Aʻusia Fakaako 14

Talateu ki he Fakataukei Fakatokāteliné

Vakai Fakalūkufuá

ʻOku fakamatalaʻi ʻe he aʻusia fakaakó ni ʻa e ngaahi fakakaukau ko ʻení:

• Ko hono maʻu ha mahino ki he ngaahi taumuʻa mo e ngaahi ola ʻoku fie maʻu ki he Fakataukei Fakatokāteliné

• Ko hono ako mo fakaʻaongaʻi e ngaahi tefitoʻi moʻoni fakalangí ki hono maʻu ʻo e ʻilo fakalaumālié ʻi he Fakataukei Fakatokāteliné

• Ko hono ʻiloʻi lelei e tokāteline ʻo e ongoongolelei ʻo Sīsū Kalaisí

• Ko hono fakahoko ʻo e Fakataukei Fakatokāteliné ʻi he loki akó

Fakatokangaʻi ange: ʻOku ʻomi ʻe he aʻusia fakaako ko ʻení ha vakai fakalūkufua nounou ki he ngaahi tefitoʻi moʻoni Fakataukei Fakatokāteliné mo hono fakahokó. Ki hano toe fakamanatu e fakamatalá, kātaki ʻo vakai ki he Fakamatala ki he ʻElito ʻo e Fakataukei Fakatokāteliné, ko e laʻipepa tufa “Vakai Fakalūkufua ki he Fakataukei Fakatokāteliné,” mo e doctrinalmastery.lds.org.

Ngaahi Fakakaukau Mahuʻingá

ʻUhinga ʻo e Fakataukei Fakatokāteliné

ʻI heʻetau hoko ko e kau faiako ʻi he Seminelí mo e ʻInisititiuti Fakalotú, ʻoku tau taumuʻa ke tokoniʻi e kau akó ke langa honau fakavaʻé ʻia Sīsū Kalaisi ʻaki hono tokoniʻi kinautolu ke nau maʻu ha mahino, tui, mo moʻui ʻo fakatatau mo ʻEne tokāteliné (vakai, Hilamani 5:12). Ka neongo iá, ʻi he ngaahi ʻahó ni ʻoku tatau e kau faiakó mo e kau akó ʻi heʻenau fehangahangai mo e ngaahi faingataʻa lahi hono fakatupulaki ʻenau tuí ʻia Sīsū Kalaisí. Fakakaukau ki he ngaahi sīpinga ʻe niʻihi ʻo e ngaahi faingataʻa ko ʻení ʻi hoʻo moʻuí pea ʻi he moʻui hoʻo kau akó. Naʻe fakamatalaʻi ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi tūkunga faingataʻa ʻoku fehangahangai mo e kau akó mo e kau faiakó:

“Kuo ʻosi atu e ngaahi ʻaho ʻi he taimi naʻe maluʻi ai e kau akó mei he kakai naʻa nau ʻohofi ʻa e Siasí. …

“…  ʻOku ʻikai ke maʻu kotoa ʻe hoʻo kau akó ʻa e tui feʻunga ke fehangahangai mo e ngaahi faingataʻa ʻoku tuʻunuku mei muʻá. …

“[ʻOku tau moʻui ʻi ha kuonga] ʻoku maʻu ai ʻe he kau akó he taimi pē ko iá ʻa e meʻa kotoa pē fekauʻaki mo e Siasí mei he ngaahi fakakaukau kotoa pē. ʻI he ʻahó ni ko e meʻa ʻoku nau mamata ki ai ʻi heʻenau ngaahi telefoni toʻotoʻó ʻoku meimei ke ne ʻahiʻahiʻi ʻa e tuí ʻo tatau mo hono fakatupulaki ʻo e tuí. …

Koeʻuhí ko e ngaahi faingataʻa ko ʻení, naʻe toki fakangofua kimuí ni mai ʻe he Poate Akó ha polokalama ʻi he seminelí naʻe ui ko e Fakataukei Fakatokāteliné. ʻE nofotaha ʻa e polokalama foʻoú ni ʻi hono langa mo fakamālohia e tui ʻa ʻetau kau akó kia Sīsū Kalaisí mo fakamālohia kinautolu ʻaki ha malava lahi ange ke moʻui ʻaki mo fakaʻaongaʻi e ongoongoleleí ʻi heʻenau moʻuí. …

“ʻOku fakalaumālie mo taimi totonu ʻa e polokalamá ni. Te ne ʻoange ha ivi tākiekina lelei ki hotau kakai kei talavoú”(M. Lāsolo Pālati, “The Opportunities and Responsibilities of CES Teachers in the 21st Century” [lea ki he kau ako fakalotu ʻi he Potungāue Ako ʻa e Siasí, Fēpueli  26, 2016]).

