Doktrinal nga Kahanas: 1 Mga Taga-Corinto 11:11
Ang mga Lalaki ug mga Babaye Parehas nga Mahinungdanon sa Plano sa Langitnong Amahan
Sa imong pagtuon sa 1 Mga Taga-Corinto 11, imong nakat-onan ang mahitungod sa giunsa sa Dios pagtan-aw ang talagsaon ug balaanong mga papel sa mga babaye ug mga lalaki. Ang tuyo niini nga leksiyon mao ang pagtabang kanimo nga madugangan ang imong kahanas niini nga mga pagtulun-an samtang imong memoryahon ang pakisayran ug ang mahinungdanong hugpong sa mga pulong sa kasulatan alang sa 1 Mga Taga-Corinto 11:11, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinuod nga sitwasyon sa kinabuhi.
Pagpangandam sa estudyante: Dapita ang mga estudyante sa pagbasa sa seksiyon 3 sa artikulo nga “Mga Lalaki ug Mga Babaye diha sa Buhat sa Ginoo” ni Presidente M. Russell Ballard sa Korum sa Napulog Duha ka Apostoles (New Era, Abril 2014, 2–5), nga mangita sa mga kamatuoran nga kinahanglan nga atong masabtan mahitungod sa doktrina sa Dios mahitungod sa mga lalaki ug mga babaye.
Posible nga mga Kalihokan sa Pagkat-on
Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “1 Mga Taga-Corinto 11,” nga mao ang pangkontekstong leksiyon para sa tudling sa doktrinal nga kahanas sa 1 Mga Taga-Corinto 11:11 . Kon gikinahanglang ibalhin kini nga leksiyon sa tudling sa doktrinal nga kahanas ngadto sa laing semana, seguroha nga matudlo usab ang tukma nga pangkonteksto nga leksiyon nianang semanaha.
Ipasabot ug Isag-ulo
Ang mosunod nga obserbasyon mahitungod sa mga kamot gipahiangay gikan sa pakigpulong ni Linda K. Burton nga “Magdungan Kita’g Saka” (Liahona, Mayo 2015, 29–32).
Tan-awa ang imong mga kamot. Obserbari giunsa nila pagkaparehas sa usag usa ug giunsa nila pagkalahi.
-
Kon ang matag usa ka kamot makahimo sa paglihok sa tinagsa , ngano sa imong hunahuna gidisenyo sa Langitnong Amahan nga ang Iyang mga anak adunay duha ka mga kamot?
-
Sa unsang paagi nga ang mga kalahian sa imong mga kamot nakatabang kanimo nga matuman ang mga tahas o magamit ang imong mga talento?
-
Sa unsang paagi nga ang imong obserbasyon mahitungod sa imong mga kamot may koneksiyon sa 1 Mga Taga-Corinto 11:11 ?
Hatagi ang mga estudyante og kahigayonan sa pagsag-ulo sa pakisayran ug mahinungdanong hugpong sa mga pulong sa kasulatan sa 1 Mga Taga-Corinto 11:11 . Ang mosunod mao ang usa ka posibleng kalihokan sa pagmemorya. Kon angay, dasiga ang mga estudyante sa paggamit sa Doktrinal Mastery nga app aron pagrebyo ug pagsag-ulo niini nga tudling.
Ang mosunod nga kalihokan makatabang nimo sa pagsag-ulo sa pakisayran sa doktrinal nga kahanas nga 1 Mga Taga-Corinto 11:11 ug sa iyang mahinungdanong hugpong sa pulong sa kasulatan, “Hinoon diha sa Ginoo ang babaye dili gawas sa lalaki ni ang lalaki gawas sa babaye.”
Isulat ang mahinungdanong hugpong sa mga pulong sa kasulatan ug pakisayran sa kasulatan. Basaha og i-recite ang hugpong sa mga pulong ug pakisayran sa makadaghang higayon, papason o tangtangon ang mga pulong sa matag higayon. Padayon hangtod nga kamo komportable na sa pagbalik og litok sa mahinungdanong hugpong sa mga pulong sa kasulatan ug pakisayran nga dili magtan-aw sa mga pulong.
Pagbansay sa paggamit
Sa imong journal sa pagtuon, irekord ang mosunod nga mga baroganan sa pag-angkon og espirituhanong kahibalo:
-
Molihok inubanan sa hugot nga pagtuo
-
Susiha ang mga konsepto ug mga pangutana inubanan sa mahangtorong panglantaw
-
Pagtinguha pa og dugang nga panabot pinaagi sa balaang gitudlo nga mga tinubdan
Ihulagway ang matag baroganan sa duha o tulo ka mga kapahayag [sentence]. Mahimo sab kang modangop sa mga parapo 5–12 diha sa Kinauyokang Dokumento sa Doktrinal nga Kahanas (2022) aron pagsusi sa imong kahibalo ug pagdugang og bisan unsang importanteng impormasyon nga lagmit imong nataligam-an.
