Leksyon 14

Pagtudlo sa mga Baruganan sa Ebanghelyo ngadto sa mga Anak

Bahin 2

Mga Ideya alang sa Paggamit

Sumala sa imong kaugalingon nga mga panginahanglan ug mga kahimtang, sunda ang usa o labaw pa niining mga sugyot.

Isip usa ka banay, pagplano og usa ka kalihokan diin kamo maghiusa nga mohatag og pangalagad.
Paghimo og buhat sa panimalay uban sa usa sa imong mga anak o uban sa usa ka apo, pagumangkon nga babaye o pag-umangkon nga lalaki, o lain nga bata sa inyong banay. Pakigsulti sa bata samtang kamo nagtrabaho. Pahimusli ang mga kahigayunan sa pagtudlo nga dili manaway sa mga paningkamot sa bata sa pagtabang.
Basaha ang mosunod nga mga sekyon diha sa gamay nga basahon For the Strength of Youth (34285): “Medya: Mga Sine, Telebisyon, Radyo, Videocassettes, mga Basahon, ug mga Magasin” (pages 11–12), “Musika ug Sayaw” (pages 13–14), ug “Kaputli sa Panghilawas” (pages 14–16). Human nimo matun-i pag-usab ang materyal, tinoa kon hain sa imong mga anak ang makakuha og kaayohan gikan sa pagbasa ug paghisgut niini nga materyal uban kanimo.

Buluhaton sa Pagbasa

Pagtuon sa mosunod nga artikulo. Kon ikaw minyo, basaha ug hisguti ang artikulo uban sa imong kapikas.

Tudloi ang mga Bata

President Boyd K. Packer
Akting nga Presidente sa Korum sa Napulog Duha ka mga Apostoles

Ang gidaghanon sa mga tawo nga nagkapundok dinhi ug sa uban nga mga dapit nagpamatuod sa dili mapalong nga kauhaw alang sa kamatuoran nga nag-uban sa pagkasakop sa Ang Simbahan ni Jesukristo sa mga Santos sa Ulahing mga Adlaw.

Samtang ako nag-ampo kon unsa ang mahimong labing bililhon alang kaninyo, kini mitunga kanako nga sulod sa tulo ka mga semana ako moabut sa akong ika-75 nga adlaw nga natawhan ug mopadulong ngadto sa unsa ang akong gipili nga itawag tunga-tunga sa itaas nga pangidaron.

Ako usa ka magtutudlo sulod sa labaw sa 50 ka mga tuig. Sa pagkatinuod ang pipila ka mga butang nga akong nakat-onan mahimong makatabang kaninyo.

Ako nakakat-on niini gikan sa kasinatian: Ang kinabuhi motudlo kanato sa pipila ka mga butang nga wala nato hunahunaa nga kita buot masayud. Kining malisud nga mga leksyon mahimong mao ang labing bililhon.

Ako nakakat-on og lain nga butang mahitungod sa pagkat-on sa akong dalan ngadto satunga-tunga sa itaas nga pangidaron. Hunahunaa kini nga panagsultihanay tali sa usa ka doktor ug usa ka pasyente:

Doktor: “Unsay akong ikatabang kanimo? Unsa ang imong problema?”

Pasyente: “Ang akong panumdoman, doktor. Ako nakabasa og usa ka butang, ug ako dili makahinumdom niini. Ako dili makahinumdom ngano nga miabut ako sulod sa lawak. Dili ako makahinumdom diin nako ibutang ang mga butang.”

Doktor: “Nan, sultihi ako, kanus-a nagsugod kining kahimtang nga nagsamok kanimo?”

Pasyente: Kanus-a lang nga unsa nga kahimtang ang nagsamok kanako?”

Karon, kon kana nakalingaw kaninyo, kamo nagedad na og ubos sa 60 o kamo nagkatawa sa inyong mga kaugalingon.

Pagtudlo sa mga Anak Samtang Sila mga Batan-on Pa

Kon ikaw magkatigulang na, ikaw dili makakat-on o makasag-ulo o magtuon sama sa imong nahimo sa diha nga ikaw batan-on pa. Mao kaha kana ngano nga si propeta Alma mitambag, “Pagkat-on og kaalam diha sa imong kabatan-on; oo, pagkat-on diha sa imong kabatan-on sa paghupot sa mga sugo sa Dios”?¹

Nagkalisud alang kanako sa pagsag-ulo sa mga kasulatan ug mga tudling sa balak. Sa akong kabatan- on ako makabalik og usa ka butang sa usa ka higayon o duha ug makahinumdom niini. Kon ako mosulti niini sa daghan nga higayon, ilabi na kon ako mosulat niini, ingon og kini magpabilin nga natala sa akong hunahuna.

