Reirein te Mwakuri n Ibuobuoki, Tuun 2018

Nimaua Bwaai Ae A Karaoi Taan Kakauongo Aika Tamaroa

Ni koauana te kakauongo e na buokiko n ataia bwa ko na kanga ni buoki kainnanoia tabeman n tamneia ao n rabwataia n te kawai are e karaoia te Tia Kamaiu.

Unimwaane Jeffrey R. Holland man te Kooram n te Tengaun ma Uoman e taku: “Tao ae e kakaawaki riki nakon te taetae bon te kakauongo. … Ngkana ti kakauongo ma te tangira, ti na aki tabe ma te bwai ae ti na taekinna. Ti na anganaki—iroun te Tamnei.”¹

Te kakauongo bon te rabwakau ae ti kona n reiakinna. Ara kakauongo e kaota ara tangira ibukiia tabeman, e buoka karikirakean te reitaki ae korakora, ao e kaoa te Tamnei ni kakabwaiaira n ana bwai n tangira te motikitaeka ni buokiira bwa tina atai kainnanoia tabeman.² Aikai nimaua kawai aika a na buokira ni kanakoraoa ara kakauongo.

1. Anganiia Aia Tai

Mwaitia aomata a kainnanoa te tai ni karekea aia iango imwaain ae a taetae. Anganiia te tai bwa a na iango imwain ao imwiin ae a taekina te bwai teuana (taraa Iakobo 1:19). Ti ibukina bwa a bane aia taetae tiaki nanona bwa a bane n tia n taekin bwaai ni kabane ake a riai n taekin. Tai maku n te aki taetae (taraa Iobi 2:11–3:1 ao Aramwa 18:14–16).

2. Kakauongo Raoi

E waekoa ara iango nakon ae a taetae tabeman. Tuka te kaririaki ni karokoa n tokina ke ni kaman iangoa te bwai ae ko na taekinna ngkana e a toki aia taetae (taraa Taeka n Rabakau 18:13). Ao ibukin anne, kakauongo ma te kantaninga bwa ko na ota iai. Am kaeka e na rang raoiroi ibukina bwa e na katauraoaki man am atatatai ae korakora.

3. Kamataata Raoi

Tai maaku n titiraki ibukin te kamataata nakon baike ko aki ota iai. (taraa Mareko 9:32). Te kamataata e kauarerekea te aki ota ao e kaota nanom n te bwai ae maroroakinaki.

4. Manga Iangoia

Manga taekina te bwai are ko ongo ao e kanga otam nakon ana namakin temanna. E buokiia aei n ataia ngkana a tia ni mataata iai ao n anganiia te tai n ota raoi iai.

5. Kakaei Bwaai ae kam Boraoi Iai

Ko na bae n aki boraoi ma bwaai aika taekinaki, ma boraoi ma ake ko kona ao n aki kabwarabuaka oin am namakin. E kona te kukurei ni buoka kakerikakan te raraoma ke te kabuakaka (taraa Mataio 5:25).

Beretitenti Russell M. Nelson e reirei bwa ti riai, “n reirei aron te kakauongo, ao te kakauongo n reirei bon imarenaia.”³ Ngkana ko kakauongo ma te nano ni kan reirei taekaia tabeman, ko na nakoraoi riki n atai kainnanoia ao n ongo namakin n aron tabeakinaia naake irarikim n aron ae na karaoia te Tia Kamaiu.

Te Kakauongo bon te Tangira

Ana karaki Unimwaane Holland e kamataataa mwakan te kakauongo:

“Raoraou ae Troy Russell e karaurau ni kabuta ana turaki te pickup man ana karaati. … E namakina ana rabwa are mai ibuki ni buti iaon te bwai teuana. … E otinako n tii noora natina te mwaane ae kakawaki ae ruaiua ana ririki, Austen, ni wene ni baraaki iaon te tabo n nakonako. … Austen e a tia ni mate.

