Aʻusia Fakaako Fika 10
Aʻusia Fakaako Fika 10: Fakakaukauʻi e Meʻa ke Akoʻí: Fakaʻaongaʻi ʻo e Folofolá mo e Tohi Lēsoni ʻa e Faiakó
Vakai Fakalūkufuá
ʻOku fakamatalaʻi ʻe he aʻusia fakaakó ni ʻa e ngaahi tefitoʻi fakakaukau ko ʻení:
-
Ko ha talateu ki he tohi lēsoni ʻa e faiakó
-
Ko hono ohi mai mo liliu ʻo e nāunau fakalēsoní
-
Ko hono fakaʻaongaʻi ʻo e tohi lēsoni ʻa e faiakó mo e folofolá ke teuteuʻi ha lēsoni.
Ngaahi Fakakaukau Mahuʻingá
ʻOku fiefia ʻa Sisitā Malei ʻi hono akoʻi ha kalasi ʻoku ako ki he Tokāteline ʻo e Ongoongoleleí tuʻo ua ʻi he māhina ʻi hono uōtí. Lolotonga ʻene fiefia heʻene hoko ko ha faiako semineli ne uiuiʻi foʻoú, ʻokú ne fifili pe te ne teuteuʻi fēfē ha lēsoni ke ola lelei he ʻaho kotoa pē: “ʻOku hangē ha meʻa lahí ʻa hono teuteuʻi mo akoʻi ha lēsoni he ʻaho kotoa pē. Ko e hā e ngaahi maʻuʻanga tokoni ʻoku lava ʻo maʻu ke tokoni kiate aú?”
Talateu ki he Tohi Lēsoni ʻa e Faiakó
ʻOku hangē hono teuteuʻi ha lēsoni ʻi he ʻaho kotoa pē ʻo e uiké ko ha ngāue fakahela mo fakamole taimí.
Sio ʻi he foʻi vitiō “Talateu ki he Tohi Lēsoni ʻa e Faiakó” (4:01), lava ke maʻu ʻi he LDS.org. ʻI he foʻi vitiō ko ʻení, te ke ako ai e founga ke fakaʻaongaʻi ʻa e folofolá mo e tohi lēsoni ʻa e faiakó ke teuteuʻi e lēsoní ke ʻaonga mo lelei.
Fakatokangaʻi ange: Kapau ʻoku teʻeki maʻu haʻo tohi lēsoni ʻa e faiakó, fetuʻutaki ki hoʻo supavaisá. Te ke lava foki ʻo maʻu ʻa e ngaahi tohi lēsoní kotoa ʻi he lds.org/manual/institute ki he ngaahi tohi lēsoni ʻa e ʻinisititiutí mo e lds.org/manual/seminary ki he tohi lēsoni ʻa e seminelí.
ʻEkitivitī ʻo e Tohi Lēsoni ʻa e Faiakó
Fakatokangaʻi ange: ʻOku fokotuʻutuʻu ʻa e lēsoni takitaha ʻi he tohi lēsoni ʻa e faiako seminelí mo e ʻinisititiutí ke tokoniʻi koe ke ola lelei hoʻo teuteú. ʻOku ʻikai ke fokotuʻutuʻu pe fakahingoa ʻi he founga tatau ʻa e ngaahi tohi lēsoni kotoa ʻa e faiakó, ka ʻoku maʻu ʻa e nāunau tatau ʻi he ngaahi tohi lēsoni ʻa e faiakó. ʻOku makatuʻunga ʻa e ngaahi ʻekitivitī ʻi he aʻusia fakaako ko ʻení ʻi he ngaahi tohi lēsoni fakamuimuitaha ʻo e seminelí.
Fakaava e tohi lēsoni ʻa e faiakó ki ha lēsoni pē pe fakaʻaongaʻi ʻa e pepatufa ko e “Lēsoni Fakaangaangá—3 Nīfai 11:1–17” ʻoku ʻoatu ʻi he konga fakalahi ʻo e tohi lēsoni ko ʻení.
