Temple of Apollo, Corinth, built about 600 B.C. This would have been one of the most imposing structures in Corinth in Paul’s day. Temples and shrines housing images of pagan deities were prevalent throughout the Greco-Roman world, and members of the Church in cities like Corinth would have encountered them daily. Paul noted that before the saints in Corinth had converted, they had been carried away unto these dumb [voiceless] idols, even as [they] were led (1 Cor. 12:2).
Paghunahuna og negatibo nga epekto sa panagbingkil, garbo, bakak nga mga pagtulon-an, ug imoralidad nga naa sa kalibotan karon. Ang mga miyembro sa Simbahan sa sayong bahin kinsa nagpuyo sa Corinto nanglimbasog niining susamang mga hagit.Samtang nagsangyaw sa Efeso panahon sa iyang ikatulong misyonaryong panaw, si Apostol Pablo misulat ngadto sa mga Santos sa Corinto aron lig-onon sila ug pahinumdoman sila nga mosalig kang Jesukristo. Kini nga leksiyon makatabang kaninyo nga makasabot kon unsaon nga ang pagtukod sa atong kinabuhi sa pundasyon ni Jesukristo makatabang kanato nga mabuntog ang kalibotanong mga hagit.
Pagpamatuod sa tinuod nga doktrina. Pangita og mga kahigayonan aron makapamatuod sa tinuod nga doktrina. Samtang magpamatuod ka sa tinuod nga doktrina, ang Espiritu mokonpirmar sa kamatuoran sa doktrina diha sa mga kasingkasing sa imong mga gitudloan.
Pagpangandam sa estudyante: Dapita ang mga estudyante nga hangyuon ang usa ka sakop sa pamilya o higala nga ipasabot kon giunsa nga ang pagtukod sa ilang kinabuhi diha sa pundasyon ni Jesukristo nakatabang kanila nga madala ang lainlaing mga hagit sa kinabuhi.
Posible nga mga Kalihokan sa Pagkat-on
Pagpabiling matinud-anon sa lisod nga mga sirkumstansiya
Hunahunaa nga usa ka suod nga higala kinsa nagpuyo sa lain nga lungsod nagpadala kaninyo sa mosunod nga mensahe:
“Lisod kaayo ang mapalibotan og negatibong mga impluwensya bisan asa. Daghan kaayong mga tawo dinhi ang wala nagsunod sa mga sugo, ug pipila kanila mga kritikal sa Simbahan. Nakaila ako sa uban kinsa nawad-an sa ilang mga pagpamatuod sa susamang mga sitwasyon ug dili ako gusto nga kini mahitabo nganhi kanako. Aduna ka bay tambag?”
Unsay inyong isulti ngadto sa inyong higala?
Unsa ang pipila sa negatibo ug makadaot nga mga impluwensya ang inyong namatikdan sa inyong gipuy-an karon?
Sa unsang paagi nga kining mga impluwensya nakahimong mahagiton sa pagpabiling matinud-anon sa inyong pagtuo?
Sa inyong pagtuon niini nga leksiyon, paghunahuna kon unsa ka kamatinud-anon kon kamo mag-atubang og kalibotanong mga hagit o negatibong mga impluwensya. Tinguhaa ang giya pinaagi sa Espiritu Santo aron mahibalo unsaon pagpalig-on sa inyong pundasyon kang Jesukristo, ug pangitaa ang mga kamatuoran nga makatabang kaninyo sa pagbuntog sa inyong mga hagit.Sa iyang ikaduhang misyonaryo nga panaw, si Apostol Pablo nagsangyaw sa ebanghelyo sa Corinto dul-an sa duha ka tuig (tan-awa sa Mga Buhat 18:1–18) ug nag-organisar og usa ka branch sa Simbahan didto. Ang Corinto usa ka adunahang sentro sa pamatigayon ug ang kapital sa siyudad sa Romanhong probinsya nga Achaea. Daghang mga lungsoranon sa Corinto ang nagsimba sa mga diosdios ug mga imoral. Ang pipila usab mabahinbahin ug makiglalis. Niini nga palibot, ang pagpabiling tinuod sa ebanghelyo sa Manluluwas nahimong lisod alang sa daghang mga miyembro sa Simbahan. Sa dihang si Pablo nagsulat sa mga Santos sa Corinto aron matabangan sila sa ilang mga hagit, siya namulong sa pundasyon nga iyang gibutang alang kanila.
