Aʻusia Fakaako Fika 13

Fakakaukauʻi e Founga Hono Akoʻí: Ko Hono Ngāueʻi e Tuí

Vakai Fakalūkufuá

ʻOku fakamatalaʻi ʻe he aʻusia fakaakó ni ʻa e ngaahi fakakaukau ko ʻení:

• Maʻu ha loto falala ki he mālohi ʻo e folofola ʻa e ʻOtuá

• Ko hono ngāueʻi e tui ki he ʻEikí mo e Laumālié

• Ko e falala ki hoʻo fānau akó

Ngaahi Fakakaukau Mahuʻingá

Ngaahi Tui Tefito ʻe Tolú

ʻOku fakamatala ʻe he palakalafi “akoʻi” ʻo e Taumuʻa ʻo e Seminelí mo e ʻInisititiuti Fakalotú ʻo pehē: “ʻOku tau akoʻi ki he fānau akó ʻa e ngaahi tokāteline mo e ngaahi tefitoʻi moʻoni ʻo e ongoongoleleí ʻo hangē ko ia ʻoku hā ʻi he folofolá mo e ngaahi lea ʻa e kau palōfitá. ‘Oku akoʻi ‘a e ngaahi tokāteline mo e ngaahi tefitoʻi moʻoni ko ‘ení ‘i ha founga ‘e maʻu ai ‘a e mahinó pea mo ha fakamāmá. ʻOku tau tokoni ki he fānau akó ke fakahoko honau fatongia ʻi he akó pea teuteuʻi kinautolu ke nau akoʻi ʻa e ongoongoleleí ki ha niʻihi kehe” (Ko Hono Akoʻi mo Ako ʻo e Ongoongoleleí:Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], x).

ʻOku fokotuʻu mai ʻe he palakalafi ko ʻení ʻoku fakatātaaʻi mai ʻe he ngaahi ngāue lelei ʻa e kau faiakó ha ngaahi tui mahuʻinga lahi ʻe tolu:

1. ʻOku lava ke tau falala ki he mālohi ʻo e folofolá

2. ʻOku lava ke tau ngāueʻi e tui ki he ʻEikí mo e Laumālié

3. ʻOku lava ke tau falala ki he fānau akó

ʻI he aʻusia fakaako ko ʻení, te ke ʻilo ai ʻa e ngaahi fakakaukau mahuʻinga kuo fakataumuʻa ke fakaloloto e mahino ʻokú ke maʻú mo e tui ki he ngaahi ʻelemēniti takitaha ko ʻeni ʻe tolú.

Hangē ko e vaʻe ʻo e sea vaʻe-tolú, ʻoku pehē ʻa e mahuʻinga ʻo e ngaahi tui mahuʻinga ko ʻeni ʻe tolú. Hangehangē ʻe aʻusia ʻe he kau faiakó ha ola lelei ʻi he taimi ʻoku tatau ai ʻenau ngaahi foungá mo e kotoa ʻo e ngaahi tui mahuʻinga ko ʻeni ʻe tolú.

Ka, ʻoku ʻikai ke tatau ʻa e ngaahi founga ʻa e kau faiakó he taimi ʻe niʻihi mo e meʻa ʻoku tui ki ai honau lotó. Hangē pē ko e ʻikai ke ngāue lelei ha sea vaʻe-tolu ʻoku maumau pe mole ha vaʻe ʻe taha, ʻoku fokotuʻu mai ʻe he tohi tuʻutuʻuni Ko Hono Akoʻi mo Ako ʻo e Ongoongoleleí ko e taimi ʻoku ʻikai ke ola lelei ai e ngāue ʻa e kau faiakó, ʻoku hoko ia koeʻuhí ko e ʻikai ke ʻi ai ha taha ʻo e ngaahi ʻelemēniti ko ʻení:

1. Falala ki he mālohi ʻo e folofolá

2. Tui ki he ʻEikí mo e Laumālié

3. Falala ki he fānau akó

Sio ʻi he foʻi vitiō “Ngaahi Tui Tefito ʻe Tolú” (1:47), lava ke maʻu ʻi he LDS.org. ʻI he foʻi vitiō ko ʻení, ʻoku lea ai ʻa Seti Uepi (Chad Webb) ko e pule ʻo e Seminelí mo e ʻInisititiuti Fakalotú kau ki ha taimi naʻá ne ongoʻi ai naʻe ʻikai ke fenāpasi ʻene founga fakafaiakó mo ʻene ngaahi tui mahuʻingá. Fakatokangaʻi ange ʻa e meʻa naʻá ne fakapapau ke fai koeʻuhí ko e aʻusiá ni.

