Aʻusia Fakaako Fika 1

Ko Hono Moʻui ʻAki mo Faiako ʻi he Founga ʻa e Fakamoʻuí

Vakai Fakalūkufuá

ʻOku fakamatalaʻi ʻe he aʻusia fakaakó ni ʻa e ngaahi tefitoʻi fakakaukau ko ʻení:

• Ko e faiakó, ko ho fatongia maʻongoʻonga ia

• Ko Sīsū Kalaisi ʻa e Faiako Tuʻukimuʻá

• Ko hono moʻui ʻaki mo faiako ʻo hangē ko ia naʻe fai ʻe he Fakamoʻuí

kalasi seminelí

Ngaahi Fakakaukau Mahuʻingá

ʻOku Talitali Lelei Kimoutolu ki he Seminelí mo e ʻInisititiuti Fakalotú (S&I). ʻOku lauiafe ha kau faiako mo e kau taki ʻi he polokalama semineli mo e ʻinisititiuti he funga ʻo e māmaní, ʻoku nau tokoniʻi ʻa e toʻu tupú mo e kakai lalahi kei talavou ʻo e Siasí ke nau ako mo fakaʻaongaʻi ʻa e tokāteline mo e ngaahi tefitoʻi moʻoni ʻo e ongoongolelei ʻo Sīsū Kalaisí. ʻOku mau fakamālō atu ʻi hoʻomou fie ngāue maʻá e ʻEikí ʻi he ngāue mahuʻingá ni.

Ko e Fatongia Maʻongoʻonga ʻo hono Akoʻi e Fānau ʻa e ʻOtuá

Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi meʻa ko ʻeni fekauʻaki mo e fatongia ʻo hono akoʻi e fānau ʻa e ʻOtuá:

ʻEletā Jeffrey R. Holland

“ʻOku tau fakamālō lahi kiate kinautolu ʻoku nau fai ʻa e akoʻí. ʻOku mau ʻofa atu mo fakahoungaʻi kimoutolu ʻo laka ange ʻi he meʻa ʻoku mau lava ke lea ʻakí. ʻOku mau falala lahi atu kiate kimoutolu. Ko ha ngāue faingataʻa moʻoni ke akoʻi lelei mo ongoʻi ʻa e ola hoʻomou ngāué. Ka ʻoku ʻaonga ia. He ʻikai ke tau lava ʻo maʻu ha ʻui ʻoku toe mahuʻinga angé’ [ ʻOku ʻIkai ha Ui ʻe Mahuʻinga Ange ʻi he Faiakó (nāunau maʻuʻanga tokoni maʻá e fakalakalaka ʻa e faiakó, 1978)]. …

“ʻOku mahino moʻoni ko e taumuʻa māʻolunga taha mo māʻoniʻoni taha ʻo e moʻui ʻa e tangatá ke tau takitaha ‘haʻu kia Kalaisi’ [T&F 20:59], tauhi ʻEne ngaahi fekaú pea muimui atu ʻi Heʻene sīpingá ke foki ki he Tamaí. ʻOku pau ko e ngāue mahuʻinga taha fika ua ʻi heʻetau moʻuí, ke tokoniʻi ʻa e niʻihi kehé ke nau fai ia—ke akoʻi, fakalotoa, mo tataki kinautolu ʻi he faʻa lotu ke nau ʻaʻeva ʻi he hala ko ia ʻo e huhuʻí foki. Mahalo ko e ʻuhinga ia naʻe pehē ai ʻe Palesiteni Tēvita O. Makei, ʻʻOku ʻikai ha fatongia maʻongoʻonga ange ʻe lava ke hilifaki ki ha tangata [pe fefine] ka ke hoko ko ha faiako ki he fānau ʻa e ʻOtuá’ [David O. McKay, ʻi he conference Report, Oct. 1916, 57]” (“A Teacher Come from God,” Ensign, May 1998, 25).

Christ teaching in synagogue

Ko Sīsū Kalaisi ʻa e Faiako Tuʻukimuʻá

Te ke maʻu ha tokoni fakalangi ʻi hoʻo feinga ke fakalakalaka mo tupulaki ko ha faiako ʻo e fānau ʻa e ʻOtuá mo feinga ke faʻifaʻitaki hoʻo moʻuí mo e faiakó ki he Fakamoʻuí.

Tuku ha kiʻi taimi ke huluʻi ai e foʻi vitiō “The Master Teacher,” (3:51), ʻoku maʻu ʻi he LDS.org. ʻOku fakamatalaʻi ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he foʻi vitioó ni ha ngaahi tafaʻaki ʻo hono akoʻi ʻo e ongoongoleleí.

Fakafanongo ʻi hoʻo mamata ʻi he foʻi vitioó ki he ngaahi ʻuhinga mahuʻinga kuo pau ke ke moʻui ʻaki mo faiako hangē ko ia naʻe fai ʻe he Fakamoʻuí. Hiki hoʻo ngaahi fakakaukaú mo e ongó ʻi ha tohinoa ako pe ʻi ha feituʻu kehe te ke lava ʻo fakaʻaongaʻi pe vahevahe mo hoʻo taki ʻinisēvesí pe kulupú.

