ថែស្សាឡូនីច ទី១ ៤–៥
ពេលវេលាដែលព្រះគ្រីស្ទនឹងយាងមកផែនដីវិញ ។
តើមានសំណួរ ឬគំនិតអ្វីខ្លះចូលមកក្នុងចិត្តរបស់អ្នក ពេលអ្នកគិតអំពីការយាងមកជាលើកទីពីររបស់ព្រះយេស៊ូវគ្រីស្ទ ? នៅក្នុងសំបុត្រទីមួយរបស់លោកទៅកាន់ក្រុងថែស្សាឡូនីច ជំពូកទី ៤–៥សាវកប៉ុលបានបង្រៀនព័ត៌មានលម្អិតសំខាន់ៗអំពីការយាងមកជាលើកទីពីររបស់ព្រះអង្គសង្គ្រោះ និងរបៀបដែលយើងអាចរៀបចំសម្រាប់ការយាងមកជាលើកទីពីរនេះ ។ មេរៀននេះមានគោលបំណងជួយអ្នកឲ្យយល់អំពីអ្វីដែលនឹងកើតឡើង និងរបៀបដែលអ្នកអាចរៀបចំសម្រាប់ពេលវេលាដែលព្រះយេស៊ូវគ្រីស្ទយាងត្រលប់មកផែនដីវិញ ។
សំណួរនានាអំពីការយាងមកជាលើកទីពីររបស់ព្រះយេស៊ូវគ្រីស្ទ
សូមចំណាយពេលបន្តិចដើម្បីមើលរូបភាពនៅខាងដើមនៃមេរៀន រួចគិតអំពីចម្លើយរបស់អ្នកចំពោះសំណួរខាងក្រោម ៖
-
តើមានរឿងអ្វីខ្លះ ដែលអ្នកដឹងថានឹងកើតឡើង អំពីការយាងមកជាលើកទីពីររបស់ព្រះយេស៊ូវគ្រីស្ទ ?
-
តើមានរឿងអ្វីខ្លះ ដែលអ្នកមិនដឹង ?
ពួកបរិសុទ្ធក្រុងថែស្សាឡូនីចក៏មានសំណួរអំពីការយាងមកជាលើកទីពីររបស់ព្រះអង្គសង្គ្រោះដែរ ។ ដោយផ្អែកលើការបង្រៀនរបស់ប៉ុលនៅក្នុងជំពូកទាំងនេះ ពួកគេអាចនឹងសួរសំណួរដូចជា « តើនៅពេលណាដែលមនុស្សជាទីស្រឡាញ់របស់យើងដែលបានស្លាប់នឹងរស់ឡើងវិញ ? » ឬ « តើការយាងមកជាលើកទីពីររបស់ព្រះយេស៊ូវគ្រីស្ទនឹងកើតឡើងនៅពេលណា ? » ឬ « តើយើងអាចរៀបចំខ្លួនសម្រាប់ការយាងមកជាលើកទីពីររបស់ព្រះយេស៊ូវគ្រីស្ទដោយរបៀបណា ? » អ្នកប្រហែលជាធ្លាប់មានសំណួរស្រដៀងគ្នានេះដែរ ។ សកម្មភាពសិក្សាខាងក្រោមដោះស្រាយសំណួរទាំងនេះ ។
១. សូមជ្រើសរើសសកម្មភាពសិក្សាខាងក្រោមយ៉ាងតិចណាស់ចំនួនពីរដើម្បីបញ្ចប់មេរៀនថ្ងៃនេះ ។ សូមធ្វើតាមការណែនាំសម្រាប់សកម្មភាព ដែលអ្នកជ្រើសរើស ។
សកម្មភាពសិក្សាទី ១ ៖ តើនឹងមានអ្វីកើតឡើងចំពោះមនុស្សរស់ និងមនុស្សស្លាប់នៅឯការយាងមកជាលើកទីពីររបស់ព្រះយេស៊ូវគ្រីស្ទ ?
