1 Mga Taga-Corinto 8–13

Kinatibuk-ang Pagpasabot

Samtang si Pablo nagpadayon sa iyang sulat ngadto sa mga Taga-Corinto, siya mitudlo nga kinahanglan kita mopili nga ibulag ang atoang kaugalingon gikan sa tintasyon. Siya nagpasabot nga ang mga lalaki ug mga babaye gituyo nga magtinabangay ug mosuporta sa usag usa diha sa ilang pagsunod sa Ginoo. Siya nagtudlo nga kon ang tanang mga miyembro makaila ug mogamit sa espirituwal nga mga gasa nga ilang nadawat gikan sa Ginoo, sila mahisama sa daghang mga parte sa usa ka lawas nga nagtinabangay sa hiniusa. Siya usab nagsulat sa detalye mahitungod sa gugma nga susama kang Kristo, o sa gugmang putli, ug nganong kinahanglan natong makab-ot kini.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

1 Mga Taga-Corinto 10

Katuyoan sa leksiyon: Kini nga leksiyon makatabang sa mga estudyante nga mosalig kang Jesukristo aron mabuntog ang tintasyon.

Pagpangandam sa estudyante: Dapita ang mga estudyante sa pagtuon sa “1 Mga Taga-Corinto 10:1–13: Ang Dios Mohatag og Paagi aron Pagbuntog sa Tintasyon” diha sa Dali, Sunod Kanako—Alang sa mga Indibidwal ug mga Pamilya: Bag-ong Tugon 2023. Samtang sila nagtuon, mahimo nilang pamalandongan kini nga pangutana: “Unsang mga klase sa paglingkawas gikan sa tintasyon ang gihatag sa Langitnong Amahan alang kaninyo?”

Butang sa leksiyon: Usa ka magnet ug usa ka puthaw nga butang
Bidyo: “Pagtinguha kang Kristo sa Matag Hunahuna” (14:47; tan-awa gikan sa time code 2:44 hangtod sa 3:23)

1 Mga Taga-Corinto 11

Katuyoan sa leksiyon: Kini nga leksiyon makatabang sa mga estudyante aron mas makasabot nganong ang mga lalaki ug mga babaye nagkinahanglan sa usag usa aron makab-ot ang kinatas-ang mga panalangin sa plano sa Langitnong Amahan.

Pagpangandam sa estudyante: Dapita ang mga estudyante sa paghinumdom kanus-a sila nakakita og mga lalaki ug mga babaye nga nagtinabangay ug nagsuporta sa usag usa. Dasiga sila sa paghunahuna mahitungod sa giunsa sa nagkalainlaing mga panglantaw, mga abilidad, ug mga kalig-on sa mga lalaki ug mga babaye positibong nakaimpluwensiya sa relasyon sa kaminyoon, pamilya, komunidad, ug Simbahan.

Doktrinal nga Kahanas: 1 Mga Taga-Corinto 11:11

Katuyoan sa leksiyon: Kini nga leksiyon makatabang sa mga estudyante aron madugangan ang ilang kahanas sa 1 Mga Taga-Corinto 11:11 diha sa ilang pagsag-ulo sa pakisayran ug mahinungdanong hugpong sa pulong sa kasulatan, pagpasabot sa doktrina, ug paggamit sa mga baroganan sa pag-angkon og espirituhanong kahibalo ngadto sa tinuod nga sitwasyon sa kinabuhi.

Pagpangandam sa estudyante: Dapita ang mga estudyante sa pagbasa sa seksiyon 3 sa artikulo nga “Mga Lalaki ug Mga Babaye diha sa Buhat sa Ginoo,” ni Presidente M. Russell Ballard sa Korum sa Napulog Duha ka Apostoles (Liahona, Abr. 2014, 46–49), nga mangita sa mga kamatuoran nga kinahanglan natong masabtan sa doktrina sa Dios mahitungod sa mga lalaki ug mga babaye.

Sugyot sa pagtudlo pinaagi sa videoconference: Mahimong ipahiangay ang pagbansay sa paggamit sigon sa mga sayop nga pagsabot o mga sitwasyon nga gipakita sa mga estudyante nga may kalabotan sa mga papel sa mga babaye ug mga lalaki sa plano sa Langitnong Amahan. Kon ang mga estudyante nagsang-at og lainlaing mga sayop nga pagsabot o mga sitwasyon, mahimong i-organisar ang mga estudyante ngadto sa mga breakout nga room aron ila kining mahisgotan.

1 Mga Taga-Corinto 12

Katuyoan sa leksiyon: Kini nga leksiyon gituyo aron matabangan ang mga estudyante nga maila ang espirituwal nga mga gasa nga gihatag sa Ginoo nganha kanila aron mopanalangin sa uban ug mopalig-on sa Iyang Simbahan.

Pagpangandam sa estudyante: Dapita ang mga estudyante sa pag-ila og usa o duha ka espirituwal nga mga gasa nga gihatag kanila. Mahimo silang mangutana sa mga miyembro sa pamilya o uban pang mga gisaligan nga mga minahal aron matabangan sila nga mobuhat niini. Hangyoa ang mga estudyante sa pagpamalandong sa ilang mga gasa ug giunsa nila kini paggamit aron mopanalangin sa uban.

Butang sa leksiyon: Usa ka naputos na nga regalo
Content nga ipakita: Ang pamahayag ni Elder Marvin J. Ashton sa wala kaayo naila nga espirituwal nga mga gasa

Sugyot sa pagtudlo pinaagi sa videoconference: Mahimong dapiton ang mga estudyante sa pagpangutana mahitungod sa espirituwal nga mga gasa diha sa chat. Ipahiangay ang leksiyon kon gikinahanglan aron matubag ang mga pangutana nga ilang gipangutana.

1 Mga Taga-Corinto 13

Katuyoan sa leksiyon: Kini nga leksiyon gituyo aron matabangan ang mga estudyante nga mabati ang tiunay nga gugma ni Jesukristo alang kanila ug aron matabangan sila nga magtinguha sa gasa sa gugmang putli aron mabati ang maong gugma alang sa uban.

Pagpangandam sa estudyante: Dapita ang mga estudyante sa paghunahuna mahitungod sa usa ka miyembro sa pamilya, higala, o lain pang indibidwal nga gusto nila og mas maayo nga relasyon uban kaniya. Hangyoa ang mga estudyante sa pagkonsiderar sa epekto sa pagpakita og dakong gugma alang niining tawhana diha sa relasyon.

Sugyot sa pagtudlo pinaagi sa videoconference: Mahimong gamiton ang mga breakout room aron matugotan ang mga estudyante nga maghisgot og mga aspeto sa gugmang putli ug giunsa sa Manluluwas pagpakita niini.