“8: E mafai faapefea ona ou fiafia pe a ou le lagonaina se mea?” Soifua Maloloina Faalemafaufau: Fesoasoani mo A’u (2019)

“E Mafai Faapefea Ona Ou Fiafia?” Soifua Maloloina Faalemafaufau: Fesoasoani mo A’u

E mafai faapefea ona ou fiafia pe a ou le lagonaina se mea?

Na faamalūina e le Faaola sami ma aumaia le faamafanafanaga ma le filemu i Ona Au Soo. E Na te mafaia ona fesoasoani ia te oe ia faateleina le fiafia ma maua le uiga o le olaga e ui i ou luitau. Faataitai nisi o manatu o loo lisiina atu i lalo, a e ia iloa e faapea atonu e ono umi se taimi e faataitai ma sese ai ina ia maua le mea e sili ona aoga mo oe:

Saili atu i le lagolago a e o i ai tomai faapolofesa. Afai e te faaauau ona tauivi mo ni nai vaiaso pe umi atu pe o faailoga e iloa ai ua faasalavei i mea o lou olaga i aso fai soo—i le fale, galuega, aoga, po o i au fesootaiga—saili se fesoasoani. O le vave ona faafetaiaia o popolega o le soifua maloloina faalemafaufau e mafai ona fesoasoani e puipuia se faafitauli i le lumanai.
Faamanatu ni manumalo laiti. O le manuia a ia o le manuia, pe o le a lava le itiiti o le foliga mai o se mea na ausia. Atonu sa e sii lou lima i le vasega, ‘ata leotele, po o le agalelei atu e tatala ma taofi se faitotoa mo se tasi. Ia manatunatu i ia taimi e te faamanatu ai ia te oe lava nei manumalo pe a faigata le olaga. Atonu e fesoasoani foi le tusia i lalo o nisi o nei taimi.
Ia suitulaga le malamalama i le pogisa. Faataitai le sui o mafaufauga taitasi e o’o mai i lou mafaufau e le lelei i se mafaufauga e faatupu lelei. Atonu e te manao foi e filifili se viiga po o se isi pese e siitia ai lagona e faalogologo i ai pe a o’o mai mafaufauga e le lelei. E mafai foi ona e talosagaina se faamanuiaga faaleperisitua.
Faataitai le vaavaaia lelei e oe o oe lava ia. Manatunatu e faia se suiga i le faasologa masani o lou aso pe faavaeina se mausa fuafuaina ma le manatu i ai. Saili atu i le fiafia i mea iti ma faigofie e ala i le iloaina o se vaaiga i se fugalaau, le tofo o le meaai e fiafia lava i ai, po o le matagofie o le pese a se manulele. Faataitai le mafaufau i isi po o se isi faatulagaga e malolo lelei ai. Faataga ou mafaufauga e liliu atu i le Atua a o e tuuina atu lou mafaufau ma le tino e toe faafouina.
Faagaoioi lou tino. Gaoioiga faaletino, faatasi ma le lava lelei o le moe ma taumafa paleni, e mafai ona faaleleia ai faalogona ma lagona. O gaoioiga faaletino e mafai ona fesoasoani e faaitiitia popolega. Atonu e te manao e savalivali i fafo, alu e tamo’e, siva, siisii mea mamafa, pe faia se isi gaoioiga faaletino e te fiafia i ai. O gaoioiga faaletino e ono mafai foi ona avea ma ala e fesootai atu ai ma isi. Tagai i le Ola Faautauta Lelei: Soifua Maloloina Faaletino (ChurchofJesusChrist.org) mo manatu faaopoopo.
Faaali atu le agaga faafetai. E le o le uiga e faapea e te teenaina pe le amanaiaina lagona o tiga ma popolega; o lona uiga e faapea ua faailoaina faamanuiaga a le Tama Faalelagi ua tuuina atu ia te oe. Tusi i lalo se mea ia le itiiti ifo ma le tasi e te faafetai ai mo aso taitasi—atonu na e maua ni taimi na e maua ai le toomaga mai tiga, pe atonu sa e manatuaina se taimi na agalelei atu ai se tasi, pe atonu na e faafetaia ai se mea na vaai i ai, manogi mai, pa’i i ai, pe tofo i ai.
Tusi ma togi ese. E le o mea tusitusia uma e tatau na tausia i se tusi faamaumau a le tagata lava ia mo manatuaga po o e tupuga mai ia te oe. O le tusitusi i le avea ma se ala e faatulaga ai mafaufauga ma faailoa atu ai faalogona moni e mafai tele lava ona fesoasoani. I nisi taimi, pe a tatou mafaufau e faapea e ono faitau i ai se tasi i mea ua tatou tusia, e tatou te faatuina ai se pa e le ono atoatoa ai le moni o tatou lagona. E mafai ona fesoasoani le tusitusi ma le faamaoni mama, faailoa atu faalogona faamaoni, ona tiai lea o le pepa. O lenei faatinoga e ono mafai ona fesoasoani ia i tatou e aveesea atu ai foi nisi o o tatou lagona patino.