Leksyon 2

Pagpalambo sa Panaghiusa diha sa Kaminyoon

Mga Ideya Alang sa Paggamit

Sumala sa imong kaugalingong mga panginahanglan ug mga kahimtang, sunda ang usa o ang duha niining mga sugyot.

Basaha ang mosunod nga mga tudling sa kasulatan mahitungod sa panaghiusa: 1 Mga Taga-Corinto 1:9–10; Mga Taga-Filipos 1:27; Mosiah 18:21; Doktrina ug mga Pakigsaad 38:27. Hunahunaa kon sa unsa nga paagi nga kining mga tudling mahimo nga magamit ngadto sa relasyon tali sa bana ug asawa.
Hisguti uban sa imong kapikas sa inyong duha nga mga panginahanglan diha sa inyong panahon, lakip ang sosyal, panarbaho, katilingbanon, ug sa Simbahan nga mga buluhaton. Hatagi og panahon ang pagsabut sa matag usa nga mga panginahanglan, ug siguroha nga ang inyong lain nga mga buluhaton dili makababag uban sa inyong pagkamaunungon sa usag usa.

Buluhaton sa Pagbasa

Tun-i ang mosunod nga artikulo. Kon ikaw minyo, basaha ug hisguti ang artikulo uban sa imong asawa.

Nga Unta Kita Mahimong Usa

Elder Henry B. Eyring
Sa Korum sa Napulog Duha ka mga Apostoles

Ug Kon Kamo Dili Magkahiusa Kamo Dili Ako

Ang Manluluwas sa Kalibutan, si Jesukristo, miingon ngadto niadtong kinsa mahimo nga kabahin sa Iyang Simbahan: “Paghiusa; ug kon kamo dili magkahiusa kamo dili ako”(D&P 38:27). Ug diha sa paglalang sa lalaki ug babaye, ang panaghiusa alang kanila diha sa kaminyoon wala gihatag isip paglaum; kini usa ka sugo! “Tungod niini, ang lalaki magabiya sa iyang amahan ug sa iyang inahan ug moipon siya sa iyang asawa, ug sila mahimong usa ka unod” (Genesis 2:24). Ang atong Langitnong Amahan buot sa atong mga kasingkasing mabugkos diha sa pagkahiusa. Kana nga panaghiusa sa gugma dili sa yano usa ka sulundon. Kini usa ka kinahanglanon.

Ang gikinahanglan nga kita maghiusa dili alang lamang niini nga kinabuhi. Kini alang sa pagka walay katapusan. Ang unang kaminyoon gipahigayon sa Dios didto sa tanaman sa dihang si Adan ug si Eva mga immortal. Iyang gibutang diha sa mga lalaki ug mga babaye gikan sa sinugdanan ang tinguha nga hiusahon isip bana ug asawa sa kahangturan sa pagpuyo diha sa mga banay sa usa ka hingpit, matarung nga panaghiusa. Iyang gibutang diha sa Iyang mga anak ang tinguha sa pagpuyo sa kalinaw uban sa tanan niadtong naglibut kanila.

Apan uban sa Pagkapukan nahimong tataw nga ang pagpuyo diha sa panaghiusa dili masayon. Usa ka trahedya sayo nga miabut. Si Cain mipatay ni Abel, ang iyang igsoon. Ang mga anak ni Adan ug Eva nahimong ubos sa mga pagtintal ni Satanas. Uban sa kahanas, kayugot, ug kamaliputon, si Satanas mipadayon sa iyang tumong. Kini sukwahi sa katuyoan sa atong Langitnong Amahan ug sa Manluluwas. Sila buot nga mohatag kanato og hingpit nga panaghiusa ug mahangturon nga kalipay. Si Satanas ang ilang kaaway ug ato, nasayud sa laraw sa kaluwasan gikan sa wala pa ang Paglalang. Siya nasayud nga diha lamang sa mahangturon nga kinabuhi nga kadtong sagrado, malipayon nga mga panaguban sa mga banay makalahutay. Si Satanas buot mobulag kanato gikan sa mga hinigugma ug mohimo kanato nga alaot. Ug siya mao ang mitanom sa mga binhi sa panagbingkil diha sa mga kasingkasing sa tawo diha sa paglaum nga kita unta magkabahin ug magkabulag.

