Reirein te Mwakuri n Ibuobuoki, Maati 2020

Te mwakuri n ibuobuoki rinanon te Ibuobuoki n te Tembora

Ngkana ti buokiia tabeman ni kimwareirei n ana kakabwaia te tembora, anne te mwakuri ni ibuobuoki.

Baekiraaun iroun Getty Images; tamnein te Tegucigalpa Honduras Tembora

Riaona, Maati 2020

Te rooroko n te Tembora e materaoi te mwakuri nako iai. Beretitenti Russell M. Nelson e reirei bwa “te tembora e bon rangi ni bongana nakon kamaiuara ao karietaatakira ao naba kamaiuaia ao karietaatakiia ara utu. …

“… Ngaira n tatabeman ti kainnanoa reitinakon kakorakoran te maiu n tamnei ao te reireiaki are e tii kona n reke inanon ana auti te Uea.”¹

Te roko n te tembora e kainnanoa bairean ara tai, katabeara, ao bwaai n ibuobuoki, ai uana naba ma te katauraoi n te maiu n tamnei. Ti mwakuri n ibuobuoki ngkana ti kinai totoko are a tukiia tarira ma mwanera man te tembora ao ni buokiia ni karekei buokaia.

Te Tembora Bon te Kakabwaia are a Kona ni Kimwareirei iai Aomata nako

Te mitinare are e a tibwa oki, Meg, e nakonako ni kaeineta mataroan te Kona Hawaii Tembora ngke e noora te ataeinnaine n tekateka tii ngaia iaon te kaintekateka i tinaniku. Meg e namakinna bwa e riai n taetae nakoina, ma e aki ataia bwa tera ae na taekinna. Ngaia are e titiraki nanon te taitai are iaon bubuanwaen te ataeinaine arei. Anne e moana te marooro are e kangaraoia bwa te ataeinnaine, Lani, n tibwaua ana karaki.

Lani e tuanga Meg ana kangaanga n oki rikaaki nakon te Ekaretia, membwa aika tamaroa ake a buokia, ao ana kaataninga bwa teuana te tai e na kabaeaki ma natina te aine ae uarereke.

Meg e kaoa Lani bwa e na tekateka ma ngaia n ruun ana tabo tataninga temboraa. A aki kona moa n rinnako riki inanon te tembora ake tabeua ngkai, ma a bon kona n rin man te mataroa. E kariaia Lani, ao a kaai n nako n rin man mataroan te tembora. Te tia mwakuri n te tembora e kairiia nakon te kaintekateka i aan tamnein te Tia Kamaiu.

Ngke a kaai n tekateka, e wirikiriki Lani, “I bon rangi ni kan rin te tembora n te bong aio, ma e bon rang nako nanou.” Ibukina bwa Meg e ira te Tamnei, e buoka kaekaan ana tataro ae raba Lani.

Iango ni Buokiia Naake akea aia Beba ni Kariaia

Aomata ake akea aia beba ni kariai n rin n te tembora a kona naba ni kakabwaiaaki n te tembora.

Tibwaua am namakin bwa e kanga te Uea ni kakabwaiako rinanon te mwakuri n te tembora.
Kaoa temanna bwa e na kaea autin te tembora ke aia tabo iruwa. Noori autin te tembora aika a boou iaon temples.ChurchofJesusChrist.org.
Noori tamnei ao reiakina ae bati riki ibukin te tembora iaon temples.ChurchofJesusChrist.org.

Kabebetea te Rooroko n te Tembora ibukiia Tabeman

Irouia naba membwa ake iai aia beba ni kariaia n rin n te tembora, te rooroko n te tembora e kona ni kakaewenako. Tabeman a kainnanoa te mwananga ae abwabwaki. Tabeman iai natiia aika a uarereke ke aia kara n aia utu aika a kainnanoa tabeakinakiia. Ti kona n kaai ni mwakuri ni kangaraoa rokoia aomata nako n te tembora.

Leola Changler e namakina te rawawata n tabeakinan kainnabana ae aoraki ao natina aika aman. Ngaia are e motikia bwa e na karekea ana tai ni katoa kauabong bwa e na rooroko n te tembora ae kaan. E riki bwa reken te rau ao te korakora nakon oin maiuna.