Ang kabatan-on mao ang panahon alang sa masayon nga pagkat-on. Mao kana ngano nga ang mga matutudlo sa mga bata ug mga batan-on gipahinungdan gayud kaayo sa mga pangulo sa Simbahan gikan pa gayud sa sinugdanan.

Mahinungdanon gayud nga matuman ang pagtudlo sa ebanghelyo ug mga leksyon sa kinabuhi ngadto sa mga bata ug batan-on.

Ang Ginoo mibutang sa unang kapangakohan ngadto sa mga ginikanan ug mipasidaan kanila:

“Ug usab, tungod kay ang mga ginikanan adunay mga anak diha sa Zion,… nga wala magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo ka tuig ang panuigon, ang sala anaa diha sa mga ulo sa mga ginikanan.”²

Kini mao ang sukaran nga katuyoan niini nga Simbahan sa pagtudlo sa mga batan-on: una diha sa panimalay ug unya sa Simbahan.

Pagtipig og Kahibalo

Laing butang nga akong nakat-unan adunay kalabut sa paghinumdom kon unsa ang atong nakatunan sa diha nga kita batan-on pa. Ang kahibalo nga gitipigan sa batan-on nga mga hunahuna mahimong makahulat sa daghan nga mga katuigan alang sa kahigayunan nga kini tingali magamit.

Itugot nga ako mohulagway. Ako nabalaka kaayo mahitungod sa kahilig sa mga sakop sa pagbaliwala sa tambag sa obispo o, sa laing bahin, nga mahimong labaw nga magsalig diha kaniya.

Ako nakahukom sa pagpakigpulong diha sa kinatibuk- an nga komprensya mahitungod sa obispo.

Sa mainampoon nga paagi ako nag-andam, ug dihay miabut sa hunahuna nga usa ka panagsultihanay gikan sa 50 ka mga tuig na ang milabay. Kini nakaalagad sa akong panginahanglan isip usa ka magtutudlo—hingpit nga nakaalagad niini. Ako mokutlo karon sa panagsultihanay ingon sa akong gibuhat sa kinatibuk-ang komperensya:

“Mga tuig na ang milabay ako nag-alagad sa halangdong konseho sa istaka uban ni Emery Wight. Sulod sa 10 ka mga tuig si Emery nag-alagad isip usa ka obispo sa banikanhon nga Purok sa Harper. Ang iyang asawa, si Lucille, nahimong among presidente sa Kapunongan sa Kahupayan sa istaka.

“Si Lucille misulti kanako nga usa ka buntag sa ting-init usa ka silingan mitawag kaniya sa may pultahan ug nangutana kang Emery. Siya misulti kaniya nga ang iyang bana atua sa gawas nagdaro. Ang silingan dayon misulti uban sa dako nga kabalaka. Sayo niana nga buntag siya nakalabay sa umahan ug nakamatikod sa pundok sa mga kabayo ni Emery nga nagbarug diha sa katunga nga nahuman nga tudling sa daro uban sa mga renda nga nagbitay ibabaw sa igdadaro. Si Emery wala didto makita. Ang silingan wala maghunahuna og lain hangtud nadugay sa iyang paglabay sa umahan pag-usab, ang ang mga pundok sa kabayo wala maglihok. Siya misaka sa koral ug milabang sa umahan ngadto sa mga kabayo. Si Emery wala didto makita. Siya midali ngadto sa balay aron pagsusi kang Lucille.

“Si Lucille malinawon nga mitubag, ‘Oh, ayaw kabalaka. Walay pagduhaduha adunay usa ka tawo nga anaa sa kasamok ug miadto aron pagkuha sa obispo.’

“Ang hulagway niana nga pundok sa kabayo nga nagbarug sulod sa mga takna diha sa umahan nagsimbolo sa pagpahinungod sa mga obispo sa Simbahan ug sa mga magtatambag kinsa mibarug sa ilang mga kiliran. Matag obispo ug matag magtatambag, sa mahulagwayon nga pagsulti, mibiya sa iyang mga pundok sa kabayo nga nagbarug diha sa wala mahuman nga tudling sa diha nga usa ka tawo nagkinahanglan og panabang.”³

Wala gayud sukad ako makagamit niana nga kasinatian sa pakigpulong—wala gayud maghunahuna niini.

