Kini nga leksiyon gituyo aron matabangan ka sa pagtimbang-timbang sa mga tumong nga imong gitakda ug sa personal nga pag-uswag nga imong nasinati sa panahon sa imong pagtuon sa Bag-ong Tugon.
Pagsukod sa nakat-onan sa estudyante. Ang pagtugot sa mga estudyante sa pagsukod sa unsa ang ilang nakat-onan mahimong makatabang kanila sa pagpamalandong kon giunsa sa Dios pagtabang kanila nga makat-on ug molambo. Tabangi ang mga estudyante sa pag-ila sa ilang mga kalamposan ingon man sa mga paagi nga sila mas molambo pa. Diha sa ilang pagpamalandong sa ilang pag-uswag ug mga hagit, sila makadawat og pagpadayag mahitungod sa sunod nga lakang nga ilang mabuhat aron mahimong mas mahisama ni Jesukristo.
Pagpangandam sa estudyante: Dapita ang mga estudyante sa pagpamalandong sa ilang pag-uswag nga may kalabotan sa ilang personal nga espirituhanong mga tumong. Dapita usab sila sa paghunahuna mahitungod sa unsa ang ilang nakat-onan o mga tumong nga ilang gitakda diha sa ilang pagtuon sa Mga Taga-Roma ug 1 Mga Taga-Corinto 1–7.
Posible nga mga Kalihokan sa Pagkat-on
Kini nga leksiyon gituyo aron matabangan ang mga estudyante sa pagtimbang-timbang sa mga tumong nga ilang gitakda, sa ilang abilidad sa pagpasabot sa mga pagtulon-an sa Bag-ong Tugon, o kon sa unsang paagi nausab ang ilang mga kinaiya, mga tinguha, ug abilidad sa pagsunod sa ebanghelyo. Ang pagtuon sa klase sa Mga Taga-Roma 1–16 ; 1 Mga Taga-Corinto 1–7 lagmit mipasabot og mga kamatuoran gawas sa kadtong anaa sa mosunod nga mga kalihokan. Kon mao, ang mga kalihokan mahimong ipahiangay nga ilakip kadto nga mga kamatuoran.
Pagkahimong usa ka disipulo ni Jesukristo
Kon ikaw makabiyahe sa bag-ong dapit, asa man nimo gustong moadto?
Samtang nagbiyahe, nganong importante man kini nga masusi kon ikaw anaa pa sa hustong dalan? Unsa kaha ang mahitabo kon ikaw nawala na?
Importante usab nga masusi ang atong espirituhanong panaw. Si Presidente M. Russell Ballard sa Korum sa Napulog Duha ka Apostoles nagtudlo sa importansiya sa pagpaningkamot sa pagkab-ot sa espirituhanong mga tumong ug dayon midugang:
Imahe
Official portrait of President M. Russell Ballard of the Quorum of the Twelve Apostles, 2004.
Akong nabantayan nga aron makapabilin nga magtutok … , kinahanglan kong kanunay nga mangutana sa akong kaugalingon, “Kumusta na man ko?”
Sama kini sa pagbaton og personal, pribado nga interbyo sa inyong kaugalingon. …
Sa umaabot nga semana, paggahin og panahon sa pagribyo sa mga tumong sa inyong kinabuhi ug sa inyong mga plano, ug siguroa nga nahiangay kini sa mahinungdanong plano sa atong Langitnong Amahan alang sa atong kalipay. Kon kamo kinahanglan nga maghinulsol ug mag-usab, nan hunahunaa ang pagbuhat sa ingon karon. …
Ako mopamatuod nga walay molabaw pa nga tumong dinhi sa mortalidad kay sa mopuyo sa kahangtoran uban sa atong Langitnong mga Ginikanan ug sa atong minahal nga Manluluwas, si Ginoong Jesukristo. Apan labaw pa kini kay sa ato lang nga tumong—kini Ila usab nga tumong. Sila dunay hingpit nga gugma alang kanato, mas gamhanan kay sa unsay masugdan nato sa pagsabot. Sila sa kinatibuk-an, sa hingpit nga paagi, mahangtorong nahiangay kanato. Kita Ilang buhat. Ang atong himaya Ilang himaya. Labaw pa sa bisan unsang butang, gusto Nila nga makapauli kita.
