Doktrinal nga Kahanas: 1 Mga Taga-Corinto 6:19–20
“Ang Imong Lawas Mao ang Templo sa Espiritu Santo”
Sa imong pagtuon sa 1 Mga Taga-Corinto 6, imong nakat-onan ang mahitungod sa sumbanan sa Ginoo sa sekswal nga kaputli ug ang importansiya sa imong pisikal nga lawas. Kini nga leksiyon makatabang kanimo nga madugangan ang imong kahanas niining mga pagtulun-an pinaagi sa paghatag kanimo og kahigayonan sa pagsag-ulo sa pakisayran ug sa mahinungdanong hugpong sa pulong sa kasulatan alang sa 1 Mga Taga-Corinto 6:19–20, aron mapasabot ang doktrina, ug aron magamit ang mga baroganan sa pag-angkon og espirituhanong kahibalo diha sa tinuod nga sitwasyon sa kinabuhi.
Pagtudlo sa kamatuoran nga adunay paghigugma. Paningkamot sa pagtudlo sa ebanghelyo susama sa gihimo sa Manluluwas. Itudlo ang kamatuoran og klaro apan kanunay nga anaa sa espiritu sa paghigugma. Ang pagtudlo uban sa gugma makatabang sa mga estudyante kinsa malagmit nakigbisog sa pipila ka baroganan sa ebanghelyo o kinsa malagmit adunay mga minahal nga wala magsunod sa ebanghelyo, magkat-on sa kamatuoran ug mobati og kadasig sa pagpuyo niini.
Pagpangandam sa estudyante: Ikonsiderar ang pagpaambit sa mga estudyante sa pagbansay nga senaryo niini nga leksiyon ug dapiton sila aron magsugod paghunahuna mahitungod sa kon unsaon nila pagtubag.
Posible nga mga Kalihokan sa Pagkat-on
Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “1 Mga Taga-Corinto 6,” nga mao ang pangkontekstong leksiyon alang sa tudling sa doktrinal nga kahanas sa 1 Mga Taga-Corinto 6:19–20 . Kon gikinahanglang ibalhin kini nga leksiyon sa tudling sa doktrinal nga kahanas ngadto sa laing semana, seguroha nga matudlo usab ang tukma nga pangkonteksto nga leksiyon nianang semanaha.
Ipasabot ug Isag-ulo
Handurawa nga anaa ka sa klase o sa korum nga panaghisgot sa dihang ang usa ka mas batang klasmeyt nangutana sa magtutudlo, “Unsa man gayod na ang balaod sa kaputli?” Ang magtutudlo mihangyo sa ubang mga estudyante, apil nimo, nga motubag.
Gamit ang mga kamatuoran nga gitudlo sa tudling sa doktrinal nga kahanas sa 1 Mga Taga-Corinto 6:19–20 , pagplano unsa ang mahimo nimong mapaambit sa imong mga klasmeyt aron matabangan sila nga makasabot sa sumbanan sa Ginoo sa sekswal nga kaputli, o kaputli, ug nganong importante kini.
-
Gamit ang mga pagtulun-an nga narekord sa 1 Mga Taga-Corinto 6:19–20 , unsaon kaha nimo pagpasabot sa usa ka tawo unsa ang balaod sa Ginoo sa kaputli ug nganong importante kini?
Paminaw og maayo sa mga tubag sa mga estudyante, ug susiha ang ilang pagsabot. Kon gikinahanglan, pagrebyo og mga kasulatan ug mga baroganan gikan sa leksiyon sa 1 Mga Taga-Corinto 6.
Hatagi ang mga estudyante og kahigayonan aron mosag-ulo sa pakisayran alang sa tudling sa doktrinal nga kahanas sa 1 Mga Taga-Corinto 6:19–20 ug sa kauban niini nga mahinungdanon nga hugpong sa pulong sa kasulatan. Ang mosunod mao ang usa ka ehemplo kon unsaon kini pagbuhat.