Kitang tanan mibati og usa ka butang sa panaghiusa ug panagbulag. Usahay diha sa mga banay ug tingali sa uban nga mga pagkabutang atong naaninaw ang kinabuhi sa diha nga usa ka tawo mipahimutang sa iyang mga kaikag sa uban ibabaw sa iyang kaugalingon, sa gugma ug uban sa sakripisyo. Ug kitang tanan nakahibalo og usa ka butang sa kasubanan ug kamingaw sa pagkahimulag ug pag-inusara. Kita dili kinahanglan nga sultihan kon unsa ang atong kinahanglan nga pilion. Kita nasayud. Apan kita nagkinahanglan og paglaum nga kita makasinati sa panaghiusa niining kinabuhi ug makasarang sa pag-angkon niini sa kahangturan sa kalibutan nga moabut. Ug kita kinahanglan nga masayud kon sa unsa nga paagi kanang mahinungdanon nga panalangin moabut aron kita masayud kon unsa ang atong kinahanglan gayud nga buhaton.

Ang Manluluwas Mihimo sa Panaghiusa nga Posible

Ang Manluluwas sa kalibutan naghisgot nianang panaghiusa ug sa unsa nga paagi kita mousab sa atong mga kinaiya aron mahimo kini nga posible. Siya tin-aw nga mitudlo niini diha sa pag-ampo nga Iyang gihatag sa Iyang katapusan nga tigum uban sa Iyang mga Apostoles-sa wala pa ang Iyang kamatayon. Kanang langitnong maanindot nga pag-ampo gitala diha sa basahon ni Juan. Siya hapit na moatubang sa makalilisang nga sakripisyo alang kanatong tanan aron paghimo sa mahangturong kinabuhi nga posible. Siya hapit na mobiya sa mga Apostoles kinsa Iyang gi-orden, kinsa Iyang gihigugma, ug uban sa kinsa Iyang ibilin ang mga yawe aron sa pagpangulo sa Iyang Simbahan. Ug busa Siya nagampo ngadto sa Iyang Amahan, ang hingpit nga Anak ngadto sa hingpit nga Ginikanan. Atong makita diha sa Iyang mga pulong sa paagi nga ang mga banay mahiusa, ingon man usab sa tanang mga anak sa atong Langitnong Amahan kinsa misunod sa Manluluwas ug Iyang mga sulugoon:

“Maingon nga gipadla mo ako sa kalibutan, maingon man usab nga gipadala ko sila sa kalibutan.

“Ug tungod kanila nagbalaan ako sa akong kaugalingon aron sila usab tinuod nga mabalaan.

“Ug nangamuyo ako dili lamang kanila ra, kondili alang usab sa mga mosalig kanako pinagi sa ilang pulong.

“Aron silang tanan ma-usa; maingon nga ikaw, Amahan, ania kanako ug ako anaa kanimo, aron sila usab maania kanako aron ang kalibutan motoo nga ikaw mao ang nagpadala kanako” (Juan 17:18–21).

Nianang pipila ka mga pulong Siya mitataw kon sa unsa nga paagi nga ang ebanghelyo ni Jesukristo makapahiusa sa mga kasingkasing. Kadtong kinsa motuo sa kamatuoran nga Iyang gitudlo makadawat sa mga ordinansa ug sa mga pakigsaad nga gihatag sa Iyang gitugotan nga mga sulugoon. Dayon, pinaagi pagkamasulundon ngadto sa mga ordinansa ug mga pakigsaad, ang ilang mga kinaiya mausab. Ang Pag-ula sa Manluluwas niana nga paagi nakahimo niini nga posible nga kita mabalaan. Dayon kita makapuyo diha sa panaghiusa, ingon nga kita kinahanglan gayud nga adunay kalinaw niini nga kinabuhi ug mupoyo uban sa Amahan ug Iyang Anak sa kahangturan.

Ang pangalagad sa mga apostoles ug mga propeta niadtong panahon, maingon man usab karon, mao ang pagdala sa mga anak ni Adan ug Eva ngadto sa paghiusa sa hugot nga pagtuo kang Jesukristo. Ang katapusan nga katuyoan kon unsa ang ilang gihunahuna, ug unsa ang ilang gitudlo, mao ang pagpahiusa sa mga banay: mga bana, mga asawa, mga anak, mga apo, mga kaliwatan, ug sa katapusan ang tanan nga banay ni Adan ug Eva kinsa mopili niini.

