Mga Kapanguhaan sa Pamilya
Leksyon 16: Ang Pag-ampo sa Banay, Pagtuon sa Kasulatan sa Banay, ug Gabii sa Banay

Leksyon 16

Ang Pag-ampo sa Banay, Pagtuon sa Kasulatan sa Banay, ug Gabii sa Banay

Mga Ideya alang sa Paggamit

Sumala sa imong kaugalingon nga mga panginahanglan ug mga kahimtang, sunda ang usa o daghan pa niining mga sugyot.

  • Kon ang imong banay naghimo sa kanunay sa pag-ampo sa banay, pagtuon sa kasulatan sa banay, ug gabii sa banay, sa mainampoon nga paagi hunahunaa ang mga paagi nga imong mapalambo sa usa o labaw pa niining mga pagkabutang. Kon ang imong banay wala magbuhat niining mga butanga, paghunahuna kon unsa ang imong buhaton aron pagtabang sa paghimo niini nga mga kalihokan diha sa imong panimalay.

  • Isip usa ka banay, pagplano og usa ka kalihokan nga inyong buhaton nga magtambayayong.

  • Tun-i pag-usab ang materyal diha sa mga pahina 137–39 sa Teaching No Greater Call (36123).

Buluhaton sa Pagbasa

Tun-i ang musunod nga mga artikulo. Kon ikaw minyo, basaha ug hisguti ang mga artikulo uban sa imong kapikas.

Ang mga Panalangin sa Pag-ampo sa Banay

Presidente Gordon B. Hinckley
Unang Magtatambag sa Unang Kapangulohan

Ang Apostol Pablo mipahayag ngadto ni Timoteo:

“Apan sabta kini unya sa kaulahiang mga adlaw managpangabut ang mga panahon nga malisud.

“Kay ang mga tawo unya magamahigugmaon man sa ilang kaugalingon, mga hinapi, tigpagawal, hambogiro, tampalasan, masukihon sa mga ginikanan, walay igabalus, dili diosnon,

“Walay pagbati sa paghigugma, dili malokmay, tigbutangbutang, mapatuyangon, mabangis, dili mahigugmaon sa maayo,

“Mabudhion, madalidalion, tigpaburot, nga mahigugma sa kalipayan inay sa Dios unta hinoon” (2 Timoteo 3:1–4).

Kinahanglan nga adunay bag-ong paghatag og gibug-aton sa pagkamatinud-anon, pamatasan, ug kaligdong sa atong panahon. Diha lamang kon kita motukod pag-usab ngadto sa kinaiya sa atong mga kinabuhi sa mga hiyas nga mao ang lintunganay sa tinuod nga sibilisasyon nga makapausab sa sumbanan sa atong mga panahon. Ang pangutana nga atong giatubang mao, Asa kita magsugod?

Ako makasulti nga kini kinahanglan gayud nga magsugod sa pag-ila sa Dios isip atong Amahan sa Kahangturan, sa atong relasyon ngadto Kaniya isip Iyang mga anak, uban sa pagpakigsulti uban Kaniya sa pag-ila sa Iyang harianon nga katungdanan, ug uban sa matag adlaw nga pangamuyo alang sa Iyang paggiya diha sa atong mga buluhaton.

Ako motuo nga ang pagbalik sa karaan mga sumbanan sa pag-ampo, pag-ampo sa banay diha sa mga panimalay sa mga katawhan, mao ang usa sa sukaranan nga mga tambal nga mahimong makapugong sa makahahadlok nga sakit nga nagkunhod sa pamatasan sa atong katilingban. Kita dili makapaabut og milagro sa usa ka adlaw, apan sa kaliwatan kita makaangkon og milagro.

Usa o duha na ka kaliwatan ang milabay, ang pag-ampo sa banay diha sa mga panimalay sa Kristyanos nga mga katawhan sa tibuok kalibutan kabahin sa daghan nga kalihokan sa adlaw sama sa pagpangaon. Samtang kana nga gawi mikunhod, ang pagkaus-os sa moralidad nga gihisgutan ni Apostol Pablo misunod.

Ako nagtuo nga walay igo nga puli alang sa buntag ug gabii nga gawi sa paghiusa sa pagluhod—amahan, inahan, ug mga anak. Kini, labaw pa sa humok nga mga alpombra, labaw pa kay sa matahum nga mga tabil, labaw pa sa maayo nga pagkabalanse sa mga kolor, mao ang butang nga makahimo alang sa labaw pa ka maayo ug labaw pa ka matahum nga mga panimalay.

Adunay usa ka butang diha sa paagi sa pagluhod nga mosukwahi sa mga kinaiya nga gihulagway ni Pablo: “hambogiro…madalidalion, tigpagawal.”1

Adunay usa ka butang sa mao nga gawi sa amahan ug inahan ug mga anak nga naghiusa sa pagluhod nga makapawala sa uban niadtong mga matang nga iyang gihulagway: “masukihon sa mga ginikanan,…walay pagbati sa paghigugma.”2

Adunay usa ka butang sa buhat sa pagtawag sa Dios nga nakatugbang sa kahilig ngadto sa pagpanamastamas ug ngadto sa pagkahimo nga nagahigugma sa kalipay inay sa Dios unta hinoon.3

Ang pagkahilig ngadto sa pagka dili diosnon, ingon sa gihulagway niini ni Pablo, ang pagka dilimapasalamaton, mawala samtang ang mga sakop sa banay naghiusa nga magpasalamat sa Ginoo alang sa kinabuhi ug kalinaw ug sa tanan nga anaa kanila. Ug samtang sila nagpasalamat sa Ginoo alang sa usag usa, adunay molambo diha sa banay nga usa ka bag-o nga pagpasalamat, usa ka bag-o nga pagtinahuray, usa ka bag-o nga pagbinatiay sa usa alang sa lain.

Ang kasulatan mipahayag: “Kamo mopasalamat sa Ginoo nga inyong Dios sa tanan nga mga butang” (D&P 59:7). Ug usab: “Ug walay butang nga ang tawo makapasakit sa Dios, o batok ni bisan kinsa nga ang iyang kasuko mapukaw, gawas niadto kinsa dili mokumpisal sa iyang sayop diha sa tanan nga mga butang” (D&P 59:21).

Sa paghiusa sa paghinumdom sa atubangan sa Ginoo sa kabus, sa timawa, ug sa gidaugdaug, adunay molambo, nga wala mamatikdi apan tinuod, usa ka gugma alang sa uban labaw sa kaugalingon, usa ka pagtahud alang sa uban, usa ka tinguha aron sa pag-alagad sa mga panginahanglan sa uban. Ang usa dili makapangayo sa Dios sa pagtabang sa usa ka silingan nga anaa sa kalisud nga walay pagbati nga giaghat sa pagbuhat og usa ka butang sa kaugalingon ngadto sa pagtabang niana nga silingan. Unsa nga mga milagro ang mahitabo diha sa mga kinabuhi sa mga tawo sa kalibutan kon ilang biyaan ang ilang kaugalingon nga kahakog ug kalimtan ang ilang mga kaugalingon diha sa pag-alagad sa uban. Ang liso nga gikan niining mapasilongan ug mabungahon nga kahoy mahimong motubo sa iyang labing maayo nga pagkatanom ug pagkaamuma diha sa matag adlaw nga mga pangamuyo sa banay.

Wala akoy nasayran nga labaw pa nga maayo nga paagi sa pagpalambo og gugma alang sa nasud kaysa alang sa mga ginikanan sa pag-ampo atubangan sa ilang mga anak alang sa yuta diin sila nagpuyo, mangamuyo sa mga panalangin sa Makagagahum dinha niini nga kini unta mapatunhay sa kalingkawasan ug kalinaw. Wala akoy nasayran nga labaw pa ka maayo nga paagi sa pagtukod sulod sa mga kasingkasing sa atong mga anak sa usa ka gikinahanglan kaayo nga pagtahud alang sa awtoridad kay sa paghinumdom sa matag adlaw nga mga pangamuyo sa banay ang mga pangulo sa atong matag mga nasud kinsa nagdala sa mga salagubangunon sa pangagamhanan.

Ako nahinumdom nga nakakita sa karatula sa usa ka pamahayag nga mabasa: “Usa ka nasud nga nag-ampo mao ang usa ka nasud nga adunay kalinaw.” Ako nagtuo niini.