Paggahin og pipila ka minuto sa pagpangutana sa imong kaugalingon sa mosunod nga mga pangutana, ingon nga ikaw adunay personal, pribadong interbyo sa imong kaugalingon. Ikonsiderar ang pagrekord sa imong mga tubag diha sa imong journal sa pagtuon.
Unsa man ang akong nabuhat bag-o lang aron makakuha og usa ka pagmatuod sa pihong mga kamatuoran pinaagi sa Espiritu Santo? Unsa man ang akong nakat-onan kabahin sa pagdawat og pagpadayag pinaagi sa Espiritu Santo? ( Malagmit nakahigayon ka sa paghunahuna niini samtang nagtuon sa 1 Mga Taga-Corinto 2 .)
Unsang mga tumong ang akong nahimo aron mahiduol sa Manluluwas ug mahimong Iyang tinun-an? Unsang mga kalamposan ang akong nasinati? Unsa nga mga babag ang akong giatubang? Unsa ang angay nakong buhaton aron mangita sa panabang sa Ginoo ug makapadayon sa pag-uswag sa akong espirituhanong panaw?
Dapita ang mga estudyante sa pagpaambit sa ilang mga hunahuna kabahin niini nga mga pangutana. Hinumdomi nga ang pipila ka mga tumong ug mga kasinatian mahimong personal kaayo o pribado, busa ayaw kinahanglana ang pagpaambit sa mga estudyante. Pahalipayi ang mga estudyante sa ilang mga kalamposan. Kon ang mga estudyante nag-atubang og mga pagbabag nga malisod nilang buntogon, mahimong ipangutana sa uban sa klase ang mga pangutana sama sa mosunod: Unsa ang atong nakat-onan niining tuiga pinaagi sa atong pagtuon sa Bag-ong Tugon nga mahimong makatabang? Unsa nga mga kasinatian ang aduna kamo nga mahimong makatabang? Dasiga ang mga estudyante sa pagpadayon pagbuhat sa ilang mga tumong, ug ipadayag ang pagsalig nga ang Langitnong Amahan motabang kanila diha sa ilang pagpaningkamot nga mahisama Kaniya.
Pagpasabot sa grasya ni Jesukristo
Aron matabangan ka sa pagsukod sa imong pagsabot sa usa ka importanteng kamatuoran sa ebanghelyo nga bag-o lang nimong natun-an, buhata ang mosunod nga kalihokan:
Handurawa nga kamo gikontak sa mga misyonaryo. Sila nagtudlo sa imong kaedad kinsa naglisod pagsabot sa grasya ni Jesukristo. Ang mga misyonaryo naghangyo kanimo nga ubanan sila sa ilang sunod nga gitakdang pagtudlo aron makapaambit ka sa unsa ang imong nakat-onan mahitungod sa grasya sa Manluluwas ug giunsa pagpanalangin sa imong kinabuhi ang pagsunod kang Jesukristo.
Paggahin og higayon sa pagsiksik sa mga kasulatan aron makakita og mga bersikulo ug mga kamatuoran nga mahimong makatabang. Ang pagbasa sa pipila sa mosunod nga mga bersikulo mahimong makatabang:
Isulat unsaon nimo pagpasabot sa grasya sa Manluluwas sa imong kaugalingong mga pulong.
Gamit ang usa ka kasulatan gikan sa Mga Taga-Roma, pagpaambit og usa ka kamatuoran mahitungod sa grasya sa Manluluwas ug unsaon nato kini pagdawat sa atong kinabuhi. Ikonsiderar ang paglakip kon sa unsang paagi nga ang pagkahibalo niini nga mga kamatuoran nagdala kanimo nga mas mahiduol sa Manluluwas.
Seguroha ang paghatag sa mga estudyante og igong panahon sa pagpangandam. Kon ang mga estudyante nahuman na, mahimo sila nga mobuhat kauban ang usa ka klasmeyt ug magpuli-puli sa pagtudlo sa usag usa ingon nga sila nagpaambit niini nga mga butang sa usa ka tawo nga gitudloan sa mga misyonaryo.
