’Episekōpora’a
Te mau parau tumu ’e te mau arata’ira’a nō te tārenara’a fare purera’a

Te mau parau tumu ’e te mau arata’ira’a nō te tārenara’a fare purera’a

« Tē fa’afāna’o nei te ’Ēkālesia i te mau fare purera’a i te ta’ata e haere mai ’ia ti’a ia rātou ’ia :

E nehenehe te hō’ē fare purera’a e ta’a ’ē i te tahi atu fare purera’a mai te au i te vaira’a ’e te mau hina’aro i terā ’e terā vāhi » (Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, 35.1).

« Nō te ha’apūai i te ’Ēkālesia, e fa’aineine te mau ārea i te mau tārenara’a rahi nō te tau roa hou ’a rave ai i te mau fa’aotira’a nō te fa’a’ā’ano atu ā i te hō’ē fare purera’a ’aore rā nō te fa’a’ohipa ’ē i te reira » (Te mau parau tumu ’e te mau arata’ira’a nō te fa’afāna’ora’a i te mau fare purera’a [2021], ChurchofJesusChrist.org). E tauturu te mau parau tumu ’e te mau arata’ira’a i muri nei i te feiā rave ’ohipa a te ārea nō te turu i te feiā fa’atere autahu’ara’a nō te ārea ’e nō te titi, ’ia rave fa’aoti i teie fā.

Mau parau tumu

Ha’apūai i te mau ’āmuira’a

E hōpoi’a nā te feiā fa’atere autahu’ara’a te ha’apūaira’a i te ’Ēkālesia nā roto i te fa’atanora’a i te rahi o te ’āmuira’a ’e tō te reira mau ’ōti’a, mai tei fa’auehia mai e te peresidenira’a ārea. E nehenehe ato’a te mau tauira’a i ni’a i te mau ’ōti’a o te ’āmuira’a e ha’amaita’i i te fa’a’ohipara’a i te mau fare purera’a.

Te fa’a’ohipara’a i te fare purera’a

« Hou ’a fa’afāna’ohia ai te tahi atu ā vāhi fa’a’ā’ano nō te fare purera’a, e hi’o maita’i te feiā fa’atere ē, tē fa’a’ohipahia ra te mau fare purera’a e vai ra i te hō’ē āteara’a tanotano, ’ia au i tō rātou fāito » (Te mau parau tumu ’e te mau arata’ira’a nō te fa’afāna’ora’a i te mau fare purera’a). Te fāito nō te hō’ē fare purera’a, ’ua tai’ohia ïa te rahira’a melo (fāito ta’ata) ’e te rahira’a ’āmuira’a (fāito ’āmuira’a) e ō i roto i te fare purera’a. I te mau vāhi e taui haere noa te rahira’a melo, e nehenehe e feruri i te fa’a’ohipa-’ē-ra’a (e vaiiho ānei ’aore rā e fa’a’ohipa nō te tahi atu mea) i te mau fare purera’a ’e te mau vāhi tei fa’a’ohipa-iti-roa-hia.

Te mitora’a tano

E mea faufa’a roa te mitora’a i te rahira’a melo ’āraua’e ’e te mara’ara’a ta’ata e tae mai nō te fa’aineine i te hō’ē tārenara’a rahi nō te mau ’ōpuara’a fare purera’a, e mea manuia ’e te tano maita’i. E nūmerahia te mau mitora’a rahira’a melo ’e te mara’ara’a ta’ata e tae mai ’ia au i te tai’ora’a i ha’amanahia.

Te feruri-māramarama-ra’a i te vāhi

E tu’uhia te mau fare putuputura’a i te vāhi tano maita’i nō te fāri’i i te nūmera rahi roa a’e o te mau melo, ma te hi’o ’ore i te mau ’ōti’a titi. Tītauhia ’ia hāro’aro’a i te mau huru mara’ara’a, te mau terera’a ta’ata ’e te utara’a e vai ra nō te tu’u i te mau fare purera’a i te vāhi tano maita’i.

Te mau ha’amāu’ara’a

« E ’imi te feiā fa’atere nō te ārea ’e nō terā ’e terā vāhi i te mau rāve’a māmā, te mau rāve’a nō te tau roa ’e te mau rāve’a vai māite nō te mau tītaura’a fare purera’a » (Te mau parau tumu ’e te mau arata’ira’a nō te fa’afāna’ora’a i te mau fare purera’a).

E feruri te mau ārea i te mau rāve’a ato’a e tano i te vaira’a i terā ’e terā vāhi. Te tahi rāve’a tano, ’oia ho’i ïa te fare o te hō’ē melo ; te hō’ē fare ha’api’ira’a ’aore rā te hō’ē pū nō te ’oire ; te hō’ē fare tārahu ; te hō’ē vāhi tei patuhia, tei ho’ohia mai ’aore rā tei fa’anaho-’āpī-hia e te ’Ēkālesia ; ’aore rā te tahi atu rāve’a.

Te mau arata’ira’a

E feruri te feiā fa’atere autahu’ara’a i te mau mea i muri nei ’ia fa’aoti ana’e rātou ē, e fea pāroita i roto i te hō’ē fare purera’a :

  • E ha’amata te mau purera’a i te sābati i te hō’ē hora tano ’e e hope i muri ri’i noa i te avatea, ’ia ti’a i te mau ’utuāfare ’ia tuatāpapa i te ’evanelia i te fare.

  • ’Ua tano noa te ātea o te nohora’a o te mau melo i te fare purera’a.

