Ang Talagsaon ug Balaang mga Tahas sa mga Lalaki ug sa mga Babaye
Imahe
A group of young men and young women hold each other’s hands in a circle and smile at each other to encourage one another.
Nagpadayon sa iyang panudlo ug pagdasig ngadto sa mga Santos sa Corinto, si Pablo mitudlo nga ang mga lalaki ug mga babaye gituyo nga magtinabangay ug mosuporta sa usag usa diha sa ilang pagsunod sa Ginoo. Ang tuyo niini nga leksiyon mao ang pagtabang kanimo aron mas makasabot nganong ang mga lalaki ug mga babaye nagkinahanglan sa usag usa aron makab-ot ang kinatas-ang mga panalangin sa plano sa Langitnong Amahan.
Pagpangandam sa estudyante: Dapita ang mga estudyante sa paghinumdom kanus-a sila nakakita og mga lalaki ug mga babaye nga nagtinabangay ug nagsuporta sa usag usa. Dasiga sila sa paghunahuna mahitungod sa kon giunsa sa lainlaing mga panglantaw, mga abilidad, ug mga kalig-on sa mga lalaki ug mga babaye positibong nag-impluwensiya sa mga relasyon sa kaminyoon, pamilya, komunidad, ug Simbahan.
Posible nga mga Kalihokan sa Pagkat-on
Ang mga papel sa mga babaye ug mga lalaki
Isip alternatibong paagi sa pagsugod, mahimong ipakita ang bahin sa pakigpulong ni Presidente Jean B. Bingham nga “Nagkahiusa sa Pagtuman sa Buhat Sa Dios” gikan sa mga time code nga 9:45–10:54.
Imahe
A couple rides their tandem bike for morning exercise.
Hunahunaa ang mosunod nga mga pangutana samtang imong gitan-aw kining hulagway sa usa ka tandem bike team.
Unsa nga mga kahanas o mga abilidad ang gikinahanglan aron matabangan kini nga team nga molampos?
Sa unsang paagi lagmit kining mga kalahian tali sa mga indibidwal nga nagpalig-on sa ilang panag-uban ug nagtabang kanila aron mahimong mas nahiusa?
Sa imong pagtuon sa 1 Mga Taga-Corinto 11 , pamalandongi kon sa unsang paagi nga ang mga lalaki ug mga babaye matarong nga magtinabangay isip managsama nga kauban sa pagtuman sa ilang balaanong gitudlo nga mga tahas ug mahimong takos alang sa kinabuhing dayon.
Tabangi ang mga estudyante aron makasabot nga pipila sa mga pagtulun-an ni Pablo may kalabotan sa pihong kultural nga mga sumbanan niadtong panahona ug mahimong lisod sabton. Pahinumdomi ang mga estudyante sa pagbantay nga dili hukman ang mga sulat ni Pablo ug ang mga tawo niadtong panahona sigon sa mga sumbanan nga gipadayag sa Ginoo karon.
Sa 1 Mga Taga-Corinto 11:1–16 , gihisgotan ni Pablo ang sosyal nga mga kustombre sa mga Taga-Corinto sa iyang panahon nga wala mahiuyon sa panan-aw sa Ginoo sa balaang tahas sa mga lalaki ug mga babaye. Importante nga dili kalibogan ang kini nga mga kustombre diha sa mga kamatuoran nga gitudlo ni Pablo.
Pinaagi kang Apostol Pablo, ang Ginoo mipadayag og walay kataposang mga kamatuoran mahitungod sa balaanong mga tahas sa mga lalaki ug sa mga babaye diha sa 1 Mga Taga-Corinto 11:11–12 .
Basaha ang 1 Mga Taga-Corinto 11:11–12 , nga mangita sa mga kamatuoran nga imong nakat-onan mahitungod sa Dios, sa mga lalaki, ug sa mga babaye.