Dasiga ang mga estudyante sa paghinumdom unsay ilang nakat-onan sa pagpangandam sa estudyante. Samtang ang mga estudyante naghisgot sa mosunod nga pangutana, mahimong isulat (o ipasulat sa mga estudyante) ang ilang mga tubag ngadto sa pisara. Ang pagrekord sa ilang mga ideya makatabang sa mga estudyante nga makabaton og koneksiyon sa unsa ang ilang makat-onan.
Sa 1 Mga Taga-Corinto 11:11 , imong nakat-onan nga sa plano sa Langitnong Amahan, ang mga babaye ug mga lalaki parehong mahinungdanon.
-
Sa unsang paagi nga kining kamatuoran wala masabti o gibalewala sa katilingban?
-
Unsa ang pipila sa mga sitwasyon sa imong kinabuhi diin lagmit aduna kay kahigayonan sa pagtudlo o pagdepensa niini nga kamatuoran?
Aron madugangan ang personal nga kalambigitan, ikonsiderar ang paggamit og mga baroganan sa pag-angkon og espirituhanong kahibalo ngadto sa mga tubag sa mga estudyante sa miaging mga pangutana. Kon gikinahanglan, gamita ang mga senaryo nga gihatag niini nga leksyon.
Mahimong makatabang ang pagpakita sa mosunod nga mga pangutana alang sa paghisgot o hatagi ang mga estudyante og kauban nga handout.
Tan-awa sa unsang paagi mas labing makakat-on ang mga estudyante gikan niini nga kalihokan. Mahimo nila kining himoon nga nag-inusara, sa gagmay nga mga grupo, o isip usa ka klase. Mahimong makatabang ang paggahin og pipila ka oras sa kataposan sa klase aron paghisgot sa ilang mga nakaplagan.
Pagpili og usa sa mosunod nga mga senaryo, ug paghunahuna mahitungod sa unsaon nga ang paggamit sa mga baroganan sa pag-angkon og espirituhanong kahibalo makatabang sa usa ka tawo nga makasabot sa kamatuoran gikan sa 1 Mga Taga-Corinto 11:11 mahitungod sa mga papel sa mga lalaki ug mga babaye sa plano sa Langitnong Amahan.
-
Ang manghod nga babaye ni Kalee nga si Elle nakadungog sa pipila sa mga lalaki sa tulunghaan nga nagsulti nga ang mga lalaki mas importante kaysa mga babaye. Si Elle nangutana kang Kalee, “Dili ba ako bililhon sama sa mga lalaki?”
-
Si Reid nabalaka tungod kay siya nakadungog sa pipila sa iyang kaubang mga miyembro sa korum nga nag-istorya nga walay pagtahod mahitungod sa mga babaye.
-
Human makatan-aw og usa ka sikat nga salida, usa ka grupo sa mga higala nagbiay-biay sa kataw-anan nga mga aksiyon sa karakter sa amahan. Ang pipila miuyon nga ang amahan wala kinahanglana, ug usa ka higala miingon, “Kini mao ang hinungdan nga dili nimo kinahanglan ang usa ka lalaki aron pagtukod og usa ka malipayon nga pamilya.”
-
Sila si Esteban ug si Klara nag-andam nga kaslon sa templo. Ang ilang mga ginikanan nagsugyot nga sila mag-istorya mahitungod sa unsaon sa matag usa pagtuman sa lainlaing mga papel ug mga responsibilidad sa ilang umaabot nga pamilya.
Molihok inubanan sa hugot nga pagtuo
-
Unsa ang mga paagi nga ikaw o ang indibidwal sa senaryo mahimong makalihok inubanan sa hugot nga pagtuo agig tubag sa isyu nga gipasaka?
-
Sa unsang paagi nga ang paghatag og bili sa talagsaon ug importanteng mga papel sa mga babaye ug mga lalaki nakatabang kanimo sa pagsunod kang Jesukristo?
Susiha ang mga konsepto ug mga pangutana inubanan sa mahangtorong panglantaw
-
Unsa ang imong nasayran mahitungod sa Langitnong Amahan ug sa Iyang plano nga mahimong makatabang kon ikaw makahinagbo og usa ka sitwasyon sama niini?
-
Unsa ang pipila sa mga papel sa mga lalaki ug mga babaye sa plano sa Langitnong Amahan?
Pangita og dugang nga impormasyon pinaagi sa balaanong gipili nga mga tinubdan
-
Sa unsang paagi nga ang imong pagsabot ug pagpamatuod sa mga kamatuoran nga gitudlo sa 1 Mga Taga-Corinto 11:11 nakatabang kanimo sa pagsanong niini nga sitwasyon?