Teuana te bong e ongo bwa tabeman aine aika kara n ana uoote a rangi ni kan nakon te tembora, ma bon akea baoia. Leola e anga nanona bwa e na baoniia. Ao inanon 40 te ririki ake imwina, e karako te tai ae na nakon te tembora tii ngaia.²

E kakabwaiaaki Leola, ao e kakabwaiaia tabeman ngke e anga nanona bwa e na mwananga ma ngaiia nakon te tembora.

Iango ni Buokiia Tabeman ni Kaea te Tembora

Ti na kanga ni buokiia tabeman n kabatia riki rokoia n te tembora? Ko na kona n nooria bwa iango naba akanne a na buokiko naba.

Bootaki ni mwananga. Anga nanom ni katauraoa ke ni karekea te bao ibukin temanna. E kona ni kaungaa temanna riki bwa e na nakon naba te tembora.
Tuangiia kaain am utu ke uoote bwa a na buokiko n karaoi otenanti ibukiia am bakatibu, riki ngkana e bati araia am utu ae tauraoi ibukin taian otenanti.
Anga nanom bwa ko na tobwa bwa aonga kaaro ni kona n nakon te tembora. Ke baireia bwa kam karuoruoa tararuakiia natimi i marenami.

Ngkana E Raroa Nako te Tembora

Chandradas “Roshan” ao Sheron Antony mai Colombo, Sri Lanka, a motikia bwa a na kabaeaki n te tembora. Raoraoia aika Ann ao Anton Kumarasamy a bon rangi n ingainga ibukiia. Ma a ataia bwa te karoko nakon Manila Philippines Tembora e aki bebete ke booraoi.

Roshan ao Sheron a tia ni kaikoa aia mwane ao ni kabaei kibaia teuana te namwakaina ni moantaai ni karekea kibaia n aron are a konaa. N tokina, e a roko te bong. Ma, inanon rokoia i Malaysia, a kunea bwa te reitinako ni kaea Biribin, a kainnanoa te visa ke te kiba iaon te wanika ae kaokoro. E aki kona n reke aia visa, ao e aki tau aia kataumwane ni kabooi kibaia n te wanika riki teuana. Ma a bon aki kona moan are a na okira mweengaia ao a na aki kabaeaki.

N aki ataia bwa tera riki ae a na karaoia, Roshan e tareboonia Anton. Anton ao Ann a bon rangi ni kan ibuobuoki. Bon ngaiia mai ibuakoia tabeman taanga i Sri Lanka ake a tia ni kabaeaki n te tembora, ao a ataia bwa bon te kakabwaia ae abwabwaki. Ma a bon tibwa tia ni kabonganaa aia kaiko ni buoka temanna kaain aia utu are kainnano, ao e aki tau aia mwane ni buokiia Roshan ma Sheron ni kabooi aia tiketi ibukin kibaia ae boou.

I Sri Lanka bon te katei bwa te buutemwaane bwa e na kabooa maen kainnabana te koora bwa e aonga n iai ana mwane ni maten kainnabana. Ann e motikia bwa e na kabonakoa maena bwa e aonga ni ibuobuoki ni kabooi tiketi aika boou. Ana bwai n tangira n akoi e anganiia Roshan ao Sheron te konaa n roko n aia tai n te tembora i Manila.

“I ataa kakaawakin te kabaeaki n te tembora,” e taku Ann. “I ataia bwa Sheron ao Roshan a na riki bwa taan kakorakora nakon te mwaanga. I aki tangiria bwa e na aki reke irouia te tai aei.”³

Iango ni Buokiia Naake Aki Kona ni Kawara te Tembora

Tao ko kona ni weteaki bwa ko na buokiia naake aki kona n nakon te tembora n ae mwaiti ke bon akea ibukin te raroa ke te mwane. Ma ko kona ni kakaaei kawai ni buokiia ni kakaitau ibukin kakabwaian te tembora.

Bootaki n reirei ke ni karaoa te katauraoi nakon te tembora ke te kiraati ibukin rongorongon te utu.
Angania tamnein te tembora ni katei ni mweengaia.
Ngkana ko a tia n roko n te tembora, tibwauai am namakin ni mwanangam ke am koaua n otenantin te tembora.
Buokiia n reiakina riki ae bati iaon berita aika tabu ake a tia ni karaoi ao aron kawakinaia. Iangoa kabonganaan “Understanding Our Covenants with God: An Overview of Our Most Important Promises,” n te Tuurai 2012 Riaona.

© 2020 iroun Intellectual Reserve, Inc. All rights reserved. Boretiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan Ministering Principles, March 2020. Kiribati. 16985 859