Ang mga babaye ug mga lalaki sa bug-os nga pakigkauban sa Ginoo
Sa 1 Mga Taga-Corinto 11:11 atong nakat-onan nga sa plano sa Langitnong Amahan, parehong mahinungdanon ang mga lalaki ug mga babaye.
Mahimong ipakita ang mosunod nga mga pamahayag ug dapiton ang mga estudyante sa pagbasa ug paghisgot nga managpares o sa ginagmayng mga grupo sa mga pangutana nga mosunod. Mahimo silang mopaambit sa klase og mga ehemplo sa mga lalaki ug mga babaye nga nagtinabangay.
Basaha ang mosunod nga mga pamahayag gikan sa pamahayag sa pamilya ug gikan sa mga miyembro sa Korum sa Napulog Duha ka Apostoles, nga mangita og mga paagi nga ang mga lalaki ug mga babaye mahinungdanon sa plano sa Langitnong Amahan.
Gikan sa pamahayag sa pamilya atong mabasa:
Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an sa Ginoong Jesukristo. Malamposon nga mga kaminyoon ug mga pamilya natukod ug napadayon diha sa mga baroganan sa hugot nga pagtuo, pag-ampo, paghinulsol, pagpasaylo, pagtahod, gugma, kalooy, buhat ug maayong makalingaw nga mga kalihokan. Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatarong ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya. Ang unang mga responsibilidad sa mga inahan mao ang pag-atiman sa ilang mga anak. Niining sagrado nga mga responsibilidad, ang mga amahan ug mga inahan adunay katungdanan sa pagtabang sa usag usa ingon nga magkauban.
Si Presidente M. Russell Ballard sa Korum sa Napulog Duha ka Apostoles mitudlo:
Imahe
Official portrait of President M. Russell Ballard of the Quorum of the Twelve Apostles, 2004.
Sa plano sa atong Langitnong Amahan nga naghatag og gahom sa priesthood, ang kalalakin-an dunay responsibilidad sa pagpangalagad sa priesthood, apan dili sila ang priesthood. Ang kalalakin-an ug kababayen-an dunay lainlain apan parehas nga bililhong tahas. Ingon nga ang babaye dili magsabak kon wala ang lalaki, ang lalaki dili hingpit nga makagamit sa gahom sa priesthood sa pagtukod og mahangtorong pamilya kon wala ang babaye. … Sa ato pa sa mahangtorong panglantaw, ang gahom sa pagpasanay ug ang gahom sa priesthood pagaambitan sa bana ug asawa.
Si Elder David A. Bednar sa Korum sa Napulog Duha ka Apostoles mitudlo:
Imahe
Official portrait of President M. Russell Ballard of the Quorum of the Twelve Apostles, 2004.
Ang talagsaong panaghiusa sa espiritwal, pisikal, mental, ug emosyonal nga mga kapasidad sa lalaki ug babaye gikinahanglan sa pagpahinabo sa plano sa kalipay. “Hinoon diha sa Ginoo ang babaye dili gawas sa lalaki ni ang lalaki gawas sa babaye” ( 1 Mga Taga-Corinto 11:11). Ang lalaki ug babaye gituyo aron magkat-on, maglig-on, magpanalangin, ug maghingpit sa usag usa.
Hatagi ang mga estudyante og igong panahon sa paghisgot unsa ang ilang nakaplagan ug ang bisan unsang mga pangutana nga anaa kanila. Pamati pag-ayo samtang sila motubag, ug mahimong mangutana og sunod aron matabangan ang mga estudyante nga mapalawom ang ilang pagsabot sama niini: Ngano sa inyong hunahuna importante man nga masabtan kini nga pagtulun-an? Unsa ang atong nakat-onan mahitungod sa panglantaw sa Langitnong Amahan sa mga babaye ug sa mga lalaki? Sa unsang paagi nga kining panglantaw nalahi gikan sa paagi kon unsaon paghisgot sa kaliboan mahitungod sa mga lalaki ug mga babaye? Sa unsang paagi lagmit ang kana nga kamatuoran nag-impluwensiya sa inyong mga kinaiya ug mga pamatasan?