ʻEkitivitī ʻo e Tohi Tuʻutuʻuni Ko Hono Akoʻi mo Ako ʻo e Ongoongoleleí

handbook cover

Naʻe akoʻi ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e hoko ʻa e Fakamoʻuí ko e faʻifaʻitakiʻanga ki he kau faiakó, ʻo pehē:

Palesiteni Boyd K. Packer

“Ko e hā ha toe faʻifaʻitakiʻanga lelei ange te tau ala maʻú? Ko e hā ha toe ako lelei ange te tau fai ka ko hono vakaiʻi ʻetau tuʻunga mahuʻingá, ngaahi taumuʻá mo e foungá pea fakahoa kinautolu mo Sīsū Kalaisí? (Teach Ye Diligently, rev. ed. [1991], 22).

ʻE tokoni ʻa e ʻekitivitií ni ke fakaloloto hoʻo mahinó ki he founga naʻe akoʻi mo tākiekina ʻaki ʻe he Fakamoʻuí ʻa e niʻihi kehé pea mo e founga ʻo ʻEne tokoni ke nau ako, tupulaki fakalaumālie, mo ului ki Heʻene ongoongoleleí.

Ako ʻa e talamuʻaki ʻi he peesi v–vii ʻi he Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú (2012). Fakaʻilongaʻi pe laineʻi ʻa e ngaahi foʻi lea ngāue ʻoku nau fakamatalaʻi ʻa e ngaahi founga kehekehe naʻe faiako mo ngāue ʻaki ʻe he Fakamoʻuí.

Ka hili hoʻo ako ʻa e ngaahi peesi ko ʻení ʻi he Ko Hono Akoʻi mo Ako ʻo e Ongoongoleleí, lekooti hoʻo tali ki he ngaahi fehuʻi ko ʻení ʻi he tafaʻaki ʻo hoʻo kiʻi tohi tuʻutuʻuní. (ʻOku poupouʻi atu ke ke hiki ha fanga kiʻi fakamatala ʻi he tafaʻaki ʻo hoʻo kiʻi tohi tuʻutuʻuní ʻi he kotoa ʻo e ngaahi lēsoni ko ʻení.)

• Ko e hā ʻokú ke fakatokangaʻi ʻi he founga moʻui, faiako, mo e taki ʻa e Fakamoʻuí?

• Ko e hā e founga naʻá ne tokoni ai ki he niʻihi kehé ke nau ako, tupulaki fakalaumālie pea mo ului ki Heʻene ongoongoleleí?

Fakamatala Fakanounoú mo e Fakaʻaongaʻí

Ngaahi Tefitoʻi Moʻoni ke Manatuʻí

• ʻOku ʻikai ha fatongia mahuʻinga ange ʻe lava ke hilifaki ki ha taha ka ko ʻene hoko ko ha faiako ʻo e fānau ʻa e ʻOtuá.

• Ko Sīsū Kalaisi ʻa e Faiako Tuʻukimuʻá. ʻOku totonu ke tau feinga ke moʻui ʻaki pea faiako hangē ko ia naʻá Ne faí.

• ʻOku tau akoʻi e tuʻunga ʻoku tau ʻi aí, ʻa ia ko hono ʻuhingá ʻe lava ʻe hotau tuʻunga fakaākongá, hotau ʻulungāngá, ʻetau fakamoʻoní, pea mo ʻetau loto ʻaki ʻa e ongoongoleleí, ʻo tākiekina ha niʻihi ʻo tatau pē mo ʻetau leá.

Palesiteni Boyd K. Packer

“Kuo pau ke ngāueʻi e meʻafoaki ke faiakó, pea ko e taimi pē ʻoku maʻu aí, kuo pau ke tanumaki ia kapau ʻoku fie maʻu ke pukepuke” (Boyd K. Packer, Teach Ye Diligently, 345).

“Ko ia, Pea hā Leva?”

ʻOku ʻiloa ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene fehuʻi ʻi he fakaʻosinga ʻo e ngaahi fakataha mo e Kōlomu ʻo e Toko Hongofulu Mā Uá, “Ko ia, pea hā leva?” ke fakatupu ha fealēleaʻaki ki he founga ʻe lava ʻo fakaʻaongaʻi ai ʻa e kaveinga ʻoku aleaʻí ke liliu e moʻui ʻa e kakaí (vakai, Jeffrey R. Holland, “Therefore, What?” [CES Conference on the New Testament, Aug. 8, 2000], si.lds.org). Fehuʻi loto pē ʻi he fakaʻosinga ʻo e aʻusia fakaako takitaha, “Ko ia, pea hā leva?” pea fakakaukauʻi pe te ke fakaʻaongaʻi fakatāutaha fēfē ʻa e ngaahi tefito mo e ngaahi tefitoʻi moʻoni ne aleaʻí.

Hiki ha ngaahi meʻa te ke fakahoko ʻo makatuʻunga ʻi he ngaahi tefitoʻi moʻoni kuó ke ako ʻi he ʻaho ní, ke fakaʻosi ʻaki ʻa e aʻusia fakaako ko ʻení.