Ko e hā ʻa e Fakataukei Fakatokāteline?

Ke tokoni ke mahino lelei ange ʻa e polokalama Fakataukei Fakatokāteliné, sio he vitiō “What Is Doctrinal Mastery?” (3:53), ʻi he he LDS.org. ʻI hoʻo sio, fakakaukau ki he ngaahi fehuʻi ko ʻení:

• Ko e hā ʻoku fakalangi mo taimi totonu ai ʻa e Fakataukei Fakatokāteliné ki he toʻu tupu ʻo e ʻahó ní?

• Ko e hā ʻa e ngaahi ola ʻoku fie maʻu mei he Fakataukei Fakatokāteliné?

Ngaahi Ola ʻoku Fie Maʻu mei he Fakataukei Fakatokāteliné

ʻOku fakatefito e Fakataukei Fakatokāteliné ʻi ha ola ʻe ua:

• Ako mo fakaʻaongaʻi e ngaahi tefitoʻi moʻoni fakalangí ki hono maʻu ʻo e ʻilo fakalaumālié.

• Ko e taukei ʻi he tokāteline ʻo e ongoongolelei ʻo Sīsū Kalaisí pea mo e ngaahi potufolofola ʻa ia ʻoku akoʻi ai e tokāteline ko iá.

ʻOku fengāueʻaki fakataha ʻa e ongo ola ʻe ua ko ení peá na lava ʻo tokoniʻi e kau akó ke langa honau fakavaʻé ʻia Sīsū Kalaisi mo ʻEne tokāteliné. ʻI hono ikunaʻi ʻe he kau akó ʻa e ongo ola ko ení, ʻoku nau fakaloloto ai ʻenau uluí pea lava ke nau tokoni ki he niʻihi kehé ke nau fakahoko e meʻa tatau.

ʻI he aʻusia fakaako ko ení, te tau vakavakaiʻi fakaikiiki ange ai ʻa e ola takitaha ʻo e Fakataukei Fakatokāteliné, vakai ki he anga hono fakahoko ʻi loki akó, mo mahino lahi ange kiate kitautolu e founga ʻoku malava ke faitāpuekina kakato ange ai e kau akó ʻe Sīsū Kalaisi mo ʻEne tokāteliné.

Maʻu ʻa e ʻIlo Fakalaumālié

Ko e ola ʻuluakí ke tokoniʻi hoʻo kau akó ke nau ako mo fakaʻaongaʻi e ngaahi tefitoʻi moʻoni fakalangí ke maʻu ai ha ʻilo fakalaumālie. ʻOku ʻafioʻi ʻe he ʻOtuá ʻa e meʻa kotoa pea ko Ia ʻa e tupuʻanga ʻo e moʻoni kotoa pē. Koeʻuhí ʻokú Ne ʻofa ʻiate kitautolu, ʻokú Ne finangalo ke tokoniʻi kitautolu ke tau ʻilo ʻa e moʻoní ʻi heʻetau feinga ke ʻilo mo maʻu e mahino ki Heʻene tokāteliné pea ʻi heʻetau fekumi ki he tali ki heʻetau ngaahi fehuʻí mo e tālafilí.

ʻI hoʻo fakahoko ʻa e ngāue ʻi he konga ko ʻení, fakakaukau ki ha ngaahi fehuʻi mo ha ngaahi tālafili ʻe niʻihi ʻe ala maʻu ʻe hoʻo kau akó, ʻo hangē ko e: “Ko e hā ʻoku lahi fau ai e mamahí ʻi he māmaní?” “Naʻe fakahoko nai ʻe Siosefa Sāmita ʻa e mali tokolahí?” pea “ʻOku ʻofa nai ʻa e ʻOtuá ʻiate au?”

ʻE lava ʻe he ngaahi tefitoʻi moʻoni ʻe tolu ko eni ki hono maʻu ʻo e ʻilo fakalaumālié ʻo tataki e kau faiakó mo e kau akó fakatouʻosi ʻi heʻenau fekumi ke ako mo mahino kiate kinautolu e moʻoni taʻengatá, tali e ngaahi fehuʻí mo e tālafilí, mo fakahoko ha ngaahi fili ʻi heʻenau moʻui fakaʻahó:

• Ngāue ʻi he tuí

• Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.

• Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

ʻOku fakamatalaʻi lahi ange ʻa e ngaahi tefitoʻi moʻoni ko ʻení mo fakaʻaliʻali atu ʻi he ngaahi konga ko ʻení.

Ngāue ʻi he Tui

ʻI he taimi ʻoku tau ngāue ai ʻi he tuí, ʻoku tau falala ki he ʻOtuá pea tau tafoki kiate Ia ʻi he lotu fakamātoato, ako, mo e talangofua. ʻOku tau fakafalala ki he meʻa ʻoku tau ʻosi ʻiloʻi ʻoku moʻoní pea hokohoko atu e fekumi ki ha ngaahi talí. ʻOku tau falala ʻe tali mo fakaleleiʻi ʻetau ngaahi fehuʻí mo e tālafilí ʻi he taimi ʻa e ʻEikí.

Sio he vitioo “Act in Faith: The Stonemason” (4:58), ʻi he LDS.org. ʻI hoʻo mamata ʻi he vitiō ko ení, kumi ki he founga ʻoku lava ke fai atu pē kuo feau ʻetau ngaahi fehuʻí mo e tālafilí ʻi he hokohoko atu ʻetau ngāue ʻi he tuí.

Vakaiʻi ʻa e Ngaahi Fakakaukaú mo e Ngaahi Fehuʻí ʻaki ha Fakakaukau Fakalangi.

ʻI heʻetau sivisiviʻi ʻetau ngaahi fehuʻí, tālafilí, palopalema fakasōsialé, mo e ngaahi meʻa fakahisitōlia ʻoku hokó ʻo fakatatau ki he palani ʻo e fakamoʻuí mo e ngaahi akonaki ʻa e Fakamoʻuí, ʻoku tau fakaafeʻi ai ʻa e Laumālie Māʻoniʻoní ke tokoni mai kiate kitautolu ke tau vakai ki he ngaahi meʻa kotoa ʻo hangē ko e ʻafio mai ʻa e ʻEikí kiate kinautolú. ʻOku tau tokanga taha ki he ngaahi tafaʻaki mahuʻinga ʻo e ongoongoleleí pea ʻikai tohoakiʻi kitautolu ʻe he fanga kiʻi meʻa ʻoku ʻikai loko mahuʻingá.

Mamata he vitiō Examining Questions with an Eternal Perspective”2:56), ʻa ia ʻoku maʻu ʻi he LDS.org ʻI hoʻo mamata ʻi he vitiō ko ení, kumi e founga te tau lava ai ʻo toe fakalea e ngaahi fehuʻí mo e tālafilí (pe kehe ange ʻetau vakai kiate kinautolú) mo fakahaaʻi e ngaahi fakakaukaú ʻi he tuʻunga moʻui ʻa e ʻEikí ki he moʻoní kae ʻikai ko hono tali tuʻu ʻa e ngaahi fakakaukau pe fakamahamahalo ʻa e māmaní. Lolotonga hoʻo sió, fakakaukau ki he ngaahi fehuʻi ko ʻení:

• ʻOku tokoni fēfē ki he kau akó ʻa e mahino kiate kinautolu e palani ʻo e fakamoʻui ʻa e Tamai Hēvaní mo ʻEne tokāteliné ke nau vakai lelei ange ai ki heʻenau ngaahi fehuʻí mo e tālafilí ʻaki ha fakakaukau ʻoku taʻengatá?

Hiki hoʻo tali ki he fehuʻi ko ʻení ʻi ha tohinoa ako pe ʻi ha feituʻu kehe te ke lava ʻo toe vakai ki ai pea vahevahe ia mo ho taki ʻinisēvesí pe kulupú.

Fekumi ki ha Mahino Lahi Ange ʻo Fou ʻi he Ngaahi Maʻuʻanga Tokoni Kuo Fokotuʻu Fakalangí

ʻI heʻetau fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí, ʻoku tau maʻu ai ha ʻilo fakalaumālie ʻo fakafou ʻi he Laumālie Māʻoniʻoní, ngaahi folofolá, kau palōfitá, mātuʻá, kau taki ʻo e Siasí, mo e ngaahi maʻuʻanga tokoni falalaʻanga kehé. ʻI heʻetau ako mei he ngaahi maʻuʻanga tokoni ko ení, ʻoku tau ako ai ke fakatokangaʻi mo ʻiloʻi ʻa e moʻoní mei he halá.

