Human gilatos, si Pedro ug Juan nagpadayon sa pagtudlo diha sa ngalan ni Kristo ngadto sa katawhan.
Lagmit imong mahinumdoman ang pagkat-on mahitungod sa hugot nga pagtuo ug kakugi ni Apostol Pedro diha sa imong pagtuon sa unang katunga nga bahin sa Bag-ong Tugon. Ang unang epistola ni Pedro gisulat ngadto paingon na sa kataposang kinabuhi ni Pedro, daghang mga katuigan human siya milakaw ug nakigsulti ni Jesukristo panahon sa buhing pagpangalagad sa Manluluwas. Sa iyang unang epistola, si Pedro, kinsa mao ang pangulong Apostol, mitutok sa mga paagi nga makapalig-on sa mga Santos diha sa grabe nga mga pagsulay nga ilang nasinati sa mga kamot sa mga Romano. Kini nga leksiyon makatabang kanimo nga mas makasabot sa mga katuyoan sa Dios sa pagtugot kanimo nga makasinati og mga pagsulay ug makapalig-on sa imong determinasyon aron makalahutay sa mga pagsulay nga matinud-anon.
Nganong makasinati kita og mga kalisdanan sa kinabuhi?
Si Elder Dale G. Renlund sa Korum sa Napulog Duha ka Apostoles mipasabot sa unsang paagi nga kitang tanan makabaton og mga kasinatian nga daw dili patas. Tan-awa ang bidyo nga “Makapungot nga Pagkadili Makiangayon,” anaa sa ChurchofJesusChrist.org, gikan sa time code nga 3:19 hangtod sa 4:12, o basaha ang mosunod nga pamahayag:
Imahe
Opisyal nga hulagway ni Elder Dale G. Renlund sa Korum sa Napulog Duha ka Apostoles, Enero 2016.
Ang uban nga pagkadili makiangayon dili mapasabot; ang dili ikapasabot nga pagkadili makiangayon makapungot. Ang pagkadili makiangayon magagikan sa pagpakabuhi sa lawas nga dili perpekto, naangol, o adunay sakit. Ang kinabuhi aduna gayoy pagkadili makiangayon. Ang ubang tawo natawo sa kabuhong; ang uban wala. Ang uban adunay mahigugmaong mga ginikanan; ang uban wala. Ang uban taas og kinabuhi; ang uban mubo ra. Ug may daghan pa niini. Ang uban mohimo og makadaot nga mga sayop bisan og naningkamot sila sa paghimo og maayo. Ang uban maningkamot sa pagwagtang sa pagkadili makiangayon kutob sa ilang mahimo. Makapasubo lang, ang ubang mga tawo mogamit sa hinatag sa Dios nga kabubut-on sa pagpasakit sa uban nga dili unta nila angayang buhaton.
Ngano sa imong hunahuna nga gigamit ni Elder Renlund ang pulong nga “makapungot” aron paghulagway sa pipila sa dili makiangayong mga butang nga atong nasinati sa kinabuhi?
Kinsa ang imong nailhan nga nagsinati o nakasinati og usa ka pagsulay nga mibati og kapungot sa pagkadili makiangayon? Ngano sa imong hunahuna ang Ginoo nagtugot niini nga mahitabo?
Sa AD 64, dagkong mga bahin sa siyudad sa Roma ang naguba sa sunog. Ang inila nga mga Romano namasangil nga ang mga miyembro sa Simbahan maoy nagsugod sa sunog, diin nagdala ngadto sa labing lisod nga pagsilot sa mga Kristiyanos sa tibuok Imperyo sa Roma. Si Pedro lagmit misulat sa iyang unang epistola panahon human niini nga hitabo aron mapalig-on ang hugot nga pagtuo sa mga Santos ug aron sa pagpahinumdom kanila sa ilang mahangtorong ganti alang sa paglahutay sa mga pagsulay nga matinud-anon. Diha sa imong pagtuon, hatagig pagtagad ang mga pangaghat sa Espiritu Santo nga mahimong makatabang kanimo nga makasabot sa pipila ka mga rason alang sa imong kaugalingong mga pagsulay ug sa unsang paagi ka makasalig kang Jesukristo aron matabangan ka nga matinud-anong makalahutay niini.
Ang kalayo sa magtutunaw
Basaha ang 1 Pedro 1:3–9, nga mangita kon unsa ang gitudlo ni Apostol Pablo mahitungod sa mga panalangin nga naghulat alang niadtong matinud-anong milahutay sa ilang mga pagsulay. Ang pulong nga mga pagsulay diha sa bersikulo 6 nagpasabot sa mga pagsulay ug mga kasakit (tan-awa sa 1 Pedro 1:6).