Kini mahimong usa ka oportunidad alang sa mga estudyante aron mopaambit sa unsa ang ilang nakat-onan sa ilang pagpangandam sa klase.
-
Unsa ang lain pang dinasig nga mga pagtulun-an gikan sa mga kasulatan o sa mga lider sa Simbahan ang mahimong makatabang kanimo aron matinud-anong motubag?
Rebyo sa doktrinal nga kahanas
Ang mosunod nga rebyo nga kalihokan kinahanglan nga gamiton sa usa ka leksiyon nga itudlo sa umaabot.
Isulat ang mahinungdanong hugpong sa pulong sa kasulatan sa 1 Mga Taga-Corinto 11:11 ngadto sa pisara, nga ilisan ang mga mahinungdanong mga pulong og blangko aron pun-an. Dapita ang mga estudyante sa pagsulat o pagrecite sa mahinungdanong tudling sa kasulatan ug pakisayran, insaktong pagapun-an ang mga blangko. Dapita ang mga estudyante sa pagsulti og balik sa pakisayran ug sa mahinungdanong hugpong sa mga pulong sa kasulatan sa makadaghang higayon.
Dugang nga mga Kalihokan sa Pagkat-on
Balaanong gipili nga mga tinubdan
Mahimong isugyot kini o lain pang balaanong gitudlo nga mga tinubdan samtang ang mga estudyante motubag sa mga senaryo:
M. Russell Ballard, “Ang mga Lalaki ug mga Babaye diha sa Buhat sa Ginoo,” Liahona, Abril 2014, 48–49Linda K. Burton, “Magdungan Kita’g Saka,” Liahona, Mayo 2015, 29–32Jean Bingham, “Nagkahiusa sa Pagtuman sa Buhat sa Dios,” Liahona, Mayo 2020, 60–63
Sugilanon ni Monika
Sa usa ka sibya sa pagbansay alang sa Seminaries and Institutes of Religion, si Brother Chad H Webb nakigpulong giunsa sa mga baroganan sa pag-angkon og espirituhanong kahibalo mahimong magamit sa usa ka senaryo mahitungod sa usa ka babaye nga ginganlan og Monika. Human mag-atubang og akusasyon nga ang Simbahan wala naghatag og bili sa mga babaye, si Monika dili segurado unsaon pagtubag.
Mahimong makatabang sa mga estudyante ang paggamit sa sugilanon ni Monika aron maghisgot sa mga kamatuoran nga gitudlo sa 1 Mga Taga-Corinto 11:11–12 ug magbansay sa paggamit sa mga baroganan sa pag-angkon og espirituhanong kahibalo. Ikonsiderar ang paghimo og mga bahin sa pakigpulong ni Brother Webb ngadto sa mga estudyante isip usa ka kapanguhaan.
Tan-awa ang Chad H Webb, “Doktrinal nga Kahanas” ( pakigpulong nga gihatag atol sa sibya sa tinuig nga training sa Seminaries and Institutes of Religion, Hunyo 14, 2016), broadcasts.ChurchofJesusChrist.org.
Paghisgot kabahin sa Kaminyoon sa Managsama og Sekso
Samtang ang mga estudyante naghisgot sa mga sitwasyon diin ang mga kamatuoran sa 1 Mga Taga-Corinto 11:11 lagmit kinahanglang itudlo o depensahan, mahimo nilang hisgotan ang kabahin sa kaminyoon sa managsama og Sekso. Seguroha nga hisgotan kini nga hilisgotan uban ang pagkasensitibo, kalooy, ug gugma. Apil ang 1 Mga Taga-Corinto 11:8–9, 12 ug ang mga parapo 2 ug 7 sa “ Ang Pamilya: Usa ka Pamahayag ngadto sa Kalibotan ” (ChurchofJesusChrist.org) mahimo usab nga makatabang.
Hinumdomi nga ang tumong niining maong mga kalihokan dili aron ihatag sa magtutudlo ang tanang mga tubag apan aron magbansay ang mga estudyante sa paggamit sa mga baroganan sa pag-angkon og espirituhanong kahibalo. Tinguhaa ang giya sa Espiritu samtang ikaw maminaw sa mga estudyante ug giaghat sa pagpangutana aron matabangan sila nga maproseso ang ilang mga kabalaka.
Ang mosunod nga sitwasyon mahimong magamit puli sa sitwasyon diha sa leksiyon:
Si Olivia adunay pipila ka mga higala nga mibati og kaibog sa samang sekso. Miingon siya, “Naglisod ko sa pagsabot nganong ang Simbahan padayon sa pagtudlo nga sayop ang kaminyoon sa managsama nga sekso. Nganong did-an man ang mga tawo sa ilang kalipay nga naggikan sa paghimo sa sama og sekso nga mga relasyon?”