Ako wala masayud og usa ka butang nga makatabang kaayo sa paghupay sa mga kabalisa sa banay, nga sa maigmaton nga mapahinabo ang pagtahud alang sa mga ginikanan nga mosangpot ngadto sa pagkamasulundon, nga makaapekto sa espiritu sa paghinulsol diin mahimo nga makawala sa daghang kasub-anan sa naungkag nga mga panimalay, kay sa paghiusa sa mag-ampo, paghiusa nga mokumpisal sa mga kahuyang sa atubangan sa Ginoo, ug nangamuyo sa mga panalangin sa Ginoo diha sa panimalay ug niadtong kinsa nagpuyo niini.

Ako dugay na kaayo nga nadani sa usa ka pamahayag nga gihimo sa usa ka tawo nga dugay na kaayo nga namatay. Si James H. Moyle misulat ngadto sa iyang mga apo kalabut sa pag-ampo sa banay sa iyang kaugalingon nga panimalay. Siya miingon: “Kami dili matulog nga dili pa mangluhod sa pag-ampo aron sa pagpangamuyo og balaan nga paggiya ug pagtugot. Mga panagbingkil mahimo nga moabut diha sa gidumala sa labing maayo nga mga banay, apan mahimo nga mawala pinaagi sa …espiritu sa pag-ampo . …Ang nga mao nga salabutan mopaingon sa pagpasiugda sa labaw pa nga matarung nga kinabuhi diha sa mga katawhan. Kini mopaingon ngadto sa panaghiusa, gugma, pagpasaylo, sa pagpangalagad.”

Sa 1872 si Koronel Thomas L. Kane, ang bantugang higala sa atong mga katawhan diha sa ilang kakuyaw sa Iowa ug diha sa panahon sa pag-abut sa mga sundalo sa Walog sa Salt Lake, miabut sa kasadpan pag-usab uban sa iyang asawa ug duha ka anak nga mga lalaki. Sila mipanaw ngadto sa St. George uban ni Brigham Young, mohunong sa matag gabii diha sa mga panimalay sa mga sakop sa Simbahan buyon sa agianan. Si Gng. Kane misulat sa nagsunodsunod nga mga sulat ngadto sa iyang amahan ngadto sa Philadelphia. Sa usa niini siya miingon:

“Diha sa matag usa sa mga dapit nga kami mihunong niini nga panaw kami mag-ampo dayon human sa paniudto-panihapon, ug mga pag-ampo na usab sa dili pa mamahaw. Walay usa nga dili moapil. …Ang mga Mormon…moluhod dayon, samtang ang pangulo sa pinuy-anan, o usa ka pinasidunggan nga bisita mag-ampo og kusog. …Sila migugol og gamay nga panahon sa pagsulti sa mga kinaiya sa Dios, apan nangayo alang sa ilang gikinahanglan, ug magpasalamat Kaniya alang sa unsa ang Iyang nahatag. …[Sila] mipakaingon niini nga ang Dios nasayud sa atong sinati nga mga ngalan ug mga titulo, ug mangayo og panalangin diha sa [naandan nga tinagsa nga ngalan],…ako nakagusto niini sa diha nga ako naanad na niini.

O, nga kita isip mga katawhan unta hingpit nga maugmad niini nga gawi, diin ingon ka mahinungdanon ngadto sa atong unang lumulupyo nga mga katigulangan. Ang pag-ampo sa banay ingon kadako nga bahin sa ilang pagsimba sama sa mga tigum nga gipundok didto sa Tabernakulo. Uban sa hugot nga pagtuo nga miabut tungod sa matag adlaw nga pasi-unang mga pag-ampo, sila mihawan sa yuta sa mga kasagbutan, midala sa mga tubig ngadto sa nauga nga yuta, mihimo sa desierto nga mamulak, midumala sa ilang mga banay sa gugma, nagpuyo sa kalinaw sa usag usa, mihimo sa ilang mga ngalan nga imortal samtang sila nahikalimot sa ilang mga kaugalingon diha sa pag-alagad sa Dios.

Ang banay mao ang sukaran nga yunit sa katilingban. Ang banay nga mag-ampo mao ang paglaum sa usa ka maayo nga katilingban. “Pangitaa ninyo si Jehova samtang siya hikaplagan pa” (Isaias 55:6).