Lau ʻa e lēsoní pea kumi ʻa e ngaahi ʻelemēniti ko ʻení: ʻI hoʻo ʻiloʻi pē ʻa e ʻelemēniti takitaha, fakaʻilongaʻi ia ʻi he lisi ko ʻení:
-
Hingoa ʻo e Lēsoní
ʻOku fakahaaʻi ʻe he hingoa ʻo e lēsoni ko ʻení ʻa e ngaahi vahe ʻi he folofolá ʻoku fakamatalaʻi ʻi he lēsoní.
-
Talateu ‘o e konga folofolá
ʻOku ʻomi ʻe he talateu ʻo e konga folofolá ha fakamatala fakalūkufua ʻo e kakano mo e kaveinga ʻo e konga folofolá.
-
Fakakulupu e vēsí mo e fakamatala fakanounou ʻo e kakanó.
ʻOku fakahaaʻi ʻe he ngaahi fakakulupu ʻo e vēsí ha fokotuʻutuʻu mahino ʻo e ngaahi veesi ʻoku nofotaha ʻi ha tefito pe ngāue makehe. ʻOku fakamatalaʻi fakanounou ʻe he ngaahi fakamatala ʻo e kakanó ʻa e ngaahi meʻa ʻoku hoko pe ngaahi akonaki ʻi he fakakulupu ʻo ha veesi.
-
Sinoʻi lēsoní
-
Ngaahi fakamatala ʻo e tokāteliné pe tefitoʻi moʻoní.
Ko e ngaahi fakamatala ʻo e tokāteliné pe tefitoʻi moʻoní ko e ngaahi fakamatala nounou ia ʻo e ngaahi moʻoni fakafolofola.
-
Fakamatala puipuituʻá mo e ngaahi fakakaukau fakalahi fakafaiako (mahalo pē he ʻikai ke ʻasi ʻeni he lēsoni kotoa pē)
ʻOku ʻomi ʻe he fakamatala ki he ngaahi meʻa ne hokó mo e puipuituʻá ha ngaahi fakamatala lahi ange pea mo ha ngaahi fakamatala fakahisitōlia ʻo e kakanó pe ngaahi potufolofolá. ʻOku ʻomi ʻe he ngaahi fakakaukau fakalahi ki he faiakó, ha ngaahi fokotuʻu ki hono akoʻi ʻo e tokāteliné mo e ngaahi tefitoʻi moʻoní ʻa ia ʻe ʻikai faʻa ʻiloʻi pe fakamamafaʻi ʻi he sinoʻi lēsoní. Te nau ala ʻomi foki ha ngaahi fokotuʻu ki hono fakaʻaongaʻi ʻo e mītia ki he mamatá, hangē ko e ngaahi fakaʻaliʻali ʻi he DVD pe vitiō ʻoku maʻu ʻi he LDS.org.
Ngaahi Konga Mahuʻinga ‘o e Ongoongoleleí ʻOku Akoʻi mo Ako ‘i he Tohi Lēsoni ʻa e Faiakó
ʻOku fakataumuʻa ʻa e tohi lēsoni ʻa e faiako semineli mo ʻinisititiutí ke tokoniʻi koe ke ke fakaʻaongaʻi fakataha ʻa e Ngaahi Konga Mahuʻinga ʻo Hono Akoʻi mo Ako ʻo e Ongoongoleleí ʻi hoʻo teuteu mo akoʻi ʻa e lēsoni takitaha.
Sio ʻi he foʻi vitiō “Ko e Ngaahi Meʻa Mahuʻinga ʻi he Nāunau Fakalēsoní” (2:15), lava ke maʻu ʻi he LDS.org. Lolotonga hoʻo sió, kumi ʻa e founga ʻoku tokoni ai ʻa e ngaahi tohi lēsoni ʻa e faiako semineli mo ʻinisititiutí ke fakaʻaongaʻi fakataha mo e Ngaahi Konga Mahuʻinga ʻo Hono Akoʻi mo Ako ʻo e Ongoongoleleí ʻi he lēsoni takitaha.
Ohi mo Fulihi ʻo e Nāunau Fakalēsoní
Naʻe akoʻi ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo kau ki he founga ʻoku totonu ke fakaʻaongaʻi ai ʻe he kau faiako semineli mo ʻinisititiutí ʻa e nāunau fakalēsoní:
“ʻʻOku tau ʻuluaki ohi mai, pea tau toki liliu. [Kapau] ʻoku tau tuʻu maʻu kakato ʻi he lēsoni kuo ʻomai ke tau akoʻí, te tau toki lava leva ʻo muimui ʻi he Laumālié ke Ne liliu ia” (“A Panel Discussion with Elder Dallin H. Oaks” [fakamafola fakasatelaite ʻa e Seminelí mo e ʻInisititiuti Fakalotú, 7 ʻAokosi 2012], si.lds.org).