Ngano kaha sa imong hunahuna nga diha sa plano sa Langitnong Amahan, ang Iyang mga anak nga lalaki ug Iyang mga anak nga babaye magkauban nga magkab-ot sa kinabuhing dayon?
Sa unsang paagi kini nagpakita sa gugma og pagtahod sa Langitnong Amahan alang sa mga babaye ug mga lalaki?
Sa unsang paagi nga ang pagsabot niini nga mga kamatuoran nagtabang kanimo kon ikaw nag-atubang sa nagkasukwahi nga mga panglantaw mahitungod sa mga papel ug mga responsibilidad sa mga lalaki ug mga babaye?
Sa unsang paagi nimo magamit ang kining mga kamatuoran mahitungod sa mga babaye ug mga lalaki sa imong kinabuhi (pananglitan, sa panimalay, sa simbahan kauban sa ubang mga batan-ong lalaki o batan-ong mga babaye, ug diha sa imong pagpangandam alang sa imong umaabot nga kinabuhing may pamilya)?
Depende sa nahabiling oras sa klase, mahimong makabenepisyo ang mga estudyante gikan sa pagpadayon sa ilang pagtuon sa 1 Mga Taga-Corinto 11 ug maghisgot sa sakramento. Tan-awa ang “Dugang nga mga Kalihokan sa Pagkat-on” nga bahin alang sa usa ka paagi nga ang mga estudyante mahimong magtuon sa sakramento.
Komentaryo ug Background nga Impormasyon
Unsa kaha kon ang mga tawo nga akong gihigugma dili maminyo o dili makaanak?
Ang pipila mabalaka o matingala mahitungod sa unsaon pagkatuman sa plano sa Langitnong Amahan alang sa mga babaye ug mga lalaki alang sa kadtong dili maminyo o dili makaanak. Uban sa dakong kaluoy, si Presidente Boyd K. Packer (1924–2015) sa Korum sa Napulog Duha ka Apostoles nagsulti niining makahupay nga mga pulong:
Imahe
Final official portrait of Elder Boyd K. Packer, President of the Quorum of the Twelve Apostles, 2000. Passed away 3 July 2015.
Kadtong wala maminyo o kadtong wala makabaton og anak dili ingon nga wala malakip sa mahangtorong mga panalangin nga ilang gitinguha apan, sa pagkakaron, pabiling wala nila makab-ot. …
Ang inyong tinago nga mga pangandoy ug hinilakan nga mga pangamuyo motandog sa kasingkasing sa Amahan ug sa Anak. Hatagan kamo og personal nga pasalig gikan Nila nga ang inyong kinabuhi mahimong puno ug walay importanteng panalangin nga dili ninyo madawat.
Isip sulugoon sa Ginoo, nga nagbuhat sa katungdanan nga ako gi-orden, mosaad ko niadtong anaa sa samang mga kahimtang nga walay importante sa inyong kaluwasan ug kahimayaan nga dili ihatag kaninyo sa saktong panahon.
(Boyd K. Packer, “Ang Pagsaksi,” Liahona, Mayo 2014, 95)
Nganong si Satanas gusto nga kita mabahin isip mga lalaki ug mga babaye?
Si Presidente Jean B. Bingham, kanhi Kinatibuk-ang Presidente sa Relief Society, mitudlo:
Imahe
Official Portrait of Sister Jean B. Bingham. Photographed in 2017.
Ang kaaway nagmalampuson sa iyang tumong nga mabahin ang mga lalaki ug babaye sa iyang paningkamot sa pag-angkon sa atong mga kalag. Si Lucifer nakahibalo nga kon iyang maguba ang gibati nga panaghiusa sa mga lalaki ug babaye, kon siya makapalibog nato sa atong balaang bili ug mga responsibilidad sa pakigsaad, siya magmalamposon sa paglaglag sa mga pamilya, nga mao ang importanteng mga yunit sa kahangtoran.