Ako buot nga motanom niini sa akong hunahuna sa dili pa ako mosulti niini sa komperensya, busa ako nangita sa anak nga babaye ni Emery Wight. Siya miuyon sa pagpakigtagbo kanako sa ilang karaan nga panimalay ug mipakita kanako sa umahan sa iyang amahan nga nagdaro unta niana nga adlaw.

Usa sa akong anak nga mga lalaki midala kanako didto usa niana ka Domingo sa buntag. Siya mikuha og pipila ka mga hulagway.

Kini usa ka maanindot nga buntag sa tingpamulak. Ang umahan bag-o pa lamang nga gidaro, sama kini sa nahimo niadtong milabay nga daghang mga tuig. Ang mga langgam nga kanaway nangaon sa bag-o pa nga nabugwal nga yuta.

Kana nga napukaw nga panumdoman, naghinumdom niana nga panagsultihanay, kasagaran alang kanako. Kini mipamatuod sa kamatuoran sa kasulatan— usa, sa wala tuyoa, akong nasag-ulo sa akong pagkabatan-on—

“Ni kamo maghunahuna sa wala pa unsa ang inyong isulti; apan mahala sa kanunay diha sa inyong mga hunahuna ang mga pulong sa kinabuhi, ug kini ihatag kaninyo niini nga takna kana nga bahin nga igahin ngadto sa matag tawo.”⁴

Diha mosunod ang saad ngadto niadtong kinsa magmahal sa kahibalo:

“Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.”⁵

Kadto maayo nga leksyon alang kanako, apan ang akong leksyon wala matapos didto.

Ako nakabuhat og pipila ka pagdibuho ug pagkulit sa kahoy sa akong pagkabatan-on. Ako sa kasagaran kinaugalingon nga nagtuon. Samtang ang mga bata nagtubo pa, ang akong panahon gihalad sa pagtudlo kanila sa mga butang nga akong nakat-unan mahitungod sa kinabuhi ug mahitungod sa pagkulit ug pagdibuho sa diha nga ako usa pa ka bata.

Human sa ilang pagdako, ako mikuha sa pagkulit sa kahoy isip usa ka mga paagi sa paglingaw. Ako mikulit og mga langgam ug migugol og daghan nga mga oras sa pagkulit. Sa diha nga gipangutana, “Pila ka mga oras nga mihimo ka sa pagkulit niini?” Sa kanunay ako mitubag, Ako wala masayud, kon ako nakahibalo, ako muhunong.”

Sulod niadtong mga takna sa pagtrabaho uban sa akong mga kamot, ako namalandong sa mga kahibulong sa pagmugna, ug ang inspirasyon moabut. Samtang ako nagkulit sa kahoy, ako nagkulit sa mga pakigpulong.

Ang pagkulit mapahulayon alang kanako. Usahay kon ako mapugsanon og gamay ug saputon, ang akong asawa moingon, “Nan, maayo pa nga mosugod ka og lain nga pagkulit,”

Ako naghunahuna kon ang akong handumanan satunga-tunga sa taas nga pangidaron nabaid og gamay, ako mahimong makatudlo sa usa niadtong mga kinulit ug makasulti unsa nga pakigpulong kini nagpaila. Ako nakat-on nga diha niadtong mahilum nga mga higayon ako makabuhat og duha ka mga butang diha-diha dayon.

Pag-ani sa Anihon gikan sa Pagtudlo

Ako dili na makahimo sa paghimo niadtong mga kinulit. Kana nga trabaho makuti kaayo alang kanako uban sa tulo ka mga tunong ug mga lutahan sa tudlo nga karon migahi og gamay tungog sa polio sa pagkabata. Gawas pa niana, ang nagkadugang nga kabug-at sa akong balaan nga tawag nakapagamay sa panahon nga akong ikagahin sa pagkulit ug sa pagandam og mga pakigpulong.

Ang abilidad sa pagkulit karon nawala na kanako, apan wala sa akong mga anak. Kami mitudlo kanila sa diha nga batan-on pa sila.

Ang hulagway niana nga pundok sa mga kabayo nga nagbarug sa umahan nagpabilin kanako. Ako naghunahuna nga tingali ako makahimo og pagdibuho sa pundok sa mga kabayo sa obispo nga nagbarug sa umahan uban sa renda nga nagbitay ibabaw sa igdadaro.