Fakakaukau ki he ngaahi maʻuʻanga tokoni kuo fokotuʻu fakalangi te ke ala ngāue ʻaki mo hoʻo kau akó ke kumi ha mahino lahi ange, ʻo hangē ko e ngaahi folofolá mo e ngaahi pōpoaki mei he konifelenisi lahí. Toe fakakaukau ki he ngaahi maʻuʻanga tokoni falalaʻanga kehe ʻe lava ke ke fakaʻaongaʻi, hangē ko e ngaahi maʻuʻanga tokoni ʻi he peesi “Gospel Topics, Essays, and Other Resources” ʻi he LDS.org.

ʻEkitivitī ki he Fakamatala ki he ʻElito ʻo e Fakataukei Fakatokāteliné

Ako e “Maʻu ha ʻIlo Fakalaumālie” ʻi he Fakamatala ki he ʻElito ʻo e Fakataukei Fakatokāteliné ke toe vakaiʻi mo feangai ange mo e ngaahi tefitoʻi moʻoni ʻo e maʻu e ʻilo fakalaumālié. Toe vakaiʻi e ngaahi tefitoʻi moʻoni ʻe tolu ʻo e maʻu e ʻilo fakalaumāié ʻoku fakamatalaʻi atu ʻi he konga ko ʻení pea laineʻi ‘a e ngaahi tafaʻaki kehe mahuʻinga ʻo e ʻo maʻu e ʻilo fakalaumālié.

Taukei ʻi he Tokāteliné

Ko e ola hono ua ʻo e Fakataukei Fakatokāteliné ko hono ʻiloʻi lelei ko ia ʻo e tokāteline ʻo e ongoongolelei ʻo Sīsū Kalaisí. ʻI hono ʻiloʻi lelei ʻe he kau akó ʻa e tokāteliné, ʻe lava ke nau taukei ʻi hono fakaʻaongaʻi e ngaahi tefitoʻi moʻoni ʻo hono maʻu e ʻilo fakalaumālié ʻi heʻenau fekumi ki he moʻoní.

Ko ʻeni ha ngaahi ʻelemēniti mahuʻinga ʻe tolu ʻo hono ʻiloʻi lelei e tokāteliné:

• Mahino e ngaahi tefito fakatokāteliné mo e ngaahi fakamatala mahuʻinga ʻo e tokāteliné.

• ʻIloʻi e ngaahi potufolofola fakataukei fakatokāteliné

• Fakamatalaʻi pea moʻui ʻaki e tokāteliné

Mahino e Ngaahi Tefito Fakatokāteliné mo e Ngaahi Fakamatala Mahuʻinga ʻo e Tokāteliné

ʻE ako ʻe he kau akó ha ngaahi tefito fakatokāteline ʻe hiva ʻo tānaki atu ki he ngaahi tefitoʻi moʻoni ʻo hono maʻu e ʻilo fakalaumālié. ʻOku ʻi he ngaahi tefito fakatokāteliné takitaha ha ngaahi fakamatala fakatokāteline ʻoku mahuʻinga ke mahino, tui, mo fakaʻaongaʻi ʻe he kau akó. ʻOku ui e niʻihi ʻo e ngaahi fakamatala fakatokāteline ko eni mei he Fakamatala ki he ʻElito ʻo e Fakataukei Fakatokāteliné ko ha fakamatala mahuʻinga ʻo e tokāteliné. ʻOku fekauʻaki ʻa e ngaahi fakamatala mahuʻinga ko ení mo e ngaahi potufolofola fakataukei fakatokāteline ʻoku tokoni ke akoʻi e ngaahi tafaʻaki pau ʻo e ngaahi fakamatala ʻo e tokāteliné.

ʻIloʻi e Ngaahi Potufolofola Fakataukei Fakatokāteliné

ʻOku ʻi ai ha ngaahi potufolofola fakataukei fakatokāteline ʻe 25 ki he ngaahi kalasi takitaha (ngaahi potufolofola ʻe 100 fakakātoa). ʻOku tokoni ʻa e ngaahi potufolofola ko ení ke akoʻi ha ngaahi tafaʻaki ʻo e ngaahi fakamatala mahuʻingá ʻoku fekauʻaki mo e tefito fakatokāteline takitaha. Hangē ko ʻení, ʻoku fekauʻaki ʻa e fakamatala fakatokāteline ko ení mo ha potufolofola fakataukei fakatokāteline mei he tefito fakatokāteline ko e “Ko e Fakalelei ʻa Sīsū Kalaisí”: “ʻOku ʻaonga ʻa e feilaulau ʻa [Sīsū Kalaisí] kiate kitautolu takitaha mo fakahaaʻi ʻa e mahuʻinga taʻe-fakangatangata ʻa e tokotaha takitaha ʻo e Fānau ʻa e Tamai Hevaní (vakai, T&F 18:10–11) ”(Fakamatala ki he ʻElito ʻo e Fakataukei Fakatokāteliné [2016], 6). Ko ha konga mahuʻinga ʻo hoʻo ngāue ko e faiakó ko hono tokoniʻi e kau akó ke nau manatuʻi mo ʻilo e tuʻuʻanga ʻo e ngaahi potufolofola ko ʻení, pea mahino e founga hono akoʻi ʻe he ngaahi potufolofolá e tokāteline ʻa e Fakamoʻuí.

