1 Mga Taga-Corinto 12

Espirituwal nga mga Gasa

A group of young men and young women enjoy each others’ company as they visit together in Paris France.

Si Pablo nagsulat sa mga Santos sa Corinto aron tabangan sila nga maila ang ilang panginahanglan nga mahiusa kang Kristo. Siya nagtudlo nga kon ang tanang mga miyembro makaila ug mogamit sa espirituwal nga mga gasa nga ilang nadawat gikan sa Ginoo, sila mahisama sa daghang mga parte sa usa ka lawas nga nagtinabangay sa hiniusa. Kini nga leksiyon gituyo aron matabangan kamo nga maila ang espirituwal nga mga gasa nga gihatag sa Ginoo kaninyo aron mopanalangin sa uban ug molig-on sa Iyang Simbahan.

Espirituwal nga mga gasa. Ang Ginoo nagpanalangin sa tanang mga miyembro sa Iyang Simbahan og espirituwal nga mga gasa ug mga abilidad. Paningkamot aron madiskobre, mapalambo, ug mapadako kining espirituwal nga mga gasa aron moalagad sa matag estudyante sa seminary, ug modasig sa mga estudyante nga mobuhat sa susama.

Pagpangandam sa estudyante: Dapita ang mga estudyante nga ilhon ang usa o duha ka espirituwal nga mga gasa nga gihatag sa ilaha. Mahimo silang mangutana sa mga miyembro sa pamilya o uban pang mga gisaligan nga mga minahal aron matabangan sila nga mobuhat niini. Hangyoa ang mga estudyante sa pagpamalandong sa ilang mga gasa ug giunsa nila kini paggamit aron mopanalangin sa uban.

Posible nga mga Kalihokan sa Pagkat-on

Pagdawat og mga gasa

Mahimong magdala og usa ka pinutos nga regalo ngadto sa klase ug ipakita kini panahon sa panaghisgot.

Unsa ang usa ka mahinungdanong gasa nga imong nadawat?
Unsa ang epekto niini nga gasa diha sa imong kinabuhi? Unsa ang gitugot niini nga imong buhaton?
Unsay imong gibati ngadto sa tawo nga mihatag og gasa kanimo?

Sa imong pagtuon sa 1 Mga Taga-Corinto 12 , imong makat-onan ang mahitungod sa espirituwal nga mga gasa nga gihatag sa Langitnong Amahan sa Iyang mga anak. Pangitaa kon nganong Siya naghatag niini nga mga gasa, ug tinguhaa ang inspirasyon gikan sa Espiritu Santo aron matabangan ka sa pag-ila sa gasa nga gihatag kanimo.

Ang Ginoo naghatag kanato og espirituwal nga mga gasa

“Ang espirituwal nga mga gasa mao ang mga panalangin o mga abilidad nga gihatag sa Dios ngadto sa Iyang mga anak pinaagi sa gahom sa Espiritu Santo” (Gospel Topics, “Spiritual Gifts,” topics.ChurchofJesusChrist.org).

Mahimong makabenepisyo sa mga estudyante ang pagtinabangay diha sa mga grupo samtang sila magtuon sa mosunod nga mga tudling sa kasulatan. Ang matag miyembro sa grupo mahimong mobasa og lainlaing mga bersikulo ug moreport ngadto sa ubang miyembro sa ilang grupo kon unsa ang ilang nakat-onan.

Pagkat-on mahitungod sa espirituwal nga mga gasa pinaagi sa pagbasa sa 1 Mga Taga-Corinto 12:3–11 .

Unsa ang pipila ka mga espirituwal nga mga gasa ang nalista niini nga mga bersikulo?

Adunay daghang lainlaing espirituwal nga mga gasa. Aron makat-on mahitungod sa uban, basaha ang Moroni 10:8–18 ; Doktrina ug mga Pakigsaad 46:11–26 ; ug ang mosunod nga pamahayag ni Elder Marvin J. Ashton (1915–94) sa Korum sa Napulog Duha ka Apostoles:

Tugoti ko sa paghisgot og pipila ka mga gasa nga wala kaayo makita o nakitaan og importansiya apan importante kaayo … : ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panaglalis; … ang gasa sa pagpangita kon unsa ang matarong; ang gasa nga dili dayon mohukom; ang gasa sa pagpangayo sa Dios og giya; … ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod.

(Marvin J. Ashton, “Adunay Daghang mga Gasa,” Ensign, Nob. 1987, 20)

Human ang mga estudyante adunay kahigayonan sa pagtuon dapita sila sa pagpaambit og mga kamatuoran nga ilang nakat-onan mahitungod sa Ginoo ug sa mga gasa nga Iyang gitinguha nga mapanalangin kanato.

