Reirein te Mwakuri n Ibuobuoki, Ritembwa 2018

Reitaki ni Kaotia bwa Ko Tabeakiniia

A rangin ni mwaiti kawai aika ti kona ni kaotia bwa ti tabeakiniia, riki n tain te Kiritimati. Ti kona n taekinna, marooro ma ngaia, n tekitinna, ni koroboki, n anganna, tibwauaia, tataro ma ngaia, n kuka, n anene, inga ma ngaia, takakaro ma ngaia, ununiki ma ngaia, ke ni kaitiaki. Tii kataia.

Kaota te tangira nakoia tabeman bon mwakoron te mwakuri n ibuobuoki ae moan te kakawaki. Te Beretitenti ni Kabuta n te Bootaki n Aine Jean B. Bingham e taku: “Te mwakuri raoi n ibuobuoki e na kakoroaki bukina teuana imwiin teuana ma te tangira bwa te bwai ni kaunganano. … Ma te tangira bwa te bwai ni kaunganano, a na riki kakai, ao ti na karekei kawai n uotia tarira ao mwanera aika a “bua” bwa a na butimwaeaki nakon ana euangkerio Iesu Kristo.”¹

Kariaiakaia tabeman bwa a na ataia bwa ti tabeakiniia bon te bwai ae kakawaki ni karikirakean am reitaki ae tamaroa. Ma aomata aika kakaokoro a namakina te tangira inanon kawai aika kakaokoro. Ngaia are ti na kanga ni kaota ara tangira nakoia tabeman ni kawai aika a na atai ao ni kukurei iai? Aikai tabeua kawai ni kaotia bwa ti mananoia, n raonaki ma iango tabeua ni moana oin am iango.

Taekinna

N tabetai ao akea te bwai ae raoiroi riki nakon taekinan am namakin ibukin temanna. Ngkai e kona aei n nanonaki n tuangakin temanna bwa ko tangiriia, e raonaki naba ma tibwauakin te bwai ae ko tangiria ibukiia ke n anga te kaeka ae koaua. Te aekaki n taeka aei e ibuobuoki ni kamatoa te reitaki. (Taraa I-Ebeto 4:29.)

Karekea am tai are a na kona aomata n tatabemaniia n ataa aron am karinerine nakon korakoran teuanne ke neienne.
Nakoia, wetea, ke kanakoa te imeeri, tekiti, ke te kaati n tuangiia aomata n tatabemaniia ake ko uringiia.

Kawaria

Karekean te tai n taetae ma ngaia ao ni kakauongo nakon temanna bon te kawai ae korakora ni kaota aron kakawakin teuanne ke neienne. Tao ko kawaria ni mweengana, n te taromauri, ke n te tabo teuana, a mwaiti aomata aika a kainnanoa temanna ae a na kona n taetae ma ngaia. (Taraa Motiaea 4:26; R&B 20:47.)

Ni kaineti ma kainnanon temanna, bairea am tai ibukin kawarana. Anaa te tai ni kakauongo raoi ao n ataa ana kaangaanga teuanne ke neienne.
Ngkana e kaangaanga kawarikin mweenga ibukin te raroa, katei aika bwainaki, ke kaangaanga riki tabeua, iangoia ni karekea te tai ni kaitibo imwiin bootakin te Ekaretia.

Beeku ma te Kaantaninga

Karaurau n iangoi kainnanoia n tatabemaniia ke te utu. Katauraoan ibuobuoki aika uaana a kaota ae ko tabeakinna. A katiteuanai bwaintangira aika kakawaki n te tai ao te mwakuri ae iangoaki raoi. “Mwakuri n ibuobuoki aika bebete a kona n iai mwiina ae korakora iaoia tabeman,” e taku Titita Bingham.²

Anga te mwakuri n ibuobuoki are e kakorakoraia aomata n tatabemaniia ke aia utu, n aron tararuakiia ataei bwa aonga kaaro n nakon te tembora.
Tarai kawai aika a na kabebetea te uota ngkana e a moanna ni kaangaanga aron te maiu, n aron kaitiakan winto, kanakonakoan te kamea, ke n ibuobuoki ni karaoan mwakuri n te katawanang.

Baane Karaoi Mwakuri

Iai aomata aika aki reitaki rinanon te marooro ae korakora. Ibukiia tabeman aomata, a karaoi reitaki man kakaean bwaai aika a tatangiri ao ni kabanea aia tai ni karaoi bwaai aikanne. E kaumakiira te Uea bwa ti na “raoniia ao ni kakorakoraia” (R&B 20:53) tarira ao mwanera.