Fakamatalaʻi pea Moʻui ʻaki e Tokāteliné

Ko ha konga mahuʻinga ʻo hono ʻiloʻi lelei e tokāteline ʻo e ongoongolelei ʻo Sīsū Kalaisí ko e lava ko ia ke fakamatalaʻi mahino e fakamatala mahuʻinga takitaha ʻo e tokāteliné pea mahino e founga ʻoku tokoni ai e ngaahi potufolofola fakataukei fakatokāteliné ki hono akoʻi ʻo e ngaahi fakamatala mahuʻinga ko iá. ʻI he taimi ʻoku mahino ai ki he kau akó ʻa e tokāteliné mo lava ke kumi mo manatuʻi e ngaahi potufolofola fakataukei fakatokāteliné mo hono ngaahi fakamatala fakatokāteline fekauʻakí, te nau lava lelei ange ʻo fakaʻaongaʻi e tokāteliné mo fakamatalaʻi ki he niʻihi kehé. Hangē ko ia ne ako ʻaki ʻe Palesiteni Poiti K. Peeka (1924–2015) ʻo e Kōlomu ʻo e kau ʻAposetolo ʻe Toko Hongofulu Mā Uá, “ʻI he mahino ʻa e tokāteline moʻoní, ʻokú ne hanga ʻo liliu ʻa e fakakaukaú mo e ʻulungāngá (“Little Children,” Ensign, Nōvema 1986, 17).

ʻEkitivitī ki he Fakamatala ki he ʻElito ʻo e Fakataukei Fakatokāteliné

Fakamatalaʻi nounou ʻa e ngaahi tefito fakatokāteline ʻe hiva ʻi he Fakamatala ki he ʻElito ʻo e Fakataukei Fakatokāteliné ke vakai ki he founga honau fokotuʻutuʻú. Ako ʻa e ʻuluaki palakalafi ʻi lalo ʻi he tefito fakatokāteline 3, “Ko e Fakalelei ʻa Sīsū Kalaisí,” pea fakasio ʻa e founga hono fakahū ʻo e ngaahi potufolofola fakataukei fakatokāteliné ki he ngaahi tefito fakatokāteliné pea tokoni ke akoʻi ʻa e ngaahi fakamatala mahuʻinga ʻo e tokāteliné ʻoku fakamatalaʻi hangatonu ʻi muʻa ʻiate kinautolú. Fakakaukau ki he founga ʻe lava ke tokoniʻi ai ʻe he tokāteline ko ení e fānau akó ke nau langa honau fakavaʻé ʻia Sīsū Kalaisi mo kamata ke tali ʻenau ngaahi fehuʻí mo e tālafilí, ʻo hangē ko ʻení, “ʻOku ʻofa ʻa e ʻOtuá ʻiate au?”

Fakataukei Fakatokāteline ʻi he Loki Akó

Kuo mahino ʻeni e ongo ola ʻo e Fakataukei Fakatokāteliné mo e founga te na lava ai ʻo tokoniʻi e kau akó ke langa honau fakavaʻé ʻia Sīsū Kalaisí, te tau sivisiviʻi e founga ke fakaʻaongaʻi ai kinaua mo akoʻi ʻi he loki akó.

ʻOku tokoni e nāunau fakalēsoni Fakataukei Fakatokāteliné ki he kau faiako mo e kau akó ke nau ako mo fakaʻaongaʻi e ngaahi tefitoʻi moʻoni ʻoku fekauʻaki mo hono maʻu ʻo e ʻilo fakalaumālié pea mo e ngaahi tefito fakatokāteline ʻe hivá. ʻOku kau ʻi he ngaahi konga mahuʻinga ʻo e naunau fakalēsoní ʻa e:

• Mahino ʻa e tokāteliné: ʻOku tokoniʻi ʻe ha ngaahi konga pe kongokonga ʻo e ngaahi ʻekitivitī fakaakó ʻa e kau akó ke nau fakatupulaki ha mahino ki he tefito fakatokāteline takitaha, ngaahi fakamatala fakatokāteline mahuʻinga ʻoku fekauʻaki mo iá, mo e ngaahi potufolofola fakatokāteline fekauʻakí.