Ang Espiritu Mogiya sa Panaghiusa ngadto sa Uban

Kamo nahinumdom sa Manluluwas nga miampo, “Ug tungod kanila”—naghisgot bahin sa mga Apostoles—“Nagbalaan ako sa akong kaugalingon aron usab sila tinuod nga mabalaan (Jaun 17:19). Ang Espiritu Santo mao ang tigbalaan. Kita makaangkon niini isip atong kauban tungod kay ang Ginoo mipahiuli sa Melchizedek nga Pagkapari pinaagi ni Propeta Joseph Smith. Ang mga yawe niana nga pagkapari ania na sa yuta karon. Pinaagi niining gahum kita makahimo og mga pakigsaad diin makatugot kanato nga makaangkon kanunay sa Espiritu Santo.

Diin ang mga katawhan aduna niana nga Espiritu uban kanila, kita mahimo nga magpaabut og kaangayan. Ang Espiritu mibutang sa pagpamatuod sa kamatuoran sa atong mga kasingkasing, diin naghiusa niadtong kinsa nakigbahin niana nga pagpamatuod. Ang Espiritu sa Dios dili gayud mopasiugda sa panagbingkil (tan-awa sa 3 Nephi 11:29). Kini dili gayud mopasiugda sa mga pagbati sa kalainan tali sa mga katawhan nga mosangpot ngadto sa panagbangi (tan-wa sa Joseph F. Smith, Gospel Doctrine, 5th ed. [1939], 131). Kini mosangpot ngadto sa personal nga kalinaw ug pagbati sa panaghiusa sa uban. Kini makahiusa sa mga tawo. Usa ka naghiusa nga banay, usa ka naghiusa nga Simbahan, ug ang usa ka kalibutan nga anaa sa kalinaw nag-agad diha sa naghiusa nga mga kalag.

Pagtuman sa mga Saad nga Gihimo diha sa Pag-ampo sa Sakramento

Bisan ang usa ka gamay nga bata makasabut kon unsa ang buhaton aron makabaton sa panag-uban sa Espiritu Santo. Ang pag-ampo sa sakramento nagsulti kanato. Madungog nato kini sa matag semana samtang motambong kita sa atong mga tigum sa sakramento. Nianang sagrado nga mga higayon kita mibag-o sa mga pakigsaad nga atong gihimo sa bunyag. Ug ang Ginoo mipahinumdom kanato sa saad nga atong nadawat samtang kita gikumpirmahan isip mga sakop sa Simbahan—ang saad nga kita unta makadawat sa Espiritu Santo. Ania ang mga pulong sa pag-ampo sa sakramento: “Sila andam sa pagdala nganha kanila sa ngalan sa imong anak, ug sa kanunay mohinumdom kaniya ug maghupot sa iyang mga sugo diin siya mihatag kanila, nga sila unta sa kanunay makabaton sa iyang Espiritu uban kanila.” (D&P 20:77).

Kita makaangkon sa Iyang Espiritu pinaagi sa pagtuman niana nga pakigsaad. Una, kita misaad sa pagdala sa Iyang ngalan ngari kanato. Kana nagpasabut nga kita kinahanglan gayud nga motan-aw sa atong mga kaugalingon nga isip Iya. Kita mobutang Kaniya nga una diha sa atong mga kinabuhi. Kita motinguha kon unsa ang Iyang gitinguha kaysa unsa ang atong tinguhaon o unsa ang gitudlo sa kalibutan nga atong tinguhaon. Samtang kita naghigugma og una sa mga butang sa kalibutan, walay kalinaw diha kanato. Paghupot og usa ka sumbanan alang sa usa ka banay o usa ka nasud sa kahupayan pinaagi sa materyal nga mga kaayohan makapabahin kanila, sa katapusan, kanila (tan-awa sa Harold B. Lee, Stand Ye in Holy Places [1974], 97). Ang sumbanan sa pagbuhat alang sa matag usa kon unsa ang buot sa Ginoo nga atong buhaton, diin nagsunod sa naandan nga paagi gikan sa pag-angkon sa Iyang ngalan diha kanato, makadala kanato ngadto sa usa ka espirituhanon nga ang-ang nga mao ang kabahin sa langit dinhi sa yuta.