Naako nakonako, bairea te tairiki n takakaro, ke ami tai ni kabane ni kamarurung.
Ibuobuoki ni kabane n te kaomiuniti ke n ana karikirake te Ekaretia.

Aanga te Bwaintangira

N tabetai te tai ke reken taai n reitaki a tianaki. Inanon katei aika mwaiti, te anga bwaintangira bon kaotan te tabeaianga ao te nanoanga. Riki te bwaintangira ae aki kantaningaaki, ao ni bebete e kona n reita nanom ni karekea te reitaki ae tamaroa riki. (Taraa Taeka n Rabakau 21:14.)

Anganiia kanaia aika a mamate nanoia iai.
Tibwaua te taeka, te kibu, ke rongorongo riki tabeua aika ko namakin bwa a na kabwaia mai iai.

Te Mwakuri n Tangira

Ngkana ko a kinaia naake ko buokiia ao ake ko ukoukora te kairi ibukiia, ko na reiakina ae mwaiti riki n aron kaotan am tangira ao am tabeaianga ibukiia n tatabemaniia.

Kimberly Seyboldt ae kaain Oregon, USA, e taekina te karaki n ukoukoran te kairi ao te anga bwaintangira ni kaota te tangira:

“Ngkana I kunea bwa I namakina te nanokawaki ke te bwarannano, I teirake ni karaoa te kariki ae te zucchini, n tainako tao waniua mwaitina. Au rengarenga n au kuuka ae onoti bon te tataro ae maraara ngkana I kukanna bwa iaonga n ataia bwa antai aika a kainnanoi kariki aikanne. I a tia n rangin ni kinaia kaain rarikiu bukina bwa e a tia te kariki ae te zucchini ae kabuebue n riki bwa kaoakiu nakon mweengaia ao maiuia.

“N te bong teuana n te tiamwa, I buti nako rarikiia te utu ae a kabonakoa te itera n riita n te blackberries n iteran te kawai. I aki kainnanoa riki te blackberries, ma te ataeinimwaane ae bakitaia n te tabo n tei e rangin n ingainga nanona ni kan noorai, n iangoia bwa Ngai ana katitamwa are imiina. I kabooi tabeua blackberries, ma iai naba au bwai n tangira ibukina. I angan te ataeinimwaane uoua te kariki. E rairaki nakon ana karo ibukin te kariaia, ao e taku, ‘Taraia, Tamau, ngkai e a reke te bwai ae ti na kanna n te bong aei.’ I kaonaki n te kukurei ibukin te tai aei ni kaota te tangira n te kawai ae bebete.”

E taku Unimwaane Jeffery R. Holland man te Kooram n Abotoro n te Tengaun ma Uoman “bwa ni kabane mwaane ao aine—ao ara ataeinimwaane ao ataeinnaine ake a ikawai riki—a [na] … kabanei riki nanoia ni buokiia i bon imarenaia, ni kakorakoraaki tii man ana tangira Kristo ae itiaki. … Au kantaninga bwa ti na beku ma Uean te oo ni kureebe, ni buoka te Atua ao te Tama n Tabena aika uatao ni kaekai tataro, n anga te karaunano, ni kaoi rannimata, ao ni kakorakorai bubuaniwae aika aki konamaki.”³

Iesu Kristo E Tabeaianga

Imwiin kautan Rataro man te mate iroun Iesu Kristo, “e tang Iesu.

“Ma ngaia are a taku Iutaia, Noria ai kabatia ra tangirana i Rouna!” (Ioane 11:35–36).

“Iai au nanoanga nakoimi,” E taku Kristo nakoia Nibwaite. Ngkanne E weteia ibukiia ake aoraki ao a karawawataki, ake a mwauku, ao mataki, ao “e katoki aorakiia” (taraa 3 Nibwaai 17:7–9).

E katea te katooto te Tia Kamaiu ibukira n te kawai are E mutiakiniia iai tabeman. E reireiniira:

“Ko na tangira Iehova ae Atuam n nanom ni kabane, ao n tamneim ni kabanea, ao ni wanawanam ni kabanea.

“Aio te Moa n tua ae e korakora.

“Ao ai aron naba are te kauoua, are e kangai, Ko na tangira raom n ai aron tangiram i bon i roum” (Mataio 22:37–39).

Antai ae kainnanoa am ibuobuoki? Ko na kanga ni kaotia bwa ko tabeakiniia?

© 2018 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/17. Kariaiakaki rairana: 6/17. Rairan Ministering Principles, December 2018. Kiribati. 15056 859