Makahimo ba kita sa atong mga panimalay nga labaw nga matahum? Oo, pinaagi sa pagpatunong sa atong mga kaugalingon isip mga banay ngadto sa Tinubdan sa tanang tinuod nga katahum. Makahimo ba kita paglig-on sa katilingban ug mohimo niini nga labaw nga maayo nga dapit puy-an? Oo, pinaagi sa paglig-on sa hiyas sa atong kinabuhi sa banay pinaagi sa paghiusa sa pagluhod ug mangamuyo sa Makagagahum pinaagi sa ngalan sa Iyang Hinigugma nga Anak.

Kini nga gawi, ang pagbalik sa banay nga pagsimba, masabwag sa tibuok yuta ug ibabaw sa yuta, makapawala sa kasub-anan sa usa ka kaliwatan nga naglaglag kanato. Kini mopahiuli sa kaligdong, pagtinahuray sa usag usa, ug sa espiritu sa pagkama-pasalamaton diha sa mga kasingkasing sa mga katawhan.

Ang Magtutudlo mipahayag, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7).

Ako mohatag sa akong pagpamatuod nga kon kamo kinasingkasing nga mogamit sa pag-ampo sa banay, kamo dili mobiya nga walay ganti. Ang mga kausaban dili dayon makita. Kini mahimong labing kulbahinam. Apan kini mahimong tinuod, kay ang Dios “magabalus ra sa mga magapangita kaniya” (Mga Hebreohanon 11:6).

Unta kita magmatinud-anon sa paghimo og usa ka panig-ingnan sa atubangan sa kalibutan dinhi niini nga gawi ug sa pag-awhag sa uban sa pagbuhat sa ingon.

Gikan sa Pebrero 1991 nga Ensign, mga pahina 2–5.

“Busa Ako Gitudloan”

Elder L. Tom Perry
Sa Korum sa Napulog Duha ka mga Apostoles

Matarung nga mga Ginikanan

Ang Basahon ni Mormon nagsugod uban niini nga mga pulong: “Ako, si Nephi, natawo sa mga matarung nga ginikanan, busa ako gitudloan sa tanan nga nakat-unan sa akong amahan” (1 Nephi 1:1). Unsa ka lahi nga kalibutan kini mahimo kon ang personal nga inadlaw nga mga talaan sa mga anak sa Amahan sa Langit magsugod uban sa sama nga mga hugpong sa mga pulong—adunay matarung nga mga ginikanan ug gitudloan pinaagi kanila.

Kita nagpuyo sa ingon ka talagsaon nga panahon sa kasaysayan, panahon nga ang ebanghelyo sa Ginoo napahiuli diha sa iyang kahingpitan. Ang atong hugpong sa misyonaryo nagkadugang sa katakus ug gidaghanon; sa ingon, ang ebanghelyo gitudlo sa daghan pa nga mga pinulongan ngadto sa labaw pa kadaghan nga mga nasud ug sa labaw pa ka daghang gidaghanon sa naminaw sukad kaniadto. Samtang ang mga purok ug mga istaka gitukod sa hapit daghang mga dapit sa kalibutan, mamugnaon nga mga hunahuna ang nadasig aron sa pagpalambo sa mga instrumento sa komunikasyon diin makapadala sa mga panudlo sa mga propeta ngadto sa mga dalunggan sa daghan, labaw pa ka daghan nga mga katawhan. Ang maayong mga balita sa ebanghelyo mahimo na karon nga makatag sa labaw pa ka dali aron sa pagdala sa paglaum sa walay katapusan nga kalinaw ngadto sa mga kasingkasing sa mga katawhan.

Kinabuhi sa Banay sa Krisis

Ang usa sa mahinungdanong mga mensahe sa ebanghelyo mao ang doktrina sa mahangturon nga kinaiya sa yunit sa banay. Kita mipahayag ngadto sa kalibutan sa bili ug kamahinungdanon sa kinabuhi sa banay, apan daghan sa mga kalibog ug kalisud nga atong nakita nga anai sa kalibutan karon mao ang nakita nga pagkakunhod sa banay. Mga kasinatian sa panimalay diin ang mga anak gitudloan ug gibansay sa mahigugmaong mga ginikanan nagkawala.

