គោលការណ៍ និងសេចក្តីណែនាំអំពីការផ្តល់សាលាប្រជុំ

« សាសនាចក្រផ្ដល់សាលាប្រជុំដើម្បីឲ្យមនុស្សទាំងអស់ដែលចូលមកអាច ៖

ចុះ និងរំឭកសេចក្ដីសញ្ញាតាមរយៈពិធីបរិសុទ្ធដ៏ពិសិដ្ឋទាំងឡាយ ( សូមមើល គោលលទ្ធិ និង សេចក្ដីសញ្ញា ២០:៧៥; ៥៩:៩–១២ ) ។
ជួបជុំគ្នា ( សូមមើល នីហ្វៃទី៣ ១៨:២២–២៣ ) ។
ថ្វាយបង្គំ និងអធិស្ឋានជាមួយគ្នា ( សូមមើល ម៉ូសាយ ១៨:២៥; មរ៉ូណៃ ៦:៩ ) ។
បង្រៀន និងផ្ដល់ការងារបម្រើដល់គ្នាទៅវិញទៅមក ( សូមមើល មរ៉ូណៃ ៦:៤–៥ ) ។
ចូលរួមនៅក្នុងការប្រើប្រាស់ដែលបានអនុម័តដទៃទៀត ដូចបានពិពណ៌នានៅក្នុង [ ជំពូកទី ៣៥ នៃ ក្បួនខ្នាតទូទៅ ] ។

សាលាប្រជុំអាចមានទម្រង់ខុសៗគ្នាអាស្រ័យលើស្ថានភាព និងតម្រូវការក្នុងមូលដ្ឋាន » ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៥.១ ) ។ គោលការណ៍ និងសេចក្តីណែនាំខាងក្រោមនេះនឹងជួយថ្នាក់ដឹកនាំតំបន់ និងស្តេកឲ្យសម្រេចបានគោលបំណងនេះ ស្របទៅតាមសេចក្តីត្រូវការរបស់សមាជិកនៅក្នុងតំបន់របស់ពួកលោក ។

កំណត់ចំណាំ ៖ នៅក្នុងផ្នែកនេះ ពាក្យ គណៈប្រធានស្ដេក ក៏សំដៅទៅលើគណៈប្រធានមណ្ឌលផងដែរ ។

គោលការណ៍

ភាពដូចគ្នា និងការកែសម្រួល

សមាជិកទាំងឡាយនៃសាសនាចក្ររស់នៅក្នុងស្ថានភាពនយោបាយ សង្គម និងសេដ្ឋកិច្ចខុសៗគ្នា ។ វួដ និងសាខាទាំងឡាយក៏មានទំហំខុសៗគ្នា ហើយធនធាននៃការដឹកនាំក៏ខុសៗគ្នាដែរ ។ លក្ខខណ្ឌទាំងនេះ និងលក្ខខណ្ឌផ្សេងទៀតអាចតម្រូវឲ្យមានការកែសម្រួលតាមមូលដ្ឋាន នៅពេលផ្ដល់សាលាប្រជុំដែលសមរម្យនានា ។

សាលាប្រជុំទាំងអស់គួរតែមានលក្ខណៈពិសេសចាំបាច់ដែលគាំទ្រដល់បទពិសោធន៍ថ្វាយបង្គំ និងកម្មវិធីទាំងឡាយនៃសាសនាចក្រ ។ លក្ខណៈពិសេសទាំងនេះរួមមានទីកន្លែងសម្រាប់ការជួបជុំគ្នាទូទៅ ការបង្រៀន និងកម្មវិធីទាំងឡាយ ។ លក្ខណៈពិសេសចាំបាច់ឯទៀតអាចត្រូវបានដាក់បញ្ចូលស្របតាមការអនុម័តរបស់គណៈប្រធានតំបន់ ។ ថ្នាក់ដឹកនាំតំបន់ប្រើសុភវិនិច្ឆ័យដ៏ឈ្លាសវៃ ខណៈពេលការកែសម្រួលប្លង់រចនាសាលាប្រជុំដែលបានអនុម័តឲ្យស្របតាមសេចក្តីត្រូវការ និងស្ថានភាពក្នុងមូលដ្ឋាន ។