Ikaduha, kita kanunay nga mosaad sa paghinumdom Kaniya. Kita mobuhat niana sa matag higayon nga kita mag-ampo diha sa Iyang ngalan. Ilabi na kon kita mangayo sa Iyang pasaylo, ingon nga kinahanglan gayud nga atong buhaton sa kasagaran, kita mahinumdom Kaniya. Niana nga higayon kita mahinumdom sa Iyang sakripisyo nga makahimo sa paghinulsol ug pagpasaylo nga posible. Kon kita mangamuyo, kita mahinumdom kaniya isip atong Manlalaban uban sa Amahan. Kon ang mga pagbati sa pagpasaylo ug kalinaw moabut, kita mahinumdom sa Iyang pailub ug sa Iyang walay katapusan nga gugma. Kana nga paghinumdom mopuno sa atong mga kasingkasing uban sa gugma.

Kita usab nagtuman sa atong saad sa paghinumdom Kaniya sa diha nga isip mga banay kita maghiusa nga mag-ampo ug sa diha nga kita mobasa sa mga kasulatan. Diha sa banay nga pag-ampo sa panahon sa pamahaw, usa ka gamay nga bata ang mahimong moampo alang sa lain aron pagpanalangin niana nga mga butang nga mamaayo niana nga adlaw sa usa ka pagsulay o sa pipila ka pagpahigayon. Kon ang mga panalangin moabut, ang panalangin sa gamay nga bata mopahinumdom sa gugma sa kabuntagon ug sa ka maloyloy-on sa Manlalaban kang kansang ngalan gipahinungod. Ang mga kasingkasing pagabugkuson sa gugma.

Kita mohupot sa atong pakigsaad aron sa paghinumdom Kaniya sa matag higayon kita mopundok sa atong mga banay aron sa pagbasa sa mga kasulatan. Sila nagpamatuod sa Ginoong Jesukristo, kay kana ang mensahe ug sa kanunay sa mga propeta. Bisan kon ang mga bata dili makahinumdom sa mga pulong, sila mahinumdom sa tinuod nga Tigpasiugda, kinsa mao si Jesukristo.

Sunod sa Tanang mga Sugo

Ikatulo, kita misaad samtang kita moambit sa sakramento sa pagsunod sa Iyang mga sugo, ang tanan niini. Si Presidente Reuben Clark Jr., samtang siya nangamuyo—ingon sa iyang gibuhat sa makadaghan nga higayon—alang sa panaghiusa diha sa pakigpulong sa kinatibuk-ang komperensya, mipahimangno kanato sa pagkamapilion sa unsay atong sundon. Siya miingon niini nga paagi: “Ang Ginoo dili mohatag kanato og butang nga dili magamit o wala kinahanglana. Siya mipuno sa mga Kasulatan uban sa mga butang nga kinahanglan nga atong nga buhaton aron nga kita makaangkon og kaluwasan.”

Si Presidente Clark mipadayon: “Sa diha nga kita moambit sa Sakramento kita mopakisaad sa pagsunod ug mohupot sa iyang mga sugo. Dinha walay mga pagpihig. Dinha walay mga panaglahi, walay mga kalainan” (sa Conference Report, Abr. 1955, 10–11). Si Presidente Clark mitudlo ingon nga kita maghinulsol sa tanang mga sala, dili lamang usa ka sala, kita nanumpa sa pagsunod sa tanang mga sugo. Lisud nga paminawon, kini dili makalibog. Kita sa yano monunot sa awtoridad sa Manluluwas ug mosaad nga magmasulundon ngadto sa bisag unsa ang Iyang mga sugo (tan-awa sa Mosiah 3:19). Kini ang atong pagtahan ngadto sa awtoridad ni Jesukristo nga motugot kanato nga mabugkos isip mga banay, isip usa ka Simbahan, ug ingon nga mga anak sa atong Langitnong Amahan.