Kinsa ang gipanalanginan sa Ginoo niini nga espirituwal nga mga gasa?
Unsa ang natabang niini kanimo aron makasabot mahitungod sa Ginoo?

Usa ka kamatuoran nga lagmit nimong maila mao nga ang Ginoo naghatag sa matag miyembro sa Iyang Simbahan og labing menos sa usa ka espirituwal nga gasa aron mopanalangin sa uban.

Dapita ang mga estudyante sa pagpamalandong sa ilang espirituwal nga mga gasa. Kon sila gidapit aron mobuhat sa pagpangandam sa estudyante sa klase, dapita sila sa paghunahuna mahitungod sa panagsulti nila sa usa ka miyembro sa pamilya o sa laing tawo nga ilang naistorya mahitungod sa ilang espirituwal nga mga gasa.

Unsa ang imong gibati mahitungod sa Langitnong Amahan ug kang Jesukristo, sa pagkahibalo nga Ilaha kang gipanalanginan og espirituwal nga gasa?
Sa unsang paagi nga ang pagkahibalo nga ikaw gihatagan og usa ka espirituwal nga gasa nakaimpluwensiya kon giunsa nimo pagtan-aw ang imong balaan nga pagkatawo?
Ngano sa imong hunahuna ang Dios naghatag og espirituwal nga mga gasa ngadto sa matag miyembro sa Simbahan ug dili lamang ngadto sa pipila ka mga miyembro?

Gusto sa Ginoo nga kita mopanalangin sa usag usa

Samtang ang mga estudyante nagkat-on mahitungod sa lainlaing mga parte sa lawas ug unsa ka mahinungdanon ang matag usa, ikonsiderar ang pagdapit og mga estudyante nga mohuman og usa ka tahas nga pagaapilan og daghang mga miyembro sa klase, sama sa pagbalhin og usa ka dakong butang sa klasrom. Lain pang opsiyon mao ang pagtugot sa mga estudyante sa paggamit lamang og usa ka kamot samtang nagtinabangay sa pagtukod og usa ka gamayng istruktura, paggisi og mga piraso sa papel, o paghimo og lain nga tahas.

Basaha ang 1 Mga Taga-Corinto 12:14–20 aron makita ang pagtandi nga gigamit ni Pablo aron matabangan kita nga maila ang importansiya sa atong indibidwal nga mga kontribusyon.

Sa unsa man gitandi ni Pablo ang Simbahan niini nga tudling? Unsa ang gitudlo niini nga pagtandi kanimo mahitungod sa espirituwal nga gasa?
Sa unsang paagi nga kamo napanalanginan pinaagi sa espirituhanong mga gasa sa uban?

2:3

Mahimong dapiton ang pipila ka mga boluntaryo nga mopaambit sa espirituwal nga mga gasa nga ilang nakita sa ilang kaugalingon, sa ilang mga klasmeyt, o sa ubang mga kauban, ug dasiga sila sa pagpasabot sa unsang paagiha kining mga gasa mahimong makapanalangin sa uban. Isip magtutudlo, tan-awa kon adunay mga estudyante nga makabenepisyo nga masultihan, panahon sa klase o sa pribado, unsang espirituwal nga mga gasa ang makita diha kanila.

Pamalandongi giunsa sa espirituwal nga mga gasa nga gihatag diha kanimo pagpanalangin kanimo ug unsaon nimo paggamit niini aron sa pagpanalangin sa imong pamilya, ward o branch, ug ang uban. Mahimo nimong irekord sa imong journal sa pagtuon ang bisan unsang mga impresiyon gikan sa Espiritu Santo mahitungod sa imong mga gasa.

Paghisgot og pipila o tanan sa mosunod nga mga pangutana o dapita ang mga estudyante sa pagtubag nila sa ilang journal sa pagtuon.

Unsa ang imong gibati nga gusto sa Ginoo nga imong masabtan mahitungod sa imong kaugalingon ug sa imong espirituwal nga mga gasa?
Unsa nga pagdasig ang mahimo nimong ikahatag sa usa ka tawo nga mibati nga siya walay espirituwal nga gasa?
Unsa nga espirituwal nga gasa ang imong gitinguha? Unsa ang imong mabuhat sa pagpangita niini nga gasa? (Ang Ginoo nagdapit kanato aron mangita og espirituwal nga mga gasa; tan-awa ang 1 Taga-Corinto 12:31 ; 14:1 ; Doktrina ug mga Pakigsaad 46:7–9 .)
Unsa ang pipila sa mga paagi nga imong magamit ang imong espirituwal nga mga gasa aron mopanalangin sa uban? Sa unsang paagi kini makatabang kanimo aron mahimong mas mahisama sa Manluluwas?