Kinabuhi sa banay diin ang mga anak ug mga ginikanan magkadungan sa pagsultihanay sa pagtuon, pagdula, ug pagtrabaho napulihan pinaagi sa dali, tinagsatagsa, pagpangaon pinaagi sa microwave ug usa ka gabii sa atubangan sa TV. Sa 1991 ang National Association of Counties, nagtigum sa Dakbayan sa Salt Lake, naghunahuna nga ang kakulang sa impluwensya sa panimalay miabut sa ingon nga punto nga nahimong krisis sa atong nasud ug migahin og panahon sa ilang mga tigum naghisgut sa ilang mga kabalaka. Sila miila sa lima ka mga sukaranang mga hunahuna nga makapadugang sa mga kahigayunan sa matag banay alang sa kalampusan.

Una, paglig-on sa mga relasyon pinaagi sa mga kalihokan sa banay; ikaduha, paghimo sa makatarunganon nga mga lagda ug mga gipaabut; ikatulo, pagtukod sa kinaugalingon nga pagtamud; ikaupat, paghimo og makab-ut nga mga tumong; ug ikalima, matag karon ug unya timbangtimbanga ang mga kalig-on ug mga panginahanglan sa banay.

Sa kalit ang dinalian ug ang tingog sa pahimangno sa atong mga propeta gikan gayud sa pagsugod sa panahon adunay talagsaon nga kalabutan. Ingon nga kita gitambagan ug giawhag, kita kinahanglan gayud nga moatiman sa atong kaugalingon nga mga banay ug mopakusog sa atong misyonaryo nga mga paninguha aron pagdala sa uban ngadto sa kahibalo sa kamaturoan ug sa kamahinungdanon sa yunit sa banay.

Si Adan ug Eva Nakat-on sa mga Katungdanan sa Pagkaginikanan

Sa sinugdanan gayud, ang mga panudlo sa Ginoo ngadto ni Adan ug Eva mipatin-aw sa ilang mga kapangakohan isip mga ginikanan. Ang ilang mga tahas gitino pag-ayo. Human sila makadawat og mga panudlo gikan sa Ginoo, sila atong makita nga nagsunod sa Iyang tambag ug nag-ingon niini:

“Ug niana nga adlaw si Adan mihimaya sa Dios ug napuno, ug misugod sa pagpanagna mahitungod sa tanan nga mga banay sa yuta, nag-ingon: Daygon ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi ako adunay hingpit nga kalipay, ug usab sa unod ako makakita sa Dios.

“Ug si Eva, iyang asawa, nakadungog niining tanan nga mga butang ug nalipay, nag-ingon: Kon dili pa unta sa atong kalapasan kita dili unta makaangkon og binhi, ug dili gayud masayud sa maayo ug sa dautan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon.

“Ug si Adan ug si Eva mihimaya sa ngalan sa Dios, ug sila mihimo sa tanan nga mga butang nga mahibaloan ngadto sa ilang anak nga mga lalaki ug sa ilang anak nga mga babaye” (Moises 5:10–12).

Pagtudlo ug Pagbansay sa mga Anak

Oo, gikan gayud sa sinugdanan ang kapangakohan sa mga ginikanan sa pagtudlo sa ilang mga anak kauban sa mga panudlo nga gihatag sa Ginoo ngadto sa atong unang yutan-ong mga ginikanan.

Ang pagpadayag nga nadawat samtang ang Simbahan napahiuli niini nga adlaw mipahimangno pag-usab sa mga ginikanan sa ilang mga kapangakohan sa pagtudlo ug pagbansay sa ilang mga anak. Diha sa ikasiyaman ug tulo nga seksyon sa Doktrina ug mga Pakigsaad, atong makita nga ang Ginoo mipanton sa pipila sa mga kaigsoonan sa wala pag-atiman sa ilang mga kapangakohan sa banay. Ang mga kasulatan mabasa:

“Apan Ako nagsugo kaninyo sa pag-amuma sa inyong mga anak diha sa kahayag ug kamatuoran. …

“Ikaw wala magtudlo sa imong mga anak sa kahayag ug kamatuoran, sumala sa mga sugo; ug kanang usa ka dautan adunay gahum, sa gihapon, diha kanimo, ug kini mao ang hinungdan sa imong kasakitan.

