John’s life may have been very different had he not had the courage to leave a party one evening in Japan.
Nangandoy ka ba nga makalingkawas sa mga tintasyon nga imong giatubang? Si Apostol Pablo nitudlo og usa ka bililhon nga baroganan nga mahimong makatabang kanato kon kita mag-atubang sa tintasyon. Kini nga leksiyon gituyo aron matabangan ka nga mosalig kang Jesukristo aron mabuntog ang tintasyon.
Pagbasa sa mga tudling sa kasulatan. Adunay lain-laing mga paagi aron basahon ang mga tudling sa kasulatan diha sa klase, apil na ang pagbasa isip usa ka klase, diha sa gagmay nga mga grupo, o sa tinagsa. Tan-awa ang mga panginahanglanon ug mga abilidad sa estudyante uban sa materyal sa pagkat-on inig pili og mga paagi sa pagbasa.
Pagpangandam sa estudyante: Dapita ang mga estudyante sa pagtuon sa “1 Mga Taga-Corinto 10:1–13: Ang Dios Mohatag og Paagi aron Pagbuntog sa Tintasyon” diha sa Dali, Sunod Kanako—Alang sa mga Indibidwal ug mga Pamilya: Bag-ong Tugon 2023. Samtang sila nagtuon, mahimo nilang pamalandongan kini nga pangutana: “Unsang mga klase sa paglingkawas gikan sa tintasyon ang gihatag sa Langitnong Amahan alang kaninyo?”
Posible nga mga Kalihokan sa Pagkat-on
Tintasyon
Pagdala og usa ka magnet ug usa ka puthaw nga butang ngadto sa klase ug dapita ang mga estudyante sa paggamit kanila aron ipasabot ang konsepto sa pagsukol sa tintasyon. Pananglitan, mahimo nilang ipasabot ang importansiya sa pagpabiling layo gikan sa tintasyon ug ang kakuyaw sa hilabihan nga pagpaduol.
Imahe
Silver Spheres Gravitated Towards a Red Magnet on Blue Background
Basaha ang mosunod nga pamahayag ni Elder Ulisses Soares sa Korum sa Napulog Duha ka Apostoles o tan-awa ang bidyo nga “Pagtinguha kang Kristo sa Matag Hunahuna” gikan sa time code nga 2:44 hangtod sa 3:23, nga anaa sa ChurchofJesusChrist.org.
Imahe
Silver Spheres Gravitated Towards a Red Magnet on Blue Background
Imahe
Elder Ulisses Soares, Quorum of the Twelve Apostles official portrait.
Sa sambingay nga pagkasulti, ang pagtugyan ngadto sa tintasyon susama sa pagduol ngadto sa magnet nga may dala nga puthaw. Ang dili makita nga pwersa sa magnet mobira sa puthaw ug hugot nga motapot niini. Ang magnet mawad-an lamang og pwersa niana nga butang kon ang puthaw ipalayo gikan niini. Busa, sama nga ang magnet walay gahom sa pagpwersa sa puthaw nga layo ra niini, samtang atong suklan ang mga tintasyon, kini magkaluya og mawad-an og gahom diha sa atong pangisip ug kasingkasing ug, ingon man, sa atong mga buhat.
Diha sa imong pagtuon sa 1 Mga Taga-Corinto 10 , pamati sa mga pangaghat gikan sa Espiritu Santo nga motabang kanimo nga makahibalo unsa ang imong mabuhat aron makasukol sa tintasyon nga imong giatubang.
Usa sa mga katuyoan sa mga kasulatan mao ang pagtabang kanato nga makat-on gikan sa mga kinabuhi ug mga pagpanglimbasog sa kadtong mga nahauna (tan-awa ang 1 Mga Taga-Corinto 10:6, 11 ; Mormon 9:31). Sa natala sa 1 Mga Taga-Corinto 10 , si Pablo migamit sa ehemplo sa mga Israelita nga milabang sa Pula nga Dagat ug mipanaw sa kamingawan samtang siya mipahinumdom sa mga Taga-Corinto sa mga paagi nga ang Ginoo nag-uban sa mga Israelita diha sa ilang pagpanaw (tan-awa ang 1 Mga Taga-Corinto 10:1–4).