សូមអាន ថែស្សាឡូនីច ទី១ ៤:១៣–១៨ ដោយស្វែងរកការយល់ដឹងអំពីអ្វីដែលនឹងកើតឡើងចំពោះមនុស្សសុចរិត នៅពេលព្រះយេស៊ូវយាងមកម្តងទៀត ។ ចូរកំណត់ចំណាំពីភាពខុសគ្នារវាងអ្វីដែលនឹងកើតឡើងចំពោះអស់អ្នកដែលបានស្លាប់ និងអ្នកដែលនៅរស់ នៅឯការយាងមកជាលើកទីពីរ ។ ( ពាក្យ « ដេកលក់ » និង « ដេក » នៅក្នុងខគម្ពីរទាំងនេះសំដៅទៅលើអ្នកដែលបានស្លាប់ ) ។ វាអាចនឹងមានប្រយោជន៍ក្នុងការអានការបកប្រែរបស់ យ៉ូសែប ស្ម៊ីធ នៃ ថែស្សាឡូនីច ទី១ ៤:១៥, ១៧ ( នៅក្នុង ខទី ១៥,, និង ខទី ១៧, ) ។
-
តើនៅក្នុងខគម្ពីរទាំងនេះមានអ្វីដែលសំខាន់ចំពោះអ្នក ?
បន្ទាប់មក សូមអាន គោលលទ្ធិ និងសេចក្តីសញ្ញា ៨៨:៩៦–៩៨ដោយស្វែងរកការយល់ដឹងបន្ថែមអំពីព្រឹត្តិការណ៍ទាំងនេះ ។ ( អ្នកក៏ប្រហែលជាចង់អាន ខទី ៩៩–១០១ ដើម្បីរៀនអំពីអ្វីដែលនឹងកើតឡើងចំពោះអស់អ្នកដែលមិនទទួលយកព្រះយេស៊ូវគ្រីស្ទនៅក្នុងជីវិតនេះទេ ) ។
-
តើអ្នកបានទទួលការយល់ដឹងបន្ថែមទៀតអ្វីខ្លះ ?
សេចក្តីពិតមួយដែលអ្នកអាចរកឃើញនោះគឺ ពួកបរិសុទ្ធដ៏ស្មោះត្រង់ដែលបានស្លាប់មុនការយាងមកជាលើកទីពីរនឹងបានរស់ឡើងវិញនៅពេលដែលព្រះគ្រីស្ទយាងមកម្តងទៀត ។
ពាក្យ « បានជួបជុំ » ( ថែស្សាឡូនីច ទី១ ៤:១៧ ) សំដៅលើមនុស្សសុចរិតដែលរួមគ្នាដើម្បីទៅជួបព្រះអង្គសង្គ្រោះនៅពេលទ្រង់យាងមក ។ គ្រិស្តបរិស័ទជាច្រើនប្រើពាក្យ rapture ( មកពីពាក្យឡាតាំងដែលមានន័យថា « បានជួបជុំ » ) នៅពេលសំដៅទៅលើពេលវេលានេះ ។
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានចែកចាយដូចខាងក្រោមអំពីព្រឹត្តិការណ៍ដ៏ពិសិដ្ឋនេះ ៖
យើងនិយាយអំពីព្រះគ្រីស្ទ
អែលឌើរអាន់ឌើរសិនលើកទឹកចិត្តយើងឲ្យរៀនបន្ថែមទៀតអំពីព្រះអង្គសង្គ្រោះ ហើយនិយាយអំពីទ្រង់នៅគេហដ្ឋាន ព្រះវិហារ នៅលើបណ្តាញសង្គម និងនៅក្នុងការសន្ទនាប្រចាំថ្ងៃរបស់យើង ។
គ្មានអ្វីដែលជំរុញបំណងខ្ញុំក្នុងការនិយាយអំពីព្រះគ្រីស្ទ ច្រើនជាងការស្រមៃគិតអំពីការយាងត្រឡប់មកវិញរបស់ទ្រង់នោះឡើយ ។ ខណៈដែលយើងមិនដឹងថាទ្រង់នឹងយាងមកនៅពេលណា តែព្រឹត្តិការណ៍នៃការយាងត្រឡប់របស់ទ្រង់នឹងមានភាពអស្ចារ្យ ! ទ្រង់នឹងយាងមកលើពពកនៅលើមេឃដ៏មហស្ចារ្យ និងសិរីរុងរឿងជាមួយពួកទេវតាបរិសុទ្ធរបស់ទ្រង់ទាំងអស់ ។ មិនត្រឹមតែទេវតាពីរបីអង្គប៉ុណ្ណោះទេ ប៉ុន្តែជាទេវតាបរិសុទ្ធរបស់ទ្រង់ ទាំងអស់ ។ គ្មានរូបចេរូប៊ីនពណ៌ក្រហមដែលគូរដោយវិចិត្រករ រ៉ាហ្វ៊ែល ដែលយើងទាំងអស់គ្នាបានឃើញនៅលើកាតនៃក្តីស្រឡាញ់របស់យើងនោះទេ ។ ទាំងនេះគឺជាពួកទេវតានៃសតវត្សរ៍ ជាពួកទេវតាដែលបានបញ្ជូនឲ្យមកបិទមាត់សិង្ហទាំងអស់ បើកទ្វារគុក ដើម្បីប្រកាសកំណើតដែលរង់ចាំជាយូរមក ដើម្បីលួងលោមទ្រង់នៅសួនច្បារគែតសេម៉ានី ដើម្បីធានាដល់ពួកសិស្សនៅឯការយាងឡើងរបស់ទ្រង់ និងដើម្បីបើកការស្តារឡើងវិញនៃដំណឹងល្អ ។
តើបងប្អូនអាចស្រម៉ៃថាត្រូវបាននាំទៅជួបទ្រង់ មិនថានៅវាំងននខាងនេះ ឬខាងនោះដែរឬទេ ? នោះគឺជាសេចក្ដីសន្យារបស់ទ្រង់ចំពោះពួកសុចរិត ។ បទពិសោធន៍ដ៏អស្ចារ្យនេះ គូសចំណាំដល់ព្រលឹងយើងជារៀងរហូត ។
( នែល អិល អាន់ឌើរសិន « We Talk of Christ » Liahona ខែ វិច្ឆិកា ឆ្នាំ ២០២០ ទំព័រ ៩១ )
ប្រសិនបើអ្នកជ្រើសរើសសកម្មភាពសិក្សានេះ សូមកត់ត្រាចម្លើយរបស់អ្នកចំពោះសំណួរខាងក្រោម ៖
សូមចំណាយពេលខ្លះដើម្បីស្រមៃមើលថា តើវាមានសភាពបែបណាក្នុងការរាប់ចូលក្នុងចំណោមមនុស្សសុចរិតនៅពេលព្រះអង្គសង្គ្រោះយាងមក ។
-
តើអ្នកអាចមានគំនិត ឬអារម្មណ៍បែបណានៅថ្ងៃនោះ ? តើអ្នកមានអារម្មណ៍យ៉ាងណាពេលដឹងថា ព្រះអង្គសង្គ្រោះចង់ឲ្យអ្នកចូលរួមជាមួយទ្រង់ នៅពេលទ្រង់យាងមក ? តើការស្រមៃឃើញពីថ្ងៃអនាគតនោះវាមានឥទ្ធិពលយ៉ាងណាចំពោះអ្នកនៅថ្ងៃនេះ ?
នៅក្នុង ថែស្សាឡូនីច ទី១ ៤:១៨ ប៉ុលបានលើកទឹកចិត្តពួកបរិសុទ្ធឲ្យ « ចូរកំសាន្តចិត្តគ្នាទៅវិញទៅមក ដោយដំណើរនេះចុះ » ។
-
តើការបង្រៀនរបស់ប៉ុលផ្ដល់ការកំសាន្តចិត្តដល់អ្នកយ៉ាងដូចម្ដេច ? តើការបង្រៀនទាំងនោះអាចផ្ដល់ការកំសាន្តចិត្តក្នុងកាលៈទេសៈដែលអ្នកអាចប្រឈមមុខនាពេលអនាគតដោយរបៀបណា ?
សកម្មភាពសិក្សាទី ២ ៖ តើការយាងមកជាលើកទីពីររបស់ព្រះយេស៊ូវគ្រីស្ទនឹងកើតឡើងនៅពេលណា ?
តើអ្នកធ្លាប់ឆ្ងល់ទេថា តើពេលណាដែលការយាងមកជាលើកទីពីររបស់ព្រះយេស៊ូវគ្រីស្ទនឹងកើតឡើង ឬតើអ្នកនឹងត្រូវរៀបចំខ្លួនរួចរាល់ដែរឬទេ ? ពួកបរិសុទ្ធនៅថែស្សាឡូនីច ទំនងជាមានសំណួរដូចគ្នានេះដែរ ។
សូមអាន ថែស្សាឡូនីច ទី១ ៥:១–៣ ហើយរកមើលពាក្យប្រៀបធៀបដែលប៉ុលបានប្រើដើម្បីពិពណ៌នាអំពីពេលវេលាដែលព្រះយេស៊ូវនឹងយាងមកផែនដីវិញ ។
-
តើអ្នកបានរកឃើញអ្វីខ្លះ ?