Unsa kaha ang buot ipasabot sa pagtukod sa inyong pundasyon diha kang Jesukristo?
Sa Basahon ni Mormon, si Helaman nag-awhag usab sa iyang mga anak nga lalaki aron magtukod diha sa pundasyon ni Jesukristo. Basaha ang Helaman 5:12 , nga mangita sa mga panalangin nga gisaad ni Helaman.
Unsa ang inyong mapaambit sa inyong higala gikan niining mga bersikulo nga lagmit makatabang?
Usa ka kamatuoran nga atong makat-onan gikan niining mga kasulatan mao nga samtang atong tukoron ang pundasyon sa atong kinabuhi diha ni Jesukristo, kita makabuntog sa impluwensya ni Satanas ug ang kalibotanong mga hagit.
Unsa ang inyong nahibaloan, gibati, o gituohan mahitungod sa Manluluwas nga makatabang kaninyo nga gustong makabaton Kaniya isip inyong pundasyon?
Tabangi ang mga estudyante nga mapalawom ang ilang pagsabot ug pagbati sa kamatuoran ug importansya niini nga baroganan. Ang mosunod nga kalihokan usa ka paagi aron mabuhat kini. Ang mga estudyante mahimong mobuhat sa kalihokan isip usa ka klase ngadto sa pisara, o ang mga instruksiyon mahimong ipakita ug ang mga estudyante mahimong mokompleto sa kalihokan diha sa ilang journal sa pagtuon.
Pagdibuho og yanong balay o gambalay [building] nga adunay lig-on nga haligi o pundasyon. Sa palibot sa balay, pagsulat og pipila ka mga hagit o negatibong mga impluwensya nga inyong giatubang.
Sa sulod o sa palibot sa pundasyon, pagsulat og mga butang nga inyong mabuhat aron ibase ang inyong kinabuhi ngadto sa Manluluwas.
Mahimong dapiton ang mga estudyante sa pagsulat sa pisara sa ilang mga tubag sa miaging duha ka mga kalihokan.
Tubaga ang mosunod nga mga pangutana: Sa unsang paagi nga kining mga lihok nakatabang ninyo o sa unsang paagi kini nakatabang ninyo sa dihang kamo nag-atubang og mga hagit o negatibong mga impluwensya?
Ang mosunod nga mga kalihokan naghatag og usa ka kahigayonan alang sa mga estudyante aron mas magtuon sa mga pagtulon-an ni Pablo mahitungod sa pagkabahin ug panagbingkil ingon man usab sa mga peligro sa pagpahiangay sa kaalam sa kalibotan labaw sa kaalam sa Dios. Ikonsiderar ang mga panginahanglanon sa mga estudyante ug tan-awa kon aduna pay panahon aron maila kon mabuhat ba kining mga kalihokan sa klase. Ang mga estudyante mahimong mopili og usa sa mga kalihokan nga buhaton sa ilang kaugalingon o isip usa ka gamay nga grupo. Sa laing paagi, ang tibuok klase mahimong mobuhat og usa sa mga kalihokan.
Sa sulat ni Pablo ngadto sa mga Taga-Corinto, iyang gisulbad ang daghang mga isyu ug nagtudlo kon unsaon sa Manluluwas ug sa Iyang ebanghelyo nga adunay gahom sa pagtabang sa mga Taga-Corinto nga mabuntog ang ilang mga hagit (tan-awa sa 1 Mga Taga-Corinto 1:23–24). Ang mosunod nga mga kalihokan nagpokus sa duha niadtong mga isyu. Basaha ang mosunod nga mga opsiyon ug pagpili og usa nga mahimong labing makahuluganon alang kaninyo nga tun-an.
Opsiyon A: Mga pagkabahin ug panagbingkil
Usa ka hagit nga gisagubang sa mga Santos sa Corinto mao ang panagbingkil. Ang mga pagkabahin miuswag sa usa ka bahin tungod kay nagtuo sila nga ang ilang kahimtang sa Simbahan natino pinaagi sa kaimportante sa tawo kinsa nagbunyag nila (tan-awa sa 1 Mga Taga-Corinto 1:12).