Si Satanas nag-agni og panagtandi isip usa ka himan nga mobati nga mas taas o mas ubos, nagtago sa mahangtorong kamatuoran nga ang kalainan sa mga lalaki ug babaye gituyo sa Dios ug parehang gihatagan og bili. Siya misulay sa pagbaliwala sa mga kontribusyon sa mga babaye ngadto sa pamilya ug sa sibil nga katilingban, sa ingon mipakunhod sa ilang makabayaw nga impluwensiya alang sa maayo. Ang iyang tumong mao ang pag-awhag og pakigbisog sa gahom kay sa pagsaulog sa mga kontribusyon sa mga lalaki ug mga babaye nga nagsangkap sa usag usa ug nakasalmot sa panaghiusa.
Giunsa sa Manluluwas pagtratar ang mga babaye ug mga lalaki
Aron matabangan ang mga estudyante sa paghunahuna mahitungod kon giunsa ni Jesukristo pagpakig-istorya ug paghatag og bili sa parehong mga babaye ug mga lalaki, mahimong ipakita ang lainlaing mga hulagway gikan sa Iyang kinabuhi. Kini mahimong maglakip sa pagbuhi kang Lazaro, ang babaye sa atabay, ang babaye nga gidakop tungod sa pagpanapaw, ang dato nga batan-ong magmamando, si Jairus ug iyang anak nga babaye, ang babaye nga adunay sakit sa dugo, ug uban pa. Dapita ang mga estudyante sa pagpamalandong giunsa sa mga ehemplo sa Manluluwas pagpakita kon unsaon nila paghatag og bili ug pagtahod ang parehong mga babaye ug mga lalaki sa ilang kinabuhi.
Kinahanglan atong sutaon ang atong mga kinabuhi samtang moambit kita sa sakramento
Ang mga estudyante mahimong makabenepisyo gikan sa pagtuon sa 1 Mga Taga-Corinto 11:23–32 ug ilhon ang kamatuoran nga nalista sa ibabaw (tan-awa ang bersikulo 28). Mahimong makatabang niini ang pagpasabot nga si Pablo nagpahinumdom sa mga Taga-Corinto sa Kataposang Panihapon, diin si Jesukristo nagtukod sa sakramento sa paghandom sa Iyang sakripisyo (tan-awa ang mga bersikulo 23–27). Human maila sa mga estudyante ang kamatuoran gikan sa bersikulo 28 , mahimong ipaambit kini nga pamahayag ni Presidente Howard W. Hunter (1907–95):
Imahe
Howard W. Hunter
Akong gipangutana ang akong kaugalingon niini: “Ako bang gipahimutang ang Dios nga labaw sa tanang butang ug gituman ang tanan Niyang mga sugo?” Dayon miabot ang pagpamalandong ug tinguha sa paglambo. Ang paghimo og pakigsaad ngadto sa Ginoo nga kanunayng motuman sa Iyang mga sugo usa ka seryoso nga obligasyon, ug ang pagbag-o niana nga pakigsaad pinaagi sa pag-ambit sa sakramento sama usab ka seryoso. Ang ligdong nga mga gutlo sa paghunahuna samtang gipaambit ang sakramento importante kaayo. Kini mga gutlo sa pagsusi sa kaugalingon, pag-analisar sa kaugalingon, pag-ila sa kaugalingon—usa ka panahon sa pagpamalandong ug tinguha nga molambo.
(Howard W. Hunter, “Thoughts on the Sacrament,” Ensign, Mayo 1977, 25)
Ang mga estudyante mahimo dayon nga maghunahuna kon unsa nga mga pangutana ang ilang mapamalandongan sa sunod nga semana panahon sa sakramento aron masusi ang ilang kinabuhi. Kini nga mga pangutana mahimong ilista ngadto sa pisara.