“Ug karon usa ka sugo Ako mohatag nganha kanimo—kon ikaw pagaluwason ikaw mopahimutang diha sa kahusay sa imong kaugalingon nga balay kay adunay daghan nga mga butang nga dili matarung sa imong balay” (D&P 93:40, 42–43).

Ang Kamahinungdanon sa Gabii sa Banay

Sa mga tuig nga milabay ang Simbahan mitambag sa tanang mga ginikanan sa paghimo og senemana nga mga gabii sa banay. Karon kana nga pahimangno natukod diha sa mga panimalay sa mga sakop sa Simbahan. Ang Lunes sa gabii mao ang gigahin isip usa ka gabii alang sa mga banay nga magkahiusa. Walay mga kalihokan nga ipasiugda niini nga gabii. Kita gisaaran og mahinungdanong mga panalangin kon ang atong mga banay magmatinud-anon bahin niini.

Si Presidente Harold B. Lee sa makausa mitambag kanato:

“Karon ibutang kini sa hunahuna; nga kon ang hingpit nga sukod sa misyon ni Elijah masabtan, nga ang mga kasingkasing sa mga anak pabalikon ngadto sa mga amahan, ug ang mga amahan ngadto sa mga anak. Kini magamit dinhi nga bahin sa tabil ingon nga mahimo kini sa pikas bahin sa tabil. Kon kita magpasagad sa atong mga banay dinhi sa paghimo sa gabii sa banay ug kita mapakyas sa atong kapangakohan dinhi, unsa ang mahitabo sa langit kon atong mawala ang pipila tungod sa atong kaugalingon nga pagpasagad? Ang langit dili mahimong langit hangtud nga atong mabuhat ang tanan nga butang nga atong mahimo aron sa pagluwas niadtong kinsa gipadala sa Ginoo pinaagi sa atong kaliwatan.”

Dayon siya mipadayon:

“Busa, ang mga kasingkasing sa inyong mga amahan ug mga inahan kinahanglan gayud nga mobalik ngadto sa inyong mga anak karon dayon, kon kamo adunay tinuod nga espiritu ni Elijah, ug dili maghunahuna nga kini magamit lamang ngadto niadtong kinsa lapas sa tabil. Himoa nga ang inyong mga kasingkasing mobalik ngadto sa inyong mga anak, ug motudlo sa inyong mga anak; apan kini kinahanglan gayud nga inyong buhaton kon sila bata pa aron matudloan sa tukma. Ug kon kamo pagpasagad sa inyong gabii sa banay, kamo nagpasagad sa sinugdanan sa misyon ni Elijah ingon ka piho nga ingon og ikaw nagpasagad sa imong pagsiksik sa buhat sa kagikanan” (sa Relief Society Courses of Study, 1977–78 [1977], 2; mga italik gidugang).1

Ako sa kanunay naghunahuna sa malipayong mga panahon nga diha kanamo sa diha nga ang among banay bag-o pa ug ang among mga anak diha sa panimalay. Akong gihinumduman pag-usab kadtong mga adlaw ug mihunahuna sa mga kausaban nga akong himoon diha sa among organisaayon ug pagdumala sa banay kon kami adunay kahigayunan sa pagpuyo niana nga panahon pag-usab. Adunay duha ka mga dapit nga akong buot palamboon kon kana nga kahigayunan itugot ngari kanako sa pag-angkon og mga gagmay nga mga anak diha sa among panimalay sa makausa pa.

Ang una mao ang paggahin og labaw pa nga panahon isip bana ug asawa diha sa usa ka tigum sa pagkat-on sa komite sa pagdumala sa banay, magsultihanay, magplano, ug mag-organisar aron labaw pang matuman ang among mga tahas isip mga ginikanan.

Ang ikaduha nga pangandoy nga buot nako, kon ako makaangkon pag-usab niadtong mga tuig, mao ang paggahin og daghang pang panahon sa banay. Kini naglakip sa labaw pa ka makanunayon, makahuluganon nga mga gabii sa banay.