• Fanga kiʻi ngāue akoakó ʻOku faʻu ʻaki e fanga kiʻi ngāué e ngaahi tuʻunga ke ako ki ai, ngaahi tūkunga ke fakafaivaʻi, mo e ngaahi fehuʻi ke tokoniʻi e kau akó ke nau fakaʻaongaʻi ai e ngaahi tefitoʻi moʻoni ʻo hono maʻu e ʻilo fakalaumālié pea mo e tokāteline ki he ngaahi tūkunga fakaonopōní mo e ngaahi fehuʻi ʻoku kaunga ki aí.

• Toe vakaiʻi ʻo e Fakataukei Fakatokāteliné: Ko e ngaahi ʻekitivitī te ne tokoniʻi e kau akó ke nau kumi, manatuʻi, mo ʻiloʻi lelei e ngaahi fakamatala fakatokāteliné mo e ngaahi potufolofola fakataukei fakatokāteline fekauʻakí.

ʻEkitivitī ki he Naunau ʻa e Faiako Fakataukei Fakatokāteliné

Ke vakai ki he anga e fōtunga ʻo e Fakataukei Fakatokāteliné ʻi he loki akó, fakaava hake hoʻo naunau fakafaiako ki he Fakataukei Fakatokāteliné ki he lēsoni ʻoku kaveinga ʻaki e “Ko e Fakalelei ʻa Sīsū Kalaisí.” ʻI he lēsoní, sivisiviʻi e ngaahi ngāue fakalokiako ko ʻení: (1) ko e mahino ʻa e tokāteliné, (2) fanga kiʻi ngāue akoakó, mo hono (3) toe vakaiʻi e fakataukei fakatokāteliné. Fakatokangaʻi ange ʻi he fanga kiʻi ngāue ki he mahino ʻa e tokāteliné, ʻoku fakaʻilongaʻi mataʻāʻā ʻa e tokāteliné pea kau ki ai mo e ngaahi potufolofola fakataukei fakatokāteliné ke tokoniʻi e kau akó ke nau ʻiloʻi lelei e tokāteliné. Fakatokangaʻi ange ʻi he fanga kiʻi ngāue akoakó ʻoku fakaafeʻi ʻa e kau akó ke nau fakamatalaʻi mo fakaʻaongaʻi e tokāteliné ki he ngaahi fehuʻi pe tālafili mei heʻenau moʻui ʻanautolú mo e moʻui ʻa e niʻihi kehé. ʻI he kau mai ʻa e kau akó ki he fanga kiʻi ngāue akoakó, ʻoku mahuʻinga ke ngāue ʻaki ʻa e ngaahi tefitoʻi moʻoni ʻo hono maʻu ʻo e ʻilo fakalaumalié. Ko hono fakaʻosí, fakatokangaʻi ange ʻoku fakataumuʻa ʻa hono toe vakaiʻi ʻo e Fakataukei Fakatokāteliné ke tokoniʻi e kau akó ke nau kumi, manatuʻi mo ʻiloʻi lelei e ngaahi fakamatala fakatokāteliné mo e ngaahi potufolofola fakataukei fakatokāteline fekauʻakí.

ʻEkitivitī ki he Naunau ʻa e Faiako Fakataukei Fakatokāteliné

Ke aʻusia ʻiate koe pē ʻa e founga ʻe lava ai ke fakaʻaongaʻi e Fakataukei Fakatokāteliné ʻi he loki akó, fakaava hoʻo naunau fakafaiako ki he Fakataukei Fakatokāteliné ki he lēsoni ʻoku kaveinga ʻaki ʻa e “Ko e Fakalelei ʻa Sīsū Kalaisí.” Teuteu ʻo fakafou ʻi ha kiʻi ngāue akoako. Fakakaukauloto angé ki ha meʻa ʻe ala fakahoko pe ongoʻi ʻe hoʻo kau akó lolotonga e kalasí mo e founga te nau ngāue ʻaki ai ʻa e meʻa kuo nau ako fekauʻaki mo e ngaahi tefitoʻi moʻoni ono maʻu e ʻilo fakalaumālié mo e ngaahi meʻa ʻo hono ʻiloʻi lelei e tokāteliné. Fakakaukau ki he ngaahi fehuʻi ko ʻení:

• ʻE tokoniʻi fēfē nai ʻe he Fakataukei Fakatokāteliné e kau akó ke nau fakamālohia ʻenau tui kia Sīsū Kalaisí mo e mahino ki Heʻene tokāteliné?