-
តើពាក្យប្រៀបធៀបរបស់ប៉ុលអំពីចោរនៅពេលយប់ និងស្ត្រីដែលមានផ្ទៃពោះបង្រៀនអ្នកអ្វីខ្លះអំពីការយាងមកជាលើកទីពីររបស់ព្រះអង្គសង្គ្រោះ ?
សូមអាន ថែស្សាឡូនីច ទី១ ៥:៤–៦ ហើយរកមើល សេចក្ដីពិតដែលប៉ុលបានបង្រៀនអំពីការត្រៀមខ្លួនសម្រាប់ការយាងមកជាលើកទីពីរ ។ សូមប្រៀបធៀបការបង្រៀនទាំងនេះជាមួយ គោលលទ្ធិ និងសេចក្តីសញ្ញា ១០៦:៤–៥ ។
-
តើអ្នកបានកើនការយល់ដឹងអ្វីខ្លះ ?
សេចក្ដីពិតមួយដែលយើងអាចរៀនចេញពីការបង្រៀនរបស់ប៉ុលគឺថា ប្រសិនបើយើងខិតខំធ្វើជា « កូនចៅនៃពន្លឺ » ដោយការធ្វើតាមព្រះយេស៊ូវគ្រីស្ទ នោះយើងនឹងត្រៀមខ្លួនរួចរាល់នៅពេលទ្រង់យាងមកម្ដងទៀត ។
ប្រសិនបើអ្នកជ្រើសរើសសកម្មភាពសិក្សានេះ សូមកត់ត្រាបញ្ជីដែលអ្នកធ្វើដូចបានណែនាំក្នុងកថាខណ្ឌបន្ទាប់ ។
ដើម្បីរៀនបន្ថែមទៀតអំពីវិធីផ្សេងៗដែលព្រះអម្ចាស់អញ្ជើញយើងឲ្យក្លាយជាកូនចៅនៃពន្លឺ សូមអាន នីហ្វៃទី៣ ១៨:២៤; គោលលទ្ធិ និងសេចក្តីសញ្ញា ៥០:២៣–២៥; ៨៨:៦៧–៦៨ ។ សូមសរសេរនៅក្នុងសៀវភៅសិក្សារបស់អ្នកនូវអ្វីដែលអ្នករកឃើញ ដែលជួយអ្នកឲ្យយល់ពីរបៀបក្លាយជាកូនចៅនៃពន្លឺ ។
-
តើបងប្អូនអញ្ជើញពន្លឺរបស់ព្រះអម្ចាស់ឲ្យចូលក្នុងជីវិតរបស់បងប្អូនដោយរបៀបណា ? តើបងប្អូនអាចអញ្ជើញពន្លឺរបស់ទ្រង់បន្ថែមទៀតមកក្នុងជីវិតដោយរបៀបណា ?
សកម្មភាពសិក្សាទី ៣ ៖ តើយើងអាចរៀបចំខ្លួនយើងសម្រាប់ការយាងមកជាលើកទីពីររបស់ព្រះយេស៊ូវគ្រីស្ទដោយរបៀបណា ?
ប៉ុលបានបញ្ចប់សំបុត្រទីមួយរបស់លោកដល់ពួកថែស្សាឡូនីចដោយការចែកចាយការទូន្មានអំពីរបៀបដែលពួកបរិសុទ្ធអាចរៀបចំខ្លួនឲ្យបានកាន់តែប្រសើរដើម្បីទៅជួបព្រះអង្គសង្គ្រោះនៅឯការយាងមកជាលើកទីពីររបស់ទ្រង់ ។
សូមអាន ថែស្សាឡូនីច ទី១ ៥:១៤–២២ ហើយស្វែងយល់ថាតើអ្នកទទួលបានការយល់ដឹងអ្វីខ្លះអំពីការត្រៀមខ្លួននេះ ។ សូមបើកចិត្តឲ្យទូលាយចំពោះគំនិតអំពីការបង្រៀនណាមួយដែលអាចមានប្រយោជន៍ជាពិសេសសម្រាប់អ្នក ។
ប្រសិនបើអ្នកជ្រើសរើសសកម្មភាពសិក្សានេះ សូមឆ្លើយសំណួរខាងក្រោម ហើយកត់ត្រាបទគម្ពីរយោងដែលអ្នកបានជ្រើសរើស ។
-
តើការបង្រៀនទាំងនេះមួយណាដែលមានអត្ថន័យបំផុតចំពោះអ្នក ? ហេតុអ្វី ?