Matikdi unsa ang gibuhat sa Ginoo alang sa mga Israelita ug ang titulo nga gigamit sa paghulagway Kaniya sa bersikulo 4 .
Unsa ang imong makat-onan mahitungod sa Manluluwas gikan sa titulo nga gigamit ni Pablo sa bersikulo 4 ?
Bisan pa sa milagrosong mga paagi sa pagsuporta sa Ginoo sa mga Israelita, may mga panahon nga sila nagpadala sa tintasyon. Basaha ang 1 Mga Taga-Corinto 10:5–11 , nga mangita sa mga tintasyon nga maoy hinungdan nga ang mga Israelita mitalikod gikan sa ilang “espirituhanong Bato,” nga si Jesukristo.
Sa unsang mga paagi sa imong hunahuna nga ang atong mga kahimtang naparehas sa kadtong sa mga Israelita?
Unsa ang komon nga mga tintasyon nga giatubang sa kabatan-onan nga lagmit maoy hinungdan nga sila motalikod gikan sa Manluluwas?
Paghunahuna mahitungod sa mga tintasyon nga imong giatubang karon ug giunsa nila pagkaanaay potensyal aron ka motalikod gikan sa “Bato,” nga si Jesukristo. Pamalandong kon sa unsang paagi maapektohan ang imong kinabuhi kon ikaw makabuntog niining mga tintasyon.
Ang Manluluwas motabang kanato nga mabuntog ang tintasyon
Hinumdomi nga ang pagtintal dili usa ka sala apan ang pagpadala sa tintasyon mao ang sala. Basaha ang 1 Mga Taga-Corinto 10:12–14 , nga mangita sa mga baroganan nga makatabang kanimo sa pagbuntog sa tintasyon.
Unsa ang gisaad sa Dios nga Iyang buhaton aron matabangan ka nga mabuntog ang tintasyon?
Unsa nga mga pulong ug mga hugpong sa mga pulong niini nga mga bersikulo ang naghulagway unsa ang gilaoman sa Dios nga atong buhaton kon kita mag-atubang sa tintasyon?
Unsa nga mga baroganan ang imong nakit-an?
Ang mga estudyante mahimong makaila og lain-laing mga baroganan. Paggahin og panahon sa paghisgot niini nga mga baroganan ug pagpokus sa unsa ang importante ngadto sa mga estudyante. Mahimong mangutana og sunod nga mga pangutana sama sa “Unsa nga mga pulong ug mga hugpong sa mga pulong ang nakatabang ninyo sa pag-ila niana nga baroganan?” ug “Sa unsang paagi nga kanang maong baroganan nakatabang kaninyo?”
Ikaw lagmit makaila og usa ka baroganan sama sa ang Dios maghatag og usa ka paagi alang kanato aron makalingkawas sa tintasyon, apan kita gikinahanglang mopili nga ipalayo ang atoang kaugalingon gikan sa tintasyon.
Mahimong mopaambit og dugang nga propetekanhong mga pamahayag nga anaa sa “Komentaryo ug Background nga Impormasyon” nga bahin sa leksiyon. Aron matabangan ang mga estudyante nga makakita og pananglitan sa paglingkawas sa tintasyon diha sa mga kasulatan, mahimong basahon ug hisgotan ang Genesis 39:1–12 o Mateo 4:1–10 .
Sa tibuok nga mga kasulatan ug pinaagi sa Iyang modernong mga propeta, ang Manluluwas nagtudlo kanato unsaon pagbuntog sa tintasyon. Basaha ang mosunod nga mga kasulatan ug propetekanhong pamahayag, nga mangita sa unsa ang imong mabuhat aron moduol sa Manluluwas ug molingkawas sa tintasyon. Mahimo nimo silang i-link ngadto sa 1 Mga Taga-Corinto 10:12–14 .
Mga Hebreohanon 4:15–16 (Timan-i: ang pangulong pari nga gihisgotan niini nga mga bersikulo mao si Jesukristo)
Si Presidente Henry B. Eyring sa Unang Kapangulohan:
Imahe
Official Portrait of President Henry B. Eyring taken March 2018.