ʻI heʻetau hoko ko e kau faiako semineli mo ʻinisititiutí, ʻoku tau ohi mai ʻa e nāunau fakalēsoni ʻi he tohi lēsoni ʻa e faiakó pea tau fulihi ia ke ne feau e ngaahi fie maʻu ʻetau fānau akó.
|
Ohi Mai |
Fulihi |
|---|---|
|
ʻOku ʻuhinga hono ohi mai ʻo e nāunau fakalēsoní ki hono lau mo e fekumi ʻi he folofolá mo e lēsoni kuo ʻomi ʻi he tohi lēsoni ʻa e faiakó. ʻOku tokoni ʻa e nāunau fakalēsoní ke mahino kiate koe ʻa e folofolá, taumuʻa ʻo e kau faʻu tohi ʻo e folofola kuo ueʻi fakalaumālié, ngaahi tefitoʻi moʻoní mo e tokāteline tefito ʻo e fakauluí. Falala ki he kaveingá pea fakaʻaongaʻi ia ʻi ho lokiakó. |
ʻOku ʻuhinga hono fulihi ʻo e nāunau fakalēsoní ke ke fulihi ʻa e lēsoní ʻo fakatatau ki he fakahinohino ʻa e Laumālié koeʻuhí ke feau e ngaahi fie maʻu ʻa e fānau akó fakafoʻituitui pea ke tokoniʻi kinautolu ke maʻu ha ola ʻoku leleí. |
Ko Hono Fakaʻaongaʻi ʻo e Folofolá mo e Tohi Lēsoni ʻa e Faiakó ke Teuteu ha Lēsoni
ʻI hoʻo fakaʻaongaʻi lelei hoʻo tohi lēsoni ʻa e faiakó, te ke lava ʻo teuteu ha ngaahi lēsoni ʻoku langaki moʻuí ka ʻoku ʻikai fie maʻu ha taimi lahi ki hono teuteú.
Sio ʻi he foʻi vitiō “Vakai Fakalūkufua ki he Nāunau Fakalēsoní” (4:45), lava ke maʻu ʻi he LDS.org. ʻOku fakamatalaʻi fakanounou ʻe he foʻi vitiō ko ʻení ʻa e founga hono fakaʻaongaʻi fakataha hoʻo folofolá mo e tohi lēsoni ʻa e faiakó ke tokoni atu ke ke teuteu ha lēsoni lelei maʻá e fānau akó.
Sio ʻi he foʻi vitiō “Ko Hono Ngāue ʻAki ʻa e Ngaahi Folofolá mo e Tohi Lēsoni maʻá e Faiakó” (5:11), lava ke maʻu atu ki he LDS.org. ʻOku vahevahe ʻe Sisitā Uilisoni ʻi he foʻi vitioó ni ha faleʻi mahuʻinga kau ki hono fakaʻaongaʻi fakataha ʻo e folofolá mo e nāunau fakalēsoní ʻi he teuteu lēsoní. Lolotonga hoʻo sió, kumi ha ngaahi fakakaukau mahuʻinga ke manatuʻi ʻi hoʻo teuteu hoʻo ngaahi lēsoní.
ʻEkitivitī Teuteu ʻo e Lēsoní
Ko ho taimi ʻeni ke fakaʻaongaʻi hoʻo folofolá mo hoʻo tohi lēsoni ʻa e faiakó ke ke akoako teuteu ai ha lēsoni. Fakaava hoʻo tohi lēsoni ʻa e faiakó ki ha lēsoni pē pe fakaʻaongaʻi ʻa e laʻipepa tufa ʻoku ui ko e “Lēsoni Fakaangaanga—3 Nīfai 11:1–17” ʻa ia ʻoku ʻoatu ʻi he fakahokohoko fakamotuʻaleá ʻi he tohi lēsoni ko ʻení.
