Aʻusia Fakaako Fika 3: Ko e Faiako mo Ako ʻaki e Laumālié
Aʻusia Fakaako Fika 3
Ko e Faiako mo Ako ʻaki e Laumālié
Vakai Fakalūkufuá
ʻOku fakamatalaʻi ʻe he aʻusia fakaakó ni ʻa e ngaahi tefitoʻi fakakaukau ko ʻení:
Ko e mahino ʻa e fatongia ʻo e Laumālie Māʻoniʻoní ʻi he akoʻí mo e akó
Ko hono feau ʻo e ngaahi fie maʻu ʻoku ʻiloʻi mo ʻikai ʻiloʻi, ʻa e kau akó
Ko hono fakaafeʻi e ivi tākiekina ʻo e Laumālie Māʻoniʻoní
Ngaahi Fakakaukau Mahuʻingá
Ko e Fatongia ʻo e Laumālie Māʻoniʻoní ʻi he Akoʻí mo e Akó
“ʻOku hoko ʻa e akoʻi mo hono ako ʻo e Ongoongoleleí, ʻo fakafou ʻi he mālohi ʻo e Laumālie Māʻoniʻoní. … Ko e faiako pē mo e ako ʻaki e Laumālié, ʻe toki mahino pea fakafalala ai ʻa e fānau akó ki he ngaahi akonaki mo e Fakalelei ʻa Sīsū Kalaisí, pea nau toki feʻunga ai ke maʻu ʻa e moʻui taʻengatá” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki i he Seminelí mo e ʻInisititiuti Fakalotú [2012], 15).
Ko e hā ʻOku Tau Faiako mo Ako ai ʻaki e Laumālié?
Kuo akoʻi ʻe Sisitā Kilisitina Paaka ʻa e semineli fakaʻahó ʻi Letingitoni ʻi Kalefōnia ʻi ha taʻu ʻe nima pea ʻoku kei feinga pē ke ne feau ʻa e ngaahi fie maʻu makehe mo e ngaahi tūkunga ʻo ʻene kau akó. Mamata ʻi he foʻi vitiō ko e “Studentsʻ Needs” (1:35), ʻoku maʻu ʻi he LDS.org. ʻOku vahevahe ʻe Sisitā Paaka ʻi he foʻi vitioó ni ʻene ngaahi fakaʻānaua ki heʻene kau akó pea mo e ngaahi meʻa foki ʻoku mafasia ai hono lotó mo ʻene fakakaukaú, ʻi heʻene feinga ke tokoniʻi ʻene kau akó ke nau aʻusia ha ului moʻoni ange ki he ongoongolelei ʻo Sīsū Kalaisí.
ʻĪmisi
kalasi seminelí
Hangē ko e ʻi ai ha kau ako ʻa Sisitā Paaka ʻoku kehekehe ʻenau ngaahi fie maʻú mo e ngaahi palopalemá, ʻe pehē foki mo koe. ʻOku fakafofongaʻi ʻe he ngaahi sīpinga ko ʻení ha ngaahi tūkunga angamaheni ʻo ha taha ako. Fakakaukau ki he founga ʻe ala hanga ai ʻe he tūkunga hoʻo kau akó ʻo faitokonia hono tataki ʻe he Laumālié hoʻo faiakó.
“ʻOku faʻa fakafemoʻuekinaʻi ʻaupito au ʻe he akó he taimi ʻe niʻihi. ʻOku lahi fau ʻeku ngaahi meʻa ke fai ʻi he ngaahi kalasi kehé.”
“ʻOfa pē te u lava ʻo tokanga ʻi he kalasí he ʻahó ni. ʻOku ʻikai ke u fuʻu laukonga lelei fēfē pea ʻoku faingataʻa ke u tokanga.”
“ʻOku ou feohi mo ha kakai tokolahi ʻaupito, ka ʻoku ou kei ongoʻi taʻelata pē.”
“ʻOku ou fiefia ke ʻi heni ʻi he seminelí—fāifai pea ʻi ai ha potu ʻoku ou ongoʻi ʻoku tali ai au.”
“ʻOku ʻikai ke u ʻiloʻi pe ʻoku totonu ke u ʻi heni ʻi he ʻahó ni. Kuó u fai ha ngaahi meʻa ʻoku ou mā ai.”
“ʻOku ou ongoʻi ʻo hangē ko au pē taha ʻi he fāmilí ʻoku ʻikai ke ʻi ai haʻaku fakamoʻoní.”
Kapau te tau fakafalala ʻataʻatā pē ki he meʻa ʻoku tau lavá, he ʻikai ke tau lava ʻo tokoniʻi kotoa e ngaahi fie maʻu makehe ʻa ʻetau kau akó. Neongo ia, kapau ʻoku tau mateuteu mo muimui ki he ueʻi ʻa e Laumālie Māʻoniʻoní, ʻe tataki kitautolu ke tau faiako ʻi ha founga te ne fakaloloto ai e ului ʻa ʻetau kau akó mo tokoni ke feau ʻa ʻenau ngaahi fie maʻu ʻoku ʻiloʻí mo ʻikai ʻiloʻí.