Ang atong hugot nga pagtuo kang Jesukristo modala nato ngadto sa paghinulsol ug ngadto sa pagsunod sa Iyang mga kasugoan. Magmasulundon kita ug mohiklin sa mga tintasyon pinaagi sa pagsunod sa mga pag-aghat sa Espiritu Santo. Moabot ang panahon nga ang atong kinaiya mausab. Kita mahisama sa usa ka gamayng bata, masulundon sa Dios ug labaw ka mahigugmaon. Kana nga kausaban, kon buhaton nato ang tanan sa paghupot niini, angay sa pagdawat sa mga gasa nga moabot pinaagi sa Espiritu Santo. Unya, kita mahimong luwas diha sa bugtong nga tinuod nga sukaranan.
(Henry B. Eyring, “Sama sa Usa ka Gamayng Bata,” Liahona, Mayo 2006, 16)
Unsa ang imong nakat-onan gikan niining mga kasulatan ug niini nga pamahayag nga nagpadasig kanimo sa pagduol ngadto sa Manluluwas aron makalingkawas sa tintasyon?
Unsa ang pipila sa mga paagi nga ang Dios maghatag og usa ka paagi sa paglingkawas sa tintasyon?
Unsa ang atong mabuhat aron maila ug magamit ang mga paglingkawas nga giandam sa Dios?
Tungod sa likas nga pagkasensitibo sa pipila ka mga tintasyon, tugoti ang mga estudyante sa pagbuhat sa mosunod nga mga pagbansay nga mag-tinagsa. Pagkahuman sa mga estudyante, mahimo nilang ipaambit sa kinatibuk-ang mga pulong kon unsa ang ilang gihimo. Ang mga estudyante kinahanglang dili mopaambit ngadto sa klase sa mga tintasyon nga ilang gipaningkamotan sa pagbuntog.
Kompletoha ang duha o labaw pa sa mosunod:
Ipasabot nga ang paghulip sa atong kaugalingong mga pangalan ug mga sitwasyon diha sa mga kasulatan makatabang kanato sa paggamit sa mga kasulatan sa atong mga kinabuhi. Dasiga ang mga estudyante sa paggamit niini nga kahanas [skill] diha sa ilang personal nga pagtuon sa kasulatan.
Isulat og balik ang 1 Mga Taga-Corinto 10:14 , nga isal-ot ang imong pangalan human sa “mga [minahal],” ug pulihi og usa ka tintasyon nga imong giatubang ang “pagsimba og dios-dios.”
Pagrekord og usa ka kasinatian diin ang Manluluwas nakatabang kanimo nga makalingkawas sa tintasyon. Sa unsang paagi nga kining kasinatian nagtabang kanimo sa paglingkawas sa imong mga kasamtangang tintasyon?
Pagrekord og pihong mga lakang nga imong buhaton aron mosalig kang Jesukristo ug mosukol sa tintasyon nga imong giatubang.
Unsa ang imong nakat-onan o nabati mahitungod sa Manluluwas diha sa imong pagtuon sa 1 Mga Taga-Corinto 10 ?
Sa unsang paagi kini makatabang kanimo nga makalingkawas sa mga pagtintal nga imong giatubang?
Komentaryo ug Background nga Impormasyon
Sa unsang paagi nga si Jesukristo ug ang Espiritu Santo makatabang kanako sa pagbuntog sa tintasyon?
Si Elder Ulisses Soares sa Korum sa Napulog Duha ka Apostoles mitudlo:
Imahe
Elder Ulisses Soares, Quorum of the Twelve Apostles official portrait.