អគារប្រជុំក៏អាចជាផ្ទះរបស់សមាជិក សាលារៀនតាមមូលដ្ឋាន ឬមជ្ឈមណ្ឌលសហគមន៍ អគារជួល អគារដែលបានសង់ ឬបានជាវដោយសាសនាចក្រ ឬជម្រើសទាំងឡាយផ្សេងទៀត អាស្រ័យលើស្ថានភាពក្នុងមូលដ្ឋាន ។ ទីកន្លែងនីមួយៗទាំងនេះគឺអាចពិចារណាថាជាដំណោះស្រាយរយៈពេលវែងដ៏សមរម្យ ។ ការប្រើបច្ចេកវិទ្យា ដូចជាបរិក្ខារសោតទស្សន៍ អាចចាត់ចែងនូវការកែសម្រួលបែបនោះបាន ។

ការផ្ដល់ទីកន្លែង

នៅពេលណាដែលអាចធ្វើបាន ថ្នាក់ដឹកនាំបព្វជិតភាពក្នុងតំបន់ និងមូលដ្ឋានត្រូវខិតខំព្យាយាមប្រើប្រាស់សាលាប្រជុំឲ្យអស់ពីលទ្ធភាព និងដោយប្រុងប្រយ័ត្ន មុនពេលស្នើសុំអគារប្រើប្រាស់បន្ថែម ។ ទីកន្លែងនៃសាលាប្រជុំអាចត្រូវបានផ្តល់ឲ្យ នៅពេលដែលចំនួននៃអ្នកចូលរួមមានការកើនឡើង ហួសពីលទ្ធភាពដែលអគារបច្ចុប្បន្នអាចផ្ទុកបាន ។

ការមានលទ្ធភាព

ថ្នាក់ដឹកនាំតំបន់ និងមូលដ្ឋានស្វែងរកដំណោះស្រាយនានាដែលសមស្របផ្នែកសេដ្ឋកិច្ច មានរយៈពេលវែង និងមានចីរភាពចំពោះតម្រូវការសាលាប្រជុំ ។ អគារថ្មីគួរតែបង្ហាញនូវរូបភាពនៃគារវភាព និងសេចក្តីថ្លៃថ្នូរ រម្យទម ហើយអាចប្រៀបផ្ទឹមបានជាមួយការរចនា និងរូបរាងនៃអគារដែលនៅជុំវិញនោះ ។ វាក៏គួរប្រើប្រាស់បរិក្ខារ និងឧបករណ៍ដែលមាននៅក្នុងមូលដ្ឋាន ហើយដំឡើងគ្រឿងសង្ហារិមតាមដែលសមរម្យផងដែរ ។ ដំណើរការនៃការផ្តល់ និងការប្រើប្រាស់ទីកន្លែងនៃសាលាប្រជុំគួរតែជួយពង្រឹងដល់ភាពខ្លួនទីពឹងខ្លួនរបស់សាសនាចក្រនៅក្នុងតំបន់ ។

សេចក្តីណែនាំទាំងឡាយ

ការប្រើប្រាស់ និងចម្ងាយ

មុននឹងផ្តល់សាលាប្រជុំបន្ថែមទៀត នោះថ្នាក់ដឹកនាំត្រូវប្រាកដថា សាលាប្រជុំដែលកំពុងប្រើប្រាស់ដែលមានចម្ងាយធ្វើដំណើរសមរម្យ គឺត្រូវបានប្រើប្រាស់តាមលទ្ធភាពរបស់វា ។ សាលាប្រជុំទាំងឡាយគឺជាចំណែកនៃឃ្លាំងរបស់ព្រះអម្ចាស់ ហើយគួរតែបានប្រើប្រាស់តាមឯករាជ្យភាពនៃព្រំដែនរបស់ស្តេក ។ បុគ្គលិកគ្រប់គ្រងអគារក្នុងតំបន់អាចជួយថ្នាក់ដឹកនាំស្វែងរកសាលាប្រជុំបាន ។