Ako nagduhaduha tungod kay siyam na ka mga tuig ang milabay sukad ako nakadibuho og usa ka hulagway. Duha ka mga higala uban sa dili kasagaran nga talento ug inspirasyon nga mitanyag sa pagtabang kanako nga modibuho sa mga pundok sa kabayo sa obispo, ug ang Hulyo mihatag og pahulay sa pagpanaw, busa ako misugod.

Ako nakat-on og daghan gikan niadtong duha ka mga higala, ug diha sa tinuod nga paagi sila anaa sa akong dibuho. Apan ako nakadawat og dugang pa nga tabang gikan sa akong duha ka anak nga mga lalaki. Usa ka anak nga lalaki mikuha niadtong mga hulagway sa gidaro nga umahan, kay ako misulay kanunay nga mahimong tukma kaayo kon maghulagway sa usa ka butang diha sa pagkulit o diha sa pagdibuho o diha sa mga pakigpulong.¹

Kana lain nga leksyon. Ako makahinumdom pagbalik gikan sa akong mga anak og usa ka butang nga ilang nakat-onan sa diha nga sila batan-on pa.

Ang lain nga anak nga lalaki mihukom sa pagbuhat og eskultura sa mga pundok sa kabayo sa obispo og gipahulma sa tumbaga isip kauban sa akong dibuho. Kami migugol og daghan nga magantihon nga mga takna nga nagtinabangay sa usag usa.

Siya mikuha gikan sa among kamalig og duha ka kasangkapan sa pangabayo nga dugay na nga wala magamit sobra sa 50 ka mga tuig. Iya kining gipaphaan sa abog ug gidala kini sa panimalay. Iyang gipatong ang usa ka kasangkapan sa pangabayo ibabaw sa usa ka mapailubon nga sakyananan nga kabayo. Kini hilum nga nagbarug samtang iyang gipahiangay ang kasangkapan sa pangabayo diha sa tukma nga pagkahan-ay ug mihimo og detalyado nga pagdibuho niini.

Ang iyang silingan nagkolekta og pipila ka mga daan nga daro. Uban niini mao ang usa ka daro nga daan na kaayo, diin iya usab nga gidibuho.

Ug busa mibalik ang among gihatag niadtong anak nga mga lalaki sa ilang pagkabatan-on. Ingon sa among uban nga mga anak, sila mipalambo niana diin kami isip mga ginikanan mitudlo kanila sa diha nga sila batan-on pa kaayo. Ug kon ang among mga adlaw padugayon pa dinhi sa yuta, moabut ang ikaduhang pag-ani—ang among mga apo—ug tingali ang ikatulo [mga apo sa tuhod].

Pagpukaw pag-usab sa Nakatulog nga mga Talento

Ako nakakat-on pag-usab og lain nga butang. Sa makausa kaniadto ako midibuho og usa ka hulagway nga dinasig pinaagi sa mga komentaryo nga akong nadungog sa diha nga ako usa pa ka bata. Kini naglarawan sa Willard Peaks. Ako nakadungog sa edaran nga mga tawo nga gipasabut sila isip Ang Kapangulohan. Kining tulo ka dagko kaayo, bagtok nga mga kinatumyan sa bukid nagbarug tugbang sa langit naghulagway sa mga pangulo sa Simbahan.

Siyam na kadto ka mga tuig ang milabay. Ang akong anak nga lalaki midala kanako ngadto sa Willard, Utah, ug mikuha og hulagway sa mga tumoy sa bukid. Mibalik kami sa ikaduha ka higayon sa diha nga adunay daghang anino ug kalainan.

Human niadtong mga katuigan ako kinahanglan nga mopukaw niadtong akong gipasagdan nga nahikatulog. Sa una kini usa ka malisud kaayo nga pakigbisog. Ako mihulga og pag-undang sa pipila ka mga higayon. Usa sa akong mga higala miawhag kanako sa pagpadayon pinaagi sa pag-ingon, “Padayon! Sa kanunay aduna pay daghang kahigayunan sa ilawom.”

Ako wala moundang tungod lamang kay ang akong asawa dili mohatag kanako sa pagtugot sa pagbuhat sa ingon. Ako nalipay nga wala nako buhata karon. Tingali, karon nga ako anaa na usab niini, ako mobuhat og lain nga pagdibuho sa umaabut nga higayon—kinsay nasayud.