Mamata ʻi he foʻi vitiō “Teaching by the Spirit” (1:39), ʻoku maʻu ʻi he LDS.org. ʻOku vahevahe ʻe Sisitā Paaka ʻi he foʻi vitioó ni hono mahuʻinga e tataki ia ʻe he Laumālié ʻi heʻene fakahoko e akoʻí.
Hokó, mamata ʻi he foʻi vitiō “The Lord Knows Every Need” (0:45), ʻoku maʻu ʻi he LDS.org. ʻOku fakamatalaʻi ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he foʻi vitiō ko ʻení, ʻa e founga ʻe lava ai ʻa e Laumālie Māʻoniʻoní ʻo tataki koe ke feau e ngaahi fie maʻu hoʻo kau akó.
ʻEkitivitī ʻo e Tohi Tuʻutuʻuni Ko Hono Akoʻi mo Ako ʻo e Ongoongoleleí
ʻĪmisi
handbook cover
“ʻOku hoko ʻa e faiako mo e ako ʻaki e Laumālié ʻi he taimi ʻoku fakahoko ai ʻe he Laumālie Māʻoniʻoní ʻa Hono fatongiá pe ngāue ki he faiakó, pe ko e fānau akó, pe kiate kinaua fakatouʻosi” (Ko Hono Akoʻi mo Ako ʻo e Ongoongoleleí,15).
ʻOku tokoni ʻa e tohi tuʻutuʻuni Ko Hono Akoʻi mo Ako ʻo e Ongoongoleleí ke fakamahinoʻi mo fakaloloto ange ʻa e mahino ʻoku tau maʻu ki he ʻuhinga kuo pau ai ke akoʻi mo ako ʻa e kau faiakó mo e kau akó ʻi he mālohi ʻo e Laumālie Māʻoniʻoní. Ako ʻa e konga 2.1 (“Faiako mo Ako ʻi he Laumālié”) ʻi he peesi 15 ki he ngataʻanga ʻo e lisi ʻoku fakaʻilongaʻi ʻi he peesi 16.
Hiki ʻi hoʻo tohi tuʻutuʻuní ʻa e ngaahi tefitoʻi moʻoni mahuʻinga pea mo e ngaahi founga ʻe tokoni atu ke ke fai ʻa e ngaahi meʻa ko ʻení:
Fakatokangaʻi ange ʻoku toki hoko pē akoʻi mo hono ako ʻo e ongoongoleleí ʻi he mālohi ʻo e Laumālie Māʻoniʻoní.
Fakaloloto e mahino ʻokú ke maʻu ki he ngaahi fatongia mo e ngāue ʻa e Laumālie Māʻoniʻoní ʻi hono akoʻi mo ako ʻo e ongoongoleleí.
Fakamatalaʻi ʻi hoʻo tohinoa fakatāutahá, ʻa e founga ʻe tokoniʻi ai ʻe he mahino mo e tui ki he fatongia ʻo e Laumālie Māʻoniʻoní ʻa e founga hoʻo teuteu e lēsoní mo hoʻo akoʻi hoʻo kau akó.
Ko Hono Fakaafeʻi ʻo e Laumālié ke Ne Fakahoko Hono Fatongiá
Ko e taimi ʻoku mahino ai kiate kitautolu e fatongia ʻo e Laumālie Māʻoniʻoní ʻi hono akoʻi mo ako ʻo e ongoongoleleí, te tau fai ʻa e meʻa kotoa te tau lavá ke fakaafeʻi Ia ke Ne fakahoko Hono fatongia ʻi heʻetau moʻuí pea mo e moʻui ʻa ʻetau kau akó (vakai, Ko Hono Akoʻi mo Ako ʻo e Ongoongoleleí, konga 2.1 [“Faiako mo Ako ʻi he Laumālié”], peesi 16).
ʻE lava ke fakahoko ʻeni ʻe he kau faiakó ke fakaafeʻi ʻa e Laumālié ke Ne fakahoko Hono fatongiá:
Feinga ke tukutaha e tokangá ʻi he aʻusia fakaako ʻa ʻenau kau akó.
Feinga ke nonga kae ʻoua ʻe ongoʻi taʻefiemālie mo hohaʻa ki ha ngaahi meʻa kehe.
Fehuʻi ʻi he laumālie fakatōkilalo.
Poupouʻi e fānau akó ke nau fakaafeʻi e Laumālie Māʻoniʻoní ki heʻenau ngaahi aʻusia fakaakó.
