Te Mwakuri n Ibuobuoki rinanon te Bootaki n Toa

Te bootaki n toa e karekea te tai n reitaki ao ni buokiia tabeman.

Te bootaki n toa bon te tai ibukin kanuaakin tamneira ao ara iango ae onoti iaon te Tia Kamaiu ao Ana Mwakuri ni Kamaiu. Ngkai ti kana te toa ni katoa wiiki, ti na bane ni kateimatoaaki (taraa Reirei ao Berita aika Tabu 84:110). Ma tabeman n ara uoote ao n ara mwaanga a uotii rawawataia ke a bon aki roroko n taromauri.

Aikai tabeua taai are ti na kanga ni kabonganai aoa akana a tabu akanne ni buokiia tabeman ao ni karaoa te bitaki inanon maiuia.

Buoka Kanakoraoan te Bootaki n Toa ibukiia Naake Ko Ibuobuoki Nakoia

Te moan mwaneka n reirei bwa ko na kanga n ibuobuoki bon karekean ataakin kainnanoia aomata ke utu. Iai kawai aika ko kona ni buoka kanakoraoan riki taneiai ibukin te taromauri n te toa man reiakinan riki rongorongoia.

Ibukin Mindy, te tina ae kairake ae a bwebwee natina aine aika uarereke, man ana konabwai n ibuobuoki temanna te tari te aine are e a tia ni karaoa te bitaki ae moan te korakora nakon neiei n ana bootaki n toa ni katoa wiiki.

“Ibukin babairean ana tai ni mwakuri kainnabau, I kairiia natiu aine aika bwebwee nakon te taromauri n tii ngai ni katoa wiiki,” e kabwarabwara Mindy. “E rangi ni kakuanano karaoan aei inanon tain te bootaki n toa ma uoman ataei aika a rangi n takaremwaremwa, ma tariu ae te tia ibuobuoki aei e anaa tabeu ao ni buokai iai.

“E tekateka irarikira ao ni buokai n tararuaiia au ataeinnaine aikai ni katoa wiiki. E rangi ni kakawaki rokon neiei irarikiu ao e rangi ni kabebetea korakain nanou inanon aia tai ni karaoi anuaia n ataei n un ke ngkana a beberino. I taku bwa e bae n aki ataia bwa mwaitira aron ana mwakuri ae e a tia n anaaki nanou iai n te tai aei inanon maiu. E noora kainnanou ae te tina ae kairake, ae kaonaki ma te korakai n nano, ao e buoka te taromauri ni karaoia bwa te tabo ae rau ao ni kakukurei ibukira ni kabane.”

Iango ni Buokiia Naake iai Kainnaoia aika Onoti

Okirikaaki ao n ribooti nakoia kaain te kooram n unimwaane ao taan kairiiri n te Bootaki n Aine ibukin kainnanoia membwa.
Taan kairiiri a bairei taian taetae n te bootaki n toa ibukin buokan kainnanoia membwa. Ngkana e na reke aroia naake ko buokiia man ongoraaia n te rongorongo, tibwaua te iango ma am tia kairiiri.
Ngkana ko ataia bwa iai temanna ae e mwauku ke iai te amwarake ae na rabwarabwataki iai are e tukiia man kakukurein taian kakabwaia n te toa, titirakiniia bwaninin te rongorongo ao tera ae kona ni karaoaki ni kanakoraoan aia taneiai n taromauri. Tibwaua te rongorongo aei ma am tia kairiiri.
Ngkana iai temanna ae ko buokiia ae aki kona ni kitana mweengana, ke tao n te tai ae aki maan, tuanga am bitiobi ngkana te toa e kona n anganaki ni mweengana. Ko kona naba n rawea te rongorongo n tain bootakin te toa ao n tibwauaia ma ngaiia iaon te tareboon, inanon te meeri, ke ngkana ko kaitibo ma ngaiia.
Ngkana te aomata ane ko buokiia iai natina aika uarereke, ko kona n anga am ibuobuoki nakoia n tain te bootaki n toa.
Ngkana naake ko buokiia aki bati n rooroko n te taromauri, kataia n ota ao iangoi kawai aika ko kona n ibuobuoki iai. Ngkana a kainnanoa baoia, ko kona ni katokaia n am kaa. Ngkana aki boutokaaki irouia aia utu, ko kona ni kaoiia bwa a na tekateka irarikim. Ko kona ni karaoi kakao aika onoti bwa a na namakinna ae a butimwaeaki ao n tangiraki n te bootaki n toa.