Ako nagtuo nga ang pagpaningkamot pagbalik ngadto sa pagdibuho sama sa usa ka tawo kinsa dili aktibo sa Simbahan sulod sa daghang mga tuig ug mihukom sa pagbalik ngadto sa panon. Aduna kana nga panahon sa pagpakigbisog sa pagkuha sa pagbati alang sa unsay wala na magamit apan sa pagkatinuod wala mawala. Ug makatabang nga adunay usa ka higala o duha.

Kana mao ang lain nga baruganan sa pagkat-on— magkuha og mga leksyon gikan sa ordinaryo nga kasinatian sa kinabuhi.

Kana nga dibuho sa Ang mga Pundok sa Kabayo sa Obispo sa dili madugay mahuman. Ang eskultura sa akong anak lalaki atua sa pandayan gihulma sa tumbaga.

Ang iyang eskultura, malagmit, labaw pa ka maayo kay sa akong gidibuho. Kana ingon og mao gayud. Ang iyang batan-on nga mga tudlo ug hunahuna makatubag sa labing andam kay sa akong mabuhat.

Samtang kita magpadulong ngadto sa tunga-tunga sa taas nga pangidaron kita makat-on nga ang gulang nga mga bukog dili sayon nga mabawog, ang mas gulang nga mga lutahan dili dali nga makalihok. Dili sayon ang paghigot sa imong mga sapatos kon ikaw mosaylo na sa imong tunga-tunga sa edad nga 60— dayon malisud na sa paghigot sa sapatos sa usa ka tawo diha sa tunga-tunga sa taas nga pangidaron.

Diha moabut na usab ang leksyon, “Pagkat-on og kaalam diha sa imong kabatan-on; oo, pagkat-on diha sa imong kabatan-on sa paghupot sa mga sugo sa Dios.”⁶

“Ang himaya sa Dios mao ang salabutan, o, sa lain nga mga pulong, kahayag ug kamatuoran.”⁷

“Apan ako nagsugo kaninyo sa pag-amuma sa inyong mga anak diha sa kahayag ug kamatuoran.”⁸

Ang langitnong gasa sa Espiritu Santo mao ang gitugyan diha sa atong mga anak sa diha nga sila walo ka mga tuig lamang ang pangidaron.

“Apan ang Manlalaban, ang Espiritu Santo, nga sa akong ngalan igapadala sa Amahan, siya mao ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo.”⁹

Timan-i ang mga pulong magatudlo ug magapahinumdom.

Ang pagtudlo sa mga bata makahatag sa iyang kaugalingon nga ganti. Wala pa ba gihapon kamo makat-on nga kon ikaw magtudlo ikaw makat-on og labaw pa gikan sa pagtudlo kay sa imong mga anak gikan sa pagkat-on?

Pagkat-on diha sa Espirituhanon nga mga Panumduman

Adunay kalainan tali sa pag-angkon sa temporal nga kahibalo ug sa pag-angkon sa espirituhanon nga kahibalo. Ang mga estudyante makakat-on niana sa adlaw sa pasulit. Malisud kaayo ang paghinumdom sa usa ka butang nga sa sinugdanan wala nimo makat-uni.

Kana tinuod sa temporal nga kahibalo, apan sa espirituhanon nga paagi kita makakat-on sa panumduman nga mobalik sa wala pa ang pagkatawo. Kita mahimong molambo sa pagkadali nga mobati sa mga butang nga dili masabut sa dihang kita batan-on pa.

Ang magbabalak nga si Wordsworth1 mibati og usa ka butang mahitungod sa kinabuhi nga wala pa dinhi sa yuta sa diha nga siya misulat,

Ang atong pagkatawo mao lamang ang pagkatulog ug usa ka paghikalimot:
Ang Kalag nga mibangon uban kanato, atong bitoon sa kinabuhi,
Diin sa laing dapit kini misalop,
Ug miabut gikan sa layo:
Dili sa hingpit nga paghikalimot,
Ug dili bug-os nga kahubo,
Apan sa nagsubay nga panganod sa himaya kita nagagikan
Gikan sa Dios, kinsa mao ang atong panimalay.10

Akong gikuha kadtong mga tudling gikan sa akong panumdoman, diin akong gitipigan sa panahon sa klase sa Ingles sa akong mga adlaw sa kolehiyo.

Ang labing mahinungdanon nga mga leksyon nagagikan sa ordinaryo nga mga panghitabo sa kinabuhi.