Falala ki he Mālohi ʻo e Folofolá

Lau ʻa e palakalafi ʻe ua ʻi lalo he ʻuluʻi fakamatala ko e “Falala ki he mālohi ʻo e folofolá” ʻi he konga 4.1.3 ʻo e tohi tuʻutuʻuni Ko Hono Akoʻi mo Ako ʻo e Ongoongoleleí (peesi 64–65). Hili ia pea lau ʻa e ngaahi potufolofola ko ʻení.

• 2 Tīmote 3:15–17

• 2 Nīfai 25:23, 26

• ʻAlamā 31:5

• Hilamani 3:29–30

Lolotonga e lau mei he tohi tuʻutuʻuní mo e folofolá, fai ʻa e meʻa ko ʻení:

• Kumi ʻa e ngaahi foʻi lea pe kupuʻi lea ʻoku nau fakahā ʻa e ngaahi tāpuaki ʻe lava ke ʻomi ʻe he folofolá ki hoʻo moʻuí mo e moʻui hoʻo fānau akó.

• Fakalaulauloto ki ha ngaahi aʻusia he taimi naʻe faitāpuekina ai ʻe he folofolá hoʻo moʻuí pe ko e moʻui ʻa e niʻihi kehé. Fakakaukau ke hiki hoʻo ngaahi fakakaukaú mo hoʻo ngaahi ongó.

ʻI he ngaahi lokiako ʻoku maʻu ai ʻe he kau faiakó mo e fānau akó ʻa e loto falala ki he mālohi ʻo e folofolá, ʻoku maʻu leva ʻe he folofolá ha fatongia mahuʻinga ʻi he akoʻí mo e akó. Sio ʻi he foʻi vitiō “Faiako Fakatefito ʻi he Folofolá” (3:20), lava ke maʻu ʻi he LDS.org. ʻI he foʻi vitiō ko ʻení, ʻoku fakamatala ai ʻa Misa Uepi ki he anga ʻo ʻene hā ʻi he lokiakó pea mo e ʻuhinga ʻoku mahuʻinga aí. ʻI hoʻo sio, fakakaukau ki he ngaahi fehuʻi ko ʻení:

• Ko e hā te ke mamata ki ai ʻi ha lokiako ʻoku hoko ai e folofola ko e uho ʻo e akoʻí mo e akó?

• Ko e hā ʻoku mahuʻinga ai ke ʻai ʻe he kau faiakó e folofolá ko e uho ʻo e ngaahi aʻusia ʻa e kau akó ʻi lokiakó?

Hiki hoʻo tali ki he ngaahi fehuʻi ko ʻení ʻi ha tohinoa ako pe ʻi ha feituʻu kehe te ke lava ʻo toe vakai ki ai pea vahevahe ia mo ho taki ʻinisēvesí pe kulupú.

Tui ki he ʻEikí mo e Laumālié

Lau ʻa e palakalafi ʻe ua ʻi lalo he ʻuluʻi fakamatala ko e “Tui ki he ʻEikí mo e Laumālié” ʻi he konga 4.1.3 ʻo e tohi tuʻutuʻuni Ko Hono Akoʻi mo Ako ʻo e Ongoongoleleí (peesi 64–65). Lolotonga hono laú, kumi e founga ʻoku hanga ai ʻe hono ngāueʻi e tui ki he ʻEikí mo e Laumālié ʻo fakahoko ha liliu ʻi he moʻui hoʻo fānau akó.

Mamata ʻi he foʻi vitiō “The Lord Knows Every Need” (0:45), lava ke maʻu ʻi he LDS.org. ʻE tokoni ʻa e foʻi vitiō ko ʻení ke ne fakaloloto e mahino ʻokú ke maʻu ki he founga ʻoku faitāpuekina fakatouʻosi ai koe mo hoʻo fānau akó ʻi hono ngāueʻi e tui ki he ʻEikí mo e Laumālié. ʻI hoʻo mamatá, fakakaukau ki he ngaahi fehuʻi ko ʻení:

• ʻI hoʻo hoko ko e faiakó, ko e hā ha ngaahi founga ʻe niʻihi te ke lava ʻo fakatātaaʻi ai ʻa e tui ki he ʻEikí mo e Laumālié?

• ʻE hoko fēfē hoʻo falala ki he ʻEikí mo e Laumālié ko ha tāpuaki ki hoʻo fānau akó?

