“9: Ou te lagona lava le tuuatoatasi. E mafai faapefea ona ou fesoasoani i se tasi ina ia malamalama i o’u manaoga?“ Soifua Maloloina Faalemafaufau: Fesoasoani mo A’u (2019)
“Ou Te Lagona Lava Le Tuuatoatasi,” Soifua Maloloina Faalemafaufau: Fesoasoani mo A’u
Ou te lagona lava le tuuatoatasi. E mafai faapefea ona ou fesoasoani i se tasi ina ia malamalama i o’u manaoga?
E tele le aoga i le atiaeina ma le faatumauina o fesootaiga. Tatalo mo le lototele e talanoa ai i se tasi e te faatuatuaina, e pei o se tagata o le aiga, uo, taitai o le Ekalesia, po o se tagata tomai faapitoa faalemafaufau. Manatua o nisi tagata o le a sili ona tatala o latou mafaufau ma malamalama nai lo isi ona o o latou malamalamaaga, manatunatuga i isi e maaleale, ma aafiaga faalesoifuaga. Fai atu i ai mo se taimi e talanoa faatasi ai—o le a mafai ona e maua se talanoaga aoga pe a fai ua tapena ma saunia le tagata o le a e talanoa i ai e taulai atu i mea o loo e fai mai ai. E mafai ona e fai atu (pe tesi) se mea faigofie e pei o le, “Ia, o loo faigata ma lu’itauina a’u i le taimi nei ma ou te manaomia lava se tasi e faalogo mai.”
Faitau i fesili o loo i lalo ma mafaufau e uiga i le ala e te tali atu ai. O manatu nei e mafai ona fesoasoani ia te oe e amatalia se talanoaga.
-
O le a se aafiaga o loo e faalogoina faaletino? Talanoa e uiga i mea o loo e lagonaina, e pei o le vaivaigofie, tiga soo le ulu, alu i le atoa le mafaufau, faafaufau, leai se to’a, tuai gaoioiga po o le tali atu, faaaogaina o fualaau faasaina, tiga o maso o le tino e le mafaamatalaina, po o suiga i le fia taumafa, mamafa, po o tulaga e moe ai.
-
O le a le mea o loo e lagonaina faalelagona? Ia faamatalatala lelei—e tele mea o loo tutupu pe a e lagonaina le lofituina i se mea, tauiviga ma se ma’i faalemafaufau. Ia mautinoa e faailoa atu lagona e pei o le leai o se faamoemoe, o le tafaovale, o le maitaita, tuuatoatasi, le mautonu, faanoanoa, fefe, po o le tuuaia. Talanoa pe faafia ona e aafia i nei lagona.
-
O le a le mea o loo e tauivi ai faaleagafesootai? Manatunatu pe faapefea ona e fesootai ma tagata o lou aiga, uo, tagata faigaluega, ma isi. Talanoa e uiga i soo se suiga o amioga ua e iloaina, e pei o le tupu so’o po o le faanoanoa e le mafaamatalaina, le fia faatasi ma isi, le tu mamā faaletagata lava ia, e le fiafia i ni gaoioiga lea sa e fiafia muamua i ai, po o le itiiti o le malosi ma le faaosofia.
-
O le a le mea e faigata ai le mafaufau? O le soifuaga i aso taitasi e mafai ona luitauina pe afai o le faatulagaga o mafaufauga ua suia pe ua i ai le afaina. Talanoaina soo se faailoga ua ia te oe, e pei o mafaufauga o le faaoo manu’a ia te oe lava, le mautonu, lagona feteenai, faigata ona manatua ni mea, po o mafaufauga i le oti ma le pule i le ola. Talanoa e uiga i le pe faafia ona oo mai nei mafaufauga ma po o le a se mea e te naunau lava ia ’ese.