahimayaon nga talan-awon nga ang mahayag nga adlaw sa dili madugay mumogna. Samtang ako nagtan-aw niining maanindot nga talan-awon diha sa balaanong pagtahud, usa ka bintana mihulma diha sa mga panganod; ang masilakon nga silaw sa nagsubang nga adlaw mibuak lapus sa nagdag-om nga langit, naghimo sa tanang butang uban sa iyang kaamag, iyang bulok, iyang kinabuhi. Ingon og ang Ginoo buot makigbahin og dugang nga panalangin, usa ka simbolo sa kahayag sa Iyang mga pagtulun-an nga naghatag og kasanag ug paglaum sa matag usa nga hikapon niini. Mga luha sa pagpasalamat mihulma alang niining kahibulongan nga kalibutan nga atong gipuyan, alang sa talagsaong katahum nga gawasnon kaayo nga gipakigbahin sa atong Langitnong Amahan uban niadtong kinsa andam nga motan-aw. Sa pagkatinuod, ang kinabuhi maanindot.

Pasalamat sa Katahum sa Kinabuhi

Naggahin ba ikaw og panahon aron sa pagkaplag sa matag adlaw kon unsa gayud ka maanindot ang imong kinabuhi? Kanus-a lang sukad ikaw nakatanaw sa pagsalop sa adlaw—ang sumasalop nga kahayag nga naghalok nanamilit sa mga panganod, mga kahoy, mga bungtod, mga kapatagan og maayong gabii, usahay kalinaw, usahay uban sa naghingapin nga pagbuswak sa bulok ug porma?

Unsa kaha ka katingalahan sa usa ka walay panganod nga gabii kon ang Ginoo mopakita sa mga kahibulongan sa Iyang mga langit—ang naggilakgilak nga mga bitoon, ang sanag sa kahayag sa bulan— ang pagpasilaub sa atong mga handurawan uban sa Iyang kahalangdon ug himaya?

Unsa ka mabihagon ang pagtan-aw sa liso nga gitanom diha sa tabunok nga yuta miturok, nagipon og kusog, ug mipasudlot og usa ka gamay mao ra og dili mahinungdanon nga saha. Sa mapailubon nga paagi kini misugod pagtubo ug milambo kini sa iyang kaugalingong kinaiya, nga nadala subay sa balaod sa matang nga gihatag sa Ginoo aron paggiya sa iyang kalamboan. Uban sa pag-amuma kini siguro nga modangat ngadto sa iyang pagkahimo nga: usa ka lily, nga gikoronahan uban sa pagkaangayan ug katahum; usa ka mahumot nga tanom nga herbabuena; usa ka peach; usa ka abokado; o matahum nga bulak uban sa talagsaon nga matang, kalumo, ug kahumot.

Kanus-a ikaw katapusan nakatan-aw sa usa ka gamay nga porma sa putot sa rosas? Matag adlaw kini molambo og bag-o ug madanihon nga kinaiya, labaw pa nga masaaron nga katahum hangtud kini mahimo nga usa ka halangdon nga rosas

Ikaw usa sa labing halangdon sa mga gilalang sa Dios. Ang Iyang pagbuot mao nga ang imong kinabuhi maanindot sa mahimayaon nga paagi sa walay pagtagad sa imong mga kahimtang. Samtang ikaw mapasalamaton ug masulundon, ikaw mahimo sa tanan nga pagbuot sa Dios nga ikaw mahimo.

Ang Hingpit nga Kalipay diha sa Kinabuhi Nagagad sa Pagsalig sa Dios

Kasub-anan, kahigawad, ug malisud nga hagit maoy mga panghitabo sa kinabuhi, dili ang kinabuhi mismo. Ako wala mawad-i og paglaum kon unsa kalisud ang pipila niini ka mga hitabo. Sila mahimo nga molungtad sa taas nga tagal sa panahon, apan kini kinahanglan nga dili tugotan nga mahimong sentro sa pagpugong sa tanang butang nga imong gihimo. Ang Ginoo midasig ni Lehi sa pagpahayag sa tanan nga sukaranan sa kamatuoran. “Ang tawo mao, nga sila unta makaangkon og hingpit nga kalipay.”¹ Kana usa ka kondisyonal nga pamahayag: “sila unta adunay hingpit nga kalipay.” Kini dili kondisyonal alang sa Ginoo. Ang Iyang katuyoan mao nga ang matag usa kanato makakaplag sa hingpit nga kalipay. Kini dili kondisyonal alang kanimo samtang ikaw mosunod sa mga sugo, pagbaton og hugot nga pagtuo diha sa Magtutudlo, ug mobuhat sa mga butang nga gikinahanglan aron pag-angkon sa hingpit nga kalipay dinhi sa yuta.

