O o’u faalogona, lagona, ma e oo lava i amioga e faigata ona taumate a o lei tupu pe puleaina i nisi o taimi, ma e mafai e lenei mea ona atili faigata ai la’u tapuai atu ma le auauna atu. Pe e i ai se nofoaga mo a’u?

Ioe. E valaaulia e Iesu Keriso tagata uma e o mai ia te Ia. Na te valaaulia tagata uma e taumamafa i le talalelei. E le gata ina i ai se nofoaga mo i latou e i ai luitau faalesoifuamaloloina faalemafaufau, ae o loo i ai foi se manaoga. O loo ia i tatou uma taitoatasi meaalofa faaleagaga, uiga patino, ma taleni e fesoasoani e fausia ai le malo o le Atua. O se tulaga e masani ai mo tagata taitoatasi o e e lagonaina tiga faalelagona e maualuga tulaga o le tigaalofa ma le malamalama. E manaomia oe e le Ekalesia ma e manao ia te oe, ma e tatau ona e lagonaina o oe o se tasi e auai.

A o avea ai ma se tasi o le Au Peresitene Sili, na aoao mai ai Peresitene Dieter F. Uchtdorf e faapea:

“Atonu e fai mai nisi, ‘E le talafeagai au ma o outou tagata i le Ekalesia.’

“Ana mafai ona e vaai i o matou loto, masalo o le a e iloaina e te fetaui lelei e sili atu i mea ua e mafaufauina. Atonu e faateia oe i le iloaina e i ai foi o matou manaoga ma faigata faapea ma faamoemoega e talitutusa ma oe. O lou talaaga po o lou tuputupu ae atonu e foliga mai e ese mai mea e te vaaia i le tele o tagata o le Au Paia o Aso e Gata Ai, ae e mafai ona avea ma se faamanuiaga. Uso e ma tuafafine, uo pele, matou te manaomia a outou taleni ma manatu tulagaese. O le eseesega o tagata taitoatasi ma tagata e toatele i le salafa o le kelope, o le malosiaga lea o lenei Ekalesia” (“Sau, Faatasi ma i Matou,” Ensign po o le Liahona, Nov. 2013, 23).