Unsa nga mga pulong o mga hugpong sa pulong gikan niini nga mga bersikulo ang sa imong hunahuna mahimong makatabang nga hinumdoman sa higayon nga ikaw o ang uban makasinati og mga pagsulay? Ngano man?
Ngano sa imong hunahuna nga si Pedro mitandi sa pagsulay sa hugot nga pagtuo sa mga Santos ngadto sa bulawan nga gitunaw sa kalayo?
Ang mosunod mao ang usa ka hulagway sa usa ka tunawan. Ang usa ka tunawan mao ang sudlanan diin ang mga metal sama sa bulawan himoong putli. Sa higayon nga ang mga metal himoong putli, sila initon ug tunawon aron matangtang ang mga hugaw ug mas mamaayo ang kataposang produkto.
Imahe
Paghulaway sa usa ka tunawan nga adunay gitunaw nga mga puthaw nga gibubo ngadto sa usa ka hulmahan
Sa unsang mga paagi lagmit nga ang pagsulay, o pagsusi, makapahimo sa hugot nga pagtuo nga “bililhon pa kaysa bulawan”? (1 Pedro 1:7).
Usa ka kamatuoran nga mahimong maila gikan niini nga mga bersikulo nga bag-o lang nimong natun-an mao nga samtang kita matinud-anong molahutay sa mga pagsulay, ang atong hugot nga pagtuo kang Jesukristo maputli ug malig-on. Ikonsiderar ang pagrekord niini nga kamatuoran diha sa imong mga kasulatan o sa journal sa pagtuon.
Unsay anaa diha sa pagsinati og lisod nga mga pagsulay nga mahimong makapalig-on sa atong hugot nga pagtuo kang Jesukristo?
Samtang ang pagsinati og kalisdanan mahimong makapaputli sa espirituhanon alang sa daghang mga tawo, adunay uban nga nahimong pait o nagmagahi sa ilang kasingkasing human sa usa ka lisod nga pagsulay (tan-awa ang Alma 62:41).
Unsa sa imong hunahuna ang makatabang kanato sa paghimo sa atong mga pagsulay nga mga panalangin kaysa sa mga kasinatian nga makapawala sa atong hugot nga pagtuo?
Unsang mga kasinatian ang imong naagian, o unsa nga mga kasinatian ang imong nahibaloan, diin ang imong hugot nga pagtuo o hugot nga pagtuo sa uban gipalig-on pinaagi sa matinud-anong paglahutay sa lisod nga mga pagsulay?
Unsa ang gitudlo kanimo niini nga mga kasinatian mahitungod sa Ginoo?
Tan-awa ang bidyo nga “Ang Kalayo sa Magtutunaw [The Refiner’s Fire]” (5:02), anaa sa ChurchofJesusChrist.org, aron makita ang usa ka ehemplo sa usa ka tawo kinsa napalig-on sa Manluluwas samtang siya matinud-anong milahutay sa iyang mga pagsulay.
Si Pedro nagtambag sa mga Santos
Usa ka tema nga nakaplagan sa tibuok nga unang sulat ni Pedro mao ang unsaon sa mga disipulo ni Jesukristo paglahutay nga matinud-anon sa pag-antos ug pagpanggukod. Ang tambag ni Pedro makahatag og paglaom, pagdasig, ug paglig-on kang bisan kinsa nga nakasinati og pagsulay sa kinabuhi.
1. Kompletoha ang mosunod nga kalihokan diha sa imong journal sa pagtuon:
Pagdrowing og usa ka yanong hulagway sa usa ka tunawan, sama sa unsa nga imong nakita bag-ohay lang sa leksiyon. Sulod sa tunawan, paglista og pipila sa mga pagsulay ug mga kasakitan nga imong nasinati o kasamtangang gisinati.
Diha sa imong pagtuon pa gayod sa mga pulong ni Pedro, pangita sa mga pagtulun-an nga mahimong makatabang kanimo sa mga pagsulay nga imong gilista sa imong hulagway. Irekord kini nga mga pagtulun-an sa gawas sa imong hulagway sa usa ka tunawan.
Pagpili og labing menos sa duha sa mosunod nga mga set sa mga bersikulo aron tun-an diha sa imong pagpangita og mga baroganan nga imong madugang sa imong hulagway. Sa imong pagbuhat sa ingon, pamalandongi ang mosunod nga pangutana: Sa unsang paagi nga kining mga pagtulun-an makatabang kanako o sa usa ka tawo nga nagsinati og usa ka lisod nga pagsulay?
1 Pedro 2:20–25—Ang ehemplo ni Jesukristo sa paglahutay sa mga pagsulay
1 Pedro 4:12–19—Mga rason sa paglipay diha sa atong mga pagsulay
1 Pedro 5:6–11—Pagdawat sa paglig-on sa Ginoo aron makalahutay sa atong mga pagsulay
Opsiyonal: Gustong Makakat-on pa og Dugang?