សូមស្វែងរកខគម្ពីរមួយ ឬពីរដែលជួយបង្កើនការយល់ដឹងរបស់អ្នកអំពីការបង្រៀនដែលអ្នកបានជ្រើសរើស ។ ( អ្នកអាចនឹងប្រើលេខយោង ឬរកមើលប្រធានបទ នៅក្នុងសេចក្ដីណែនាំដល់បទគម្ពីរទាំងឡាយ ឬ Topical Guide ដើម្បីជួយអ្នកឲ្យស្វែងរកបទគម្ពីរដែលទាក់ទង ) ។
-
តើព្រះយេស៊ូវគ្រីស្ទបានជួយអ្នកដោយរបៀបណា ឬតើទ្រង់នឹងជួយអ្នកដោយរបៀបណា ដើម្បីត្រៀមខ្លួនសម្រាប់ការយាងមកជាលើកទីពីររបស់ទ្រង់ ? តើអ្នកអាចរៀនអ្វីខ្លះអំពីទ្រង់មកពីការណ៍នេះ ?
សូមពិចារណាលើសេចក្តីពិតដែលអ្នកបានរៀននៅថ្ងៃនេះ និងទង្វើដែលអ្នកមានអារម្មណ៍ថាត្រូវបានបំផុសគំនិតឲ្យធ្វើ ដែលនឹងជួយអ្នកឲ្យត្រៀមខ្លួន និងរំភើបចិត្តក្នុងការជួបព្រះអង្គសង្គ្រោះម្តងទៀត ។ សូមកត់ត្រាគំនិតរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។
ជម្រើស ៖ តើចង់រៀនសូត្របន្ថែមទៀតទេ ?
ថែស្សាឡូនីច ទី១ ៥:២ ។ តើពេលវេលានៃការយាងមកជាលើកទីពីររបស់ព្រះអង្គសង្គ្រោះអាចប្រៀបធៀបនឹងចោរនៅពេលយប់យ៉ាងដូចម្ដេច ?
អែលឌើរ ប្រ៊ូស អ័រ ម៉ាក់ខន់ឃី ( ឆ្នាំ ១៩១៥–១៩៨៥ ) ក្នុងកូរ៉ុមនៃពួកសាវកដប់ពីរនាក់បានពន្យល់ថា ធម្មតាចោរតែងមកនៅពេលយប់ « ដោយមិននឹកស្មានដល់ ហើយដោយគ្មានការព្រមានទុកជាមុន » ( Doctrinal New Testament Commentary [ ឆ្នាំ ១៩៧៣ ] ៣:៥៤ ) ។ ការប្រៀបធៀបនេះបង្ហាញថា ការយាងមកជាលើកទីពីររបស់ព្រះអង្គសង្គ្រោះនឹងមានការភ្ញាក់ផ្អើលដល់មនុស្សមួយចំនួន ។
ថែស្សាឡូនីច ទី១ ៥:២១ ។ តើប៉ុលចង់មានន័យយ៉ាងណាដោយថា « ចូរលមើលគ្រប់ទាំងអស់ ហើយកាន់ខ្ជាប់តាមសេចក្តីដែលត្រឹមត្រូវ » ?
ប៉ុលបានអញ្ជើញពួកបរិសុទ្ធក្រុងថែស្សាឡូនីចឲ្យ « ចូរលមើលគ្រប់ទាំងអស់ »—មានន័យថាដើម្បីពិនិត្យ ឬសាកល្បងពួកគេឲ្យយល់ថាតើពួកគេល្អ ឬអាក្រក់—ហើយដើម្បី « កាន់ខ្ជាប់តាមសេចក្តីដែលត្រឹមត្រូវ » ។ ក្នុងនាមជាសមាជិកនៃសាសនាចក្រ យើងត្រូវបានបង្រៀនមិនត្រឹមតែរៀនពីដំណឹងល្អប៉ុណ្ណោះទេ ប៉ុន្តែដើម្បីសញ្ជឹងគិត អធិស្ឋាន ហើយទីបំផុតយល់ពីវា ( សូមមើល នីហ្វៃទី៣ ១៧:១–៣; គោលលទ្ធិ និងសេចក្តីសញ្ញា ៦៨:២៥–២៦ ) ។ បន្ទាប់មក យើងត្រូវប្រកាន់ខ្ជាប់យ៉ាងរឹងមាំ និងស្មោះត្រង់ចំពោះសេចក្តីល្អដែលយើងយល់ ។