• ʻE Founga fēfē nai hono toe tali ʻe he Fakataukei Fakatokāteliné ʻa e ngaahi fehuʻi pe tālafili ʻa e kau akó (ʻi he tuʻunga ko ʻení “ʻOku ʻofa nai ʻa e ʻOtuá ʻiate au?”)?

Hiki hoʻo tali ki he ngaahi fehuʻi ko ʻení ʻi ha tohinoa ako pe ʻi ha feituʻu kehe te ke lava ʻo toe vakai ki ai pea vahevahe ia mo ho taki ʻinisēvesí pe kulupú.

ʻE tāpuekina ai hoʻo kau akó ʻi heʻenau fakaʻaongaʻi fakataha e ngaahi tefitoʻi moʻoní mo e ngaahi founga fakahoko ʻo e Fakataukei Fakatokāteliné ʻi he toenga ʻo ʻenau moʻuí.

Sio he vitiō “Acquiring Spiritual Knowledge: Madison’s Story (Maʻu ha ʻIlo Fakalaumālie: Talanoa ʻo Metisoní)” (8:36), ʻi he LDS.org. ʻI he foʻi vitiō ko ʻení, ʻoku fakaʻaongaʻi ʻe ha finemui ko hono hingoá ko Metisoni, ʻa e ngaahi tefitoʻi moʻoni hono maʻu e ʻilo fakalaumālié ke maʻu ai ha ngaahi tali ki heʻene ngaahi fehuʻí pea ke akoʻi mo tokoniʻi e niʻihi kehé ke nau ʻilo ʻa e moʻoní. ʻI hoʻo mamata aí, fakakaukau ki he ngaahi fehuʻi ko ení:

• ʻE tokoniʻi fēfē ʻe he Fakataukei Fakatokāteliné hoʻo kau akó ke langa honau fakavaʻé ʻia Sīsū Kalaisi mo ʻEne tokāteliné?

• ‘E tokoniʻi fēfē koe ʻe he ngaahi tefitoʻi moʻoni ʻo hono maʻu e ʻilo fakalaumālié ke tākiekina ʻaki ha tokotaha ako ke ne ʻilo ʻa e moʻoní pea maʻu ha ngaahi tali ki heʻene ngaahi fehuʻí?

• ʻE lava fēfē ʻe he ngaahi tefitoʻi moʻoni ʻo e Fakataukei Fakatokāteliné ʻo tokoniʻi e kau akó ʻi heʻenau tokoniʻi e niʻihi kehé ke maʻu e ʻilo fakalaumālié?

Ngaahi Fakakaukau Fakalahi ki he Fakataukei Fakatokāteliné

ʻE tokoniʻi koe ʻe he ngaahi fakaukau ko ení ki hono fakaʻaongaʻi lelei taha e Fakataukei Fakatokāteliné ʻi ho loki akó. Fekumi ki he tokoni ʻa e ʻEikí pea mo e fakahinohino ʻa hoʻo kouʻotineita fakalotofonuá ke fakapapauʻi ʻa e founga lelei taha ke ke fakahoko ʻaki e Fakataukei Fakatokāteliné pea mo hoʻo kau akó.

• Fakaʻaongaʻi ʻa e laʻipepa tufa “Vakai Fakalūkufua ki he Fakataukei Fakatokāteliné” ʻa ia ʻoku ʻoatu ʻi he fakamatala fakalahi ʻo e tohi lēsoni ko ʻení ke toe vakaiʻi mo fakamanatu atu ʻa e konga takitaha ʻo e Fakataukei Fakatokāteliné mo e founga ʻenau fekaukauʻakí.

• ʻOku kehekehe mo māvahevahe pē ʻa e Fakataukei Fakatokāteliné mei hono akoʻi fakahokohoko ʻo e folofolá, pea ʻokú na hoko fakatouʻosi pē ko e ongo konga mahuʻinga ʻo e aʻusia ʻa e kau akó ʻi he seminelí. Ke lava ke akoʻi fakatouʻosi kinaua, ʻe fie maʻu ke ke palani fakalelei hoʻo ngaahi lēsoní ʻo fakaʻaongaʻi e fakaʻutoʻuta ne fokotuʻu atú, kae fakafenāpasi pē ki hoʻo ngaahi fie maʻu fakalotofonuá.