Pagpataas sa imong tinguha nga mahiusa kang Kristo
Ang pagkahiusa mao ang usa pa ka importanteng konsepto sa mga sulat ni Pablo ngadto sa mga Taga-Roma ug sa mga Taga-Corinto.
Mahimong dapiton ang mga estudyante sa pagpili og usa o duha ka mga bersikulo diin si Pablo nagtudlo mahitungod sa pagkahiusa (pananglitan, Mga Taga-Roma 14:19 o Mga Taga-Roma 15:1). Dayon buhata ang usa sa mosunod nga mga kalihokan:
Isaysay ang bersikulo o mga bersikulo nga magdungan isip usa ka klase.
Bahina ang mga estudyante ngadto sa gagmayng mga grupo ug dapita sila sa pagsaysay sa bersikulo o mga bersikulo sa makusog pinaagi sa pagpuli-puli kon kinsay mosulti sa kada linya sa kasulatan. Kon ang mga estudyante gusto og dugang nga hagit, mahimo silang magpuli-puli kon kinsay mosulti sa kada pulong.
Isaysay ang mga bersikulo o mga bersikulo isip usa ka klase usa ka pulong sa matag higayon, nga lain-laing estudyante ang magsulti sa matag pulong.
Hangyoa ang mga estudyante sa paghunahuna kon unsa sila kamaayo nga nagtinabangay ug mopaambit og bisan unsang mga panabot nga ilang nakat-onan mahitungod sa pagkahiusa pinaagi niini nga kalihokan. Dapita ang mga estudyante sa pagpamubo sa kon unsa ang gitudlo ni Pablo diha sa bersikulo o mga bersikulo.
a. Pangita og usa ka bersikulo nga imong natun-an sa Mga Taga-Roma o 1 Mga Taga-Corinto nga nagtudlo kanimo og usa ka makahuluganon nga kamatuoran mahitungod sa pagkahiusa nimo sa uban diha kang Kristo. Pipila ka mga pananglit anaa makita sa Mga Taga-Roma 12:10–21 ; 14:10–13, 19 ; 15:1–7 ug diha sa 1 Mga Taga-Corinto 1:10–13 ; 3:3–9 . Unsa nga kamatuoran ang gitudlo niining bersikulo nga imong gipili?
b. Paghunahuna og usa ka higayon diin imong nasinati unsa ang gitudlo ni Pablo sa bersikulo nga imong gipili. Unsa sa imong hunahuna ang labing natampo ngadto sa imong mga paningkamot aron mahiusa kang Kristo?
c. Tubaga ang duha sa mosunod nga mga pangutana:
Unsa ang kalahian tali sa yanong pagtinabangay ug pagkahiusa pinaagi ni Jesukristo ug sa Iyang ebanghelyo?
Nganong ang kamatuoran nga imong napili sa aytem a mahinungdanon man alang kanimo?
Sa miaging bulan, giunsa nimo pagpalambo ang imong pagsabot sa pagkahiusa ug sa imong tinguha nga mahiusa sa uban?
Unsa man ang imong gihimo aron mas mahiusa sa uban diha kang Kristo?
Unsa nga mga hagit ang imong giatubang diha sa imong pagbuhat aron mas mahiusa sa uban?
Tinguhaa ang giya sa Espiritu Santo aron matabangan ka sa pagkahibalo sa mga paagi nga gusto sa Ginoo kanimo aron mas mahiusa sa uban diha ni Kristo. Tinguhaa usab ang pagpadayag kon unsaon pagbuntog ang bisan unsang hagit nga imong giatubang.
Padayon pagsibog sa unahan sa imong espirituhanong panaw, mahiduol sa Langitnong Amahan ug kang Jesukristo. Sayri nga Sila nahigugma kanimo ug andam nga motabang kanimo sa imong mga paningkamot.
Pagpamatuod kabahin sa Langitnong Amahan ug kang Jesukristo ug sa Ilang tinguha nga motabang.