Ang imong hingpit nga kalipay mag-agad sa imong pagsalig sa Langitnong Amahan ug sa Iyang balaan nga Anak, ang imong pagtuo nga ang ilang laraw sa kalipay sa pagkatinuod makahatag kanimo og hinpit nga kalipay. Hunahunaa ang ilang doktrina makapahimo kanimo nga makapahimulos sa mga katahum niini nga yuta ug mopabuhong sa imong mga relasyon sa uban. Kini makadala kanimo ngadto sa makahupay, makalig-on nga mga kasinatian nga modagayday gikan sa pag-ampo ngadto sa Amahan sa Langit ug ang mga tubag nga Iyang gihatag agi og balus.

Panan-awon ug Pailub

Ang gamay nga bato nga ipaduol sa mata makita nga usa ka higanti nga sagabal. Ilabay sa yuta, kini makita kon tan-awon pag-ayo. Ingon man usab, ang mga problema o mga pagsulay sa atong mga kinabuhi kinahanglan nga tan-awon diha sa pananawon sa kasulatan nga doktrina. Sa lain nga paagi sila sayon kaayo nga makaapas sa atong pananawon, mosuyop sa atong kusog, ug mohikaw kanato sa hingpit nga kalipay ug katahum nga buot sa Ginoo nga atong dawaton dinhi sa yuta. Pipila ka mga katawhan sama sa mga dagkong bato nga gilabay ngadto sa dagat sa mga problema. Sila gilumsan niini. Pagkasama sa sungsong. Kon anaa sa problema, pakig-away aron gawasnon nga mulotaw sa pag-alagad pag-usab uban sa kalipay.

Ikaw ania sa yuta alang sa usa ka balaanon nga katuyoan. Dili sa walay katapusan lingawon o sa kanunay hingpit nga magpadayon sa kalingawan. Ikaw ania dinhi aron pagasulayan, aron pagpamatuod sa imong kaugalingon aron ikaw makadawat sa dugang nga mga panalangin nga anaa sa Dios alang kanimo.² Ang makalukmay nga epekto sa pailub gikinahanglan.³ Pipila ka mga panalangin ihatag dinhi niini nga kinabuhi; ang uban moabut tabok sa tabel.

Ang Ginoo adunay katuyoan sa imong personal nga pagtubo ug kalamboan. Kana nga pag-uswag modali kon ikaw mauyunon nga motugot Kaniya nga paggiya kanimo subay sa matag kasinatian nga pagtubo nga imong masugatan, bisan kon sa sinugdanan ikaw gusto o dili. Kon ikaw mosalig sa Ginoo, kon ikaw mauyunon sa paghimo sa imong kasingsing ug sa imong hunahuna nga masentro sa Iyang kabubut-on, kon ikaw mohangyo nga giyahan sa Espiritu aron sa pagbuhat sa Iyang kabubut-on, ikaw makasiguro sa labing mahinungdanon nga kalipay diha kanimo ug labing malampuson nga pagkab-ot gikan niining mortal nga kasinatian. Kon ikaw mangutana sa tanang mga butang nga gisugo kanimo nga buhaton, o kusganon nga mobatok sa matag dili maayo nga hagit, imong gihimo nga malisud alang sa Ginoo sa pagpanalangin kanimo.⁴

Ang imong kabubut-on, ang katungod sa paghimo og mga pagpili, wala ihatag aron ikaw makakuha sa unsay imong gusto. Kining balaan nga gasa gihatag aron ikaw mopili kon unsay buot sa imong Amahan sa Langit alang kanimo. Niana nga paagi Siya makagiya kanimo nga mahimo sa tanan nga Iyang katuyoan aron ikaw mahimo.⁵ Kana nga agianan magdala kanimo ngadto sa mahimayaon nga hingpit nga kalipay ug kamaya.