Ang Ginoo mitugyan niana nga awtoridad pinaagi sa Iyang mga propeta aron magmapainubsanon sa mga sulugoon. Kanang hugot nga pagtuo mihimo sa atong balaan nga tawag isip usa ka magtutudlo sa banay o usa ka pagduaw nga magtudlo ngadto sa sugo gikan sa Ginoo. Kita molakaw alang Kaniya, sa Iyang mando. Usa ka ordinaryo nga tawo ug usa ka tin edyer nga junyor nga kauban moadto ngadto sa mga pinuy-anan mag-agad nga ang mga gahum sa langit motabang kanila sa pagsiguro nga ang mga banay maghiusa ug nga walay kapintas sa usag usa, ni pamakak, paglibak, ni pagsulti og mga dautan. Nga ang hugot nga pagtuo—nga ang Ginoo nagtawag og mga sulugoon—motabang kanato sa pagbaliwala sa ilang mga kinutoban kon sila mobadlong kanato, ingon nga sila mohimo. Atong makita ang ilang maayo nga katuyoan labaw pa ka tin-aw kay sa ilang tawhanon nga mga kinutoban. Kita dili kaayo mobati og kasilo ug labaw pa nga mobati og pasalamat ngadto sa Magtutudlo kinsa mitawag kanila.

Ang Gugma nga Putli Mahinungdanon sa Panaghiusa

Adunay pipila ka mga sugo nga, kon lapason, makaguba sa panaghiusa. Ang pipila adunay kalabutan sa unsa ang atong gisulti ug pipila sa unsa nga paagi kita motubag ngadto sa unsa ang gisulti sa uban. Kinahanglan gayud nga kita dili mosulti og dautan ni bisag kinsa. Kinahanglan gayud nga kita motan-aw sa kaayo sa usag usa ug mosulti og maayo sa usag usa sa bisan unsang higayon nga kita makahimo. (David O. McKay, sa Conference Report, Okt. 1967, 4–11).

Sa samang higayon, kinahanglan gayud nga kita mobarug batok niadtong kinsa nagsulti og pagbiaybiay sa sagrado nga mga butang, tungod kay ang piho nga sangputanan niana nga kalapasan mao ang pagkasilo sa Espiritu ug makahimo og panagbingkil ug kalibog. Si Presidente Spencer W. Kimball mipakita sa paagi sa pagbarug nga dili makig-away samtang siya naghigda sa gurney sa ospital ug mihangyo sa usa ka tig-atiman kinsa sa usa ka higayon sa kapakyas, migamit sa pagpasipala sa ngalan sa Ginoo: “ ‘Palihug! Palihug! Kana akong Ginoo kansang mga ngalan imong gipanamastamasan.’ Dihay mamingaw nga kahilom, dayon sa usa ka pinugngan nga tingog mihagawhaw: ‘Gikasubo ko’” (The Teachings of Spencer W. Kimball, ed. Edward L. Kimball [1982], 198). Usa ka dinasig, mahigugmaong pagbadlong mahimong usa ka pagdapit ngadto sa panaghiusa. Kapakyas sa paghatag niini kon gidasig sa Espiritu Santo mosangpot ngadto sa panagbangi.

Kon kita buot makabaton sa panaghiusa, adunay mga sugo nga kinahanglan gayud nga atong sundon bahin sa unsay atong bation. Kinahanglan gayud kita mopasaylo ug dili magbaton og dautang tinguha ngadto niadtong kinsa nakasilo kanato. Ang Manluluwas mihatag og panig-ingnan diha sa krus: “Amahan, pasayloa sila kay wala sila masayud sa ilang ginabuhat.” (Lucas 23:34). Kita wala masayud sa mga kasingkasing niadtong kinsa nakasilo kanato. Ni kita masayud sa tanang mga gigikanan sa atong kaugalingong kasuko ug kasakit. Si Apostol Pablo nagsulti kanato kon unsaon sa paghigugma diha sa usa ka kalibutan sa dili hingpit nga mga katawhan, lakip na ang atong mga kaugalingon, sa diha nga siya miingon, “Ang gugma mapailubon ug mapugnganon. Ang gugma dili masinahon, dili tigpagawal. Ang gugma dili tigpaburot, dili bastos, dili maakup-akupon, dili masuk-anon o maligutguton” (1 Mga Taga- Corinto 13:4–5). Ug unya Siya mihatag sa maligdong nga pahimangno batok sa pagtugbang sa kasaypanan sa uban ug kalimtan ang atong kaugalingon sa dihang siya misulat, “Kay karon, nagatan-aw kita sa kangitngit sa usa ka salamin, apan unya sa nawong sa nawong: karon, bahin lamang ang naila ko, apan unya makaila ako sa tanan bisan sama… nga ako usab nailhan pag-ayo” (1 Mga Taga-Corinto 13:12).