Tupad sa inyong gidibuho nga balay, mahimo kamong maglista og bisan unsang mga paagi nga inyong atubangon nga mga pagkabahin o panagbingkil sa inyong ward, pamilya o komunidad.
Pagbantay aron maseguro nga ang mga ehemplo nga gihatag sa mga estudyante wala nagpaila sa usa ka espiritu sa kasuko o panagbingkil ngadto sa kasinatian sa pagkat-on. Kon adunay panagbingkil, awhaga ang mga estudyante nga magmasinabtanon ug mahigugmaon aron ang Espiritu maanaa gihapon.
Unsa ang pipila ka sangpotanan sa pagkabahin ug panagbingkil?
Unsa ang inyong nakita niini nga mga bersikulo nga mahimong makatabang sa mga tawo aron mabuntog ang mga pagkabahin ug panagbingkil?
Ngano sa inyong hunahuna nga ang pagtukod sa inyong kinabuhi kang Jesukristo makatabang ninyo aron mahiusa ug dili kaayo makiglalis niadtong mga naglibot kaninyo?
Opsiyon B: Ang kaalam sa kalibotan
Daghan sa mga nagpuyo sa Corinto naghatag og bili sa kalibotanong kaalam. Ang mensahe sa usa ka gilansang sa krus nga Mesiyas walay kahulogan sa kadaghanan sa mga Judeo ug mga Hentil. Sa Romanhong kalibotan, ang silot sa paglansang sa krus nagsimbolo sa kaulaw ug kapildihan. Ang ideya sa usa ka tawo nga andam mosakripisyo alang sa uban kay “binoang” ngadto sa mga Griyego ( 1 Mga Taga-Corinto 1:23). Alang sa mga Judeo, ang Mesiyas nga nagpakamatay diha sa krus usa ka “kapangdolan” ( 1 Mga Taga-Corinto 1:23) tungod kay sila nagdahom sa Mesiyas nga mobuntog sa ilang mga kaaway.
Sa usa ka dapit sa inyong gidibuho nga balay, paglista og mga paagi nga ang kaalam sa kalibotan mahimong makaapekto o makahagit sa inyong pagpamatuod kang Jesukristo ug sa Iyang ebanghelyo.
Ngano kaha nga pipila sa mga tawo wala makasabot o makadayeg kang Jesukristo ug sa Iyang Pag-ula karon?
Unsa nga mga kausaban ang lagmit mahitabo kung ang usa ka tawo moanhi aron masayod ug mobati nga ang Manluluwas adunay gahom sa ilang kinabuhi? (tan-awa sa 1 Mga Taga-Corinto 1:24).
Sa unsang paagi nga ang pagtukod sa inyong kinabuhi ngadto kang Jesukristo ug sa Iyang ebanghelyo makatabang kaninyo sa pag-atubang sa mahagitong kalibotanon nga mga ideya?
Pagtukod sa atong mga kinabuhi diha kang Jesukristo
Paggahin og pipila ka minutos sa pagtimbang-timbang sa inyong kaugalingong kinabuhi. Sa unsang mga paagi ninyo gitukod ang inyong pundasyon nganha kang Jesukristo? Sa unsang mga paagi kaha nga gusto ninyo nga molambo? Sa unsang paagi nga mas matukod ang inyong kinabuhi diha sa Manluluwas nga si Jesukristo ug sa Iyang ebanghelyo makatabang ninyo pag-atubang sa inyong kaugalingong mga hagit ug negatibong mga impluwensya? Ikonsiderar ang pagsulat sa inyong mga hunahuna ug mga tumong diha sa inyong journal sa pagtuon.
Ikonsiderar ang pagdapit sa mga estudyante nga mopaambit sa ilang mga hunahuna aron pagtapos sa klase. Pagdugang usab og personal nga mga panabot ug pagpamatuod.
Komentaryo ug Background nga Impormasyon
Nganong kinahanglan man nga akong tukoron ang akong pundasyon diha ni Jesukristo?