ʻI hoʻo fakakakato ʻa e ngaahi sitepu ko ʻení, fakaʻilongaʻi kinautolu ke fakahaaʻi kuó ke ʻosi fakakakato ʻa e konga ko ia ʻo hoʻo teuteú.
-
Lau ʻa e hingoa ʻo e lēsoní peá ke vakai ki hoʻo konga folofolá.
-
Lau ʻa e talateu ʻo e konga folofolá.
-
Fekumi ʻi he konga folofolá ʻaki hono lau, ako, fakalaulauloto, pea lotua ke maʻu ha ueʻi fakalaumālie.
-
Ako ʻa e sinoʻi lēsoní, tokanga ʻaupito ki he ngaahi fakamatala fakatokāteliné mo e tefitoʻi moʻoní.
-
Fakakaukau ki ha ngaahi fie maʻu ʻa hoʻo fānau akó peá ke fakapapauʻi ʻa e tefitoʻi moʻoni ʻoku nau fie maʻu lahi tahá.
-
Fakapapauʻi ko e hā hono lahi ʻo e fakamamafa te ke fai ki he ngaahi tefitoʻi moʻoni kehekehe, ʻo makatuʻunga ʻi he ngaahi fie maʻu hoʻo fānau akó.
-
Lau ha faʻahinga nāunau fakalahi naʻe ʻomi ʻi he lēsoní pea fakakaukauʻi ʻa e founga te ke fakaʻaongaʻi ai ʻa e nāunau ko ʻení ʻi hoʻo lēsoní.
Mateuteu ke aleaʻi ʻa e aʻusia ko ʻení mo hoʻo taki fakaakó pe kulupú.
Fakamatala Fakanounoú mo e Fakaʻaongaʻí
Ngaahi Tefitoʻi Moʻoni ke Manatuʻí
Ko e folofolá ʻa hoʻo maʻuʻanga tokoni ki he nāunau fakafaiakó pea ko e tohi lēsoni ʻa e faiakó ʻa hoʻo maʻuʻanga tokoni ki he teuteu hoʻo lēsoní.
-
ʻOku fokotuʻutuʻu ʻa e nāunau fakalēsoní ʻi ha founga ke tokoniʻi koe ke teuteu ke ola lelei mo ʻaonga e lēsoní.
-
Te ke lava ʻo ʻohi mai mo liliu ʻa e nāunau fakalēsoní ke feau e ngaahi fie maʻu ʻa e fānau akó.
-
ʻI hoʻo liliu e nāunau fakalēsoní, fakakaukauʻi fakalelei e ngaahi fie maʻu hoʻo fānau akó mo e ueʻi ʻa e Laumālie Māʻoniʻoní.
-
Te ke lava ʻo feau e ngaahi fie maʻu ʻa e fānau akó ʻi hoʻo teuteu e lēsoní mo fakaʻaongaʻi lelei e nāunau fakalēsoní.
“Ko kinautolu kuo ui ʻe he palōfitá ke fakapapauʻi ʻa e tonu ʻa e tokāteline naʻe akoʻi ʻi he Siasí ke ne vakaiʻi ʻa e foʻi lea kotoa pē, tā fakatātā kotoa pē, fakatātā kotoa pē ʻi he nāunau fakalēsoni ʻokú ke maʻú. Te tau lava fakaava ʻa e mālohi ʻo e naunau fakalēsoní, ʻi haʻatau ngāue ʻaki ʻetau tuí ʻa ia kuo ʻomi ʻe he ʻOtuá. …
“I he fai pau ki he kaveinga ʻo e nāunau fakalēsoní pea pehē ki hono hokohokó, te ne fakaʻatā ʻetau ngaahi meʻafoaki fakafaiako laulōtahá, pea he ʻikai taʻofi kinautolu” (Henry B. Eyring, “The Lord Will Multiply the Harvest” [an evening with Elder Henry B. Eyring, Feb. 6, 1998], 4, 5, si.lds.org).
“Ko ia, pea hā leva?”
Hiki ha ngaahi meʻa te ke fakahoko ʻo makatuʻunga ʻi he ngaahi tefitoʻi moʻoni kuó ke ako ʻi he ʻaho ní, ke fakaʻosiʻaki ʻa e aʻusia fakaako ko ʻení.