Ang pagpakigbatok sa tintasyon nagkinahanglan og tibuok kinabuhi nga kakugi ug kamatinud-anon. Apan palihog sayri nga ang Ginoo andam nga moabag kanato sa atong personal nga mga paningkamot ug nagsaad og maanindot nga mga panalangin kon kita molahutay hangtod sa kataposan. …
Hinigugma kong mga kaigsoonan, ako mopamatuod nga kon kita mosalig sa lig-on nga sukaranan sa kaluwasan, ang Manluluwas sa atong mga kalag, … ang atong abilidad sa pagkontrol sa atong mga hunahuna madugangan pag-ayo. Ako mopaniguro kaninyo nga ang atong espiritwal nga kahamtong molambo sa magkadugang nga gikusgon, mousab sa atong mga kasingkasing, mohimo kanato nga mas sama ni Jesukristo. Dugang pa, ang impluwensiya sa Espiritu Santo mahimong mas hugot ug makanunayon diha sa atong kinabuhi. Dayon ang mga tintasyon sa kaaway, sa hinayhinay, mawad-an og gahom ibabaw kanato, moresulta sa usa ka mas malipayon ug mas putli ug mapahinungoron nga kinabuhi.
Alang niadtong kinsa, sa bisan unsa nga rason, nadala sa tintasyon ug nagpuyo sa dili matarong nga mga buhat, ako mopasalig kaninyo nga adunay paagi aron makabalik, ug adunay paglaom diha ni Kristo.
Si Elder Quentin L. Cook sa Korum sa Napulog Duha ka Apostoles mitudlo:
Imahe
Official portrait of Elder Quentin L. Cook. Called to the Quorum of the Twelve Apostles on 6 October 2007.
Ang baroganan sa mahangtorong pag-uswag mao nga ang pagpugong sa kaugalingon ug ang pagpuyo nga matarong makapalig-on sa atong abilidad sa pagbatok sa tintasyon. Tinuod kini sa espiritwal o sa temporal nga mga butang. …
Isip kabahin sa balaang plano sa Dios, gipanalanginan kita og gasa sa Espiritu Santo. … Siya usab ang tingog nga mopasidaan batok sa dautan ug tingog nga manalipod batok sa peligro. Kon magsuhid kita sa kadagatan sa kinabuhi, ang pagsunod sa mga pag-aghat sa Espiritu Santo mahinungdanon. Ang Espiritu motabang nato nga malikay sa mga tintasyon ug mga peligro, ug mohupay ug mogiya kanato latas sa mga hagit.
Si Presidente Spencer W. Kimball (1895–1985) mitudlo:
Imahe
Portrait painting of President Spencer W. Kimball.
Ang husto nga mga desisyon maoy pinakasayon nga himoon kon gipangandaman na natong daan, uban sa pinakamahinungdanong mga tumong sa hunahuna, makapawala kini sa daghang kabalaka sa [panahon sa pagdesisyon], kon kapuyon ug gitintal kita og maayo. …
Palamboa ang pagdisiplina sa kaugalingon aron dili ka na mag-usab-usab sa desisyon nga imong pagabuhaton kon mag-atubang ikaw sa mao gihapon nga pagtintal. Kinahanglan nga kausara ikaw modesisyon sa usa ka butang! …
Ang panahon sa pag-undang sa dautang mga buhat mao ang sa wala pa sila magsugod. Ang sekreto sa maayong kinabuhi anaa diha sa pagpanalipod ug pagpugong. Kadtong kinsa misunod sa dautan sa kasagaran mao kadtong mibutang sa ilang mga kaugalingon sa makuyaw nga kahimtang.
(Mga Pagtulun-an sa mga Presidente sa Simbahan: Spencer W. Kimball [2006], 137–138)
Dugang nga mga Kalihokan sa Pagkat-on
Ang inyong playbook sa paglikay sa tintasyon
Dapita ang mga estudyante sa paghisgot sa papel sa usa ka playbook alang sa usa ka grupo sa isports. Hangyoa ang mga estudyante sa paghunahuna mahitungod sa mga tintasyon nga ilang giatubang samtang ilang tan-awon ang “Basahon sa mga taktika ug mga angayang buhaton [Playbook] sa Imong Pagkapari” gikan sa time code nga 3:50 hangtod sa 5:59, anaa sa ChurchofJesusChrist.org. Sa kini nga bidyo, si Elder Gary E. Stevenson sa korum sa Napulog Duha ka Apostoles naghisgot og mga paagi nga kita makasukol sa tintasyon.
Human sa bidyo, mahimong hatagan ang mga estudyante og oras sa pagmugna og ilang kaugalingong basahon sa mga taktika ug mga angayang buhaton [playbook] ug plano alang sa pagsukol sa tintasyon.