• Ka neongo iá, ʻe lava ke kei fakaʻaongaʻi pē e ngaahi fakakaukau mo e ngaahi tefitoʻi moʻoni ʻo e Fakataukei Fakatokāteliné, ʻi hono akoʻi fakahokohoko e lēsoní pe ngaahi tūkunga kehé ʻi he toenga e taʻú ʻo fakatatau ki he lahi ʻa e ngaahi fehuʻí pe tālafili ʻi he kalasí. ʻE hoko hono fakamamafaʻi e ngaahi potufolofola fakataukei fakatokāteliné ʻi hoʻo akoʻi fakahokohoko e folofolá ke ne tokoniʻi e kau akó ke nau maʻu ha mahino lahi ange ki he puipuituʻa mo e kakano ʻo e potufolofola takitaha kae pehē foki ki hono fakamahuʻingaʻi e mahuʻinga ʻo e ngaahi moʻoni ʻoku akonekina ʻi he potufolofola takitaha.

• ʻE hoko atu hono langaki mo fetongi ʻe he Fakataukei Fakatokāteliné ʻa e polokalama fakataukei folofolá. ʻOku totonu ke fetongi ʻe he ngaahi ʻekitivitī mo e ngaahi potufolofola fakataukei fakatokāteliné e ngaahi kaveinga ki he fakataukei folofolá ʻi he ngaahi pulusinga kimuʻá.

• Ke ʻilo mo ha fakahinohino lahi ange, ʻalu ki he doctrinalmastery.lds.org.

Fakamatala Fakanounoú mo e Fakaʻaongaʻí

Ngaahi Tefitoʻi Moʻoni ke Manatuʻí

• Ko e Fakataukei Fakatokāteliné ko ha ueʻi fakalaumālie ia ke tāpuekina ʻetau kau akó ʻi heʻenau fakalakalaka mo fehangahangai mo e ngaahi pole faingataʻá.

• ʻOku nofo taha e Fakataukei Fakatokāteliné ʻi ha ongo ola ʻe ua: (1) ko hono ako mo fakaʻaongaʻi e ngaahi tefitoʻi moʻoni fakalangí ki hono maʻu ʻo e ʻilo fakalaumālié pea mo (2) hono ʻiloʻi lelei e tokāteline ki he ongoongolelei ʻo Sīsū Kalaisí pea mo e ngaahi potufolofola ʻoku akoʻi ai e tokāteline ko iá.

• Ko hono tokoniʻi ko ia e kau akó ke nau aʻusia e ongo ola ʻo e Fakataukei Fakatokāteliné, ʻe tokoniʻi ai kinautolu ke langa honau fakavaʻé ʻia Sīsū Kalaisi ʻi heʻenau feinga ke mahino, tui, mo moʻui ʻo fakatatau mo ʻEne tokāteliné.

“Ko e Fakataukei Fakatokāteliné ko ha polokalama ia ʻi he seminelí mo ha ngaahi kaveinga ʻe tolu: ʻuluakí, ke tokoniʻi ʻetau kau akó ke nau ako e founga ke maʻu ai e ʻilo fakalaumālié; uá, ke tokoniʻi e kau akó ke nau ʻilo mo mahino kiate kinautolu e tokāteline ʻa e Fakamoʻuí—ʻoku ʻuhinga ia ke ʻilo ʻa e tokāteline moʻoní ʻi heʻenau fakakaukaú pea ke mahino ʻa e tokāteline moʻoní ʻi honau lotó foki, pea ʻoku tau fie maʻu ke tō loloto ia ki honau lotó; pea ko e tolú, ke tokoniʻi e kau akó ke nau ako e founga ke fakaʻaongaʻi ai ʻa e tokāteliné ʻi heʻenau moʻuí, ke nau moʻui ʻaki mo fakaʻaongaʻi foki ia ke tali ʻaki e ngaahi fehuʻi ʻe ala maʻu ʻe honau ngaahi kaungāmeʻá pe akoʻi mo tokoniʻi ʻaki e niʻihi kehé ke nau ʻilo ʻa e moʻoní” (Kim B. Clark, “Doctrinal Mastery and Deep Learning” [lea ki he kau faiako fakalotu ʻi he Potungāue Ako ʻa e Siasí, 17 ʻo Fēpueli , 2017]).

Ko ia, pea hā leva?

Hiki ha ngaahi meʻa te ke fakahoko ʻo makatuʻunga ʻi he ngaahi tefitoʻi moʻoni kuó ke ako ʻi he ʻaho ní, ke fakaʻosi ʻaki ʻa e aʻusia fakaako ko ʻení.