Aron matabangan ka sa pagsag-ulo sa pakisayran alang sa tudling sa doktrinal nga kahanas sa 1 Mga Taga-Corinto 6:19–20 ug sa iyang mahinungdanong hugpong sa pulong sa kasulatan nga “Ang imong lawas mao ang templo sa Espiritu Santo,” mahimong magmugna og hulagway, meme, o collage sa mga litrato aron pagrepresentar niini nga tudling ug sa doktrina nga gitudlo. Ang biswal nga imong gihimo gikinahanglang halandomon apan gikinahanglan usab nga matinahoron ug nagtahod sa kasulatan ug sa doktrina nga gitudlo niini. Mahimo nimong gamiton ang hulagway sa imong gidrowing nga usa ka tawo nga nagtindog tapad sa templo sa kalihokan diha sa leksiyon sa 1 Mga Taga-Corinto 6. Seguroha nga isulat ang pakisayran 1 Mga Taga-Corinto 6:19–20 ug ang mahinungdanong hugpong sa pulong sa kasulatan diha duol sa imong hulagway.
Samtang nagtan-aw sa biswal nga pagrepresentar nga imong gihimo o gipili, litoka ang pakisayran sa tudling sa kasulatan ug mahinungdanong hugpong sa pulong sa kasulatan diha sa imong hunahuna hangtod imong mabati nga imo na silang namemorya.
Pagbansay sa paggamit
Tabangi ang mga estudyante sa pagrebyo sa mga baroganan sa pag-angkon og espirituhanong kahibalo. Ang mosunod mao ang usa ka ehemplo kon unsaon kini pagbuhat. Isip usa ka alternatibo, mahimong dapiton ang tulo ka mga estudyante nga mag-andam daan og pinamubo [summarize] ug itudlo kini nga mga baroganan ngadto sa ilang mga klasmeyt.
Diha sa imong journal sa pagtuon, mubo nga irekord kon unsa ang imong nahibaloan ug nahinumdoman mahitungod sa mga baroganan sa pag-angkon og espirituhanong kahibalo nga walay pagdangop sa lain pang mga tinubdan. Kon ikaw nahuman na, dangop ngadto sa Kinauyokang Dokumento sa Doktrinal nga Kahanas (2022) aron masusi ang imong kahibalo ug magdugang og bisan unsang importanteng mga impormasyon nga lagmit imong nalimtan.
Pamalandongi ang mosunod nga mga sitwasyon. Dayon tubaga ang mga pangutana nga mosunod gamit ang mga baroganan sa pag-angkon og espirituhanong kahibalo ug ang doktrina nga gitudlo sa 1 Mga Taga-Corinto 6:19–20 nga ang atong mga lawas mao ang mga templo sa Dios diin ang Espiritu makapuyo. Isip alternatibo, mahimo ka usab nga magmugna og usa ka lahi nga senaryo nga mas mahinungdanon kanimo o sa mga kabatan-onan sa imong lugar.
Ang mahangtoron nga baroganan sa atong mga lawas isip mga templo sa Dios diin ang Espiritu makapuyo mahimong magamit sa mga sitwasyon gawas sa pagkaputli. Ikonsiderar ang pagpahiangay sa senaryo aron mahimo kining labing mahinungdanon alang sa mga estudyante.
Usa ka tinedyer ang nagdako nga nasayod sa mga sumbanan sa Ginoo sa pagkaputli apan, human maanaa sa taud-taod nga seryosong pagpakigrelasyon, mibati og usa ka tinguha sa pagpahayag sa iyang [lalaki] mga pagbati pinaagi sa pag-apil sa usa ka sekswal nga relasyon sa iyang trato nga babaye [girlfriend]. Siya adunay mga miyembro sa pamilya ug mga higala kinsa adunay sekswal nga relasyon sa wala pa ang kaminyoon, ug daw malipayon silang tanan.
Susiha ang mga konsepto ug mga pangutana inubanan sa mahangtorong panglantawSi Elder David A. Bednar sa Korum sa Napulog Duha ka Apostoles mipasabot nga “ang mahangtorong importansiya sa kaputli masabtan lang sa lapad nga konteksto sa plano sa Langitnong Amahan sa kalipay para sa Iyang mga anak” (“Kita Nagtuo sa Pagkaputli,” Liahona, Mayo 2013, 41).