Ang pipila maghulat alang sa mapugsanon nga espirituhanon nga mga kasinatian aron sa pagsiguro sa ilang pagpamatuod. Dili kana mahimo sa ingon niana nga paagi. Kini mao ang mahilom nga mga pag-aghat ug mga impresyon sa ordinaryo nga mga butang nga naghatag kanato og kasiguroan sa atong pagkatawo isip mga anak sa Dios. Kita nagpuyo ubos kaayo sa atong mga kahigayunana sa panahon nga kita mangita og mga timailhan ug motan-aw “lapas sa timaan”¹¹ alang sa katingalahan nga mga panghitabo.

Kita mga anak sa Dios, kay kita nagpuyo uban Kaniya diha sa kinabuhi nga wala pa dinhi sa yuta. Matag karon ug unya kana nga tabil ablihon. Adunay moabut kanato nga pagbati kon kinsa kita ug ang sa atong dapit sa mahangturong plano sa mga butang. Tawga kana nga panumdoman o espirituhanon nga panan-aw, kini usa niadtong mga pagpamatuod nga ang ebanghelyo ni Jesukristo tinuod. Ang ingon nga pagpadayag moabut kon kita nagtudlo.

Sa makausa ako nakadungog ni Presidente Marion G. Romney (1897—1988) nga miingon, “sa kanunay ako nasayud nga ako nagsulti ubos sa impluwensya sa Espiritu Santo tungod kay ako sa kanunay makaton og usa ka butang gikan sa unsay akong gisulti.”

Ang Ginoo misulti ngadto sa mga anciano:

“Kamo wala ipadala aron tudloan apan sa pagtudlo sa mga katawhan sa mga butang nga Ako mitugyan sa inyong mga kamot pinaagi sa gahum sa Espiritu;

“Ug kamo pagatudloan sa kahitas-an. Himoa nga balaan ang inyong mga kaugalingon ug kamo pagatugahan sa gahum, nga inyong ihatag ug gani ingon nga Ako namulong.”¹²

Bisan kon ang pag-ani sa mga kinabig diyutay alang sa mga misyonaryo, usa ka espirituhanon nga gahum ang moabut ngadto kanila ug ngadto sa Simbahan tungod kay sila nakat-on pinagi sa ilang pagtudlo.

Ang presidente sa korum sa mga deakono mao ang maglingkod diha sa konseho ug magtudlo sa iyang isigka mga deakono.¹³ Ang presidente sa korum sa mga anciano mao ang motudlo sa mga sakop sa iyang korum sumala sa mga pakigsaad.¹⁴

Si Pablo misulti ngadto kang Timoteo, “Ug ang mga butang nga imong nadungog gikan kanako sa atubangan sa daghang mga saksi, kinahanglan ipiyal mo kini ngadto sa kasaligan nga mga tawo nga may katakus sa pagpanudlo sa uban usab.”¹⁵

Siya mipasabut sa siyam ka mga pulong sa unsa nga paagi nga ang pagtudlo nahimong ganti sa kaugalingon:

““Nan, karon, ikaw nga nagapanudlo sa uban, dili ba usab nimo tudloan ang imong kaugalingon?Ikaw nga nagawali batok sa pagpangawat, nagapangawat ka ba?

“Ikaw nga nagaingon nga ang tawo kinahanglan dili manapaw, nanapaw ka ba?”¹⁶

Ang Pagkamauyunon nga Tigkat-on

Sa miaging adlaw ako nakadawat og sulat nga nangayo og pasaylo, ingon nga nahitabo sa daghang mga higayon. Kini miabut gikan sa usa ka tawo nga wala nako mailhi. Kini nga sulat naghisgot kon unsa ka dako ang iyang kasilag ug kasuko ngari kanako sulod sa dugay na nga panahon tungod sa pakigpulong nga akong nahatag. Kini usa ka hangyo alang sa pagpasaylo.

Ako dali nga mopasaylo. Ako usa lamang ka tinugyanan sa paghatag og pakigpulong ug paghatag og pasaylo.

Ang mga kasulatan naglangkob og daghang mga pakisayran nga nagpadayag kon unsa ka “lisud”¹⁷ ang pagpaminaw sa mga pagtulun-an sa mga propeta ug mga apostoles alang sa mga taga Israel ug alang sa mga Nephite. Sayon ra kaayo ang pagsalikway sa pagtulun-an ug sa pagsupak sa magtutudlo. Kana mao ang kapalaran sa mga propeta ug mga apostoles sukad pa sa sinugdanan.