Pagpuyo uban sa Hingpit nga Kalipay taliwala sa Kalisdanan

Pagkat-on gikan sa madasigong mga tagsatagsa ka tawo kinsa nahimong malinawon uban sa ilang mga hagit ug nagpuyo uban sa hingpit nga kalipay taliwala sa kalisdanan. Usa ka matahum nga babaye nga adunay mahulgaon nga walay pagkaayo nga sakit makanunayon nga nakakita og hingpit nga kalipay sa kinabuhi. Siya nakasabut sa laraw sa kalipay, nakadawat sa mga ordinansa sa templo, ug naninguha sa pagbuhat sa iyang labing maayo aron makasarang alang sa gisaad nga mga panalangin. Ang iyang personal nga inadlaw nga talaan nagtala:

“Kini usa ka matahum nga adlaw. Ako mikuha sa mga sulat ug milingkod sa duyan. Ako nalipay kaayo ug natagbaw sa mainit nga adlaw, sa matam-is nga kahumot sa kinaiyahan ug sa mga kahoy nga naglibot kanako. Ako naglingkod lamang ug mihimaya sa kamatuoran nga ako sa gihapon buhi dinhi niining matahum nga yuta…Ang Ginoo maayo kaayo kanako. Unsa ako ka mapasalamaton kaniya nga ania pa gihapon ako dinhi ug mibati og kamaayo kaayo. Ako malipayoooooon kaayo buot lang nga mosinggit ug mosayaw niining maanindot nga balay samtang ang adlaw mosulod sa dagkong mga bintana. Ako nahigugma nga nabuhi.”

Usa ka maisog nga inahan maisugon nga nakigaway sa usa ka makapahugo nga sakit migugol og dili maihap nga mga takna nga naghago nga mihuman sa usa ka dako, makapahagit nga pagborda nga buhat sa arte. Kini usa ka gasa sa managtiayon nga nakasinati og mga pagsulay. Alang sa managtiayon kini usa ka bililhon nga bahandi, usa ka makanunayon nga pahinumdom sa bililhon nga mga bunga sa matinuoron nga paniguha diha sa atubangan sa kalisdanan, usa ka malungtaron nga mensahe sa paglaum nga gibugkos diha sa gapos sa putli nga gugma ug mauyunon nga sakripisyo.

Pagkaplag sa Hingpit nga Kalipay Unsay Anaa Kanimo

Ang mga bata nagtudlo kanato kon unsaon sa pagkaplag og hingpit nga kalipay bisan ubos sa labing mahagiton nga mga kahimtang. Ang mga bata wala pa gihapon makat-on nga mawad-an sa kadasig pinaagi sa paghunahuna sa mga butang nga wala kanila. Sila nakakaplag og hingpit nga kalipay pinaagi sa unsay anaa kanila. Ako nahinumdom sa usa ka gamay nga batang lalaki nga nagdula buyon sa daplin sa suba. Siya mihigot og usa ka buok nga pisi sa bingwit sa tumoy sa duha ka gibiyaan nga mga lata sa pabugnaw nga ilimnon. Siya milabay sa usa ka lata ibabaw sa sanga, dayon gipuno kini og tubig. Siya mobira sa lain nga lata, dayon buhian kini. Ang gibug-aton sa una nga lata mobira sa ikaduha nga lata sa taas samtang kini mahulog. Siya mokatawa ug mosayaw uban sa kamaya.

Yano, makapabata nga mga kasinatian naglibot kanato. Kini mahimo nga mga barbola sa kaluwasan aron sa pagpaubos sa tensyon ug pagpasaka sa espiritu. Ayaw paghunahuna sa unsay wala kanimo o nawala. Ang Ginoo misaad sa masulundon sa pagpakigbahin sa tanan nga anaa Kaniya uban kanila. Ikaw sa kasamtangan nagkulang dinhi, apan sa sunod nga kinabuhi, kon ikaw magmatinudanon sa imong kaugalingon nga takus pinaagi sa pagpuyo nga maisugon, ang kahingpitan mao ang imong panalangin.