Ang mga Batan-on Nagtampo sa Kalampusan

Ang hingpit nga salagubangunon sa pagplano ug pag-andam alang sa mga gabii sa banay kinahanglan nga dili ihatag ngadto lamang sa mga ginikanan. Ang labing malampuson nga gabii sa banay nga akong nasaksihan mao nga kon ang mga batan-on sa banay aktibo nga mohimo sa ilang bahin.

Ako nagtawag kaninyo bantugang mga deakono, mga magtutudlo, ug mga pari, kamo Beehive nga mga babaye, mga Mia Maid, ug mga Laurel sa paghimo og dako nga tampo diha sa kalampusan sa inyong mga gabii sa banay. Sa daghan nga mga panimalay kamo ang konsinsya sa banay. Human niana, kamo ang adunay labing daghan nga maani gikan niini nga kasinatian. Kon kamo buot mopuyo diha sa usa ka kalibutan sa kalinaw, kasiguroan, ug kahigayunan, ang banay nga imong matampo ngadto mahimong makadugang sa kaayohan, oo, bisan sa tibuok kalibutan.

Ako nahinumdom sa usa ka panig-ingnan niini nga nahitabo sa mga adlaw nga pangilin sa Pasko usa ka tuig sa diha nga kami uban sa mga apo naglulinghayaw. Aron sa paghimo og tinuod nga kasinatian nga panag-uban, kami miandam og usa ka sakyanan aron magkauban sa pagpanaw. Diha sa sakyanan mao si Lolo ug Lola ug ang akong anak nga lalaki ug ang iyang tulo ka dagko na nga mga anak. Ang asawa sa akong anak lalaki nagpabilin sa panimalay uban sa mga gagmay nga mga sakop sa banay. Ako ang mipuli sa pagmaneho, ug ang akong asawa naglingkod sunod kanako naglihok isip tiglawig. Gikan sa luyo nga tumoy sa sakyanan, ako nakadungog ni Audrey, ang kinamagulangan nga anak, nakigsulti sa iyang amahan. Siya miingon, “Pa, usa sa atong mga tumong niini nga tuig mao ang paghuman sa Basahon ni Mormon diha sa atong pagtuon sa banay. Kini mao ang katapusan nga adlaw sa tuig. Nganong dili nato humanon karon aron kita maanaa sa iskedyul?”

Unsa ka talagsaon nga kasinatian kini sa pagpaminaw sa akong anak lalaki ug sa iyang tulo ka mga anak, matag usa magpulipuli sa pagbasa og kusog sa katapusan nga mga kapitulo sa Moroni ug mihingpit sa ilang tumong sa pagbasa sa tibuok Basahon ni Mormon. Hinumdumi, usa ka batan-on nga babaye ang mihimo sa sugyot, dili usa sa mga ginikanan.

Hagit ngadto sa mga Batan-on

Kamo usa ka pinili nga kaliwatan—gitagana alang niining talagsaon nga panahon sa kasaysayan sa mga katawhan. Kamo adunay daghan kaayo nga ikahatag aron pagdugang sa pagtubo ug pagpalambo sa mga banay diin kamo nahisakop. Ako mohagit kaninyo sa pagpadayon sa unahan diha sa inyong mga yunit sa banay uban niana nga linain, madasigon nga espiritu sa inyong kabatan-on aron paghimo sa ebanghelyo nga tinuod nga buhi diha sa inyong mga panimalay. Hinumdumi ang tambag ni Presidente Joseph F. Smith sa diha nga siya miingon:

“Ako buot nga ang akong mga anak, ug tanang mga anak sa Zion, masayud nga walay bisan unsa niining kalibutan nga bililhon kaayo alang kanila ingon sa kahibalo sa Ebanghelyo ingon nga kini gipahiuli sa kalibutan niining ulahing mga adlaw pinaagi ni Propeta Joseph Smith. Walay bisan unsa nga makailis sa pagkawala niini. Walay bisan unsa sa yuta nga makatandi sa kahalangdon sa kahibalo kang Jesukristo. Busa, himoa nga ang tanan nga ginikanan sa Zion mag-atiman sa ilang mga anak, ug magtudlo kanila sa mga baruganan sa Ebanghelyo, ug maninguha ingon ka layo sa mahimo sa pagpahimo kanila sa pagbuhat sa ilang katungdanan—dili sama sa makina, tungod kay sila giaghat sa pagbuhat niini, apan paningkamot sa pagsilsil sulod sa mga kasingkasing sa mga bata ang espiritu sa kamatuoran ug mapadayunon nga gugma alang sa Ebanghelyo, nga sila dili lamang mobuhat sa ilang katungdanan tungod kay kini makahimuot sa ilang mga ginikanan, apan tungod kay kini usab makapahimuot sa ilang mga kaugalingon” (sa Brian H. Stuy, comp., Collected Discourses Delivered by President Wilford Woodruff, His Two Counselors, the Twelve Apostles, and Others, 5 bol. [1987–92], 5:436).