Usa sa mga Kabulahanan nagtudlo nga:

“Bulahan kamo sa diha nga panamastamasan kamo sa mga tawo, ug pagalutoson kamo, ug pagabutangbutangan kamo sa tanang matang sa kadautan batok kaninyo tungod kanako.

“Kinahanglan managmaya ug managkalipay kamo: kay dako ang inyong balus didto sa langit: kay sa ingon man niini gilutos sa mga tawo ang mga propeta nga nag-una kaninyo.”¹⁸

Sa tinuod kadtong mga sulat nga nangayo og pasaylo nag-ingon, “Wala ako makasabut ngano nga ikaw mibati sa panginahanglan sa paghimo kanako nga mobati nga dili kaayo mahimutang ug dako kaayo og kasal-anan.” Unya, tungod sa ilang pakigbisog, diha miabut ang usa ka panan-aw, usa ka inspirasyon, usa ka pagsabut sa mga hinungdan ug mga sangputanan. Sa katapusan sila nakakita ug nakasabut ngano nga ang ebanghelyo ingon sa gihapon niana.

Ako maghisgot og usa sa daghang mga hilisgutan. Usa ka igsoong babaye sa katapusan masayud ngano nga kami mohatag og gibug-aton sa kamahinungdanon sa mga inahan nga magpabilin sa panimalay uban sa mga anak. Siya nakasabut nga walay pagpangalagad nga kapareho sa makabayaw nga pagkahapsay nga moabut pinaagi sa dili hakog nga pagkainahan. Ni siya kinahanglan nga mopadayon sa pagpahapsay sa salabutan o kultural o sosyal. Kadto nga mga butang mohaum—sa tukma nga panahon—kay kini mopaigo sa walay katapusan nga hiyas nga moabut gikan sa pagtudlo sa mga anak.

Walay pagtulun-an nga tugbang, labaw ka magantihon sa espirituhanon nga paagi, o labaw nga makabayaw kay sa usa ka inahan nga nagtudlo sa iyang mga anak. Ang usa ka inahan mahimong mobati og pagka dili maayo sa kinaadman sa kasulatan tungod kay siya okupado sa pagtudlo sa iyang banay. Siya dili makadawat og ubos nga ganti.

Si Presidente Grant Bangerter adunay usa ka doktrinal nga panagsultihanay uban ni Presidente Joseph Fielding Smith, kinsa nagsuroy sa iyang misyon sa Brazil. Si Sister Bangerter naminaw ug sa katapusan miingon, “Presidente Smith, ako nagpadako og mga bata ug wala gayuy panahon aron mahimong batid sa kasulatan sama kaniya. Makaadto ba ako sa celestial nga gingharian uban ni Grant?”

Si Presidente Smith mipalandong sa maligdong nga paagi sa mubo nga higayon ug unya miingon, “Bahin niana, tingali kon ikaw moluto kaniya og pie.”

Ang usa ka lalaki mahimong maglisud kaayo sa pagtugbang niana nga sukod sa pagkaespirituhanon nga pagkahapsay nga sa natural nga paagi nagdugangngadto sa iyang asawa samtang siya nagtudlo sa iyang mga anak. Ug kon siya makasabut sa ebanghelyo, siya masayud nga siya dili mahimaya kon wala ang iyang asawa.¹⁹ Ang iyang labing maayo nga paglaum mao ang pagdumala isip usa ka matagaron, kasaligan nga kauban sa pagtudlo sa ilang mga anak

Mga Panalangin sa mga Magtutudlo

Karon, hunahunaa kini nga saad:

“Pagtudlo kamo nga makugihon ug ang akong grasya mouban kaninyo [ang magtutudlo], aron kamo [ang magtutudlo, ang inahan, ang amahan] matudloan nga labaw sa hingpit diha sa teoriya, diha sa baruganan, diha sa doktrina, diha sa balaod sa ebanghelyo, diha sa tanan nga mga butang mahitungod ngadto sa gingharian sa Dios, nga angay alang kaninyo [ang inahan, ang amahan] sa pagsabut.”²⁰

Timan-i ang saad alang ngadto sa magtutudlo kaysa ngadto sa estudyante.