Si Elder Chi Hong (Sam) Wong sa Seventy mipayahag:
Imahe
Official Portrait of Elder Chi Hong (Sam) Wong. Photographed in March 2017.
Kon kita motukod sa atong pundasyon diha kang Jesukristo, kita dili mapukan! Samtang kita matinud-anong molahotay hangtod sa kataposan, ang Dios motabang nato sa pag-establisar sa atong mga kinabuhi diha sa Iyang bato, “ug ang mga ganghaan sa impyerno dili makabuntog batok [kanato]” ( Doktrina ug mga Pakigsaad 10:69). Tingali dili kita makahimo sa pag-usab sa tanan sa unsay umaabot, apan kita makapili unsaon nga kita makapangandam sa unsay umaabot.
Mahimong kantahon ang “Unsa Kalig-on ang Tukuranan” (Mga Himno, nu. 44) kauban ang mga estudyante sa dili pa sugdan ang leksiyon. Dapita ang mga estudyante nga mamalandong sa importansya sa usa ka lig-on nga pundasyon diha sa ilang pagtuon niini nga leksiyon.
Opsiyon C: Paghukom ug garbo
Ang mosunod usa ka dugang nga opsiyon sa pagtuon alang sa ulahing kalihokan sa leksiyon.
Sa 1 Mga Taga-Corinto 4:1–3 , makita nga ang pipila ka mga miyembro sa Simbahan sa Corinto mihukom o misaway sa gihimo ni Pablo isip usa ka misyonaryo ug lider sa Simbahan. Tingali nakapangutana sila sa iyang paghukom o naghunahuna nga mas maayo pa ang laing tawo.
Tupad sa inyong gidibuho nga balay, paglista og bisan unsang mga paagi nga tingali kamo mobati nga matintal sa paghukom sa inyong mga lider.
Basaha ang 1 Mga Taga-Corinto 4:1–7 , ug maglista og mga pulong o hugpong sa mga pulong nga lagmit makatabang kaninyo o sa usa ka tawo nga nanglimbasog sa pagbatok sa pagkagarboso ug sayop nga paghukom sa uban.
Unsa nga mga pulong o hugpong sa mga pulong ang labing nakatabang kaninyo?
Nganong importante man nga atong mahinumdoman nga ang Ginoo nasayud sa mga hunahuna ug mga intensyon sa atong mga kasingkasing? (tan-awa sa 1 Mga Taga-Corinto 4:5).
Sa unsang paagi nga ang pagtukod sa inyong pundasyon diha kang Jesukristo nakatabang dihang kamo o ang uban mapagarbohon o sayop nga naghukom sa uban?
Pagtukod og panaghiusa pinaagi ni Jesukristo
Ang mosunod nga video mahimong gamiton sa paghulagway kon unsaon, nga bisan adunay dakong pagkadaiya sa mga kaliwat ug mga kultura, kita mahiusa isip mga disipulo ni Jesukristo pinaagi sa pagsunod Kaniya. Kini makatabang sa mga estudyante nga matubag ang mosunod nga pangutana: Sa unsang paagi nga ang pagtukod sa inyong kinabuhi kang Jesukristo ug sa Iyang ebanghelyo nakatabang ninyo aron mas mahiusa niadtong nagpalibot kaninyo?
Ang mahuyang nga mga butang sa kalibotan
Ikonsiderar ang pagbasa sa 1 Mga Taga-Corinto 1:26–27 uban ang mga estudyante ug ipangutana ang sama sa mosunod:
Sa inyong hunahuna ngano kaha nga ang Dios mipili niadtong gikonsiderar sa kalibotan nga boang ug huyang aron mosangyaw sa Iyang ebanghelyo?
Sa unsang paagi nga ang pagtukod og usa ka lig-on nga pundasyon kang Jesukristo nag-andam kaninyo aron mopaambit sa ebanghelyo ngadto sa uban?
Dapita ang mga estudyante nga mopaambit og personal nga misyonaryong mga kasinatian o mga kasinatian gikan sa mga sakop sa pamilya kinsa nagserbisyo og mga misyon diin ang Ginoo nagtrabaho pinaagi kanila aron matabangan ang uban nga moduol ngadto kang Kristo.