Dasiga Pag usab ang Gabii sa Banay

Ang mga gabii sa banay alang sa matag-usa, bisan kon kini anaa sa duha ka mga ginikanan nga panimalay, nag-inusara nga ginikanan nga panimalay, o dili minyo nga sakop nga yunit sa banay. Mga magtutudlo sa banay, kami nagtawag kaninyo diha sa inyong naandan nga mga pagduaw sa pag-awhag ug pagpadasig pag-usab sa paghimo og mga gabii sa banay.

Ang atong propeta karon, si Presidente Ezra Taft Benson, mipahinumdom kanato pag-usab sa kamahinungdanon sa paghimo sa mga gabii sa banay ug sa mga sagol nga naglangkob sa usa ka malampuson nga gabii sa banay. Siya miingon:

“Gimugna sa paglig-on ug pagbantay sa banay, ang programa sa gabii [sa banay] sa Simbahan nga gitukod usa ka gabii matag semana nga kana gigahin alang sa mga amahan ug mga inahan aron pagpundok sa ilang anak nga mga lalaki ug anak nga mga babaye libut kanila diha sa panimalay. Ang pag-ampo gihalad, mga himno ug uban nga mga awit kantahon, mga kasulatan basahon, mga hilisgutan sa banay hisgutan, mga abilidad ipakita, mga baruganan sa ebanghelyo itudlo, ug kasagaran mga dula dulaon ug hinimo sa balay nga mga pabugnaw idalit” (sa Conference Report, Philippine Islands Area Conference 1975, 10).

Kini mao ang among paglaum nga matag usa kaninyo unta mosulat sa matag usa niadtong mga sugyot nga gihimo pinaagi sa propeta kon unsa ang kinahanglan nga ilangkob sa gabii sa banay.

Unya siya mipadayon: “Karon, ania ang mga panalangin nga gisaad pinaagi sa propeta sa Dios alang niadtong kinsa mohimo og sinemana nga mga gabii sa [banay]: `Kon ang mga Santos mosunod niining tambag, kami mosaad nga mahinungdanon nga mga panalangin ang mosangput. Gugma sa panimalay ug pagtahud sa mga ginikanan magkadugang. Hugot nga pagtuo mapalambo diha sa mga kasingkasing sa mga batan-on sa Israel, ug sila makaangkon og gahum sa pagpakigbatok sa dautan nga mga impluwensya ug mga pagtintal nga nagsamok kanila’ “ (sa Conference Report, Philippine Islands Area Conference 1975, 10; tan-awa usab sa Improvement Era, Hunyo 1915, 734).

Kami moawhag sa matag usa kaninyo sa pagsunod sa tambag sa atong propeta. Sa tanang mga yunit sabanay sa tibuok kalibutan sa Simbahan, timbang-timbanga pag-usab ang kauswagan nga inyong nahimo sa paghimo sa naandan nga mga gabii sa banay. Ang paggamit niini nga programa mahimong taming ug usa ka panalipod nganha kaninyo batok sa mga kadautan sa atong panahon ug magdala kaninyo, sa tinagsa ug tiningub, labaw pa ka mahinungdanon ug buhong nga hingpit nga kalipay karon ug sa kahangturan nga moabut.

Unta ang Dios manalangin kanato nga kita unta mohatag og kadasig pag-usab ug molig-on niining mahinungdanon kaayo nga programa samtang kita maghiusa nga magtinambaganay isip mga sakop sa banay.

Gikan sa pakigpulong ni Elder L. Tom Perry sa April 1994 general conference of the Church (tan-awa sa Conference Report, Abr., 1994, 47–51; o Ensign, Mayo 1994, 326–38).