Uringnga, Mwakurin Baai aika Bebete e Rang Korakora Mwiina

N taetae iaon te mwakuri n ibuobuoki, e taku, Titita Jean B. Bingham, te Beretitenti ni Kabuta n te Bootaki n Aine: “N tabetai ti taku bwa ti riai ni karaoa te bwai ae moan te bubura ao n ninikoria ni ‘warekaki’ bwa ti beku ibukiia kaain rarikira. Ma mwakuri n ibuobuoki aika beebete a kona ni karekea mwiina aika korakora iaoia tabeman—ao nakoira naba.”¹

N te uoote ae uarereke i Belgium, Evita e anga nanona n taainako bwa e na raitaeka ibukiia iruwa ake a taetae n Spanish ao membwa n tain ana bootaki n taromauri te Ekaretia. N te tai teuana, e kabwarabwaraaki Evita nakon temanna ae kaain Dominican Republic are e reirei taekan te Ekaretia. E atatai teutana n te Ingiriti, te taetae n Spanish bon oin ana taetae. Ngaia are e anganano Evita ao ni karaurau n raitaeka ibukina n te bootaki n toa bwa e aonga n namakina te mweengaraoi.

“Te rairairi n tabetai e kona ni karika au Tabati ae na kakukurei riki,” e taku Evita. “Ma iriirakin taian wirikiriki n tuangakiia tabeman ngkana arona bwa a kainnanoa te tia raitaeka ni koauana e anganai te namakin ae kakukurei ao n rau n ataakina bwa I kona ni buokiia n namakina te Tamnei ao ni kukurei n te bootaki n toa.”

Iango n Ibuobuoki rinanon Mwakurin Baai aika Bebete

Taetae nakoia am tia kairiiri n nooria bwa antai ae kainnanoa teutana te ibuobuoki n te bootaki n toa. Ke ngkana iai temanna ae ko ataia ae kainnanoia, kakoaua raoi bwa a na ataia am tia kairiiri.
Tekateka n aki karongoa ngkai ko tataninga boon te taromauri. Aei e na buokiia “tabeman ake a uruaki nanoia ao naake a rawawata ake i rarikira”² ake a kainnanoa te rau are e roko rinanon te karinerine n te tabo ae tabu.
N te Tabati n aki mamatam, iangoa katabuan am aki mamatam ao am tataro nakon temanna are ko buokia are e kainnanoa karauan nanona.
Tataro bwa ko na ataia ngkana arona bwa iai temanna ae na karekea te bwai ae e tamaroa man tekatekam irarikina ke ni kaan ma ngaiia n tain te bootaki n toa ke ngkana arona bwa iai tabeua kawai ae ko kona n ibuobuoki iai.

Te Bootaki n Toa e Kona n Riki bwa te Tabo ni Butimwaaia Aomata ni Kabane

Beretitenti Joseph Fielding Smith (1876–1972) e taku, “Te bootaki n toa e rangi n tabu, e rangi ni mimitong, mai buakon ana bootaki ni kabane te Ekaretia.”³ Ibukin aei, e kakawaki kakoauana raoi bwa ni kabane ake a roko n te bootaki n toa a namakina te butimwaeaki ao a kanuaaki raoi tamneiia—ai moarara riki membwa aika boou ke membwa ake a tuai man roko n te tai anne.

Merania bon kaain New South Wales, Aotiteria, ae raraoraona te aine ae reirei taekan te Ekaretia n ana uoote. “E riki bwa temanna raoraou ae I tatangiria ngkai,” e taku Merania. “I tatangiria n tekateka irarikina n te bootaki n toa ni katoa wiiki, ao I aki toki n titirakinna bwa e uara ao ngkana arona bwa iai te bwai ae I kona ni karaoia ni buokia iai.” Imwiin teutana te tai, e a bwabetitoaki raoraon Merania. Aia kekeiaki membwa n te uoote, n ai aron naba tamaroan angin te butimwaeaki n te bootaki n toa, bon te bwai ae e korakora are e karika mwin ana babaire.

Iango ni Buokiia Naake a Oki ke Membwa aika Boou

Ngkana ko na taetae n te bootaki n toa, ko kona ni kaoiia raoraom, am utu, ao tabeman n roko n ongora n am rongorongo.
Ko kona ni kakaeiia ao ni butimwaaiia naake a tiku n tii ngaiia ke naake a kainnanoa buokaia. Tuangiia ngkana ko kona n tekateka irarikiia ke ni kaoiia bwa a na tekateka irarikim.
Ngkana e bwara te taromauri, ko kona ni kaoiia naake ko buokiia ao tabeman nakon ana waaki ni kakukurei te Ekaretia aika a na roko, nakon te tembora, ke te waaki ni bobotaki.
Ngkana temanna ae ko buokiia ae roko n te bootaki n toa ma e aki roko n te tai anne, ko kona n tuangiia ngkana arona bwa iai aia titiraki ni bwaai ake a reireinaki iai. Tuangiia bwa n taainako a bon butimwaeaki n roko iroum ngkana arona bwa iai te taeka, te karaki, ke mwakoron te reirei ae aki ota iai. Kam kona ni uaia ni kakaei taian reke ngkana e riai.

© 2020 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan Ministering Principles, June 2020. Kiribati. 16988 859