Pagdapit og andam nga mga estudyante sa pagpakigbahin kon unsay ilang gisulat. Mahimong mopaambit og usa ka personal nga kasinatian o pagpamatuod sa espirituwal nga mga gasa.

Komentaryo ug Background nga Impormasyon

Sa unsang paagi nako magamit ang akong espirituwal nga mga gasa aron sa pag-alagad sa uban?

Si Presidente Dieter F. Uchtdorf, kanhi sa Unang Kapangulohan, mipaambit unsaon nato pagsunod sa ehemplo ni Jesukristo:

2:3

Kon ako maghunahuna sa Manluluwas, Siya akong mahulagway sa kanunay nga ang Iyang mga kamot gituyhad, nagkab-ot aron sa paghupay, pag-ayo, pagpanalangin, ug paghigugma. Ug kanunay Siyang nakig-istorya nga, dili gayod mopakaubos, sa mga tawo. Gihigugma Niya ang mga mapaubsanon ug ang mga maaghop ug naglakaw taliwala kanila, nangalagad ngadto kanila ug nagtanyag og paglaom ug kaluwasan. 

Mao kana ang Iyang gihimo atol sa Iyang mortal nga kinabuhi; mao unta kana ang Iyang buhaton kon nagpuyo pa Siya uban kanato karon; ug mao kana ang kinahanglan natong buhaton isip Iyang mga disipulo ug mga miyembro sa Ang Simbahan ni Jesukristo sa mga Santos sa Ulahing mga Adlaw. … 

Samtang kita mosunod sa Iyang hingpit nga ehemplo, ang atong mga kamot mamahimong Iyang mga kamot; ang atong mga mata, Iyang mga mata; ang atong kasingkasing, Iyang kasingkasing. 

(Dieter F. Uchtdorf, “Kamo ang Akong mga Kamot,” Ensign o Liahona, Mayo 2010, 68)

Si Elder David A. Bednar sa Korum sa Napulog Duha ka Apostoles mitudlo:

Nakadawat kita og espirituwal nga mga gasa aron makapanalangin sa ubang tawo. Kon ang atong gitinguha mao ang pagdawat og usa ka gasa tungod kay gusto nato kini, kita posibleng dili makadawat niini. Diha sa atong pagpangita aron moalagad sa uban sigon sa mga pagtulun-an ni Jesukristo, nan kita gipanalanginan og espirituwal nga mga gasa ug gipataas nga kapasidad nga naghimong posible sa pagpangalagad.

(David A. Bednar, “Understanding Heavenly Father’s Plan,” ChurchofJesusChrist.org/prophets-and-apostles/unto-all-the-world/understanding-heavenly-fathers-plan)

Unsa ang akong mabuhat kon ako mibati nga walay importanteng espirituwal nga gasa?

2:3

Si Elder John C. Pingree Jr. sa Kapitoan mipaambit og usa ka pananglitan sa usa ka sister kinsa nakat-on nga siya adunay usa ka espirituwal nga gasa nga wala niya mabantayi:

Usa ka adlaw, usa ka dismayado nga sister nangamuyo, “Ginoo, unsay akong personal nga pangalagad?” Mitubag Siya, “Tan-awa ang uban.” Usa kadto ka espirituhanong gasa! Sukad niadto, nakaplagan niya ang kalipay sa pagtagad niadtong kanunay nga makalimtan, ug ang Dios mitrabaho pinaagi kaniya sa pagpanalangin og daghan. Ang atong ubang mga gasa dili makapainila nato pinaagi sa mga sumbanan sa kalibotan, apan importante kini sa Dios ug sa Iyang buhat.

(John C. Pingree, Jr., “Ako Adunay Buhat alang Kanimo,” Liahona, Nob. 2017, 33–34)

Unsa ang angay nakong buhaton kon ako mobati og kakulang alang sa akong mga buluhaton sa Simbahan?

Si Presidente Dieter F. Uchtdorf, sa kanhi Unang Kapangulohan, mitudlo:

Tingali kamo mobati nga anaay uban nga labawng makahimo o may labaw nga kasinatian nga mas makahimo sa inyong mga calling ug ubang mga buluhaton labaw kay sa inyong mahimo, apan ang Ginoo naghatag ninyo niini nga mga responsibilidad nga may hinungdan. Tingali may mga tawo ug mga kasingkasing nga kamo ang bugtong makakab-ot ug makatandog. Tingali wala nay lain nga makahimo niini sa ingon nga paagi.

(Dieter F. Uchtdorf, “Mangusog Diha sa Imong Gibarogan,” Liahona, Nob. 2008, 56)