តំបន់នីមួយៗកំណត់ពេលវេលាធ្វើដំណើរទៅកាន់សាលាប្រជុំ ដែលមានរយៈពេលសមរម្យសម្រាប់សមាជិក ជាទូទៅការធ្វើដំណើរមិនត្រូវលើសពី ៣០ ទៅ ៤៥ នាទីនោះទេ សម្រាប់សមាជិកភាគច្រើន នៅក្នុងអង្គភាពមួយ ។ គណៈប្រធានតំបន់អាចកែសម្រួលតម្រូវការទៅតាមរយៈពេលធ្វើដំណើរ សម្រាប់តំបន់របស់ខ្លួន ស្របតាមកាលៈទេសៈ និងថ្លៃធ្វើដំណើរតាមមូលដ្ឋាន ។

ចំនួនអ្នកចូលរួម

តំបន់នីមួយៗកំណត់ទំហំ និងប្រភេទសាលាប្រជុំ ដើម្បីផ្តល់ឲ្យស្របទៅតាមចំនួននៃសមាជិកដែលចូលរួម និងជម្រើសសាលាប្រជុំដែលមាន ។ ថ្នាក់ដឹកនាំតំបន់ និងមូលដ្ឋានពិចារណាអំពីការសាងសង់បាន តែបន្ទាប់ពីមានការកំណត់ថា វាជាដំណោះស្រាយរយៈពេលវែងដ៏សមរម្យ និងមានចីរភាពខាងផ្នែកសេដ្ឋកិច្ចប៉ុណ្ណោះ ។

ភាពស្មោះត្រង់នៃការថ្វាយដង្វាយមួយភាគក្នុងដប់

មុននឹងអាចសាងសង់ ឬជាវសាលាប្រជុំមួយបាន នោះចំនួនភាគរយនៃសមាជិកពេញវ័យសកម្មបង់ដង្វាយមួយភាគក្នុងដប់ពេញលេញនៅក្នុងអង្គភាព ត្រូវតែមានចំនួនស្មើនឹង ឬលើស ៨០ ភាគរយនៃភាគរយមធ្យមភាគនៃសមាជិកពេញវ័យសកម្មបង់ដង្វាយមួយភាគក្នុងដប់ពេញលេញនៅក្នុងតំបន់ ( ឬនៅក្នុងប្រទេស ពេលដែលតំបន់នោះមានច្រើនជាងមួយប្រទេស ) នៅឆ្នាំមុន ។ គណៈប្រធានតំបន់ក៏អាចអនុវត្តតម្រូវការនៃការបង់ដង្វាយមួយភាគក្នុងដប់ពេញលេញ និងភាពស្មោះត្រង់នេះចំពោះការជ្រើសរើសអគារជួល ឬសាលាប្រជុំផងដែរ ។

ការដាក់ផែនការមេសម្រាប់សាលាប្រជុំ

ដើម្បីពង្រឹងដល់សាសនាចក្រ តំបន់ទាំងឡាយត្រូវរៀបចំផែនការមេសម្រាប់រយៈពេលវែងពីមុនធ្វើការសម្រេចចិត្តដើម្បីបន្ថែម ឬរៀបចំសាលាប្រជុំថ្មី ។ ពួកគាត់ដាក់ពាក្យស្នើផែនការទាំងនេះ ស្របតាមកាលវិភាគដែលបានរៀបទុក ។ កត្តាសំខាន់នៅក្នុងផែនការទាំងនេះ រួមមានការប្រើប្រាស់កន្លែងក្នុងអគារដែលមានរួចហើយ ការប៉ាន់ស្មានពីកំណើនសមាជិក យុទ្ធសាស្រ្តផ្លាស់ប្តូរអគារ ការផ្លាស់ប្តូរព្រំដែនអង្គភាព និងតម្លៃសមរម្យ ។ តម្រូវការ និងផែនការរបស់សាលាប្រជុំ គឺនឹងត្រូវបានលើកយកមកពិចារណាក្នុងកម្រិតរបស់តំបន់ និងក្រុមប្រឹក្សាសម្របសម្រួល ។