  • Mai te mea e tītauhia te tahi hāmanira’a i ni’a i te fare purera’a, e mea iti ïa ’e te māmā.

E fa’a’ohipa te mau ārea i te mau parau tumu nō te tārenara’a fare purera’a ma te fa’aineine i te hō’ē tārenara’a rahi pae matahiti hou ’a rave ai i te mau fa’aotira’a nō te fa’a’ā’ano atu ā i te hō’ē fare purera’a ’aore rā nō te fa’a’ohipa ’ē i te reira.

Tārenara’a rahi a te mau titi ’āmui ’aore rā a te ’āpo’ora’a fa’aaura’a

E nehenehe e hāmani i te mau tārenara’a rahi i roto i te mau titi ’āmui ’aore rā te ’āpo’ora’a fa’aaura’a mai te mea :

  • E nehenehe e fa’a’ohipa ’āmui i te mau fare e vai ra ’aore rā te mau fare e ’ōpuahia ra, i rotopū i te tahi mau titi.

  • E nehenehe te mau tauira’a ’ōti’a e ha’uti i ni’a i te tahi atu mau titi.

  • Tē fa’a’ite ra te mara’ara’a ’e te fa’a’ohipara’a i mana’ohia ē, tītauhia te tahi vāhi ’āpī.

  • Nō te taui-haere-noa-ra’a te rahira’a melo, e vāhi hau tē nehenehe e fa’a’ohipa ’ē.

E ’ohipa te mau fa’atere a te ārea i te pae nō te tārenara’a ’e te mau Hitu ’Ahuru ārea ’e terā mau peresideni titi nō te fa’aineine i te mau anira’a parau fa’ati’a i te peresidenira’a ārea.

Te tārenara’a fare purera’a i roto i te titi

I te taime e ferurihia te hina’aro e fa’a’āno ’aore rā e fa’a’ohipa ’ē i te hō’ē fare purera’a ’aita e vai ra i roto i te tārenara’a rahi a te ’āpo’ora’a titi ’āmui ’aore rā a te ’āpo’ora’a fa’aaura’a, e ’ohipa te fa’atere a te ārea i te pae nō te tārenara’a ’e terā peresideni titi nō te fa’aineine i te mau anira’a parau fa’ati’a a te peresidenira’a ārea.

Te parau fa’ati’a ’e te ’aufaura’a nō te ’ōpuara’a

E nehenehe te mau ’ōpuara’a tītaura’a i te vāhi ’āpī ’aore rā te mau ’ōpuara’a fa’a’ohipa-’ē-ra’a tei fa’ata’ahia i roto i te ’ohipa tārenara’a e hāponohia i roto i te tārenara’a matahiti, ’aore rā nā roto i te tahi atu anira’a parau fa’ati’a.

Te mau ti’ara’a ’e te mau hōpoi’a

Peresidenira’a ārea

E hōro’a te peresidenira’a ārea i te arata’ira’a nō te mau fa’anahora’a e rave, te mau fa’aotira’a ’e te mau fa’ahope’ara’a e tīa’ihia ra nō te tārenara’a fare purera’a. E fa’ata’a te peresidenira’a ārea i te mau mea ta’a ’ē e hi’o maita’i, ’e e ha’api’i rātou i te mau Hitu ’Ahuru ārea i te ha’api’ira’a tumu ’e te mau parau tumu, ’e nā rātou e hōro’a i te parau fa’ati’a nō te mau tītaura’a mātāmua roa ’e te mau mana’o hope’a nō te tārenara’a rahi.

Hitu ’Ahuru ārea ’e feiā fa’atere autahu’ara’a nō terā ’e terā vāhi

E ha’api’i te Hitu ’Ahuru ārea i te ha’api’ira’a tumu ’e te mau parau tumu i te mau peresideni titi ’e misiōni, ’e e ’āpo’o ato’a ’oia e te mau rave ’ohipa a te ārea. E hi’o te Hitu ’Ahuru ārea, te mau peresideni titi ’e te mau peresideni misiōni i te mau tārenara’a rahi nō te mau ’ōpuara’a fare purera’a ma te hōro’a rātou i tō rātou mana’o. E hāpono rātou i te mau tauira’a ’ōti’a ’āmuira’a i te peresidenira’a ārea ’ia hi’o mai rātou.

Ti’a fa’atere nō te mau ’ohipa pae faufa’a (DTA) ’e te mau rave ’ohipa a te ārea

E fa’afāna’o te ti’a fa’atere nō te mau ’ohipa pae faufa’a (DTA) ’e te mau rave ’ohipa a te ārea i te feiā fa’atere nō te ’Ēkālesia te mau ’itepiri tano, te mau parau fa’a’ite, te mau tuātapapara’a ’e te mau mana’o. ’Ia au i te arata’ira’a a te peresidenira’a ārea ’e te fa’anahora’a fare purera’a a te ārea, e fa’aineine te fa’atere a te ārea i te pae nō te tārenara’a i te mau tārenara’a rahi pae matahiti, tei roto te mau anira’a a te ’āpo’ora’a fa’aaura’a ’e a te mau titi ’āmui ’e a te mau titi. E ’ohipa ’āmui te fa’atere i te pae nō te tārenara’a ’e te feiā fa’atere autahu’ara’a nō te rave i te mau fa’aotira’a māramarama maita’i ’e nō te hōro’a i te mau mana’o hope’a.

Fa’ata’ara’a : Te parau nō te peresidenira’a titi nō te peresidenira’a mata’eina’a ato’a ïa.

Nene’i