“Pagtudlo kamo nga makugihon ug ang akong grasya mouban kaninyo [kinsa nagtudlo sa inyong mga bata o sa Primarya, Pang-Domingo nga Tulunghaan, Batan-ong mga Babaye ug Lalaki, pagkapari,seminaryo, Kapunongan sa Kahupayan],” aron kamo makahibalo:

“Sa mga butang diha sa langit ug diha sa yuta, ug sa ilawom sa yuta; mga butang nga diha na, mga butang nga anaa, mga butang nga sa mubong panahon mahinabo; ang mga butang nga anaa sa panimalay, mga butang nga atua sa layong dapit; ang mga gubat ug ang mga kagubot sa mga nasud, ug ang mga paghukom nga anaa sa yuta; ug ang kasayuran usab sa mga nasud ug sa mga gingharian—

“Nga kamo [kinsa nagtudlo] unta maandam diha sa tanan nga mga butang kon Ako mopadala kaninyo pag-usab aron sa pagpalambo sa balaan nga tawag diin ako nagtawag kaninyo, ug sa misyon diin Ako nagsugo kaninyo.”²¹

Si Pablo nanagna ngadto sa batan-on nga Timoteo “nga unya sa kaulahiang mga adlaw managpangabut ang mga panahon nga malisud.”²² Siya miingon, “Mosamot pa sa pagkadautan ang mga tawong dautan ug ang mga tigpahisalaag, ang mga limbongan ug ang mga gilimbongan.”²³

Apan sa gihapon kita mahimo nga luwas. Ang atong kaluwasan anaa sa pagtudlo sa mga bata:

“Bansaya ang bata diha sa dalan nga iyang pagalaktan, Ug bisan kong siya matigulang na siya dili mobiya gikan niana.”²⁴

Si Pablo mitambag kang Timoteo:

“Apan ikaw, magapadayon ka diha sa mga butang nga imong nahikat-onan ug imong ginatoohan pagayo, sanglit ikaw nahibalo man kong kinsa ang imong nahikat-onan niini;

“Ug nga sukad sa imong pagkabata ikaw nakasabut na sa balaan nga kasulatan, nga makagagahum sa pagtudlo kanimo ngadto sa kaluwasan pinaagi sa pagtoo kang Kristo Jesus.”²⁵

Kini mao ang Simbahan ni Jesukristo. Kini mao ang Iyang Simbahan. Siya mao ang atong Panig-ingnan, atong Manunubos. Kita gisugo nga mahimong “maingon nga kadto siya.”²⁶

Siya magtutudlo sa mga bata. Siya misugo sa Iyang mga tinun-an didto sa Jerusalem “paduola kanako ang gagmayng kabataan, ug ayaw ninyo sila pagpugngi nga moduol kanako, kay ang gingharian sa langit ila sa mga sama kanila.”²⁷

Sa asoy sa pagpangalagad sa Manluluwas diha sa mga Nephites, atong makita sa kinahiladman sa Iyang kalag tingali kay sa bisan diin nga dapit:

“Ug nahinabo nga siya misugo nga ang ilang gagmay nga mga bata kinahanglan dad-on ngadto kaniya.

“Busa sila midala sa ilang gagmay nga mga bataug gipalingkod sila sa yuta nga nag-alirong kaniya, ug si Jesus mitindog sa ilang taliwala; ug ang pundok sa mga katawhan mihatag og agianan hangtud nga nadala na ang tanan ngadto kaniya… . …

“…Siya mihilak, ug ang pundok sa mga katawhan nakasaksi niini, ug siya mikuha sa ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila.

“Ug sa diha nga siya nakahimo na niini siya mihilak pag-usab;

“Ug siya namulong ngadto sa pundok sa mga katawhan, ug miingon ngadto kanila: Tan-awa ang inyong gagmay nga mga bata.

“Ug samtang sila mipunting sa ilang mga mata paingon sa langit, ug sila nakakita sa langit nga naabli, ug sila nakakita sa mga anghel nanaog gikan sa langit nga ingon og diha sa taliwala sa kalayo; ug sila nanaog ug gialirongan kadtong gagmay nga mga bata, ug sila gialirongan sa kalayo; ug ang mga anghel nangalagad ngadto kanila.

“Ug ang pundok sa mga katawhan nakakita ug nakadungog ug nagpamatuod; ug sila nasayud nga ang ilang talaan tinuod kay silang tanan nakakita ug nakadungog.”²⁸

Ako nasayud nga kadtong talaan tinuod. Ako naghatag og pamatuod Kaniya ug mopanalangin kaninyong tanan kinsa nagtudlo sa mga bata diha sa Iyang ngalan.

Gikan sa pagkigpulong gihatag didto sa usa ka debosyonal sa Semana sa Edukasyon sa Unibersidad sa Brigham Young niadtong 17 Agosto 1999 (tan-awa sa Ensign, peb. 2000, 10–17).¹