Pangita og magantihon nga mga panalangin sa imong kinabuhi sa diha nga, sa kaalam sa Ginoo, Siya mihikaw kanimo sa usa ka butang nga imo kaayo nga gikinahanglan. Ngadto sa buta o bungol, Siya mipalig-on sa uban nga mga panabut. Ngadto sa nasakit, Siya mihatag sa pailub, salabutan, ug milambo nga pagpasalamat alang sa pagkamabination sa uban. Uban sa pagkawala sa usa ka minahal, Siya mopahugot sa mga bugkos sa gugma, mopabuhong sa mga handumanan, mopalig-on sa paglaum sa umaabut nga panaghiusa pag-usab. Ikaw makakaplag sa magantihon nga mga panalangin kon ikaw sa mauyunon nga paagi modawat sa kabubut-on sa Ginoo ug mogamit sa hugot nga pagtuo nganha Kaniya.⁶

Ngadto sa gisakit nga mga katawhan ni Alma, ang Ginoo miingon:

“Ako usab mopagaan sa mga alantuson…gani kamo dili makabati kanila diha sa inyong mga buko-buko…; ug Ako mobuhat nga kamo mobarug ingon nga mga saksi alang kanako human niini, ug nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit.

“Ug…ang mga alantuson…gihimo nga magaan; oo, ang Ginoo mipalig-on kanila nga sila makadaug sa ilang mga alantuson uban sa kasayon, ug sila mitugyan uban sa maayo nga buot ug uban sa pailub ngadto sa tanan nga kabubut-on sa Ginoo.”⁷

Ang Pagkamamugnaon Makatabang Kanimo nga Makapahimulos sa Kinabuhi

Sulay sa pagkamamugnaon alang sa hingpit nga kalipay nga ikahatag niini. Human ang ilang halangdong mga bana gipapauli, sila Sister Camilla Kimball, Amelia McConkie, ug Helen Richards nakakat-on sa pagpintal. Sila wala lamang magbilin og mga kabilin sa mga arte, apan sila dili na gayud makakita og pagsalop sa adlaw, usa ka nawong o usa ka kahoy nga sama usab. Karon sila makakita sa pino nga mga pagbag-o sa bulok ug porma ug magmaya diha sa buhong nga katahum nga naglibot kanila.

Pagpili og usa ka butang sama sa musika, sayaw, paglilok, o balak. Ang pagkamamugnaon makatabang kanimo nga makapahimulos sa kinabuhi. Kini makapasanay og espiritu sa pagpasalamat. Kini makapalambo sa natago nga kahanas, mopahait sa imong kasarang sa pagpangatarungan, sa pagbuhat, ug sa pagpangita sa katuyoan sa kinabuhi. Kini makaabog sa kamingaw ug kasakit sa kasingkasing. Kini makahatag sa pagbag-o, sa pagkidlap sa kadasig, ug kasadya alang sa kinabuhi

Pag-alagad: Usa ka Yawe sa Kalipay

Andam sa pag-alagad sa uban mao ang usa ka yawe sa malungtaron nga kalipay. Si Presidente Spencer W. Kimball miingon: “Ang Dios nakakita kanato, ug siya nagbantay ibabaw kanato. Apan sa kasagaran kini pinaagi sa lain nga mortal nga siya mohatag sa atong mga gikinahanglan. Busa, kini mahinungdanon nga kita moalagad sa usag usa.”⁸

Ako nakaila og usa ka babaye kinsa hingpit kaayong malipayon. Matag buntag siya mohangyo sa iyang Amahan sa Langit sa pagdala kaniya ngadto sa usa ka tawo nga iyang matabangan. Kanang kinasingkasing nga pag-ampo natubag sa nagbalikbalik nga higayon. Ang mga alantuson sa daghan napagaan ug ang ilang mga kinabuhi napasanag. Siya padayon nga gipanalanginan nga nahimong instrumento nga gigiyahan sa Ginoo.

Ang Kalisud Mahimong Himoon nga Kalamboan

Ako nasayud nga matag kalisdanan nga atong giatubang sa kinabuihi, bisan kadtong miabut tungod sa atong pagpasagad o bisan sa kalapasan, mahimong mausab sa Ginoo ngadto mga kasinatian sa pagtubo, usa ka tinuod nga hagdanan paingon sa taas. ⁹ Sa piho ako dili makaawhag sa kalapasan isip usa ka agianan sa pagtubo. Kini masakit, malisud, ug busa sa kinatibuk-an wala kinahanglana. Maalamon kaayo ug labaw kaayo nga masayon sa pagpadayon sa unahan diha sa katarung. Apan pinaagi sa tukma nga paghinulsol, hugot nga pagtuo diha sa Ginoong Jesukristo, ug pagsunod sa Iyang mga sugo, bisan sa kahigawad nga moabut gikan sa kalapasan mahimong mausab ngadto sa pagbalik sa kalipay.

