Mwakuri n Ibuobuoki rinanon Nakomai, Iriirai

E na kanga Nakomai, Iriirai ni buokiko ni karaoa te bitaki ni maiuia tabeman?

Ngkana tao ko raoniia am utu, n te kiraatiruum n te Reirei n Tabati ngkai te tia reirei ngkoe ke kaain te kiraati, ke n te reirei, n te mwakuri, ke n taabo riki tabeua, kamatebwaian koroboki aika tabu rinanon Nakomai, Iriirai e anga katooto aika mwaiti n aron karaoan te ibuobuoki nakoia tabeman. Te anga reirei, n arona raoi “e raka riki nakon kairan te marooro n te Tabati; kanoana bon te ibuobuoki ma te tangira ao kakabwaiakiia tabeman n te euangkerio.”¹

Te Reitaki ma Ataein te Reirei

Ngke Ofelia Trejo de Cárdenas e weteaki bwa e na reireiniia kairake n ikawai n ana uoote i Mexico City, e namakinna bwa ana reitaki ae tamaroa ma ataein ana Reirei n Tabati e na karikirakea ana konabwai n reireiniia ao ni kakorakoraiia.

“Ngkana arona bwa e aki tamaroa au reitaki ma au ataei ao ngkana a aki namakina au tangira, a na bon aki kakoauaai n au anga reirei n te kiraati ke n au kaoti koaua,” e taku. “A na namakinna ae Ngai bon tii te tia reirei n Tabati.”

Ma e na kanga Titita Cárdenas ni karikirakea ana reitaki ae aron aei ngkai bon tii tetaina ana tai n anga reirei ni katoa uoua te wiiki? E kunea te kaeka rinanon bwaai n rabakau aika boou. Kabonganaakin te mobaera application ae WhatsApp, ngaia ao ana ataei a kona n reitaki n te tai ae waekoa ni katoa bong rinanon te tekiti ke bwanaaia. Ngkai, ni katoa bong imwaain te reirei are imwiina n te Reirei n Tabati, temanna te tia anganano n te kiraati e kanakoa kibun teuana te boki ae tabu nakoia kaain te kiraati ake tabeman man te reirei anne are imwiina ao ana iango ae irekereke. Imwiin warekan te kibu ao te iango, a anga oin aia iango kaain te kiraati.

“Ngke a wareka te kibu, a kanakoa te ubu ae kukurei ngaia I ataia bwa a tia ni wareware ke ni kamatebwaia te kibu anne ao a bon tia n iangoia,” e taku Titita Cárdenas. Ngke e nang boo tain te reirei n te Tabati are imwiina, a bon tauraoi raoi ataei bwa a na ira buakon te waaki.

Te reitaki ae katoa tai aei e kakabwaia temanna te kairake n ikawai are a aki kakaonimaki ana karo n te Ekaretia.

“I kukurei ngkana I nooria n roko n te taromauri ibukina bwa I ataia ae imwain rokona, e na bon rinanon tabeua kangaanga,” e taku Titita Cárdenas. “I aki nanokokoraki bwa koroboki aika tabu ao iango ake a kanakoi kaain te kiraati ao kiibu ao iango ake e tibwai ngke ai manga ana tai e rangi ni kakorakoraaki iai n ae bati.”

E taku Titita Cárdenas bwa te mwakuri n ibuobuoki rinanon koroboki aika tabu e aki toki n ana reirei n Tabati ao ana reitaki ae katoa tai ma kaain ana kiraati ni koroboki aika tabu.

“E irianaki au katauraoi ma te tataro ibukiia au ataei,” e taku. “I aki tii iangoiia n te Tabati ma ni katoa bong naba n te wiiki. Ngaiia n tatabemaniia iai kainnanoia ae onoti ao a kakaokoro. Bon natin te Atua ngaiia n tatabemaniia. I tabe n iangoiia ngkana I katauraoa au reirei.”

Ao ngkana e anga reirei, e kakauongo—nakoia ana ataei ao nakon te Tamnei ae Raoiroi.

“Te tia reirei bon te Tamnei,” are n taainako neienne e ongo man bwanaaia ana ataei. “I bon riai ni kakauongo ibukina bwa te bwai are a taekinna bon te kaotioti are anganaki iroun te Tamnei.”