Mamata ʻi he foʻi vitiō “Inviting the Spirit: Teachers” (2:47), ʻoku maʻu ʻi he LDS.org. ʻOku vahevahe ʻe he kau faiakó ʻi he foʻi vitioó ni ʻa e meʻa te nau lava ʻo fai ke fakaafeʻi ai ʻa e Laumālié ki honau lotó pea ki he lokiakó. Hiki ha fanga kiʻi fakamatala ʻi hoʻo tohi tuʻutuʻuni Ko Hono Akoʻi mo Ako ʻo e Ongoongoleleí fekauʻaki mo hono mahuʻinga ʻo e ngaahi ngāue ʻokú ke loto ke manatuʻí, ʻi hoʻo mamata ʻi he foʻi vitioó.
ʻE lava ke fakahoko ʻeni ʻe he kau faiakó ke fakaafeʻi ʻa e Laumālié ke Ne fakahoko Hono fatongiá:
Lautohi mo faiako mei he folofolá mo e ngaahi lea ‘a e kau palōfitá.
Fakatefito he Fakamoʻuí e ngaahi sīpingá mo e ngaahi fealēleaʻakí pea fakamoʻoni ‘o kau kiate Ia.
Fakamatalaʻi mahinongofua mo mahino ‘a e tokāteliné mo e ngaahi tefitoʻi moʻoni ʻo e ongoongoleleí.
Fakaʻaongaʻi ha taimi ke fakakaukau ai ‘i he fakalaulauloto, lolotonga ha kiʻi taimi fakalongolongo fakalaumālie.
Fevahevahe‘aki ha ngaahi me‘a lelei ne hoko fakafo‘ituitui, pea fakamo‘oni kau ki he tokāteliné mo e ngaahi tefito‘i mo‘oní.
Fakahā ‘a e fe‘ofa‘aki mo e fefakahounga‘aki ‘iate kinautolu, pea ki he ‘Eikí foki.
Mamata ʻi he foʻi vitiō “Inviting the Spirit: Teachers and Students” (2:23), ʻoku maʻu ʻi he LDS.org. ʻOku vahevahe ʻe he kau faiakó mo e fānau akó ʻi he foʻi vitioó ni ʻa e meʻa te nau lava ʻo fai ke fakaafeʻi ai ʻa e Laumālié ki honau lotó pea ki he lokiakó. Hiki ha fanga kiʻi fakamatala ʻi hoʻo tohi tuʻutuʻuni Ko Hono Akoʻi mo Ako ʻo e Ongoongoleleí fekauʻaki mo hono mahuʻinga ʻo e ngaahi ngāue ʻokú ke loto ke manatuʻí, ʻi hoʻomou mamata ʻi he foʻi vitioó.
Lekooti ʻi hoʻo tohinoa fakatāutahá ha ngaahi ongo pe ngāue kuo hā mai ki ho ʻatamaí ʻi hoʻo fakakaukauʻi e founga te ke lava ai mo hoʻo kau akó ʻo fakaafeʻi e Laumālie Māʻoniʻoní ke fakahoko Hono fatongia ʻi hono akoʻi mo ako ʻo e ongoongoleleí.
“ʻOku hoko ʻa e faiako mo e ako ʻaki e Laumālié ʻi he taimi ʻoku fakahoko ai ʻe he Laumālie Māʻoniʻoní ʻa Hono fatongiá pe ngāue ki he faiakó, pe ko e fānau akó, pe kiate kinaua fakatouʻosi” (Ko Hono Akoʻi mo Ako ʻo e Ongoongoleleí,15).
ʻE lava ke tataki koe ʻi hoʻo tokanga ki he ngaahi ueʻi fakalongolongo ʻa e Laumālié, ke ke tokoni ʻi hono feau e ngaahi fie maʻu ʻoku ʻiloʻi mo ʻikai ʻiloʻi ʻa e kau akó.
“Ko ʻene mahino pē kiate koe mo hoʻo kau akó ʻa e fatongia mahuʻinga ʻo e Laumālie Māʻoniʻoní ʻi he ako fakalaumālié, [te nau] fai leva e meʻa kotoa pē ke fakaafeʻi ʻaki e Laumālié ke Ne fakahoko e ngaahi fatongiá ni.”
ʻĪmisi
Palesiteni Dieter F. Uchtdorf
He ʻikai lava ha ako taʻe ʻi ai ʻa e fakaake ʻa e Laumālié mei langi. … ʻI he ʻuhingá ni, kuo pau ke ke akoʻi ʻa e ongoongoleleí ‘ʻaki ʻa e Laumālié, ʻa ia ko e Fakafiemālie naʻe fekauʻi mai ke akoʻi ʻa e moʻoní’ [T&F 50:14] “(Dieter F. Uchtdorf, ”A Teacher of God’s Children” [evening with President Dieter F. Uchtdorf, Jan. 28, 2011], 7, si.lds.org).
“Ko ia, Pea hā Leva?”
Hiki ha ngaahi meʻa te ke fakahoko ʻo makatuʻunga ʻi he ngaahi tefitoʻi moʻoni kuó ke ako ʻi he ʻaho ní, ke fakaʻosi ʻaki ʻa e aʻusia fakaako ko ʻení.