Paghimo og lista sa mga butang nga imong mabuhat alang sa kalipay, sama sa:

Palandonga ang mga kasulatan aron makasabut sa laraw sa kalipay.
Pag-ampo uban sa hugot nga pagtuo ni Jesukristo.
Higugmaa ug alagari ang uban.
Dawat sa mga ordinansa sa templo. Balik aron sa pagpanalangin sa uban.
Paminaw sa propeta ug sunod sa iyang tambag.
Pagpasalamat alang sa unsay anaa kanimo.
Pahiyom kanunay.

Ang imong lista makahatag og mga yawe sa katagbaw ug hingpit nga kalipay.

Ang Hagit Temporaryo apan ang Kalipay Mahangturon

Usa ka inila nga awit sa Brazil nagbalikbalik sa usa ka bakak nga daghan ang mituo: Ang kasubanan dili gayud matapos, apan ang kalipay matapos. Ako mosaksi nga uban sa hugot nga pagtuo diha sa Manluluwas ug sa pagsunod sa Iyang mga pagtulun-an, ang kalipay dili gayud matapos, apan ang kasub-anan matapos.

Bisan unsa ka lisud ang usa ka butang nga imong giatubang o sa usa ka hinigugma kini kinahanglan nga dili mopasulabi sa imong kinabuhi ug sentro sa tanan nimong kaikag. Ang mga hagit mao ang mga kasinatian nga mitubo, ang temporaryong yugto nga pagadulaon sa likod nga talan-awon sa makapahimuot nga kinabuhi. Ayaw kaayo pagpadala sa usa ka hitabo nga ikaw dili makahunahuna sa laing mga butang o pag-amuma sa imong kaugalingon o alang niadtong kinsa nagsalig kanimo. Hinumdumi, sama kadaghan sa pag-ayo sa lawas, ang pag-ayo sa pipila ka espirituhanon ug emosyonal nga mga hagit nagkinahanglan og panahon.

Ang Ginoo miingon, “Pagpailub sa mga kasakit, kay ikaw makabaton og daghan; apan lahutay kanila, kay, tan-awa, Ako anaa uban kanimo, gani ngadto sa katapusan sa imong mga adlaw.”¹⁰ Ingon nga ikaw mapailubon, ikaw makasabut kon unsa ang ipasabut sa “Ako anaa uban kanimo.” Ang gugma sa Dios makahatag og kalinaw ug hingpit nga kalipay.

Ang imong hugot nga pagtuo ni Jesukristo makahatag sa kinabuhi og malungtaron nga kahulogan. Hinumdumi nga ikaw anaa sa panaw ngadto sa kahimayaan. Usahay ikaw adunay mga kasinatian nga naghatag og labaw pa nga kalipay kay sa uban, apan kining tanan adunay katuyoan uban sa Ginoo.¹¹

Isip usa ka saksi sa Manluluwas, ako moawhag kanimo sa pagpasaylo sa bisan kinsa nga imong gibati nga nakapasakit kanimo. Kon adunay kalapasan , paghinulsol niini, aron ang Magtutudlo unta moayo kanimo.

Pasalamati ang imong Amahan sa Langit ug Iyang Hinigugma nga Anak alang sa laraw sa kalipay ug sa mga baruganan sa ebanghelyo diin kini gibase. Pagmapasalamaton alang sa mga ordinansa ug sa mga pakigsaad nga ilang gihatag, Ako maligdong nga mopamatuod nga sila adunay gahum sa pagpurongpurong sa imong kinabuhi sa kalinaw ug hingpit nga kalipay, aron paghatag niini sa katuyoan ug kahulogan. Ikaw makat-on nga ang kasub-anan ug kahigawad temporaryo. Ang kalipay walay katapusan tungod ni Jesukristo. Ako maligdong nga mosaksi nga Siya buhi, nga Siya nahigugma kanimo, ug nga Siya motabang kanimo.

Gikan sa pakigpulong ni Elder Scott sa Abril 1996 nga kinatibukang komperensya sa sa Simbahan (tan-awa sa Conference Report, Abr. 1996, 31–35, o Ensign, Mayo 1996, 14–26).