-
Unsa ang pihong mga aspeto sa plano sa kaluwasan sa Langitnong Amahan ang gusto nimo nga masabtan ug mapamalandongan sa tawo niini nga sitwasyon?
-
Sa unsang paagi nga ang mga kamatuoran sa 1 Mga Taga-Corinto 6:19–20 nakaapekto sa paagi sa imong panglantaw sa balaod sa kaputli ug sa imong relasyon sa Dios nga Kapangulohan?
Pagtinguha pa og dugang nga panabot pinaagi sa balaang gitudlo nga mga tinubdanMahimong mopili og usa o daghan sa mosunod nga balaanong gitudlo nga mga tinubdan alang sa pagpangita og mga kamatuoran nga mahimong magamit ug makatabang sa senaryo nga imong gipili.
-
Exodo 20:14 ; Alma 38:12 ; Alma 39 ; 3 Nephi 12:27–30 ; Doktrina ug Mga Pakigsaad 42:22–23
-
Giya ngadto sa mga Kasulatan, “ Kaputli ,” scriptures.ChurchofJesusChrist.org
-
David A. Bednar, “Kita Nagtuo sa Pagkaputli,” Liahona, Mayo 2013, 41–44
Tubaga ang mosunod nga pangutana:
-
Unsa ang imong nakaplagan nga lagmit makatabang niini nga senaryo?
Molihok inubanan sa hugot nga pagtuo
-
Unsa ang pipila sa lainlaing mga paagi nga ang usa ka indibidwal lagmit mopili og paglihok inubanan sa hugot nga pagtuo niini nga sitwasyon?
-
Unsa nga mga kasinatian nga aduna ka sa Langitnong Amahan ug ni Jesukristo nga makatabang kanimo sa pagsalig Kanila ug pagsunod sa Ilang mga pagtulun-an?
I-summarize unsaon sa matag usa sa mga baroganan sa pag-angkon og espirituhanong kahibalo nga mahimong magamit sa senaryo. Kon ikaw naghimo og kaugalingong senaryo, seguroha usab sa paglakip og usa ka pinamubo [summary] niana nga sitwasyon.
Human ang mga estudyante adunay panahon sa pagpamalandong ug pagtubag sa miaging pangutana, mahimo silang dapiton sa pagpaambit sa senaryo nga ilang gigamit ug sa paghisgot sa ilang mga tubag. Usa ka paagi sa paghimo niini mao ang pagbutang og lingkoranan nga walay naglingkod atubangan sa room ug dapiton ang mga estudyante sa paghanduraw nga ang tawo nga anaa sa senaryo naglingkod niana nga lingkoranan. Paghangyo og usa ka estudyante sa paghunahuna og usa ka butang nga lagmit iyang ipaambit nianang tawhana. Dayon pangutana kon aduna bay laing estudyante nga gustong magdugang sa unsa ang gisulti sa unang estudyante. Pagdapit og pipila ka mga estudyante nga mopaambit og mga ideya nga mahimong makatabang sa tawo niini nga sitwasyon. Awhaga ang mga estudyante sa paggamit sa tulo ka mga baroganan sa pag-angkon og espirituhanon nga kahibalo.
Rebyo sa doktrinal nga kahanas
Ang mosunod nga rebyo nga kalihokan kinahanglan nga gamiton sa usa ka leksiyon nga itudlo sa umaabot:
Dapita ang mga estudyante sa paghinumdom o pagpakita sa hulagway nga ilang gihimo aron pagrepresentar sa 1 Mga Taga-Corinto 6:19–20 . Dapita sila sa pagsuta kon ila bang mahinumdoman ang mahinungdanong hugpong sa pulong sa kasulatan nga nahiuban niini nga tudling. Kon gikinahanglan, pagbansay sa pagrecite sa pakisayran sa kasulatan ug sa mahinungdanong hugpong sa pulong niini nga tudling sa doktrinal nga kahanas.