Pagpabilin nga Limpyo ug Pagbantay sa Garbo

Ang pag-ampo sa sakramento makapahinumdom kanato matag semana kon sa unsa nga paagi ang gasa sa panaghiusa moabut pinaagi sa pagkamasulundon ngadto sa mga balaod ug mga ordinansa sa ebanghelyo ni Jesukristo. Kon kita motuman sa atong mga pakigsaad sa pagdala sa Iyang ngalan ngari kanato, sa paghinumdom Kaniya kanunay , ug maghupot sa iyang mga sugo, kita makadawat sa panag-uban sa Iyang Espiritu. Kana makapahumok sa atong mga kasingkasing ug mohiusa kanato. Apan adunay duha ka mga pahimangno nga naguban gayud niana nga saad.

Una, ang Espiritu Santo magpabilin lamang uban kanato kon kita magpabilin nga limpyo ug gawasnon gikan sa gugma sa mga butang sa kalibutan. Ang pagpili sa pagkadili limpyo makapapahawa sa Espiritu Santo. Ang Espiritu mopuyo lamang uban niadtong kinsa mopili sa Ginoo kay sa kalibutan. “Paglimpyo kamo” (3 Nephi 20:41; D&P 38:42) ug higugmaa ang Dios uban sa tanan ninyong “kasingkasing…uban sa inyong tibuok nga gahum, hunahuna, ug kusog” (D&P 59:5) dili mga sugyot apan mga sugo. Ug kini mahinungdanon sa pagpakig-uban sa Espiritu, kon wala kini kita dili mahimo nga usa.

Ang lain nga pahimangno mao ang pagbantay sa garbo. Ang panaghiusa nga moabut sa usa ka banay o sa usa ka katawhan nga nahupay pinaagi sa Espiritu makahatag og mahinungdanong gahum. Uban niana nga gahum moabut ang pag-ila gikan sa kalibutan. Bisan kana nga pag-ila makahatag og pagdayeg o kasina, kini makadala kanato ngadto sa garbo. Kana makapasilo sa Espiritu. Adunay usa ka panalipud batok sa garbo, kanang siguro nga gigikanan sa pagkawalay panaghiusa. Kini mao ang pagtan- aw sa kabuhong nga gibu-bo sa Dios nganhi kanato dili lamang ingon nga timaan sa Iyang kahimuot apan usa ka kahigayunan aron pagpasakop uban niadtong naglibot kanato sa usa ka mahinungdanong pangalagad. Ang lalaki ug ang iyang asawa makat-on nga maghiusa pinaagi sa paggamit sa ilang pagkasama sa ilang pagsabut sa usag usa ug sa ilang mga panaglahi aron sa pagdayeg sa usag usa sa pagalagad sa usag usa ug niadtong naglibot kanila. Sa sama nga paagi, kita magkahiusa uban niadtong kinsa dili modawat sa atong doktrina apan makigbahin sa atong tinguha sa pagpanalangin sa mga anak sa atong Langitnong Amahan.

Kita mahimong tigpasiugda sa kalinaw, takus nga tawgon nga bulahan ug mga anak sa Dios (tan-awa sa Mateo 5:9).

Ang Dios nga atong Amahan buhi. Ang Iyang hinigugma nga Anak, si Jesukristo, mao ang pangulo niining Simbahan, ug Siya mihatag ngadto sa tanan kinsa modawat niini nga sumbanan sa kalinaw

Gikan sa usa ka pagpakigpulong ni Elder Eyring sa Abril 1998 kinatibuk-ang komperensya sa Simbahan (tan-awa sa Conference Report, Abr. 1998, 85–89; o Ensign. Mayo 1998, 66–68).