ការពិចារណាផ្សេងទៀត

ការិយាល័យ និងការប្រជុំស្តេក

ជាទូទៅ តំបន់ផ្ដល់ការិយាល័យស្តេក នៅពេលស្តេកកំពុងតែគ្រោងបង្កើត ហើយប្រសិនបើវាមិនអាចប្រើប្រាស់អគារចាស់បានទេនោះ ។ តាមដែលលទ្ធភាពអាចធ្វើបាន នោះសន្និសីទស្តេក សកម្មភាពទាំងឡាយ និងការប្រជុំក្រុមប្រឹក្សាស្តេកគឺត្រូវធ្វើឡើងនៅក្នុងអគារដែលមានស្រាប់ ឬទីកន្លែងជួល ។ បច្ចេកវិទ្យាសោតទស្សន៍អាចប្រើប្រាស់សម្រាប់ការប្រជុំស្តេកនានា ដើម្បីផ្ដល់លទ្ធភាពបន្ថែមពីលើលទ្ធភាពអគារដែលមានស្រាប់ ឬទីកន្លែងជួលដែលអាចផ្តល់ឲ្យនោះ ។

ផែនការអគារសាលាប្រជុំប្រចាំឆ្នាំ

កន្លែងសាលាប្រជុំគឺទទួលបានមូលនិធិតាមរយៈផែនការអគារសាលាប្រជុំប្រចាំឆ្នាំ ។ គណៈប្រធានតំបន់បញ្ជូនផែនការប្រចាំឆ្នាំរបស់ខ្លួន ទៅកាន់គណៈកម្មការគ្រប់គ្រងថវិកា និងការបម្រុងទុក តាមរយៈគណៈប៊ីស្សពជាអធិបតី ។

ការិយាល័យបន្ថែមសម្រាប់ប៊ីស្សព និងស្មៀន

សេចក្ដីណែនាំខាងក្រោមនេះផ្ដល់ព័ត៌មានដល់ថ្នាក់ដឹកនាំក្នុងមូលដ្ឋាន នៅពេលពិចារណាអំពីការិយាល័យបន្ថែមសម្រាប់ប៊ីស្សព និងស្មៀននៅក្នុងសាលាប្រជុំដែលមានស្រាប់ ។

សេចក្តីណែនាំ ៖

បុគ្គលិកផ្នែកគ្រប់គ្រងអគារអាចជួយធ្វើការសិក្សាលើការប្រើប្រាស់ដើម្បីយល់ពីចំណុះប្រើប្រាស់ និងចំណុះផ្សេងទៀតនៃទីធ្លាអគារនៅក្នុងសាលាប្រជុំដែលមានស្រាប់ឲ្យបានកាន់តែប្រសើរ ។
មុនពេលផ្ដល់កន្លែងបន្ថែមទៀតសម្រាប់ធ្វើការិយាល័យ នោះថ្នាក់ដឹកនាំត្រូវប្រាកដថា បានពិចារណាពីការប្ដូរមុខងារថ្នាក់រៀនដែលមានទាំងអស់ និងកន្លែងផ្សេងទៀតទៅជាការិយាល័យរួចហើយ ។
សូមពិចារណាប្រើការិយាល័យស្មៀនចូលគ្នា ( ឧទាហរណ៍ អង្គភាពពីរប្រើការិយាល័យតែមួយ ) ។
សំឡេងបិទជិត ( ពិដាន ជញ្ជាំង និងទ្វារ ) គួរតែផ្ដល់តាមតម្រូវការដើម្បីការពារដល់ភាពសម្ងាត់ ។ ការណ៍នេះអាចធ្វើទៅបានដោយមានការដាក់បន្ទះអ៊ីសូឡង់ ឬប្រព័ន្ធបិទខ្ទប់សំឡេង ។

សម្រាប់ទីតាំងនៅក្នុងសហរដ្ឋអាមេរិក និងប្រទេសកាណាដា សមាជិកបុគ្គលិកផ្នែកគ្រប់គ្រងអគារសាលាប្រជុំ និងបុគ្គលិកប្រចាំតំបន់បានស្វែងរកសេណារីយ៉ូការិយាល័យ និងការប៉ាន់ស្មានពីតម្លៃចំនួនបីបួនសម្រាប់អគារតាមផែនការបទដ្ឋាននាពេលបច្ចុប្បន្ន និងអតីតកាល ។