Ara kiraati Kanga “Ai aron te Bootaki n Utu n te Tairiki”

Carla Gutiérrez Ortega Córdoba e namakina te kakabwaiaaki n riki bwa kaain ana kiraati Titita Cárdenas n te Reirei n Tabati ibukina bwa te tabo ae ko ribanaaki raoi iai ma te mwakuri n ibuobuoki. Carla e katerea anuan te tabo anne nakon tabeua bwaai, n raonaki ma:

Te katauraoi: Tibwauaan koroboki aika tabu ao iango e buokiia ataei ni katauraoi ibukin te kiraati are imwiina. “Warekan koroboki aika tabu ni katoa bong e kanuaira ao ni karababai ara atatai, “e kabwarabwaraa.
Ira buakon te waaki: “Ti bane n taetae. Aei e anganai te konaa n rangi ni kinaia riki kaain au kiraati, titebo ma raoraou ao mwaaneu ao tariu.”
Te tangira: “Sister Cárdenas e kairiiri ma nanona. Ara kiraati titebo ma ai aron te bootaki n utu n te tairiki, ma tabeman taari mwaane ao aine. E bon rangi n onoti.”
Te Tamnei ae Raoiroi: “Iai te tamnei ae kakukurei, ao n rau ae ti karekea inanon ara kiraati ibukina bwa iai nanora ni karaoa ae ti na raonaki iroun te Tamnei.”
Kakoaua: “Nakomai, Iriirai e a tia ni buokai ni katauraoi n tibwauaa au kakoaua. I karekea au atatai ae nano riki ibukin ana Boki Moomon ao te Baibara. Anne e anganai te konaa n tibwauaa te bwai are I reiakinna ma kaain au kiraati n te reirei ao aomata n te tabo ni mwakuri.”

Mwakuri n Ibuobuoki nakon Kainnano n te Maiu n Tamnei

Ngke Greg ao Nicky Christensen, mai Kentucky, USA, a wareka taekan te berita ae tabu nakon Aberaam inanon koroboki aika tabu ma natiia aika tenimaan mwaane, a kunea bwa e kangaanga kabwarabwarakina nakoia. A baireia bwa n aia utu ngaiia n tatabemaniia a na kamatebwaia te berita ae tabu nakon Aberaam i bon irouia ao imwiina a na tibwauai baike a kunei.

“Ti karekei tabeua taeka aika kakukurei,” e taku Greg. Natira ae waniua-ana-ririki ni maiu e ataia bwa aran Aberaam ngkoa bon Aberam. Arana e bitaki nakon Aberaam ibukina bwa e a tia ni karaoa te berita nakon te Uea bwa e na totokoa karaoan te bure ao ni maiuna te maiu ae raoiroi. I bon rangi ni miimi ngkai e kona ni karekea anne.”

Iai te bwai ae boou ae a bane n reiakinna ao ni karekea te marooro ae tamaroa bwa tera raoi te berita ae tabu nakon Aberaam ao tera nanona ibukiia Aika Itiaki ni boong aikai.

“Ti taneiai ni kabutia imarenara ni wareki kiibu ni koroboki aika tabu ibukin kamatebwaian koroboki aika tabu n ara utu,” e taku Nicky. “Nakomai, Iriirai e katauaki raoi nakon te anga reirei ma te Tamnei. Ngkai ngkana ti kamatebwai ni kabane, I namakina ana wirikiriki te Tamnei bwa ti na karaoa ara marooro n te anga riki ae kaokoro ae boboto iaon kainnanoia ara utu.”

Kabonganaakin Nakomai, Iriirai e aki tii buokiia aia utu n rangi ni katabeaki riki ao n iai nanoia ni kamatebwaia te euangkerio n aia utu, ma e a tia ni buoka Greg ao Nicky n ibuobuoki nakon kainnanoia natiia n te maiu n tamnei.

“Nakomai, Iriirai e buokai n reireiniia au ataei,” e taku Nicky. “E bon buokai naba ni kaitarai kangaanga aika kakaokoro ake I karekei n tabetai ma natiu. I namakina riki ae I kaan ma te Tamnei, I rangi ni kakaungo riki, ao I a tia ni karekei wirikiriki bwa N na kanga ni buokiia natiu n tatabemaniia.”

E rangi ni kukurei Greg n te marooro ae abwabwaaki ibukin te euangkerio are Nakomai, Iriirai e ibuobuoki ni karekea te rikirake inanon te utu. “Natira mwaane a boni bane ni kakaokoro n aron aia atatai are a mena inanona iaon te euangkerio,” e taku. “Nakomai, Iriirai e a tia ni katauraoa kawaira ni buokiia n tatabemaniia n reiakin baike a boboto iaon kainnanoia. Noraakiia bwa a karikirakea tangiran te euangkerio ao ni mamatakuaniia ni baireia bwa a na kanga ni kamwakura aia atatai n te euangkerio ni maiuia bon te kakabwaia ae kakukurei.”

© 2020 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Ministering Principles, September 2020. Kiribati. 16724 859