Hiki hoʻo tali ki he ngaahi fehuʻi ko ʻení ʻi ha tohinoa ako pe ʻi ha feituʻu kehe te ke lava ʻo toe vakai ki ai pea vahevahe ia mo ho taki ʻinisēvesí pe kulupú.

Falala ki he Fānau Akó

Lau ʻa e ʻuluaki palakalafi ʻe fā ʻi lalo he ʻuluʻi fakamatala ko e “Falala ki he Fānau Akó” ʻi he konga 4.1.3 ʻo e tohi tuʻutuʻuni Ko Hono Akoʻi mo Ako ʻo e Ongoongoleleí (peesi 64–65). Lolotonga hono laú, kumi e ngaahi foʻi lea pe kupuʻi lea ʻoku nau fakahaaʻi ʻa e ʻuhinga te ke lava ai ʻo falala ki he meʻa ʻe malava ʻe hoʻo fānau akó ke nau ako, akoʻi, mo fakaʻaongaʻi ʻa e tokāteline mo e ngaahi tefitoʻi moʻoni ʻo e ongoongoleleí.

Sio ʻi he foʻi vitiō “Fakatuʻotuʻa Lahi Ange ki Hoʻo Kau Akó” (2:21), lava ke maʻu ʻi he LDS.org. ʻOku fakatātaaʻi ʻe he foʻi vitiō ko ʻení ʻa e founga naʻe tokoniʻi ai ʻe ha fakatuʻotuʻa mo ha falala ʻa ha faiako ki heʻene fānau akó ke nau “ongoʻi ʻa e ngaahi ngāue ʻa e Laumālié” mo tākiekina ʻenau uluí (Bonnie L. Oscarson, “Ngaahi ʻAmanaki Lahi Angé” [fakamafola fakasatelaite ʻa e Seminelí mo e ʻInisititiuti Fakalotú, 5 ʻAokosi 2014], lds.org/broadcasts). Lolotonga hoʻo sió, fakakaukau ki he fehuʻi ko ʻení:

• ʻE kehe fēfē ha kalasi mo ha faiako ʻoku falala ki he meʻa ʻoku malava ʻe he fānau akó ke ako, akoʻi, mo moʻui ʻaki e ongoongoleleí mei ha kalasi ʻoku ʻikai fuʻu fakatuʻotuʻa pe siʻisiʻi e falala ʻa e faiakó ki he fānau akó?

Hiki hoʻo ngaahi fakakaukau ki he fehuʻi ko ʻení ʻi ha tohinoa ako pe ʻi ha feituʻu kehe te ke lava ʻo fakaʻaongaʻi pe vahevahe ia mo hoʻo taki ʻinisēvesí pe kulupú.

Fakamatala Fakanounoú mo e Fakaʻaongaʻí

Ngaahi Tefitoʻi Moʻoni ke Manatuʻí

Koeʻuhí ke ola lelei hoʻo akoʻí, kuo pau ke tatau hoʻo ngaahi founga fakafaiakó mo e ngaahi tui tefito ʻe tolu ko ʻení.

1. Te tau lava ʻo falala ki he mālohi ʻo e folofola ʻa e ʻOtuá.

2. ʻOku lava ke tau ngāueʻi e tui ki he ʻEikí mo e Laumālié.

3. ʻOku lava ke tau falala ki he fānau akó.

ʻE lava ke tokoni he taimi kotoa pē ke ke fehuʻi kiate koe pe naʻe fēfē hono fakaʻaongaʻi ʻo e ngaahi tui tefito ko ʻení ʻi hoʻo ngaahi founga [fakafaiakó] mo e ngaahi ngāue fakakalasí.

“ʻOku ou kōlenga atu, maʻamoutolu mo e fānau akó, ke mou tui te nau fie lau ʻa e [Tohi ʻa Molomoná], ʻo ʻikai ko haʻamou fakamālohiʻi kinautolu ki ai, ka te ne tohoakiʻi kinautolu ki ai” (Henry B Eyring, “The Book of Mormon Will Change Your Life” [CES symposium on the Book of Mormon, Aug. 17, 1990], 2, si.lds.org).

“Ko ia, pea hā leva?”

Hiki ha ngaahi meʻa te ke fakahoko ʻo makatuʻunga ʻi he ngaahi tefitoʻi moʻoni kuó ke ako ʻi he ʻaho ní, ke fakaʻosi ʻaki ʻa e aʻusia fakaako ko ʻení.