“E aki kona ni matu, e rangin n rotaki n te aki rau, e nanokawaki ao n tiku ma te aki raunnano. … Ma inanon te tai ni maraki n rawawata e roko … John Manning. …

“I aki kona n ataia bwa e kanga n reke aia tai John ao toana ae uarereke ni karaoa kawaia nakon mweengan Russell. … Ae I ataia man te tiburing ae nako ngke te Tari Manning e ruorikaaki ao n anaa Troy Russell man kawain ana ka te tabo are e riki iai te nanokawaki ae kanga aiaron ae bon tabekan Austen. Ai aron … te tari inanon te euangkerio are kanga ai arona, John e anaa katabean te nakoanibonga n tararua ao ni kawakina Troy Russell. E moanna n taekinna, ‘Troy, e tangiriko Austen bwa ko na teimatoa ni maiu—n ikotaki ma are iaon te tabo ni bwatiketibooro—ngaia ae N na mena ikai n 5:15 ni katoa ingabong. Bwaina te tatauraoi. …’

“‘I aki tangiria n nako,’ Troy e tuangai imwiina, ‘bukina bwa I a tia ni kakaira Austen n tainako. … Ma John e imanono, ngaia are I a nako. Man te moan bong are imwiina, ti taetae—ke I bon taetae ao John e ongora. … N te moan tai e kaangaanga, ma imwiin te tai I ataia I a tia ni karekea korakorau n aekan [John Manning], ae e tangirai ao n tia ni kakauongo irou ni karokoa I a tia ni karekea te kimwareirei ngke I a manga maiu.’”⁴

© 2018 iroun Intellectual Reserve, Inc. All rights reserved. Boretiaki n te USA. Kariaiakaki n te Ingiriti: 6/17. Kariaiakaki rairana: 6/17. Rairan te Ministering Principles, June 2018. Kiribati. 15055 859

Bwaai aika a na Taraaki

1. Jeffrey R. Holland, “Witnesses unto Me,” Liahona, Turai 2001, 16.

2. Taraa David A. Bednar, inanon te “Panel Discussion” (te bootaki ni kataneiai irouia taan kairiiri ni kabuta te aonaaba, Nobembwa 2010), broadcasts.lds.org.

3. Russell M. Nelson, “Listen to Learn,” Ensign, Meei 1991, 23.

4. Jeffrey R. Holland, “Taan Tei Nakon te Ekaretia,” Liahona, Nob. 2016, 62, 67.

Te Mwakuri n ibuobuoki n Aron Ae Karaoia te Tia Kamaiu

Ngke e kitana Ieriko Iesu, uoman mwaane aika mataki a takarua nako Ina, ni kangai, “ko na nanoangaira, te Uea. …

“Ao e tei Iesu, ao E weteia, ao E taku, Tera ae kam tangiria ba N na karaoia nako imi?

“A taku nako Ina, Te Uea, a na kaureaki matara.

“Ao E nanoangaia Iesu, ao E ringi mataia: ao a rina n noraba, ao a iria” (Mataio 20:30, 32–34).

Tera ae ti kona n reiakinna man aron ana kakauongo te Tia Kamaiu?

Te Kakao ni Mwakuriia

Iangoia bwa ko na kanga ni karaoi reirei aikai inanom bwa ko na kanga n ibuobuoki. Titirakiniia naake ko buokiia te bwai ae a kainnanoia. Ongora nakon aia kaeka ao ana wirikiriki te Tamnei ae Raoiroi. Mwakuria te bwai ae ko ongo.

Reirei n ibuobuoki a baireaki ni buokiira n reireiniira n tabeakiniira i bon imarenara—n aki tibwaaki kanga te rongorongo. Ngkai ti ataia naake ti beku ibukiia, e na kairiira te Tamnei ae Raoiroi n ataia tera te rongorongo are a kainnanoia n reitia ma ara tararua ao ara nanoanga.