1 Pedro 2:20. Nganong nagtudlo man si Pedro nga kita angay nga moantos sa atong mga pagsulay nga mapailubon?
Si Elder Neal A. Maxwell (1926–2004) sa Korum sa Napulog Duha ka Apostoles mitudlo sa mosunod:
Imahe
Kataposang opsiyal nga litrato ni Elder Neal A. Maxwell, 1992.
Ang pagpailob hugot kaayo nga nabugkos sa hugot nga pagtuo ngadto sa atong Langitnong Amahan. Sa pagkatinuod, kon kita hilabihan … ka dili mapailobon, nagsugyot kita nga kita nasayod kon unsay pinakamaayo–labaw pa ka maayo kay sa Dios. O, sa dili mokubos, atong ipamugos nga ang atong tagal sa panahon mas labaw pa ka maayo kay sa Iya. … Nan, ingon sa gipakita nga, ang pailob mao ang importanteng mortal nga hiyas nga may kalabotan sa atong hugot nga pagtuo, atong kagawasan sa pagpili, atong kinaiya ngadto sa kinabuhi, atong pagkamapaubsanon, ug atong pag-antos. .… Walay laing paagi alang sa tinuod nga paglambo nga mahitabo.
(Neal A. Maxwell, “Patience” [Debodsyonal sa Brigham Young University, Nob. 27, 1979], 1, 4, speeches.byu.edu)
Unsaon nako pagbuntog ang mga pagsulay nga akong giatubang?
Si Elder Neil L. Andersen sa Korum sa Napulog Duha ka Apostoles mitudlo sa mosunod:
Imahe
Opisyal nga hulagway ni Elder Neil L. Andersen sa Korum sa Napulog Duha ka Apostoles, 2010, Agosto.
Sa panglimbasog sa yutan-ong mga pagsulay, nga nagmapailobon sa pagpadayon, ang makaayo nga gahom sa Manluluwas magdala og kahayag, panabot, kalinaw, ug paglaom. Pag-ampo sa tibuok ninyong kasingkasing. Lig-ona ang inyong pagtuo kang Jesukristo, diha sa Iyang reyalidad, sa Iyang grasya. … Tan-aw sa unahan. Ang inyong mga problema ug mga kasub-anan anaa gayod, apan dili kini hangtod sa hangtod. Molabay ra ang adlaw ninyong mangitngit, tungod kay “ang Anak … [mibangon] uban ang pang-ayo diha sa Iyang mga pako.
(Neil L. Andersen, “Nasamdan,” Liahona, Nob. 2018, 86)
Unsaon nako pagkaplag og kalipay samtang nag-antos taliwala sa mga pagsulay?
Si Elder Jospeh B. Wirthin (1917–2008) sa Korum sa Napulog Duha ka Apostoles namulong mahitungod sa pagkaplag og kalipay panahon sa kalisdanan ug paghinumdom sa tambag sa iyang inahan nga nagkanayon, “Bisan unsa ang mahitabo, ug higugmaa kini.”
Imahe
Kataposang opisyal nga hulagway ni Elder Joseph B. Wirthlin sa Korum sa Napulog Duha ka Apostoles, 2004. Namatay sa Disyembre 1, 2008.
Unsaon nato pagdawat ang mga adlaw nga puno sa kasubo? Dili kita makahimo—dili gayod niini nga higayon. Wala ako magtuo nga ang akong inahan nagsugyot nga atong pugngan ang pagkawalay kadasig o paglimud sa pagkatinuod sa kasakit. Wala ako magtuo nga siya nagsugyot nga atong tabunan ang dili maayo nga mga kamatuoran ilawom sa usa ka nagpaka-aron ingnong kalipay. Apan ako nagtuo nga ang paagi sa atong pagsumbalik sa kalisdanan mahimong usa ka dakong hinungdan kon unsa kita ka malipayon ug kamalamposon niini nga kinabuhi. Kon atong atubangon ang mga kalisdanan nga maalamon, ang atong labing lisod nga mga panahon mahimong mga panahon sa labing paglambo diin mahimong modala ngadto sa mga panahon sa dakong kalipay. …
Samtang kita nangita og kataw-anan, pangitaa ang mahangtorong panglantaw, sabta ang baroganan sa pagbalos, ug paduol ngadto sa atong Langitnong Amahan, kita makalahutay sa kalisod ug pagsulay. Kita makasulti, sama sa gibuhat sa akong inahan, “Bisan unsa ang mahitabo, ug dawata kini. Kita makaingon, sama sa akong inahan, “bisan unsa ang mahitabo, ug higugmaa kini.”